Presidenti Donald Trump njoftoi se Shtetet e Bashkuara do të nisin të hënën një operacion për nxjerrjen e anijeve të bllokuara nga Ngushtica e Hormuzit. Përmes një mesazhi në rrjetet sociale, Trump deklaroi se SHBA-ja do t’i udhëheqë këto anije në mënyrë të sigurt jashtë rrugëve të kufizuara ujore, si një “gjest humanitar” për të mirën e rajonit dhe ekonomisë globale.
Ky operacion, i pagëzuar si “Project Freedom”, vjen në një kohë tensionesh të larta, pasi Irani ka kufizuar trafikun detar që nga fillimi i luftës në shkurt, ndërsa SHBA-ja ka vendosur një bllokadë ndaj porteve iraniane. Trump paralajmëroi se çdo pengesë ndaj këtij procesi do të “trajtohet me forcë”.
Në anën tjetër, reagimi nga Teherani ka qenë i ashpër. Ligjvënësi iranian Ebrahim Azizi deklaroi se çdo ndërhyrje amerikane do të konsiderohet shkelje e armëpushimit. Pavarësisht toneve kërcënuese, Trump la të kuptohet se po zhvillohen bisedime “shumë pozitive” me palën iraniane, të cilat sipas tij mund të sjellin një rezultat të favorshëm për të gjitha palët, megjithëse nuk dha detaje se si do të koordinohet ky bashkëpunim në terren.
