Lajmet

Qeriqi: Në Izbicë dëshmohet se Serbia ka qenë e vendosur të shfarosë popullin shqiptar

Për krimet e kryera, Qeriqi tha se duhet të gjykohet dikush.

Publikuar

Sot, u bënë homazhe në kompleksin memorial në Izbicë të Skenderajt, në 24-vjetorin e masakrës, ku janë vrarë 147 persona, gjashtë prej të cilëve ende të zhdukur.

Xhevdet Qeriqi nga Organizatat e dala nga lufta u shpreh se në Izbicë dëshmohet që Serbia ka dashur të shfarosë qytetarët e Kosovës.

Për krimet e kryera, Qeriqi tha se duhet të gjykohet dikush dhe jo që padrejtësisht të gjykohen luftëtarët e Ushtrisë Çlirimtare të Kosovës.

“Këtu dëshmohet që Serbia ka qenë e vendosur që me çdo çmim ta çfarosë popullin shqiptar. Është një vend i sakrificës, i vuajtjes, një vend ku janë masakruar edhe fëmijë deri në moshën njëvjeçare, pleq, fëmijë, gra. Kështu që, për këtë krim duhet të gjykohet dikush, e jo padrejtësisht të akuzohen e gjykohen luftëtarët e UÇK-së”, u shpreh ai.

Qeriqi shpreson që shumë shpejt ish-krerët e UÇK-së të kthehen në Kosovë.

“Normalisht duke pasur parasysh se vet ishin udhëheqës të luftës së UÇK-së edhe sot jemi të lirë falë sakrificës, angazhimit të tyre bashkë me shumë luftëtarë të UÇK-së kemi ardhur në këtë ditë. Është me të vërtetë një zbehje, por do të shpresojmë dhe do të besojmë që shumë shpejt edhe ata do t’i kthehen Kosovës të lirë”, tha ai.

Ndërsa, deputetja Ganimete Musliu u shpreh se masakra e Izbicës është dëshmi e gjallë se çka ka ndodhur aty në vitin 1999.

Ajo potencoi se Kosova duhet të jetë krenare me të kaluarën e saj.

“Sot jemi këtu për të kujtuar 147 të rënët në Izbicë. Kjo është një dëshmi e fortë dhe një fakt i gjallë se çka ka ndodh këtu në vitin 1999… Ende kemi varre të zbrazëta, që familjarët i presin më të dashurit e tyre. Askush s’ka dhanë përgjigje për ta. Prandaj, populli i Kosovës duhet të jetë krenar me të kaluarën e vet. Institucionet e Kosovës duhet të jenë të kujdesshëm në veprimet që bëjnë, në vendimet që marrin, sepse ky vend ka dhanë shumë, liria ka kushtu shumë dhe ne kemi obligim që gjakun që është derdh për këtë vend mos ta lajmë asnjëherë të jetë gjak i humbur”, u shpreh ajo.

Musliu tha rëndesa e dhimbjes është dhumë e madhe pasi ish-krerët e UÇK-së gjenden në Hagë. Ajo tha se ata kanë bërë përpjekje maratonike për të mbrojtur popullsinë civile nga agresori serb dhe për të ndalur gjenocidin në Kosovë.

“Është e tmerrshme kur i sheh çlirimtarët në Hagë, ndërsa kriminelët të lirë nëpër Serbi dhe është e pafalashme që Gjykata Speciale sot i dënon çlirimtarët në emër të popullit, në emër të cilit popull, në emër të kujt i dënon? Cili popull i dënon çlirimtarët e vet. Prandaj, konsideroj që bota të reflektojë mbi atë se çka ka ndodhë”, tha ndër të tjera ajo.

Sot, janë bërë 24 vjet nga masakra e Izbicës, ku më 28 mars 1999, forcat policore dhe ushtarake serbe, pas rrethimit të mijëra civilëve të fshatit Izbicë dhe vendbanimeve përreth, kanë veçuar 147 burra të rinj dhe pleq, të cilët i kanë vrarë dhe masakruan, ndërsa pjesën tjetër e kanë dëbuar jashtë Kosovës.

Masakra e Izbicës hyn në radhën e krimeve më të rënda të shtetit të Serbisë, ku vrasja masive, përdhosja e trupave dhe varrimi i tyre, përmes pamjeve satelitore është bërë lajm botëror. 24 vjet pas këtij krimi askush nga autorët dhe ekzekutuesit serbë nuk ka dalë para drejtësisë vendore dhe asaj ndërkombëtare.

Lajmet

Sot përfundon periudha shtesë e regjistrimit të popullsisë

Publikuar

nga

Sot përfundon regjistrimi i popullsisë edhe për komunat në Kosovë të cilat kishin kërkuar shtyrjen e afatit për një javë në mënyrë që të përmbyllin suksesshëm këtë proces.

Afati i regjistrimit të popullsisë ishte nga 5 prilli deri më 17 maj, ndërsa me kërkesë në disa komuna është shtyrë edhe për një javë, deri më 24 maj.

Shtyrja e afatit ishte bërë pasi mund të kishte individë, ekonomi familjare që nuk ishin regjistruar, si në Dragash, Prishtinë, Prizren, Drenas, Fushë Kosovë, Skenderaj, Obiliq, Ferizaj, Shtërpcë, Kaçanik dhe Gjakovë.

Edhe në katër komunat e Veriut, në objektet e komunave zyrat kanë qenë të hapura nga ora 09:00-18:00.

Në periudhën sa është shtyrë regjistrimi, intervistat janë zhvilluar nga stafi i Agjencisë së Statistikave të Kosovës (ASK).

Ndryshe, nga këtu regjistrimi i Diasporës do të vazhdojë të bëhet përmes Platformës online eDiapsora (https://ediaspora.rks-gov.net/) deri më 31 gusht 2024.

Pas javës së parë të regjistrimit sipas të dhënave nga Agjencia e Statistikave të Kosovës (ASK), ishin regjistruar mbi 1 milion e 420 mijë banorë.

Referuar po kësaj periudhe kohore për diasporën ishte kaluar numri mbi 400 mijë që janë regjistruar në formën online.

Sipas zyrtarëve të ASK-së kualiteti i të dhënave në këtë regjistrim do të jetë shumë më i mirë se në vitin 2011.

Drejtues të Agjencisë së Statistikave të Kosovës dhe njohës të ekonomisë thonë se vendi ka nevojë për evidencë të mirëfilltë të qytetarëve dhe nga ky regjistrim presin të ketë përmirësim në aspektin ekonomik në vend, hartim të politikave më efektive në investime e po ashtu edhe realizim të të drejtave të qytetareve.

Vazhdo të lexosh

Art

​Zbulohet piktura e vjedhur me vlerë 5 milionë euro në Spanjë

Publikuar

nga

Policia spanjolle njoftoi sot se gjeti një pikturë të vjedhur të piktorit irlandez-britanik Francis Bacon me vlerë 5 milionë euro.

Piktura u gjet në Madrid rreth nëntë vjet pasi u vodh për herë të parë nga një shtëpi private në kryeqytetin spanjoll.

Kjo pikturë ishte një nga pesë veprat e hequra nga banesa e bankierit spanjoll Jose Capelo, një mik i ngushtë i piktorit, në vitin 2015. Tri piktura u gjetën në vitin 2017.

Tani, kjo pikturë e katërt që do të rikthehet është një portret i Capelo-s që është pikturuar në vitin 1989.

Edhe pse hetimi ka vazhduar që nga viti 2015, policia tha në një deklaratë se ata kapën gjurmët e pikturës shkurtin e kaluar pasi arrestuan dy persona të akuzuar për marrjen e dy pikturave të mbetura të vjedhura të Francis Bacon.

Në total janë arrestuar 16 persona që dyshohet se janë përfshirë në grabitjen. Por hetimi mbetet i hapur, pasi piktura e mbetur e vjedhur mbetet në tregun e zi. Policia tha se ata po i drejtohen shtetasve spanjollë që kanë marrëdhënie me grupet e krimit të organizuar nga Evropa Lindore.

Francis Bacon njihet si një nga gjigantët e artit bashkëkohor, i njohur për imazhet e tij të papërpunuara me fokus brutalitetin. Ai vdiq në moshën 82-vjeçare nga një atak në zemër teksa po pushonte në Madrid. /AA

Vazhdo të lexosh

Lajmet

Sot mbahet seanca e rigjykimit për vrasjen e Marigona Osmanit

Publikuar

nga

Sot do të mbahet seanca e rigjykimit për vrasjen e Marigona Osmanit.

Seanca gjyqësore ndaj të akuzuarve Dardan Krivaqa dhe Arbër Sejdiu, është shtyrë për sot me kërkesë të mbrojtësve të tyre.

Trupi gjykues ka planifikuar që nga ora 10:00 të fillojë seanca gjyqësore në çështjen penale kundër të akuzuarve.

Vazhdo të lexosh

Lajmet

​Hovenier: Qeveria e Kosovës të lëvizë përpara me Asociacionin

Publikuar

nga

Ambasadori amerikan në Prishtinë, Jeff Hovenier, tha se shteti i tij beson se për Kosovën është urgjente që të lëvizë përpara me dërgimin në Gjykatën Kushtetuese të një draft-statuti për Asociacionin e komunave me shumicë serbe.

Gjatë një interviste për transmetuesin publik të Kosovës, Hovenier tha se Kosova ka shumë miq që duan ta shohin shtetin pjesë të organizatës të Këshillit të Evropës dhe të shfaqë përkushtimin për të drejtat e pakicave dhe të drejtave të njeriut.

“Një nga mënyrat më të dukshme për të bërë këtë e që e kemi rekomanduar të gjithë, është ndërmarrja e këtij hapi të rëndësishëm të dërgimit të këtij drafti të BE-së të Asociacionit të komunave me shumicë serbe në Gjykatën Kushtetuese. Na duket se kjo është një gjë e rëndësishme për Kosovën, pa iu referuar Këshillit të Evropës, sepse do të ndihmojë për të siguruar mbrojtje të duhur për komunitetin etnik serb në Kosovë, por gjithashtu zhbllokon dhe hap këtë rrugëtimin në të cilin duam ta shohim Kosovën”, tha Hovenier.

Kosova dështoi të futej në agjendën e takimit të Komitetit të Ministrave në Këshillin e Evropës të mbajtur në mes të majit në Strasburg, pasi shtetit iu vendos kusht që të lëvizte përpara me themelimin e Asociacionit të komunave me shumicë serbe.

Një ditë para takimit në Strasburg, kryediplomatja e Kosovës, Donika Gërvalla, përmes një letre njoftoi Këshillin e Evropës se Kosova synon që të hartojë një draft-statut për Asociacionin dhe ta dërgojë në Kushtetuese deri në fund të majit, në këmbim të pranimit të shtetit në këtë organizatë për të drejtat e njeriut.

Por, në letrën e Gërvallës thuhej se draft-statuti do të frymëzohej nga një draft i prezantuar kohë më parë nga organizata gjermane Friedrich-Ebert-Stiftung, e jo draft-statuti që iu paraqit Kosovës dhe Serbisë nga BE-ja tetorin e vitit të kaluar.

Hovenier tha se me sa e kupton ai, kjo ofertë e Gërvallës më nuk është e vlefshme, ndërkaq sa i përket se çfarë draft-statuti duhet Kosova të dërgojë në Kushtetuese, ambasadori amerikan tha:

“Lidhur me pyetjen se cili draft dhe si dërgohet më tej, kjo është çështje e rëndësishme dhe padyshim që është një zgjedhje sovrane e Qeverisë së Kosovës se çfarë statuti zgjedh të hartojë dhe si e çfarë do të kërkojë të miratojë apo dërgojë në Gjykatën Kushtetuese. Por, do të them se drafti i ofruar nga Bashkimi Evropian – ky draft statut për Asociacionin e komunave me shumicë serbe – ofron një sërë përparësish unike dhe të rëndësishme”.

Vitin e kaluar, Bashkimi Evropian, si ndërmjetës i dialogut mes Kosovës dhe Serbisë, i prezantoi palëve një draft-statut për Asociacionin, i cili u pranua në parim.

Po vitin e kaluar, Kosova dhe Serbia arritën një marrëveshje për normalizimin e raporteve, që parasheh edhe sigurimin e një niveli të vetëmenaxhimit të komunitetit serb dhe zbatimin e të gjitha marrëveshjeve të arritura në dialog.

Në kuadër të dialogut që ndërmjetësohet nga BE-ja, Kosova dhe Serbia kanë arritur dy marrëveshje për Asociacionin: më 2013 dhe 2015.

Por, Gjykata Kushtetuese tha më 2015 se Marrëveshja mbi parimet për themelimin e Asociacionin nuk ishte në harmoni të plotë me aktin më të lartë juridik të shtetit. Harmonizimi, sipas Kushtetueses, mund të bëhet përmes akteve nënligjore.

Megjithatë, Kosova deri më tani nuk ka ndërmarrë hapa drejt themelimit të tij.

Qeveria e Kosovës është shprehur kundër një asociacioni njëetnik.

Vazhdo të lexosh

Të kërkuara