Studentët e Fakultetit Juridik dhe Fakultetit të Menaxhimit të Patundshmërive dhe Infrastrukturës në UBT kanë realizuar një vizitë studimore në Gjykata Themelore në Prishtinë, në kuadër të lëndës “E Drejta Kontraktore”, nën shoqërimin e Prof. Egzona Osmanaj.

Kjo vizitë u organizua me qëllim të ndërlidhjes së njohurive teorike me praktikën profesionale, duke u ofruar studentëve mundësinë që të ndjekin nga afër zhvillimin e procedurave civile dhe funksionimin e sistemit gjyqësor në praktikë.

Gjatë qëndrimit në gjykatë, studentët ndoqën katër seanca gjyqësore civile, prej të cilave dy janë zhvilluar pranë gjyqtares Rrezarta Ajeti dhe dy të tjera pranë gjyqtarit Durim Balaj. Përmes këtij aktiviteti, ata patën rastin të kuptojnë më mirë procedurat civile, komunikimin profesional në sallën e gjykimit dhe mënyrën e trajtimit të rasteve konkrete.

UBT vazhdon të promovojë mësimin praktik dhe përfshirjen aktive të studentëve në aktivitete profesionale, duke krijuar ura bashkëpunimi me institucione vendore dhe duke i përgatitur studentët për sfidat reale të profesionit.

Vizitat studimore dhe aktivitetet e tilla janë pjesë e qasjes moderne të UBT-së ndaj arsimit, ku teoria dhe praktika zhvillohen paralelisht për të ndërtuar profesionistë të përgatitur për tregun e punës dhe institucionet vendore e ndërkombëtare.

Në kuadër të aktiviteteve të Ditëve të Artit dhe Dizajnit, Fakulteti i Artit dhe Dizajnit në UBT do të organizojë një aktivitet të veçantë kulturor dhe akademik në bashkëpunim me Ambasadën e Japonisë në Kosovë dhe Asociacionin e Miqësisë Kosovaro-Japoneze.

Aktiviteti do të mbahet më 26 maj 2026, duke filluar nga ora 11:00, në Parkun Shkencor, Inovativ dhe Teknologjik të UBT-së në Lipjan, dhe do të sjellë diskutime, prezantime dhe ligjërata që ndërlidhin kulturën, artin dhe zhvillimet moderne të Japonisë.

Ngjarja do të hapet me fjalën përshëndetëse të dekanes së Fakultetit të Artit dhe Dizajnit, Prof. Dr. Ariana Gjoni, ndërsa më pas pjesëmarrësit do t’i drejtohen me fjalë rasti Prof. Afërdita Statovci dhe përfaqësuesja e Asociacionit të Miqësisë Kosovaro-Japoneze, znj. Luljeta Arifi.

Pjesë qendrore e aktivitetit do të jetë ligjërata me temën “Japonia në Ditët Moderne”, e cila do të mbahet nga z. Hiroyasu Tanigaki nga Ambasada e Japonisë në Kosovë, duke ofruar një pasqyrë mbi zhvillimin, kulturën dhe ndikimin modern të Japonisë në botë.

Ky aktivitet synon të forcojë bashkëpunimin kulturor dhe akademik ndërmjet Kosovës dhe Japonisë, si dhe të krijojë hapësira frymëzuese për studentët dhe pjesëmarrësit në kuadër të Ditëve të Artit dhe Dizajnit në UBT.

Prishtinë – Në një kohë kur qytetarët e Kosovës për vite me radhë janë detyruar të kërkojnë trajtim jashtë vendit për shërbime më cilësore dhe më të avancuara, United Hospital po shfaqet si një revolucion i vërtetë në sistemin privat shëndetësor, duke sjellë standarde që deri dje konsideroheshin luks i spitaleve euro-perëndimore.

Që nga momenti kur pacienti hyn në ambientet e United Hospital, krijohet përshtypja se ndodhet në një institucion modern evropian të shëndetësisë, ku profesionalizmi, teknologjia dhe kujdesi njerëzor funksionojnë në harmoni të plotë. Me aparatura të avancuara diagnostikuese si CT e trurit, MRI, radiologji moderne dhe laboratorë të standardeve bashkëkohore, ky spital tashmë ka fituar epitetin e një qendre elitare mjekësore në Kosovë dhe rajon.

Por forca më e madhe e United Hospital nuk qëndron vetëm te teknologjia, ajo që e veçon realisht është stafi i jashtëzakonshëm profesional, ekipet multidisiplinare dhe menaxhimi adekuat që kanë ndërtuar një sistem funksional sipas standardeve euro-perëndimore.

Mjekë me renome, specialistë të dëshmuar dhe ekspertë të profileve të ndryshme mjekësore punojnë çdo ditë me përkushtim maksimal për t’u ofruar pacientëve trajtim cilësor, siguri dhe besim. Pikërisht kjo ndërthurje e ekspertizës njerëzore me teknologjinë moderne po e shndërron United Hospital në simbol të një shëndetësie të avancuar dhe dinjitoze për qytetarët e Kosovës.

I ndërtuar me infrastrukturë moderne dhe i pajisur me teknologjinë më të avancuar mjekësore “state of the art”, United Hospital tashmë është kthyer në një nga institucionet më të kompletuara shëndetësore në rajon.

Nga emergjenca 24-orëshe deri te ndërhyrjet kirurgjikale më komplekse, pacientët po gjejnë në këtë spital atë që për vite ka munguar në sistemin shëndetësor kosovar: siguri, profesionalizëm dhe trajtim dinjitoz.

Në zemër të këtij institucioni qëndron një ekip i fuqishëm ekspertësh dhe specialistësh nga fusha të ndryshme të mjekësisë, kirurgë, kardiologë invazivë, gjinekologë, anesteziologë, internistë, pediatër, ortopedë, nefrologë, hematologë dhe staf profesional laboratorik e radiologjik, të cilët ofrojnë kujdes të pandërprerë 24 orë në ditë.

Një nga pikat më të forta të spitalit është repartit i emergjencës, i projektuar për t’u përballur me çdo situatë kritike, nga rastet akute deri te komplikimet më të rënda shëndetësore. Po ashtu, laboratori modern dhe radiologjia e avancuar me CT dhe diagnostikim preciz i japin pacientëve mundësinë të marrin shërbim të shpejtë dhe të saktë në një vend të vetëm.

Në aspektin kirurgjikal, United Hospital ka ngritur kapacitete që rrallë gjenden në rajon, duke mbuluar kirurgjinë e përgjithshme, kardiake, vaskulare, torakale, maksillo-faciale, ORL dhe kirurgjinë pediatrike. Ndërsa në repartet internistike, spitali po avancon veçanërisht në kardiologjinë invazive, ku laboratori funksionon 24 orë pa ndërprerje.

Për drejtuesit dhe stafin e këtij institucioni, misioni nuk është vetëm trajtimi i pacientëve, por rikthimi i besimit të qytetarëve në shërbimet shëndetësore brenda Kosovës. Dhe pikërisht ky vizion po e bën United Hospital një nga adresat më të besueshme dhe më moderne për kujdesin shëndetësor në vend.

United Hospital – Spitali privat që po vendos standarde të reja në shërbimet shëndetësore në Kosovë

United Hospital po konsiderohet si një nga institucionet më moderne dhe më të kompletuara spitalore në Kosovë. Si spitali i përgjithshëm privat më i madh në vend, United Hospital ofron shërbime mjekësore 24 orë, duke garantuar kujdes të vazhdueshëm dhe profesional për pacientët nga të gjitha trevat e Kosovës.

Ky institucion shëndetësor veçohet për stafin e tij të përzgjedhur profesional, të përbërë nga ekspertë dhe specialistë me përvojë në fusha të ndryshme të mjekësisë. Në përbërje të ekipit janë kirurgë, gjinekologë, mjekë familjarë, internistë, laborantë të specializuar dhe profesionistë të profileve të tjera, të cilët çdo ditë janë në shërbim të pacientëve me përkushtim dhe standarde të larta etike e profesionale.

United Hospital ka investuar jo vetëm në resurset njerëzore, por edhe në teknologji moderne diagnostikuese dhe trajtuese, duke ofruar një gamë të gjerë shërbimesh mjekësore nën një kulm të vetëm. Nga diagnostikimi laboratorik dhe ekzaminimet specialistike, deri te ndërhyrjet kirurgjikale dhe trajtimet emergjente, spitali synon të jetë adresë besimi për çdo pacient që kërkon kujdes të sigurt dhe efikas.

Pacientët që kanë marrë shërbime në këtë institucion vlerësojnë qasjen profesionale të stafit, korrektësinë, pastërtinë, organizimin dhe përkushtimin ndaj çdo rasti, duke e konsideruar United Hospital si një model modern të kujdesit shëndetësor në Kosovë.

Me shërbim të pandërprerë 24 orë dhe me një staf të përgatitur profesionalisht, United Hospital vazhdon të forcojë pozitën e tij si një nga institucionet më të besueshme dhe më të avancuara private në sektorin e shëndetësisë në vend.

Edmond Hajrizi merr drejtimin e United Hospital, vizioni që synon ta kthejë Kosovën në adresë të shërbimeve moderne shëndetësore

Pas revolucionit që bëri në arsimin universitar dhe inovacionin akademik në Kosovë, Edmond Hajrizi tashmë ka marrë një tjetër sfidë madhore: avancimin dhe transformimin e United Hospital në një qendër moderne shëndetësore me standarde evropiane.

Me ardhjen e Hajrizit në menaxhimin dhe drejtimin strategjik të këtij gjiganti shëndetësor, United Hospital po hyn në një fazë të re zhvillimi, ku fokusi kryesor mbetet siguria e pacientit, profesionalizmi, teknologjia moderne dhe shërbimet e avancuara mjekësore.

I njohur si një nga figurat më inovative në fushën e arsimit dhe menaxhimit në Kosovë, Hajrizi po sjell në sektorin shëndetësor të njëjtën filozofi që e bëri të suksesshëm në universitet: modernizim, standarde ndërkombëtare dhe orientim drejt nevojave reale të qytetarëve.

Sipas tij, investimet e fundit në United Hospital nuk janë të rastësishme, por të ndërtuara mbi analizimin konkret të nevojave dhe ankesave të pacientëve kosovarë, të cilët për vite me radhë janë detyruar të kërkojnë trajtim jashtë vendit.

“Kam bërë gjithçka që arsimi në Kosovë të ketë progres dhe të ecë paralel me botën. Tani po bëj përpjekje që tërë këtë dituri, eksperiencë dhe ndikim pozitiv ta ofroj edhe në avancimet shëndetësore. Do të mundohem që pacienti kosovar të mos bredhë rrugëve të spitaleve të rajonit e as të Evropës, sepse teknologjinë evropiane ua kemi sjellë në Kosovë me të gjitha aparaturat moderne”, ka deklaruar Edmond Hajrizi për Rajonipress.

Hajrizi vlerëson se zhvillimi i qëndrueshëm i një shoqërie moderne nuk mund të kuptohet pa dy shtyllat themelore: arsimin dhe shëndetësinë.

Sipas tij, këto dy sektorë nuk funksionojnë të ndarë, por ndërtojnë një ekosistem të ndërlidhur që përcakton nivelin e zhvillimit dhe perspektivën e një populli.

“Mendoj se arsimi dhe mjekësia janë bazamenti kryesor për zhvillimin e një populli dhe perspektivën e tij. Ato e ndihmojnë njëra-tjetrën dhe si të tilla krijojnë ekosistemin e nevojshëm për një mjekësi moderne dhe të kërkuar në ditët e sotme”, ka deklaruar Hajrizi.

Me këtë filozofi, ai synon që përvoja e tij në transformimin e arsimit universitar të reflektohet tashmë edhe në avancimin e shërbimeve shëndetësore, duke krijuar institucione që ecin paralel me standardet më të zhvilluara evropiane.

Ndryshe nën drejtimin e tij, United Hospital tashmë po konsiderohet një nga institucionet më të avancuara private në vend, i pajisur me teknologji të sofistikuar diagnostikuese dhe trajtuese, përfshirë CT moderne, MRI, laboratorë të specializuar dhe pajisje të standardeve bashkëkohore evropiane.

Me këtë qasje të re menaxheriale dhe me investimet e vazhdueshme në teknologji dhe ekspertizë, United Hospital synon jo vetëm të trajtojë pacientë, por të rikthejë besimin e qytetarëve se edhe në Kosovë mund të marrin shërbime shëndetësore të nivelit evropian.

United Hospital sjell revolucionin e diagnostikës në Kosovë – prezantohet MRI më e avancuar në rajon me Inteligjencë Artificiale

United Hospital po vazhdon të vendosë standarde të reja në shëndetësinë moderne, duke sjellë në Prishtinë një nga teknologjitë më të sofistikuara diagnostikuese që ekziston aktualisht në Evropë dhe rajon. Në një investim që konsiderohet hap revolucionar për sistemin shëndetësor në Kosovë, United Hospital ka instaluar sistemin më të avancuar MRI – Philips MR 5300 BlueSeal, duke u bërë spitali i parë në rajon që operon me këtë teknologji të gjeneratës së fundit.

Ky investim strategjik nuk përfaqëson vetëm avancim teknologjik, por një transformim të mënyrës së diagnostikimit dhe trajtimit të pacientëve në Kosovë. Pajisja moderne MRI 1.5T është e pajisur me teknologjinë inovative BlueSeal, një sistem inteligjent që funksionon me sasi minimale heliumi dhe eliminon nevojën për rimbushje, duke rritur ndjeshëm sigurinë, stabilitetin dhe efikasitetin operacional.

Ajo që e bën këtë sistem unik është integrimi i Inteligjencës Artificiale (AI), e cila mundëson skanime deri në 50 për qind më të shpejta dhe me saktësi shumë më të lartë diagnostikuese. Për pacientët kjo nënkupton më pak kohë pritjeje, ekzaminime më komode dhe rezultate më precize, ndërsa për mjekët përkthehet në diagnostikim më të avancuar dhe vendimmarrje më të sigurt klinike.

Me rezolucion ultra të lartë të imazhit dhe teknologji të standardeve më të avancuara globale, kjo pajisje e vendos United Hospital në nivelin e qendrave moderne evropiane të diagnostikës dhe trajtimit.

Realizimi i këtij projekti është bërë në bashkëpunim me Unicare, përfaqësuese zyrtare e Philips Healthcare, kompani që njihet botërisht për inovacionet në teknologjinë mjekësore.

Duke operuar ekskluzivisht me pajisje të markës Philips dhe duke investuar vazhdimisht në teknologji moderne, United Hospital po e shndërron Kosovën në një qendër ku pacientët mund të marrin shërbime të standardeve euro-perëndimore pa pasur nevojë të kërkojnë trajtim jashtë vendit.

Ky investim konsiderohet një tjetër dëshmi se sistemi privat shëndetësor në Kosovë po hyn në një epokë të re, ku teknologjia, ekspertiza profesionale dhe kujdesi modern për pacientin po ecin paralel me zhvillimet më të avancuara globale./rajonipress/

Agjencia e Kosovës për Akreditim, përkatësisht Këshilli Shtetëror i Cilësisë (KShC), zhvilloi mbledhjen e saj të rregullt në kampusin e UBT-së.

Me këtë rast, anëtarët e Këshillit Shtetëror të Cilësisë u pritën nga Rektori i UBT-së, Edmond Hajrizi, i cili prezantoi ekosistemin inovativ të UBT Smart City, si dhe zhvillimet më të fundit akademike, teknologjike dhe infrastrukturore të institucionit. Delegacioni realizoi gjithashtu një vizitë në hapësirat moderne të Parkut Shkencor, Inovativ dhe Teknologjik të UBT-së.

Ndërsa, Kryetarja e Bordit, Hasnije Ilazi, prezantoi punën dhe aktivitetet e Këshillit, duke vënë në pah angazhimin e tyre për krijimin e politikave dhe standardeve në përputhje me praktikat më të mira ndërkombëtare, si dhe duke i konsideruar institucionet e arsimit të lartë partnerë të rëndësishëm në këtë proces zhvillimor.

Agjencia e Kosovës për Akreditim është pjesë e organizatave prestigjioze ndërkombëtare EQAR dhe ENQA, ndërsa së fundmi ka shënuar një tjetër sukses të rëndësishëm ndërkombëtar, duke u njohur nga CHEA – Council for Higher Education Accreditation në Shtetet e Bashkuara të Amerikës, si “recognized authority” deri në vitin 2033. Me këtë njohje, AKA është bërë institucioni i parë në Evropë që siguron këtë status nga CHEA, duke dëshmuar progresin institucional, reformat dhe besimin ndërkombëtar në sistemin e arsimit të lartë në Kosovë.