Në hapje të Kongresit të Tretë Kosovë-Turqi, sot u bë përurimi i Laboratorit të Forenzikës në UBT, hap ky i rëndësishëm drejt zhvillimit të kapaciteteve të kërkimit shkencor në Kosovë.

Presidenti i UBT-së, Prof. Dr. Edmond Hajrizi, ishte i pranishëm për të shënuar këtë moment historik, krah personaliteteve të shquara si Prof. Dr. Irfan Karadede nga Universiteti Izmir Katip Çelebi, Prof. Dr. Sevinç Polat nga Universiteti Yozgat Bozok, si dhe Prof. Dr. Ilirjan Mandro, Rektor i Akademisë së Sigurisë së Shqipërisë.

Në mesin e të pranishmëve ishin edhe personalite eminente nga fusha e drejtësisë dhe politikës, si Ushtruesi i detyrës së Kryeprokurorit të Shtetit, Besim Kelmendi, Zëvendësministri në Ministrinë e Zhvillimit Rajonal, Ali Tafarishku, dhe Ambasadori i Turqisë në Kosovë, Sabri Tunç Angili.

Në përurim të laboratorit, udhëheqësi i bordit shkencor të Institutit të Forenzikës në UBT, Arsim Gërxhaliu tha ky hap duhet të shërbejë si pikënisje për zhvillimin edhe të disiplinave të tjera forenzike.

“Andaj pikërisht sot, në këtë datë të Kongresit të Tretë Kosovë-Turqi, bëjmë edhe hapjen zyrtare të laboratorit, si një pikënisje për fillimin dhe zhvillimin e disiplinave të tjera forenzike”, deklaroi ai.

Instituti i Forenzikës në UBT është një qendër e rëndësishme e dijes dhe shërbimeve në Kosovë dhe mbulon një gamë të gjerë temash në aspektin akademik, shkencor dhe profesional, duke përfshirë mjekësinë, kriminologjinë, teknologjinë, ushqimin, ekonominë, sigurinë, inxhinierinë, teknologjinë, artin, dhe shumë fusha të tjera./UBTNews/

Në një ceremoni madhështore në Kampusin Inovativ të UBT-së në Lipjan u bë hapja e Kongresit të Tretë të Forenzikës Kosovë-Turqi. Në hapjen e këtij kongresi morën pjesë personalitete të rëndësishme, si Rektori i UBT-së, Prof. Dr. Edmond Hajrizi, dhe përfaqësues nga institucione prestigjioze si Universiteti “Izmir Katip Çelebi”, Universiteti “Yozgat Bozok”, Ambasada e Turqisë në Kosovë, Qeveria e Kosovës, si dhe institucione të tjera vendore.

Para të pranishmëve, rektori i UBT-së, Prof.Dr. Edmond Hajrizi theksoi rëndësinë e këtij kongresi për UBT-në dhe institucionet e të dyja vendeve në përgjithësi. Ai potencoi rëndësinë e thellimit të bashkëpunimit në këtë drejtim edhe me shtetet e tjera.

“Kjo traditë e cila ka ndodhur edhe njëherë paraprakisht që të mbahet mes Kosovës dhe Turqisë, të vazhdojë si format tradicional për të vazhduar me kongrese të tilla edhe në vitet tjera në Kosovë, në Turqi dhe mendojmë që në të ardhmen të vendosen edhe shtetet tjera fqinje sikurse Shqipëria, që të krijojmë kështu një miqësi të mirë. Mendoj se shkenca e Forenzikës është një dimension shumë interesant dhe kompleks. Ka edhe një ndërlidhje apo më mirë të themi një ndikim edhe nga teknologjitë e reja që po zhvillohen tash e tutje. Dhe nga ky kompleksitet dhe ky nivel kërkohet edhe një qasje më e madhe akademike dhe shkencore, dhe një qasje edhe më e mirë e bashkëpunimit ndërinstitucional dhe në nivelin nacional dhe ndërkombëtare, në mënyrë që ne të krijojmë metoda më të mira, qasje më të mira, vegla më të mira, involvim të teknologjive të avancuara sa më mirë dhe sa më lehtë, në mënyrë që cilësia e shërbimeve dhe i gjithë spektri i Forenzikës, të trajtohet apo punohet sa më mirë”, deklaroi ai.

Kongresi synon të shërbejë si platformë për ndarjen e njohurive dhe përvojave të fundit në forenzikë, duke përfshirë teknikat më të reja të analizave kriminalistike./UBTNews/

Me një ceremoni madhështore, në UBT është hapur kongresi i tretë i Forenzikës Kosovë-Turqi.

Kongresi synon të shërbejë si një platformë për ndarjen e njohurive dhe përvojave të fundit në forenzikë, duke përfshirë teknikat më të reja të analizave kriminalistike, teknologjitë moderne në identifikimin e krimeve, dhe metodologjitë inovative të hetimit.

Në një fjalë rasti para të pranishmëve rektori i UBT-së, Prof.Dr. Edmond Hajrizi tha se ky është mesazh që forenzika është një ekosistem në të cilin duhet të ndërlidhen të gjitha palët e interesit si në nivel kombëtar dhe atë ndërkombëtar./UBTNews/

Më 23 maj 2024, Fakulteti i Inxhinierisë së Ndërtimit dhe Infrastrukturës në UBT organizoi një debat për sigurinë në komunikacion. Ky diskutim u zhvillua në bibliotekën e kampusit të UBT-së, si pjesë e Javës së Sigurisë në Komunikacion.

Debati ofroi një platformë për të diskutuar aspekte të ndryshme të sigurisë në komunikacion, duke përfshirë infrastrukturën, aspektet ligjore dhe rregullat e policisë së Kosovës. Pjesëmarrësit u informuan dhe patën mundësinë të debatojnë mbi këto tema të rëndësishme.

Në këtë aktivitete morën pjesë përfaqësues nga institucionet kryesore, përfshirë Ministrinë e Planifikimit Hapësinor dhe Infrastrukturës. Diskutimet u përqendruan në rolin dhe rëndësinë e infrastrukturës për sigurinë në komunikacion, si dhe në sfidat dhe strategjitë për përmirësimin e saj.

Debati u hap nga Dekani i Fakultetit Inxhinierisë së Ndërtimit në UBT, Visar Krelani, i cili falënderoi të pranishmit për prezencën dhe theksoi nevojën e zhvillimit të diskutimeve të tilla në nivele akademike.

Togeri Nazim Zogaj, përfaqësues nga Policia e Kosovës ndau pikëpamjet dhe rekomandimet e tyre për sigurinë në komunikacion. Sipas togerit të Policisë së Kosovës, Nazim Zogaj, disa nga shkaktarët më të shpeshtë të aksidenteve rrugore në vitin 2023 ishin mosmbajtja e distancës së sigurisë mes automjeteve, manipulimi i pasigurt me automjet, mos përshtatja e shpejtësisë ndaj kushteve të rrugës, mos respektimi i përparësisë së kalimit, kyçje e pasigurt në rrugë, radhitje e parregullt apo ndërrim i shiritave, kthim, rrotullim dhe lëvizje prapa.

Togeri Zogaj raportoi se ka pasur një rritje të numrit të kundërvajtjeve të cilat kanë rezultuar me pikë negative. Në vitin 2018, ishin regjistruar 18 mijë kundërvajtës, ndërsa në vitin 2023 ky numër ka arritur në 28 mijë. Kjo rritje tregon për një trend negativ, por Zogaj shprehu shpresën se statistikat do të përmirësohen me ndryshime të mundshme ligjore gjatë këtij viti.

“Gjithashtu, numri i personave të cilëve u është ndaluar drejtimi i mjetit motorik është rritur nga mbi 6 mijë në vitin 2018 në mbi 9 mijë në vitin 2023. Po ashtu, është vërejtur një rritje e madhe në kundërshtimet ndaj kundërvajtjeve, nga 1791 ankesa në vitin 2018 në 5556 ankesa në vitin 2023”, tha Zogaj.

Zogaj gjithashtu pasqyroi të dhënat krahasuese të numrit të patentë shoferëve dhe mjeteve motorike me aksidentet fatale dhe personat e vdekur nga viti 2011 deri në 2023. Në vitin 2011, numri i patentë shoferëve të lëshuar nga MPB-ja ishte 475,902, ndërsa deri në vitin 2023 ky numër është rritur në 879,555, një rritje prej 403,653 ose 85%.

“Numri i mjeteve motorike në qarkullim është rritur nga 189,943 në vitin 2011 në 459,108 në vitin 2023, një rritje prej 269,165 ose 142%. Krahasimi i aksidenteve fatale me numrin e patentë shoferëve të lëshuar tregon një rënie për 34 aksidente fatale ose 26%, dhe numri i personave të vdekur ka rënë për 51 persona ose 33%”, theksoi togeri Zogaj.

Nol Dedaj, ekspert i komunikacionit dhe profesor në UBT, ka deklaruar se çdo vit në aksidente rrugore humbin jetën rreth 1.300.000 persona, ndërsa rreth 50.000.000 persona pësojnë lëndime trupore. Sipas tij, parashikimet tregojnë se deri në vitin 2030, aksidentet rrugore mund të bëhen shkaku i pestë kryesor i vdekjeve në botë, me rreth 2.400.000 viktima nëse trendi aktual vazhdon.

“Në vitin 2020, Asambleja e Përgjithshme e Kombeve të Bashkuara miratoi një program dhjetëvjeçar, mbështetur nga 100 shtete, me qëllim të stabilizimit dhe uljes së numrit të viktimave nga aksidentet rrugore. Ky program synon një reduktim prej 50% të viktimave deri në vitin 2030. Nëse arrihet ky objektiv, do të parandalohen rreth 5 milionë viktima dhe 50 milionë lëndime trupore, duke kursyer gjithashtu rreth 30 miliardë dollarë nga buxhetet e shteteve”, u shpreh Dedaj.

Visar Baxhuku, profesor në UBT, ka theksuar se kundërvajtjet që rezultojnë në pagesa gjobash kanë përfunduar si proces. Sipas tij, numri i kundërvajtjeve është rritur në mënyrë represive, duke shënuar një rritje prej 21.5% në Ballkan, ku nga 219 gjoba për çdo 1000 banorë në vit, krahasuar me 94 gjoba për çdo 1000 banorë në shtetet evropiane, që është një numër shumë i lartë dhe ka kosto financiare të konsiderueshme. Ai sugjeron që për të ulur aksidentet, masat preventive duhet të zëvendësohen me masa të tjera./UBTNews/