Përmes fotografive dhe dokumenteve të ndryshme, është prezantuar periudha e rezistencës paqësore në Kosovë e deri te shtetndërtimi.
Ekspozita “Rezistenca paqësore dhe shtetndërtimi 1989-1999″, e autorit Shkumbin Brestovci, po qëndron e hapur në muzeun “Shtëpia e Pavarësisë Dr.Ibrahim Rugova” në Prishtinë.
Në ndërtesën e këtij muzeu, që më herët ishte shtëpi e Lidhjes së Shkrimtarëve të Kosovës, janë paraqitur fotografi të ndryshme, që përshkruajnë ngjarjet që ndodhën në Kosovë nga viti 1989 deri më 1999.
Përmes kësaj ekspozite, autori thotë se tregohen fillimet e rezistencës së organizuar, pastaj rezistenca paqësore, shkollimi paralel, krimet e kryera nga forcat serbe si dhe ngjarje tjera.
Aty janë edhe fotografitë nga pluralizmi politik, fshirja e identitetit kur policët dhe ushtarët serbë ua morën dokumentet e identifikimit shqiptarëve të Kosovës.
Fotografitë po ashtu shfaqin bilancin e luftës, shkatërrimin e shtëpive, e të tjera.
“Është një tregim i asaj çka ka ndodhur në këtë periudhë, por natyrisht i kam shtuar edhe disa elemente të tjera, duke pasur parasysh se aty vijnë edhe njerëz të huaj që nuk janë të njoftuar me kontekstin historik”, thotë autori i ekspozitës.
Brestovci thotë se me këtë ekspozitë ka dashur që të tregohet sfondi historik i ngjarjeve të zhvilluara në atë periudhë.
“Muzeu i dedikohet asaj periudhe kohore. Ka qenë pikërisht dedikimi i presidentit, Ibrahim Rugova dhe i institucioneve kulturore, që ai muze t’i dedikohet asaj periudhe”, thotë ai.
Ekspozita shfaq edhe fotografi të kohës të institucioneve paralele shqiptare dhe serbe.
Po ashtu, ka edhe dëshmi të ndërkombëtarizimit të çështjes së Kosovës.
“Ka pasur një mosnjohje dhe një injorim nga bashkësia ndërkombëtare për Kosovën në atë kohë. Por, rezistenca kosovare me një ngulm të madhe e ka ndërruar atë opinion”, tha Brestovci.
Përpjekjet e kosovarëve dhe popullatës shumicë për liri datojnë për një shekull, përderisa përpjekjet për krijimin e një shteti të pavarur datojnë për një kohë të gjatë, por ato kanë marrë forma më konkrete të organizimit nga fundi i viteve të 80-ta dhe fillimi i viteve të 90-ta, atëherë, kur edhe filloi shpërbërja e ish-Jugosllavisë.
Madje, edhe vetë shpërbërja e ish-Jugosllavisë vlerësohet se filloi në Kosovë.
Vitet 1988-89 shënuan protesta masive të shqiptarëve kundër politikës represive të Serbisë ndaj Kosovës, që kulmoi me suprimimin e autonomisë, që Kosova gëzonte në ish-Jugosllavi.
Muaji shkurt i vitit 1989 u karakterizua me grevën e minatorëve të kompleksit “Trepça”, në mbrojtje të pozitës kushtetuese të Kosovës.
Greva e minatorëve besohet se lëkundi themelet e ish-Jugosllavisë.
Më 23 mars 1989, në Kuvendin e Kosovës, në kundërshtim me vullnetin e qytetarëve, ndryshohet Kushtetuta e vitit 1974, me çka suprimohet autonomia e Kosovës në Federatën Jugosllave, duke e lënë Kosovën si një pjesë përbërëse të Serbisë.
Suprimimi i autonomisë pasoi pushtimin e Kosovës me mijëra policë e ushtarë serbë, duke e vënë popullatën shumicë nën masa represive dhe aparteidi.
Pavarësisht represionit, më 2 korrik të vitit 1990, Kuvendi i Kosovës shpalli deklaratën kushtetuese që e definonte Kosovën Republikë.
Me fillimin e shpërbërjes së Jugosllavisë, Kosova organizoi edhe referendumin për pavarësi e sovranitet, të mbajtur në shtatorin e vitit 1991. Nga ky moment, në Kosovë instalohet sistemi i organizimit paralel, që pasoi zgjedhjet e mbajtura jashtë sistemit juridik serb, në të cilat Ibrahim Rugova zgjidhet president dhe formon qeverinë në ekzil.
Autori i ekspozitës “Rezistenca paqësore dhe shtetndërtimi 1989-1999”, Shkumbin Brestovci thotë se synimi i tij ka qenë që kjo të jetë ekspozitë e përhershme.
Megjithatë, kjo gjë, siç thotë ai, nuk varet prej tij, por prej autoriteteve institucionale.
Kryeministri i Kosovës, Albin Kurti, ka udhëtuar për në Mbretërinë e Bashkuar, ku do të marrë pjesë në Konferencën e Mbrojtjes në Londër, ku edhe do të jetë folës kryesor.
Sipas njoftimit të zyrës për media të Qeverisë, aty, Kurti do të zhvillojë një takim bilateral me Sekretarin e Punëve të Jashtme të Mbretërisë së Bashkuar, David Cameron, i cili gjithashtu do të marrë pjesë në këtë konferencë.
“Gjatë qëndrimit në Mbretërinë e Bashkuar, kryeministri Kurti do të zhvillojë takime edhe në Parlamentin britanik, si dhe do të ketë një bashkëbisedim me Drejtuesen Ekzekutive të Institutit ODI (Overseas Development Institute), Sara Pantuliano, për 25-vjetorin e përfundimit të luftës dhe çlirimit të Kosovës”, thuhet në njoftim.
Ministrja e Turizmit dhe Mjedisit, Mirela Kumbaro ka vizituar sot Prishtinën, ku është pritur nga presidentja e Republikës së Kosovës, Vjosa Osmani. Në takimin me presidenten Osmani, ministrja Kumbaro u shpreh se shqiptarët e Kosovës janë baza solide e turizmit gjithëvjetor në Shqipëri.
“Turi i aktiviteteve në Prishtinë nisi me një takim shumë energjik me Presidenten e Republikës së Kosovës Vjosa Osmani. Kryefjalë të bisedës kishim turizmin dhe shkëmbimet mes dy vendeve tona ku mysafirët nga Kosova mbeten baza më e qëndrueshme e turizmit gjithëvjetor, por lajmi i mirë është se edhe shqiptarët e Shqipërisë çdo vit e më shumë po preferojnë të vizitojnë atraksionet turistike e natyrore të Kosovës. Dakordësuam për mundësi të reja bashkëpunimi në turizëm, forcim të promovimit të përbashkët të mes vendeve tona, si edhe i përcolla Presidentes Osmani ftesën për një vizitë në Shqipëri nga zonat malore në bregdet, përfshirë edhe lumin Vjosa, tashmë Park Kombëtar”, është shprehur ministrja Kumbaro.
Presidentja Osmani nga ana tjetër vlerësoi “zhvillimin dhe rritjen që ka përjetuar Shqipëria në turizëm, duke pritur shifra rekord vizitorësh”.
Gjatë qëndrimit në Prishtinë, ministrja Kumbaro do të zhvillojë takime edhe me Ministrin e Mjedisit, Planifikimit Hapësinor dhe Infrastrukturës, Liburn Aliu, ministren e Industrisë, Ndërmarrësisë dhe Tregtisë së Republikës së Kosovës, Rozeta Hajdari si dhe kryetarin e PDK, Memli Krasniqi.
Ministrja do të marrë pjesë gjithashtu në aktivitetin për çeljen e sezonit turistik të Lezhës që do të mbahet në Prishtinë, në simbolikën e mirënjohjes për të gjithë shqiptarët e Kosovës që zgjedhin Shqipërinë si destinacion.
Nesër do të varroset trupi i ministrit të Jashtëm iranian, Hossein Amir-Abdollahian, në një faltore në jug të Teheranit.
Një ceremoni mortore do të mbahet në ndërtesën e Ministrisë së Punëve të Jashtme të Iranit në Teheran në orën 09:00 të mëngjesit me kohë lokale. Ndërkaq gjatë ditës Amir-Abdollahian do të varroset në faltoren e Shah Abdol-Azim në Rey, në jug të Teheranit./UBTNews/
Grupi i Miqësisë Kosovë-Arabi Saudite në Kuvendin e Republikës së Kosovës, në përbërje të deputetëve: Fitim Haziri, kryetar i Grupit të Miqësisë Kosovë-Arabi Saudite, gjithashtu anëtarëve Blerta Deliu Kodra, Fjolla Ujkani, Gramoz Agusholli dhe Visar Korenica pritën në takim Komitetin Parlamentar Arabi Saudite-Kosovë të Asamblesë Konsultative të Arabisë Saudite (Shura), kryesuar nga Khaled bin Mohammed Al Bawardi që shoqërohej nga ambasadori Faisal Hifzi Ghazi.
Në këtë takim u diskutuan mundësitë për thellimin e bashkëpunimit midis Kosovës dhe Arabisë Saudite në fusha të ndryshme, me theks të veçantë në ekonomi, arsim, shëndetësi dhe turizëm, përmes projekteve konkrete.
Në aspektin ekonomik u propozuan projekte me rëndësi vitale për zhvillimin e bashkëpunimit ekonomik mes dy vendeve. Nga ana e delegacionit mysafir, u propozua krijimi i një linje ajrore direkte, si dhe krijimi i një grupi të përbashkët punues mes dy vendeve. Nga anëtarë të grupit vendor të miqësisë u kërkua themelimi i Odës Ekonomike të Arabisë Saudite në Kosovë, si urë lidhëse mes bizneseve të dy shteteve, si dhe liberalizimi i vizave për qytetarët e Kosovës, të cilët dëshirojnë të vizitojnë Arabinë Saudite.
Projektet e propozuara nga të dyja palët synojnë krijimin e një baze të qëndrueshme për zhvillimin e marrëdhënieve ekonomike dhe nxitjen e investimeve reciproke.
Anëtarët e Grupit të Miqësisë të Kuvendit të Kosovës shprehën gjithashtu mirënjohjen e tyre për Arabinë Saudite sa i përket mbështetjes ndërkombëtare për Kosovën, veçanërisht në organizatat ndërkombëtare.
Nga ana tjetër, delegacioni nga Arabia Saudite shprehu gatishmërinë për të ndihmuar në zhvillimin dhe realizimin e projekteve të bashkëpunimit, duke ofruar mbështetje për fushat e interesit të përbashkët.
Ky takim përfundoi me zotimin e të dyja palëve për të formuar një grup punues i cili do të punonte në përgatitjen e një memorandumi të bashkëpunimit, me qëllim jo vetëm arritjen e objektivave të përbashkëta dhe konkretizimin e projekteve të interesit të përbashkët në të ardhmen, por edhe shtrirjen e bashkëpunimit edhe në fushat e tjera.