Kulturë

Çfarë shoku je – sipas shenjave të Horoskopit

Ç’lloj shoku je ti në grupin tënd, nisur nga shenja.

Published

5 years ago

July 8, 2021

Betim Gashi

Dashi: Miku që bën mblesëri

Je shumë i shoqërueshëm dhe i njeh mirë njerëzit. Shumë miq të pyesin ty të parin nëse të pëlqen i dashuri apo e dashura e re, falë intuitës tënde të pagabueshme dhe komunikimit troç. Përveç kësaj, je shpirti i festës! Duke qenë se njeh “dreq e bir”, ata që janë më të ndrojtur vijnë tek ty që t’i ndihmosh, por ke edhe shokë që janë po kaq të shoqërueshëm sa ti. Di si të bësh bashkë edhe njerëzit që s’kanë lidhje me njëri-tjetrin. Prandaj je njeriu të cilit duhet t’i blejnë këpucë sepse herët apo vonë, do ta martosh ndonjë çift.

Demi: Miku për rrezik

Je një njeri aq i besueshëm, sa je i pari që duan të kenë afër kur kanë probleme. Ty të besojnë sekretet më të thella dhe ti je një thesar i vërtetë për ta, sepse di si t’i dëgjosh dhe t’i ndihmosh. Megjithatë ti vetë nuk u beson menjëherë: të duhet ca kohë sa t’u hapesh, por nëse e bën, janë përjetë shokët e tu. Ndonjëherë të duket vetja shumë “kot” se nuk je shpirti i festës, por kjo nuk të heq aspak pikë. Miqtë e tu janë miq të vërtetë dhe dinë çfarë të vlerësojnë tek ti.

Binjakët: Miku “lule më lule”

Bën miq menjëherë, sa hap e mbyll sytë, qofshin ata të këqinj apo të mirë. Por lodhesh shpejt prej tyre dhe nuk është se e kanë gjithmonë fajin ata, sepse mund të të mërziten për vogëlsira. Nuk të pëlqen të rrish vetëm, ndaj zakonisht je i rrethuar nga një grup njerëzish dhe përpiqesh gjithmonë të shmangësh të qenit vetëm, çfarëdo të kesh për të bërë. Edhe pse me të tjerët ke një marrëdhënie “fik e ndiz”, ke grupin tënd të miqve të afërt që nuk i braktis. Si njeri aventurier, skuadra jote vjen tek ti sa herë ka ca lekë për të prishur për qejf.

Gaforrja: Miku i thellë

Si “mami” i gjithë grupit që je, IQ-ja jote emocionale është ekstremisht e lartë. U ke qëndruar pranë miqve të tu mes problemeve më të ndërlikuara dhe je i bekuar me dhuntinë e intuitës së paparë. Kjo të bën t’i kuptosh thellësisht problemet e të tjerëve dhe ndonjëherë i përjeton si të jenë të tuat. Të duket sikur e gjithë pesha e botës bie mbi ty, një prej shkaktarëve kryesorë të humorit super të luhatshëm të Gaforreve. Kur kanë nevojë për mbështetje emocionale, të gjithë e dinë kujt t’i drejtohen, çka është ironike pasi ti vetë nuk para hapesh për ndjenjat.

Luani: Miku shpirt i festës!

Si i lindur për të qenë në qendër të vëmendjes, Luani nuk e ka të vështirë të bëjë miq të rinj. E në fakt, nuk para ka njerëz që s’u pëlqen që në takimin e parë. Megjithatë prirja për të qenë në qendër të vëmendjes mund t’i bëjë miqtë e tu të ngushtë të ndihen të vegjël dhe të parëndësishëm kur janë me ty. Ironikisht, ti nuk je aq egoist sa të bëjnë thjesht ndihesh më mirë kur flet për veten se të thuash diçka që mund ta bëjë tjetrin të mos ndihet rehat. Ti thjesht zgjedh mënyrën më të mirë për të dy.

Virgjëresha: Miku vetëflijues

Ti je një lloj martiri, Virgjëreshë. Përpiqesh më shumë se ç’duhet edhe nëse marrëdhënia nuk është e barabartë, edhe duke i nënvlerësuar përpjekiet e tua që tjetri të mos e marrë vesh sa ke bërë në të vërtetë për të. Për fatin tënd të mirë, 2-3 miq të ngushtë që të njohin mirë të vlerësojnë shumë, ashtu siç e meriton. Ti parapëlqen të kesh pak shokë përsa janë të vërtetë, kurse një rreth i madh shoqëror të krijon ankth. Je ndoshta shenja që e ka më të vështirë të largohet nga marrëdhëniet e sëmura, pikërisht sepse nuk do të flakësh në erë gjithçka ke bërë. Por ndonjëherë është më mirë: ata që nuk e vlerësojnë çfarë bën ti, nuk kanë për ta vlerësuar kurrë.

Peshorja: Miku i drejtë

Je një krijesë shumë e shoqërueshme, Peshore, sepse nuk para ka situata që nuk të pëlqejnë. Nuk ndihesh ndonjëherë në siklet në një dhomë plot me njerëz dhe të gjithë bien pre e sharmit tënd të lindur. Mund të jesh edhe pak martir: në përpjekje për të qenë sa më diplomatik, nuk para u bie shkurt gjërave dhe nuk ke një opinion të prerë. Këtë njerëzit mund ta lexojnë si paqëndrueshmëri, por në të vërtetë, ti thjesht e kalon kohën duke peshuar anët negative dhe pozitive të gjithçkaje.

Akrepi: Miku që të mbron

Ti je truproja i miqve të tu, ai që i ruan nga kushdo dhe s’e mendon dy herë përpara se t’ua tregojë vendin nëse ndonjëri guxon të ngatërrohet me miqtë e tu. Je një ndër njerëzit më besnikë dhe ata që janë me fat sa për ta kuptuar, e respektojnë dhe njëherësh e kanë frikë besnikërinë dhe pasionin tënd. Je gati t’ia nxjerrësh sytë ish-it që e ka lënduar një prej miqve të tu. E kupton se ndoshta do të duhej të bëje një hap prapa, veçse ti dhe miqtë e tu e dini shumë mirë se nëse ka karma në univers, ai je ti.

Shigjetari: Miku që të kthen humorin

Je super miqësor, aq miqësor sa shumë njerëz të jashtëm e marrin karizmën tënde për mungesë thellësie. Pak e dinë sa njeri i ndjeshëm je. Herë pas here të duhet t’ua kujtosh miqve sa të rëndësishëm janë për ty, sepse shpesh mendojnë se të kanë shokë vetëm për kohë të mira. Madje as miqtë e tu më të ngushtë nuk e kuptojnë se i konsideron miq të ngushtë, sepse është e vështirë të kuptohet me ty. Gjithashtu je shumë bujar dhe të ishte për ty, të gjithë do të ishin të lumtur dhe të kënaqur. Nuk je cinik, je thjesht i vetëdijshëm për realitetin, qoftë për atë çfarë pret nga të tjerët ashtu edhe për atë çfarë u premton atyre.

Bricjapi: Prijësi i grupit të miqve

Zakonisht ti je udhëheqësi de-facto i grupit tënd shoqëror. Tmerrësisht i përgjegjshëm, shumë i pavarur. Kujdesesh njësoj si për ta edhe për veten. Ndoshta nuk e kupton, por miqtë e tu vërtet e vlerësojnë shumë mendimin tënd dhe mbështeten tek ti. Duke pasur kaq shumë vetëbesim kur flet, i jep shumë peshë mendimit. Ndonjëherë edhe kur e thua diçka me shaka, mund të kuptohet si gjykim i brendshëm. Sigurisht, nuk duhet ta ndryshosh veten, por mbaj mend se fjalët e tua kanë shumë ndikim tek të tjerët.

Ujori: Miku që të dëgjon

Je miku mendimin e të cilit të tjerët mezi e presin sepse nuk kënaqesh me pak. Mund të jesh pak i largët dhe të dukesh i painteresuar, por ata që të njohin më mirë, e dinë se je një mik shumë besnik. Natyra jote kokëfortë mund t’i trembë ndonjëherë, por në fakt, je një dëgjues shumë i mirë dhe shumë empatik në bisedë me miqtë. Është ironike se me gjithë natyrën e veçantë dhe të vështirë, je në fakt një prej miqve më të përkujdesur që dikush mund të ketë.

Peshqit: Miku i mençur

Je ndërmjetësi i gjithë konflikteve në shoqëri. Duke qenë shumë i ndjeshëm dhe duke besuar se ka mirësi tek kushdo, të gjithë të besojnë dhe të ndodh shpesh të marrësh një rol neutral, si ai që i zbut gjërat. Je shumë i matur dhe miqtë t’i besojnë problemet e tyre më të fshehta, sepse i kupton shumë mirë dhe mund t’u thuash të vërtetën që s’ia pranojnë dot vetes. Je shumë i mirë me fjalët dhe çdo përvojë të ka bërë më të mençur, ndaj je një ndër shtyllat e shoqërisë.

Burimi: Cosmopolitan

Lajmet

Matura Shtetërore 2026: Matematika me rezultatin më të ulët mesatar

Published

3 days ago

September 3, 2026

UBT News

Ministria e Arsimit dhe Shkencës ka publikuar rezultatet e afatit të dytë të Provimit të Maturës Shtetërore 2026, pas përfundimit të procesit të administrimit, vlerësimit dhe përpunimit të të dhënave.

Në këtë afat provimit iu nënshtruan gjithsej 4,433 kandidatë, ndërsa 2,444 prej tyre e kaluan me sukses, që përbën 55.1 për qind të numrit të përgjithshëm të kandidatëve. Të dhënat janë konfirmuar edhe në njoftimin zyrtar të ministrisë.

Arritshmëria mesatare e përgjithshme në test ishte 43.2 pikë.

Sipas lëndëve, rezultatet mesatare ishin:

Gjuhë amtare: 49.3 pikë

Gjuhë angleze: 44.1 pikë

Matematikë: 36.4 pikë

Lënda zgjedhore: 42.9 pikë

Rezultati më i lartë mesatar është shënuar në Gjuhën amtare, me 49.3 pikë, ndërsa rezultati më i ulët në Matematikë, me 36.4 pikë.

Gjatë administrimit të provimit, 18 kandidatë janë larguar nga testi për shkak të mosrespektimit të rregullave dhe procedurave të përcaktuara për administrimin e Provimit të Maturës Shtetërore.

Ministria e Arsimit dhe Shkencës ka falënderuar të gjithë personat e angazhuar në organizimin dhe administrimin e provimit për kontributin në mbarëvajtjen e procesit./A.K/

Lajmet

“Jetimët” nga Prishtina drejt Londrës dhe skenave evropiane

Published

3 days ago

September 3, 2026

UBT News

Shfaqja teatrore, një bashkëprodhim artistik Shqipëri–Kosovë, vjen më 7 shtator në Teatrin Dodona, ndërsa më 12 shtator prezantohet në Londër.

Shfaqja teatrore “Jetimët”, një produksion i realizuar përmes bashkëpunimit artistik mes Kosovës dhe Shqipërisë, do të ngjitet në skenën e Teatrit Dodona në Prishtinë, më 7 shtator 2026, ndërsa pesë ditë më vonë, më 12 shtator, do të prezantohet para publikut në Londër, në King Alfred Phoenix Theatre.

“Jetimët” është një tragjikomedi e fuqishme dhe emocionuese që sjell në skenë historinë e tre njerëzve të formësuar nga vetmia, mungesa dhe nevoja e thellë njerëzore për t’u dashur. Një takim i papritur i vendos ata përballë sekreteve, plagëve dhe të vërtetave që për një kohë të gjatë i kanë mbajtur të fshehura.

Duke ndërthurur humorin e zi, tensionin dhe momente thellësisht prekëse, shfaqja lëviz vazhdimisht mes së qeshurës dhe dhimbjes, duke ngritur pyetje mbi familjen, braktisjen, dashurinë dhe nevojën njerëzore për të pasur dikë që mund ta quajmë “tonin”.

Një tragjikomedi që të bën të qeshësh, të shqetëson dhe të fton të reflektosh, “Jetimët” vjen si një bashkëpunim artistik Shqipëri–Kosovë dhe bashkon në skenë artistë nga të dyja vendet.

Regjia e shfaqjes është e Ilir Bokshit, ndërsa në role interpretojnë Adrian Morina, Ylber Bardhi dhe Ledion Zoi. Asistent regjisor është Butrint Pasha, skenografinë dhe kostumet i ka realizuar Petrit Bakalli, muzika është e Butrint Pashës, ndërsa përkthimi është realizuar nga Artur Lena.

Producentë të projektit janë A&M Arts and Films dhe Teatri Dodona.

Një rol të rëndësishëm në realizimin e këtij projekti ka pasur mbështetja e Ministrisë së Kulturës së Republikës së Shqipërisë, në kuadër të projektit CultAlb. Ekipi realizues shpreh mirënjohjen për këtë mbështetje, e cila kontribuon në forcimin e bashkëpunimit kulturor dhe artistik ndërmjet Kosovës dhe Shqipërisë.

Bashkëpunime të tilla ndërmjet institucioneve dhe artistëve të të dyja vendeve krijojnë mundësi të reja për shkëmbim kulturor dhe për prezantimin e krijimtarisë shqiptare në skenat ndërkombëtare.

Pas prezantimeve në Prishtinë dhe Londër, shfaqja “Jetimët” pritet të vazhdojë rrugëtimin e saj ndërkombëtar, me prezantime të planifikuara në Greqi, Maqedoninë e Veriut dhe Shqipëri, si dhe me pjesëmarrje në festivale dhe aktivitete të ndryshme teatrore në rajon dhe Evropë.

Përmes këtij projekti, “Jetimët” synon të sjellë para publikut një vepër të rëndësishme të dramaturgjisë bashkëkohore, por edhe të dëshmojë potencialin e bashkëpunimit artistik Shqipëri–Kosovë dhe kontributin e artistëve shqiptarë në skenat ndërkombëtare./RTK/A.K/

Lajmet

Ndahet nga jeta historiani dhe publicisti Daut Dauti

Published

4 days ago

September 2, 2026

UBT News

Historiani, gazetari, hulumtuesi dhe publicisti i njohur nga Kosova, Dr. Daut Dauti, ka ndërruar jetë në Londër në orët e para të mëngjesit, pas një sëmundjeje të rëndë me të cilën ishte përballur për rreth dy vjet.

Dauti lindi në vitin 1960 në Kokaj të Gjilanit dhe gjatë karrierës së tij la gjurmë në gazetari, historiografi dhe në studimet për Kosovën dhe çështjen shqiptare.

Ai kreu studimet në Fakultetin Juridik të Universitetit të Prishtinës, ndërsa studimet pasuniversitare i vazhdoi në Thames Valley University në Londër, në fushën e Bashkimit Evropian.

Karrierën në gazetari e nisi në gazetën studentore “Bota e Re”, ndërsa më pas vazhdoi në revistën “Zëri”. Nga viti 1994 deri më 1999 ishte korrespondent i saj në Londër, ndërsa gjatë viteve 1999–2001 punoi si redaktor në Institute for War and Peace Reporting (IWPR).

Në vitet 2000–2002, Dauti shërbeu si sekretar i përgjithshëm i Asociacionit të Gazetarëve të Kosovës dhe ishte anëtar i pavarur i Komisionit Qendror të Zgjedhjeve.

Ai ka ushtruar edhe detyrën e këshilltarit për media dhe zëdhënësit të Qeverisë së Kosovës, të udhëhequr nga kryeministri Bajram Kosumi, ndërsa në Londër ishte i angazhuar edhe me organizata ndërkombëtare.

Me veprimtarinë e tij shumëvjeçare në gazetari, histori dhe publicistikë, Daut Dauti mbetet një nga emrat e njohur të jetës intelektuale dhe mediatike shqiptare në Kosovë./A.K/

Kulturë

Nga Labëria në Hollywood, fyelli shqiptar rikthehet te brezi i ri

Published

4 days ago

September 2, 2026

UBTNews

Tingujt tradicionalë të Labërisë po marrin një jehonë të re, jo vetëm në skenën ndërkombëtare të kinemasë, por edhe te brezi i ri shqiptar. Mjeshtri i instrumenteve popullore, Vendim Kapaj, për të tretin vit radhazi do të zhvillojë në Vlorë një kurs falas për mësimin e fyellit dhe instrumenteve të tjera tradicionale.

Nisma synon t’u krijojë të rinjve dhe të gjithë të apasionuarve pas muzikës popullore mundësinë të njihen nga afër me një prej pasurive më të veçanta të trashëgimisë muzikore shqiptare.

Në një prononcim për ATSH-në, Kapaj bëri të ditur se interesi për kursin është rritur ndjeshëm këtë vit. Përveç të rinjve nga Vlora, Tepelena, Kurveleshi dhe zonat përreth, në kurs ka të interesuar edhe nga Tirana.

“Ky është viti i tretë radhazi që ofroj kursin falas të fyellit. Interesi këtë vit ka qenë edhe më i madh. Kam pasur të interesuar edhe nga Tirana, përfshirë disa vajza, ndërsa pjesa më e madhe janë të rinj nga Tepelena, Vlora, Kurveleshi dhe zonat përreth”, u shpreh Kapaj.

Kursi do të zhvillohet nga shtatori i vitit 2026 deri në korrik të vitit 2027. Krahas fyellit, pjesëmarrësit do të kenë mundësi të mësojnë edhe për instrumente të tjera tradicionale, si cylja dyjare, bilbili, xhamba, pipizana, si dhe instrumente të tjera të muzikës popullore shqiptare.

Interesi i shtuar për këtë nismë lidhet edhe me një eksperiencë të veçantë të Kapajt në kinematografinë ndërkombëtare. Mjeshtri shqiptar është përfshirë si solist në fyell në kolonën zanore të filmit “The Odyssey”, me regji të Christopher Nolan dhe muzikë të kompozitorit Ludwig Göransson.

Pjesëmarrja në këtë produksion ka bërë që tingulli karakteristik i fyellit shqiptar të dëgjohet edhe përtej kufijve, duke i dhënë një tjetër dimension traditës muzikore të jugut të Shqipërisë.

“Jehona që ka pasur emri im nga pjesëmarrja në filmin ‘The Odyssey’ ka ndikuar edhe në rritjen e interesit për kursin. Është kënaqësi që pas kësaj vëmendjeje ndërkombëtare, të shohim të rinj që duan të mësojnë dhe të vazhdojnë këtë traditë”, tha Kapaj për ATSH-në.

Për Kapajn, kursi falas është më shumë se një aktivitet muzikor. Ai synon të jetë një mënyrë konkrete për ruajtjen dhe përcjelljen e instrumenteve, repertorit dhe traditës së muzikës labe te brezat e rinj.

Nga Labëria në skenën ndërkombëtare të kinemasë dhe tashmë sërish te të rinjtë shqiptarë, fyelli vijon rrugëtimin e tij si një prej instrumenteve më karakteristike të muzikës popullore shqiptare, duke dëshmuar se tradita mund të ruhet dhe të marrë jetë të re edhe përmes brezave të rinj.

Foto: Kosovapress

D.L