Lajmet

Lufta në Ukrainë, Peleshi: Ku janë vendosur trupat shqiptare

Peleshi: Kemi 20 trupa në Letoni. Jemi duke shtuar prezencën në KFOR dhe në lindje.

Published

4 years ago

March 17, 2022

Betim Gashi

Shqipëria ka dërguar mjete ushtarake në Ukrainë, si edhe ka pozicionuar trupat e saj në Letoni.

Gjithashtu po shtohet vazhdimisht prezenca në KFOR dhe në lindje. Ka një angazhim për të çuar një togë shtesë.

Kështu u shpreh ministri i Mbrojtjes Niko Peleshi në një intervistë për emisionin Sot në Euronews Albania, ku dha detaje mbi angazhimin e Shqipërisë në luftën në Ukrainë, si edhe mbi diskutimet në takimin e ministrave të Mbrojtjes të shteteve që janë në NATO, që u zhvillua në Bruksel të mërkurën.

Cila është ndihma që mund t’i japë sot ushtria shqiptare ushtrisë dhe popullit ukrainas që po lufton kundër okupatorit rus? Çfarë ndihme konkrete mund t’i japim ne sot Ukrainës?

Së pari më lejoni të ndaj me ju tematikën apo fokusin e samitit të sotëm, që është si e thatë ju ishte një samit i jashtëzakonshëm i ministrave të Mbrojtës së NATO-s. Vendet anëtarë të NATO-s aleatët kanë ndarë me njëri-tjetrin kontributet që janë dhënë dhe lëvruar për Ukrainën si dhe gatishmërinë për të shtuar dhe për të përforcuar mbështetjen, qoftë me mjete ushtarake, qoftë me mbështetje humanitare për Ukrainën.

Shqipëria pa dyshim që nuk është prapa vendeve të tjera, ne kemi tashmë dërguar ndihmën e parë të rëndësishme, të qenësishme ne mjete ushtarake në Ukrainë dhe jemi angazhuar edhe sot e në vijim për të shtuar kontributet me gjithë mundësitë tona, qoftë me municione dhe me mjete ushtarake, por pa dyshim edhe me pajisje humanitare qoftë nga ushtria shqiptare, por edhe nga shoqëria civile.

Të mbetemi pak më konkretisht tek ndihma ushtarake që Shqipëria i ka dhënë Ukrainës, flasim për mjete ushtarake brenda kapaciteteve dhe mundësive që ka Shqipëria, për çfarë bëhet fjalë, çfarë kemi çuar ne sot në Ukrainë?

Unë ju kërkoj ndjesë që nuk mund të ndaj në detaje sasitë dhe llojin e municioneve dhe pajisjeve ushtarake që ne i kemi lëvruar Ukrainës. Na kanë ndihmuar dhe mbështetur me logjistikë vende anëtare të NATO-s, të cilat gjithashtu preferoj t’i mbajmë diskrete për arsye të kuptueshme, por dëshiroj të them që kjo ndihmë ka qenë e qenësishme, qoftë në vlerë, qoftë në sasi. Po ashtu e përshëndetur dhe e falënderuar edhe nga vetë presidenti Zelensky, para një jave, ku pati dhe një telefonatë me kryeministrin Rama për ta falënderuar dhe për të diskutuar se ç’mund të bëjmë ne më tepër për Ukrainën. Natyrisht ashtu si kryeministri edhe unë në të gjitha takimet dhe samitet, të cilat do të jenë si e thatë ju të herëpashershme, të shpeshta dhe të jashtëzakonshme në këto kohë, në ndjekje të situatës të mbajmë shënim dhe të angazhohemi, për gjithçka mundemi në ndihmë të Ukrainës.

Në qoftë se sot ne po konfirmojmë këtë ndihmë për Ukrainën, çfarë do të ndodhë në Samitin e jashtëzakonshëm të NATO-s që pritet të mbahet në Bruksel në datën 24 Mars? A do të përshkallëzohet ndihma? Ky Ministerial sot i paraprin Samitit të jashtëzakonshëm, ku do të jetë ndryshimi midis vendimmarrjes që ka pasur sot Ministeriali dhe Samitit të jashtëzakonshëm të NATO-s që mbahet më 24 Mars?

Ministeriali i sotëm nuk ka marrë ndonjë vendim mbi ndonjë dokument të caktuar, Ministeriali i sotëm ka pasur për synim të konfirmoj kontributet dhe vullnetin për të shtuar kontributet, së dyti për të forcuar unitetin i cili si po vlerësohet nga të gjithë ministrat tani që flasim në Samit është përparësi më i rëndësishëm dhe lë të themi pozitivja e gjithë ngjarjes negative, agresionit të tmerrshëm që po ndodh nga Rusia në Ukrainë.

Nuk ka qenë kur më parë Aleanca e NATO më e bashkuar se sot. Sot nuk ka më dallime brenda aleatëve janë të gjithë të njëzëshëm. Janë të gjithë të gatshëm dhe të bindur se ne duhet të forcojmë mbrojtjen, duke mbështetur Ukrainën. Është e rëndësishme që lufta në Ukrainë të fitohet nga Ukraina, Putin të dështojë dhe të dekurajohet për të mos vazhduar agresionin e tij në vende të cilat janë të rrezikuara me shumë të drejtë. Dua të kujtojë këtu që Ballkani Perëndimor nuk është shumë larg në reze nga kjo vatër.

Është real rreziku dhe nëse flasim për rrezik për rajonin e Ballkanit, cilat vende keni parasysh dhe nga mund të vij ky rrezik, nga mund të vijë ky agresion?

Një nga rezultat e Samitit të sotëm sidomos në pjesën e dytë të tij, është forcimi dhe vullneti i të gjithë aleatëve për të forcuar krahun lindor të Aleancës, që do të thotë vendet që janë në kufi dhe pranë Rusisë. Në nuk jemi, Ballkani Perëndimor nuk është drejtpërdrejt në frontin e parë të lindjes, por ne jemi le të themi në frontin e dytë. Ajo çka e bënë të brishtë Ballkanin tonë është fakti se jo të gjitha shtetet e Ballkanit Perëndimor janë të vendosur në orientimin perëndimor, kemi shtete si Serbia për shembull, apo Bosnja që janë të lëkundura në qëndrimin e tyre. Kjo e bën situatën politikë në Ballkan të jetë e ndikueshme nga agresioni rus. Pikërisht fuqizim që po vendoset sot dhe po merret vullneti i të gjithë anëtarëve, fuqizimi i prezencës me njësi të shtuara ushtarake në lindje, dekurajon Rusinë për të pretenduar ta shtrijë destabilitetin edhe në Ballkanin tonë Perëndimor.

Jemi fatlum qe jemi vend anëtarë në NATO si e kemi thënë edhe më parë, por vetëm tre nga gjashtë vendet e Ballkanit Perëndimor janë në NATO. Sot është momenti të rikujtojmë se edhe procesi ynë integrues në BE si një nga dy strukturat kryesore euro-atlantike duhet të marrë një shpejtësi të re qoftë për Shqipërinë, qoftë për vende të tjera të Ballkanit perëndimor në mënyrë që ne të ndjehemi më të sigurt dhe në mënyrë që vendet e Ballkanit Perëndimor ta shohin prosperitetin e tyre shoqëror dhe ekonomik nga perëndimi.

Ka një garanci të shprehur, qoftë në takimin në Ministerialin e sotëm, apo të gjitha takimet diplomatike që janë mbajtur në nivel të lartë të BE për të përshpejtuar rrugën e Shqipërisë në BE dhe ndoshta anëtarësimin në NATO të Kosovës, në këto kushte të tensionit politik dhe ushtarak që është krijuar në Europë?

Takimi i ministrave të brendshëm të NATO-a nuk është forumi dhe platforma ku mund të merren angazhime të tilla, por gjithsesi mund të ndaj me ju faktin që jo vetëm Shqipëria, Jo vetëm Maqedonia e Veriut dhe Mali i Zi, pra vendet anëtare në NATO të Ballkanit perëndimor, por edhe vende të tjera si Italia, Bullgaria dhe vende të tjera shumë të ndjeshme për zhvillimet në Ballkanin perëndimor kanë rikujtuar edhe njëherë se Ballkani Perëndimor duhet të marrë një vëmendje të shtuar, qoftë duke përshpejtuar proceset integruese në BE dhe NATO, qoftë edhe duke forcuar prezencën ushtarake në to. Kjo që po ndodh, Shqipëria është pjesë e shtimit të njësive ushtarake qoftë në Ballkanin Perëndimor, në Kosovë dhe në Bosnje, qoftë edhe në Lindje si po e thosha edhe pak më lart. Por ndërkohë ju keni ndjekur Borrel, i cili e ka thënë se BE ka një vullnet dhe duhet të përshpejtojë proceset integruese të Shqipërisë dhe Ballkanit Perëndimor në të.

Unë dua t’ju bëj disa pyetje të tjera për të cilat ka shumë kuriozitet.

A është gati Shqipëria nëse do të nevojitet gjithmonë që të aktivizojë forcat rezerviste dhe sa është numri i forcave rezerviste që ne kemi sot në dispozicion?

Ashtu si e thashë ne jemi pjesë e NATO dhe i marrim detyrat, angazhimet dhe direktivat në raport me komandanatin suprem të NATO-s. Deri tani na është kërkuar që të shtojmë disa njësi ushtarake në rajonin e Ballkanit dhe në lindje dhe ne jemi angazhuar dhe tani kemi edhe vendimet e Këshillit të Ministrave të miratuara në fuqi dhe jemi në gatishmëri sapo të marrim komandën, sinjalin për ti alokuar këto trupa, këto njësi shtesë. Pra nuk jemi në skenarin e aktivizimit e mobilizimit edhe përtej Forcave tona të Armatosura, në forcat rezerviste e më tej, nuk jemi në skenar gatishmërie. Kjo në kuptimin që nuk e kemi ngritur nivelin tonë të gatishmërisë as ne, as vende të tjera në Ballkanin Perëndimor sepse nuk kalkulojmë por një rrezik me potencial të lartë për të ndodhur në Ballkanin Perëndimor, nuk jemi të shqetësuar për agresione të mundshme ushtarake tek ne. Ashtu si e thashë ne jemi aleat të NATO dhe artikulli 5 mbron çdo centimetër katror të hapësirë së NATO. Pra nuk është çështje te një agresion potencial ndaj Shqipërisë, për këtë do të duhet të jemi të gjithë të qetë.

Ne jemi të mbrojtur ashtu si është i mbrojtur çdo vend anëtar i NATO-s. Ajo që ne na shqetëson është destabiliteti dhe eskalimi politik që mund të ndodh në vendet e Ballkanit perëndimor, kryesisht tek ato vende që janë të pavendosura si duhet në orientimin e tij perëndimor, por që kanë influenca nga vlerat tona rivale siç është Rusia, por edhe Kina.

Nëse do të mbërrijmë tek ai skenar, a do të aktivizoheshin forcat tona rezerviste dhe a kemi ne një numër të konsiderueshëm forcash rezerviste?

Unë besoj që jemi shumë larg një skenari të tillë dhe mirë është që të mos bëjmë hipoteza sepse në opinionin publik pastaj do të shkaktonte një lloj frike dhe meraku të panevojshëm dhe të pajustifikuar për momentin.

Disa helikopterë që ne i kemi pjesë të FA që janë helikopterët Cougar, ndodhen për një servis në Poloni, si është historia e tyre kemi shumë vite që nuk dëgjojmë për këto helikopterë që i blemë dikur në kohën e një qeverie tjetër. A janë ata në gjendje funksionale dhe ky servis që po i bëhet për ti vënë në dispozicion nëse do të jetë nevoja?

Jo nuk ka lidhje, ato janë servise periodike që i bëhen mjeteve tona ajrorë, pra nuk ka lidhje fare me situatën apo me nevojën për rritjen e gatishmërisë.

Nuk jemi në skenarin e rritjes së gatishmërisë sonë, por serviset ndodhin në mënyrë periodike. Ne kemi filluar një bashkëpunim shumë të suksesshëm deri tani, me agjencinë e prokurimit të NATO, e cila prokuron për llogarinë tonë këto lloj shërbimesh periodike duke na ndihmuar dhe duke na bërë që disa dështime të së kaluarës, s’ka ndonjë sekret duhet ta themi, në mirëmbajtjen e helikopterëve, pra vonesat, në kryerjen të shërbimeve, tani i shmangim sepse fuqia kontaktuale e kësaj agjencie të specializuar të NATO është shumë më e madhe se e jona. Kontrata që ju sapo përmendët është një kontratë e vjetër që nuk është kryer nga agjencia e NATO-s, por ka qenë lidhur më parë nga Ministria e Mbrojtjes dhe tani është duke u lëvruar, por nuk ka lidhje me situatën.

Ajo që mund të jetë me interes është fakti që ne presim së shpejti të marrim dy helikopterë blackhok nga SHBA, të kontraktuar, të paguar presim tani lëvrimin madje nuk besoj se nxitohem nëse them që kalkulojmë edhe mundësitë për të rritur flotën e blachok madje për ta rritur edhe me mjete të tjera ajrore që lidhen edhe me situatën edhe në kuptimin që në këtë situatë kur themelet e arkitekturës në rajon dhe sigurisë evropiane po tronditen në tërësi janë lëkundur. Çdo vend duhet të rikalkulojë kapacitet e veta. Natyrisht ne kemi objektiv kapacitet e NATO për të përmbushur, por duhet të zhvillojmë dhe kapacitet tona kombëtarë.

Një nga pikat për të cilat po diskutohet në Samit është edhe riangazhimi për të respektuar detyrimit për të rritur buxhetin 2% të GDP-së deri në vitin 2024. Ne si Shqipëri jemi angazhuar jemi duke respektuar këtë grafik, por sot jemi të angazhuar të ripërsëritet ky angazhim.

Për flotën detare, për anijet Iliria edhe ato kanë pasur probleme me mirëmbajtjen, si është gjendja sot e flotës detare shqiptare, a është më problem mirëmbajtja e tyre? A do të investojmë në flotën detarë si po investojmë në flotën ajrore?

Po duhet thënë se disa nga objektivat e kapaciteteve lidhen edhe me modernizmin dhe shtimin e flotës detare. Problemet e mirëmbajtjes janë probleme në çdo fushë në çdo sektor mirëmbajtja është gjithmonë një dhembje koke do të thosha. Po ne sot që flasim kryejmë mirëmbajtjen e mjeteve tona detare nga një shoqëri aksionere që është në pronësi të Ministrisë së Mbrojtjes. Ndërkohë kemi bërë një kontratë të vogël modeste, por shumë të rëndësishme me një kompani holandeze, e cila la bërë vlerësimin e nevojave të mirëmbajtjes. Shumë cilësore si produkt ka përfunduar tani që po flasim dhe mbi atë gjetje, pra mbi bazën e atij studimi ne do të kontraktojmë tani një mirëmbajtje më profesionale të mjeteve tona detare. I kemi në gjendje funksionale, por kane nevojë për mirëmbajtje për të qenë brenda standardit. Ka në manual të shërbimeve periodik edhe normalisht edhe defekte dhe nevoja për shërbime aktuale.

Cili është angazhimi tjetër i juaji në këtë Ministerial si ministër i Mbrojtjes së Shqipërisë?

Ky Ministerial është i ndarë në dy sesione tani do të vijojë pjesa e dytë. Unë kam përsëri një fjalë për këtë sesion, ky sesion është kryesisht për angazhimin tonë për buxhetin e mbrojtjes të të gjitha vendeve anëtare, por edhe për gatishmërinë tonë për t’i dhënë mbështetje planeve të komandantit suprem të NATO-s dhe sekretarit të përgjithshëm për ta për ta përforcuar prezencën tonë në lindje. Me sa duket ajo prezence nuk do të jetë për një kohë të shkurtër aty, sepse po thosha që agresioni rus i pajustifikuar dhe barbar ka lëkundur gjithë peizazhin e sigurisë europiane, çka do të thotë se edhe NATO dhe vendet anëtare të saj do të rishohin strategjitë e tyre të sigurisë së mbrojtjes por padyshim por edhe prezencën në kufijtë me Rusinë.

Dhe një pyetje të fundit, kemi në sot forca në Poloni?

Jo ne nuk kemi forca në Poloni, ne kemi forca ne Letoni.

Kemi 20 trupa në Letoni. Jemi duke shtuar prezencën në KFOR dhe në lindje si e thashë jemi angazhuar që do të çojmë një togë shtesë.

Vendi

Caktohen numrat e partive politike për zgjedhjet e 7 qershorit

Published

9 hours ago

May 16, 2026

UBTNews

Komisioni Qendror i Zgjedhjeve (KQZ) ka hedhur shortin për renditjen e subjekteve politike të certifikuara në fletëvotimin për zgjedhjet parlamentare të 7 qershorit.

Sipas shortit të tërhequr nga KQZ-ja, Lëvizja Vetëvendosje në fletëvotim do ta ketë numrin 116, ndërsa Partia Demokratike e Kosovës do të garojë me numrin 125.

Lidhja Demokratike e Kosovës do të mbajë numrin 113, kurse Aleanca për Ardhmërinë e Kosovës do të paraqitet me numrin 128. Ndërkaq, Partia Socialdemokrate në zgjedhje do të garojë me numrin 129.

Zgjedhjet për Kuvendin e Kosovës do të mbahen më 7 qershor të këtij viti.

Sipas të dhënave të KQZ-së, për 120 ulëse në Kuvendin e Kosovës do të garojnë 23 subjekte politike me gjithsej 917 kandidatë.

Kujtesë

Ditari: Çfarë ngjarjesh shënuan datën 16 maj 1993-1998?

Published

10 hours ago

May 16, 2026

UBTNews

Lajmet e datës 16 maj pasqyrojnë jetën reale në Kosovë, në këtë periudhë shumë të rëndë. Nga represioni i përditshëm në fillimvitet e nëntëdhjeta deri te lufta e vitit 1998.

(Foto: Pas gati dhjetë ditësh, u mor vesh se Bahri Fazliu ishte vrarë më 5 maj në kufirin Shqipëri-Mali i Zi, afër fshatit Vuthaj)

16 maj 1994

Lajm i plotë:

Policia plagosi Zekë Hajrizin në oborrin e tij

Më 14 maj, rreth orës 11:00 në fshatin Strofc, policia serbe plagosi në oborrin e tij Zekë Hajrizin (38). Policia shtiu me automatik në Zekën derisa ai po bënte përpjekje për të ikur. Njoftohet se Zekë Hajrizi po kërkohej nga policia që prej dy javësh, nën pretekst se duhej të dorëzonte armën pa leje. Mirëpo ai nuk iu kishte përgjigjur thirrjes për t’u paraqitur në stacionin e policisë në Vushtrri.

Policia pasi e plagosi e dërgoi Zekën në stacionin e policisë në Prilluzhë e më vonë në stacion të policisë në Vushtrri.

Janë keqtrajtuar edhe anëtarët e familjes, duke përfshirë edhe babain Brahim Hajrizin (80) dhe të ëmën Nailen (75).

Anëtarët e familjes së të plagosurit kanë shkuar në spitalin e Mitrovicës për t’u interesuar, por përgjegjësit e atij spitali kanë deklaruar se Zeka nuk është pranuar në spital.

Supozohet se i plagosuri ende mbahet në stacionin e policisë.

Fshati Strofc i komunës së Vushtrrisë ka qenë objekt i ekspeditave të shpeshta ndëshkuese të forcave serbe. Më 14 maj, kur u plagos Zekë Hajrizi, policia bastisi dhe torturoi anëtarët e familjes së Selman Hasanit (djemtë Sokolin, Istrefin, Shabanin dhe Ilmiun), si dhe Ilmi Ademin (me të meta psikike) dhe të miturin Bekim Ademi (16).

Lajme të tjera:

Kryetari Rugova viziton disa vende evropiane

Të shtunën përfundoi “Mitingu i poezisë ’94”

“Deili Telegraf”: Presidenti shqiptar kërkon zgjidhjen e çështjes së Kosovës

Represioni në Kosovë

Nga shtëpia e shëndetit në Suharekë u dëbuan 11 punëtorë

Beogradi i shqetësuar për natalitetin e lartë të shqiptarëve në Kosovë

Drama shqiptare e TPK-së nuk merr pjesë në takimet “Joakim Vujiq”

Ballkani duhet t’u takojë vendeve të rajonit

Shqiptarët u akuzuan për marrëdhënie të këqija ndërnacionale në Medvegjë

Kosova është nën kontrollin e rreptë policor e ushtarak të Serbisë

16 maj 1995:

Lajm i plotë:

Ushtria serbe vrau një shtetas të Shqipërisë dhe plagosi një tjetër

Të shtunën (më 13 maj) në orën 17,30, në rajonin e piramidës kufitare D-14/2, rreth 30 metra thellësi të territorit të Shqipërisë, dy ushtarakë serbë vranë me armë zjarri Ferid Ramadan Vllaçën, 31-vjeçar dhe plagosën Meflan Halilhoxhën 48-vjeçar nga fshati Pakishtë, rrethi i Kukësit.

Në njoftimin e TVSH-së thuhej se ishin takuar ekspertët e dy vendeve dhe se ata kishin konstatuar se të dy bashkëfashtarët ishin qëlluar në befasi dhe pa asnjë shkak derisa kullosnin bagëtinë në territorin shqiptar.

Këtë e vërtetuan edhe provat materiale në vend të ngjarjes, njollat e shumta të gjakut rreth 30 metra në thellësi të territorit shqiptar si dhe një numër gëzhojash të armëve automatike në përdorim të ushtrisë serbe pesë deri gjashtë metra në thellësi të territorit shqiptar.

Lajme të tjera:

UE – me forca speciale për raste krizash

Ushtrime të përbashkëta të forcave speciale detare shqiptare e amerikane

Procesi ndaj Nevzat Halilit vazhdon pasnesër

Edhe dy ish-policë mohuan akuzën në Gjilan

Gjykimi i ish-policëve shqiptarë në Prizren vazhdon më 25 maj

Vazhdon paraburgimi i veprimtarëve në Kaçanik

Përfundoi Festivali i dhjetë i filmit shqiptar

Në Stokholm mbahet seminari për çështjen shqiptare në Ballkan

Dy mësimdhënës të SHMT “M. Beçikemi” në Vushtrri u dënuan me nga 10 ditë burg

Bastisje të policisë serbe në komunën e Podujevës

Java e rinisë evropiane në Strasburg

Përkujtohet shkrimtari Rexhep Elmazi

Beogradi përpiqet të krijojë problemin e paqenë të serbëve në Shqipëri

Gazetat serbe paralajmërojnë vendosjen e 10 mijë refugjatëve serbë në Kosovë

Pandeli Majko: “Për Kosovën të gjithë jemi të një mendimi”

Mitrovicë: Një shqiptarë u mor për herë të tetë në polici

Në Kosovë një rast i etheve hemorragjike

16 maj 1997:

Lajm i plotë:

Vrasja e qytetarit nga Gurbardhi i Malishevës ende e pasqaruar

Pas vrasjes në rrethana të pasqaruara me armë zjarri më 13 maj të Kapllan Isuf Berishës (50), nga Gurbardhi i Malishevës, KI i Degës së LDK-së në Malishevë, sjell informata plotësuese.

I ndjeri në ditën kritike kishte dalë në fushë dhe nga persona të panjohur vritet me tre plumba nga pushka e gjuetisë, ndërsa trupi i tij është gjetur të nesërmen rreth orës 5:00.

Të afërmit e të ndjerit theksojnë se nuk dihet motivi i kësaj vrasjeje, pasi ai nuk kishte raporte të këqija me askënd.

Të përkujtojmë se viteve të fundit, policia serbe ka bastisur disa herë shtëpinë e të ndjerit Kapllan I. Berisha, si dhe e ka keqtrajtuar fizikisht me pretekst të kërkimit të armëve.

Pardje, policia serbe ua ka konfiskuar pushkët e gjuetisë katër vetave, ndërsa pronarët e tyre i ka urdhëruar që të paraqiten në polici. Bëhet e ditur se policia ka gjetur dy nga tre gëzhojat e plumbave me të cilët është vrarë Kapllani.

Lajm i plotë

Dhuna e përditshme në Kosovë

Gjilan: – Më 6 maj, policia serbe me pretekst të kërkimit të armëve kërkoi në shtëpitë e tyre babë e bir Nazim e Jakup Halitin nga Dobërçani.

Po këtë ditë, në stacionin e policisë serbe në Gjilan u mor në pyetje Sadri Daku, kryetar i Nëndegës VII të FR të LDK-së në Gjilan. Ai nga inspektorët serbë u pyet për një vizitë të tij kohë më parë në Shqipëri, si dhe u pyet për aktivitetin e Forumit të Rinisë. Atij iu kthye pasaporta e cila i qe marrë kohë më parë, ndërsa nga inspektorët serbë u kërcënua se në rast se vazhdon të merret me aktivitet do të likuidohet!

Pardje, në të ashtuquajturën bisedë informative u thirr edhe Naip Rexhepi, nënkryetar i Nendegës së LDK-së në Malishevë. Meqë ai nuk gjendej në shtëpi, policët serbë urdhëruan nënën e tij që Naipi të paraqitet në polici.

Lipjan: – Dje, policia serbe me pretekst të kërkimit të armëve ishte në shtëpinë e Elvis Selimit (20) në Banullë të Lipjanit. Meqë ai nuk gjendej në shtëpi, policia urdhëroi anëtarët e familjes së tij që Elvisi të paraqitet në stacionin e policisë serbe në Lipjan.

Njoftohet se Elvis Selimi është keqtrajtuar rëndë.

Istog: – Më 11 maj, policia serbe, me pretekst të dorëzimit të armëve mori në shtpinë e tyre babë e bir Hajriz e Hamdi Idrizajn nga Zhakovci, të cilët u dërguan në stacionin e policisë serbe në Istog. Nga Hamdiu policia kërkoi edhe një thikë, ndërsa më vonë edhe e keqtrajtoi fizikisht.

Po këtë ditë, në postkomandën e policisë serbe në Rakosh u mor në pyetje edhe Izet Haxhijaj nga Rakoshi.

Më 14 maj, policia mori në pyetje edhe Nexhmedin Haxhiaj (25) nga Rakoshi, i cili pa kurrfarë shkaku është keqtrajtuar fizikisht.

Pardje policia serbe mori në pyetje Nazmi Bytyçin, arkatar i KKF-së në Istog. Ai është pyetur kryesisht për punën e tij në KKF të Istogut, si dhe është urdhëruar që të paraqitet sërish më 16 maj në polici.

Vushtrri: – Dje, një patrullë e policisë serbe, me pretekst të kërkimit të armëve ishte në familjet e vëllezërve Beqir, Shaqir e Shaban Begu në Vushtrri. Ata u kërcënuan se nese nuk i dorëzojnë armët, policia do t’i kërkojë sërish.

Më 11 maj, policia serbe me pretekst se i ka dëmtuar pyjet, ishte në shtëpinë e Shaqir Asllanit në Beçuk. Ai u urdhërua që të paraqitet në polici së bashku me djalin e tij Sabriun, të cilët në polici u maltretuan rreth katër orë.

Mitrovicë: – Nga 30 prilli deri më 10 maj të këtij viti për çdo të dytën ditë është urdhëruar që të paraqitet në stacionin e policisë në Mitrovicë, Jetullah Hajdrai (42) nga lagjja Tavnik e Mitrovicës. Njoftohet se z. Hajdari po thirret me pretekst të dorëzimit të armëve.

Malishevë: – Gjatë muajit të kaluar policia sebe postkomandës së Kijevës dhe ajo e Rahovecit, me pretekst të kërkimit të armëve ishin në katër familje shqiptare.

Bëhet e ditur se në Drenoc të Malishevës janë bastisur dy familje, me të njëjtin pretekst, ndërsa gjatë muajit që shkoi policia ka kërkuar dhe ka mbajtur në stacionin e policisë nëntë veta nga kjo komunë.

Lajm i plotë:

Një qytetar nga Panorci i Malishevës u mor 25 herë në polici

Banush Sahitaj (60) nga Panorci, tash një kohë është në shënjestër të policisë serbe dhe ai deri tash është marrë në polici dhe është keqtrajtuar fizikisht rreth 25 herë, njofton KI i Degës së LDK-së në Malishevë.

Njoftohet se vitin e kaluar qytetarët serbë e malazezë ia kanë prerë mbi 1 hektar pyje, me pretekst se hapësira pyjore nuk ishte e tij!

Lajm të tjera:

Konferencë me gazetarë e kryetarit të Republikës dr. Ibrahim Rugova

Biseda rreth arsimit shqip në UNESCO

PE kërkon hapjen e Zyrës Informative në Prishtinë

KMDLNj: Në Kosovë, gjatë prillit, u vranë 3 dhe u keqtrajtuan 272 persona

Në Prishtinë filloi dënimi me burg i shqiptarëve që kanë blerë prona serbe

Parlamenti i Shqipërisë miratoi ligjin e zgjedhjeve, socialistët nuk morën pjesë në votim

Në Shqipëri krijohet Bashkimi për Demokracinë

U identifikua viktima e vetme e gjetur nga tragjedia e Otrantos

Shefi i ushtrisë serbe qëndroi në brezin kufitar me Shqipërinë

Festivali i recituesve “Presheva ’97” do të mbahet nga 22-24 maj

Mbahet Mitingu i 34-të i Poezisë

Tërmet në Shqipëri

Nga Instituti i Zveçanit inxhinierët shqiptarë largohen nga vendet e tyre të punës

16 maj 1998

Ora 14:30:

Lajm i plotë:

Forcat serbe vranë dy shqiptarë në Çitak të Skënderajt

Rifat Çitaku (55) dhe nipi i tij Muhameti (24) nga fshati Çitak u vranë dje rreth orës 10:00 nga pjesëtarët e forcave serbe që udhëtuan me një konvoj prej rreth 100 automjetesh nga Mitrovica në Skënderaj e pastaj në Rakosh të Istogut. Gjysh e nip u vranë pas shpine duke ikur nga pjesëtarët e forcave serbe.

Fadil Geci, kryetar i nëndegës së LDK-së në Llaushë i tha QIK-ut se forcat serbe ndërmorën dje prej orës 10 deri në 18:00 një aksion kundër fshatrave Çitak e Padalishtë. Z. Geci tha se për pasojat e aksionit në Padalishtë nuk ka të dhëna, ndërsa policia ka hyrë në fshatin Çitak dhe ka plaçkitur shtëpitë. Beqir Çitakut, i janë marrë dy vetura kombi Volsvagen me regjistrim dhe dokumente në rregull dhe çdo gjë e vlefshme në shtëpi. Beqirin e kanë marrë në stacion dhe e kanë kërkuar djalin e tij Naserin dhe i janë kërcënuar se gjoja në shtëpinë e tij po mban terroristë.

Geci tha se janë gjtuajtur me armë shtëpitë e Hysen, Bajram, Shaqir, Sadri, Hamdi, Halit dhe Hajzer Çitakut.

Në një njoftim të Degës së LDK-së në Skënderaj thuhet se policët serbë vepruan në fshatin Çitak në stilin e hajnave, duke vjedhë çdogjë me vlerë nga shtëpitë e Zenel Sadik Loshit, Adem Tahir Shalës, Imer Hasan Shalës, Xhevdet Kadri Loshit, Gani Shalës, Haxhi Metë Zeqirit dhe Alush Qazim Loshit, të cilit ia plaçkitën veturën e tipit “Golf dysh”.

Në këtë njoftim thuhet se me plumbë pushkësh është goditur shtëpia e Demë Hasan Loshit, por për fat të mirë nuk është vrarë kush.

Në shtëpinë e Adem Shalës, pas kryerjes së aksionit, policia serbe me shkronja shqipe ka shkruar “UQK”. Dyshohet se në mesin e policëve ka pasur edhe kolaboracionistë shqiptarë nga komuna e Istogut.

Varrimi i dy personave të vrarë do të bëhet sot në varrezat e fshatit Çitak në ora 15.

Lajme të tjera:

Nuk është i saktë pohimi i mediumeve serbe për tre shqiptarë të vrarë në Rakosh

Granatime të fshatrave Kopiliq, Turiçec e Vojnikë

Thyerje të lokaleve zejtare në Skënderaj

Gjendje e rëndë në Deçan – sërish të shtëna drejt Baballoqit

Në hyrje të Podujevës policia keqtrajton kalimtarët

Nuk lejohet hyrja e kamionëve me mall në Kosovë

Snajperistët serbë u vendosën në një shtëpi të pabanuar në afërsi të Rahovecit

Rahovec: Policia serbe kidnapoi familjen shtatanëtarëshe të Zeqir Krasniqit

Në Rahovec nuk u mbajt protesta gjithëpopullore

Policët serbë shtinë në drejtim të fëmijëve

Kaçanik: Midis fshatrave Gërlicë e Epërme dhe Gabrricë policia serbe ka shtënë me armë zjarri

Lajm i plotë:

Bahri Fazliu u vra më 7 maj në Plavë

Në zonën e kufirit me Shqipërinë, në Plavë, më 7 maj është vrarë Bahri (Rrahman) Fazliu nga fshati Llaushë i komunës së Podujevës.

Siç njoftoi mbrëmë Televizioni Shqiptar, Bahriu ishte anëtar i Lëvizjes Kombëtare për Çlirimin e Kosovës dhe i Ushtrisë Çlirimtare të Kosovës. Në njoftim thuhej se ai ra heroikisht duke luftuar me forcat e agresorit serb.

Në njoftim thuhet se varrimi i tij do të bëhet në vendlindjen e tij, në Llaushë të Podujevës, pranë eshtrave të vëllait të tij Fahriut, i cili po ashtu ra heroikisht në vitin 1989, ndërsa për këtë opinioni do të njoftohet me kohë.

Organet e ushtrisë jugosllave Bahri Fazliun e kishin identifikuar si Fatmir Gashi. Trupi i tij pa jetë është mbajtur disa ditë në morgun e spitalit në Berane të Malit të Zi.

Ndërkohë, gazeta “Bujku” njofton sot se trupi i pajetë i Bahri Fazliut është varrosur pardje në varrezat e fshatit Vuthaj të komunës së Plavës me të gjitha nderimet tradicionale të shqiptarëve të kësaj ane.

Lajme të tjera:

Në protestën gjithëpopullore në Prishtinë morën pjesë rreth 100 mijë shqiptarë

Aeroplanët vëzhgues amerikanë “avaks” mbi territorin e Maqedonisë

Në Gostivar u varros polici maqedonas që ka luftuar në Drenicë

Shtatëvjeçari i plagosur – në shok dhomë

Të shtëna sporadike në Morinë, Ponoshec e Smolicë

Drejtuesit e Zyrës së Republikës së Kosovës në Bruksel u prit Senatin e Belgjikës

Raport mbi shkeljen e të drejtave dhe të lirive të njeriut në Kosovë gjatë muajit prill 1998

Të shtëna të policisë serbe midis fshatrave Gërlicë e Epërme dhe Gabrricë

UPSUP e çmon të papranueshëm dialogun pa ndërmjetësim ndërkombëtar

Civilët serbë keqtrajtuan dy të rinj shqiptarë

Policët serbë rrahën Bekim Sumën në Han të Elezit

Lajmet

Vizita e Marta Kos në Prishtinë: BE kërkon stabilitet politik, Kurti insiston në statusin e kandidatit

Published

1 day ago

May 15, 2026

UBTNews

Komisionarja e Bashkimit Evropian për Zgjerim, Marta Kos, ka zhvilluar vizitën e saj të parë zyrtare në Kosovë, ku ka përcjellë një mesazh të qartë për spektrin politik që të gjejnë një gjuhë të përbashkët për t’i dhënë fund ngërçit të gjatë institucional dhe për të formuar institucione të qëndrueshme pas zgjedhjeve të qershorit. Gjatë qëndrimit në Prishtinë, Kos u prit fillimisht nga ushtruesja e detyrës së presidentit, Albulena Haxhiu, dhe më pas zhvilloi një takim me kryeministrin në detyrë, Albin Kurti.

Në një konferencë të përbashkët për media me kryeministrin në detyrë, komisionarja Kos vuri theksin te rëndësia e stabilitetit të brendshëm për procesin e integrimit evropian. Ajo bëri një thirrje të qartë për të gjithë aktorët politikë që të gjejnë një mënyrë për të kthyer stabilitetin institucional dhe kërkoi që, pas formimit të Kuvendit të ri, liderët të bashkohen për të zgjedhur edhe presidentin e ri përmes kompromisit.

Kos vlerësoi se Kosova ka një perspektivë të madhe evropiane dhe deklaroi se nuk ka siguri në Evropë pa Kosovën. Megjithatë, ajo tërhoqi vërejtjen se përsëritja e shpeshtë e zgjedhjeve ka krijuar një vit të humbur më 2025, duke ngadalësuar reformat kyçe dhe duke rënduar buxhetet shtetërore. Vizita e saj vjen në prag të zgjedhjeve të parakohshme parlamentare të caktuara për 7 qershor, të cilat janë të tretat me radhë që nga fillimi i vitit 2025.

Nga ana tjetër, kryeministri në detyrë, Albin Kurti, e cilësoi takimin si produktiv dhe të drejtpërdrejtë, duke e shfrytëzuar rastin për të ngritur sërish çështjen e statusit të vendit kandidat dhe hapjen e negociatave me bllokun.

Kurti kujtoi se kanë kaluar mbi 40 muaj që kur Kosova ka aplikuar për anëtarësim dhe se mbështetja publike për BE-në në vend qëndron vazhdimisht rreth 90%, duke qenë ndër më të lartat krahasuar me vendet e tjera. Ai po ashtu paralajmëroi se vakumi që lë Bashkimi Evropian në rajon synohet të mbushet nga aktorë të tjerë dashakeq që minojnë vlerat evropiane dhe rrezikojnë sigurinë e përbashkët, prandaj kërkoi që BE-ja të shtyjë përpara unitetin e brendshëm për avancimin e merituar të Kosovës.

Kosova mbetet vendi i vetëm në Ballkanin Perëndimor që ende nuk e ka marrë statusin e vendit kandidat që nga aplikimi i saj më 15 dhjetor të vitit 2022. Përveç krizës së brendshme politike, një nga pengesat kryesore për përparimin e saj mbetet mosnjohja e pavarësisë nga pesë shtetet anëtare të bllokut, që janë Greqia, Spanja, Rumania, Sllovakia dhe Qiproja.

Kjo ishte vizita e parë e Marta Kosit në Kosovë që nga marrja e mandatit të saj në Komisionin Evropian më 1 dhjetor 2024. Që nga ajo kohë, ajo kishte vizituar të gjitha shtetet e tjera të përfshira në procesin e zgjerimit, ndërsa mungesa e një vizite në Prishtinë gjatë vitit 2025 ishte arsyetuar nga zyrtarët evropianë me krizën politike dhe mungesën e institucioneve funksionale.

Lajmet

REL: Shqipëria bëhet gati për të dërguar trupa në Gazë

Published

1 day ago

May 15, 2026

UBTNews

Shqipëria po përgatitet për t’u angazhuar në Rripin e Gazës, në kuadër të Forcës Ndërkombëtare të Stabilizimit.

Ministri i Mbrojtjes i Shqipërisë, Ermal Nufi tha në një konferencë për mediat në Tiranë se një skuadër shqiptare ka parë situatën në terren.

“Në kuadër të angazhimit në Bordin e Paqes, Shqipëria ka marrë masa për shqyrtimin e situatës në Gaza. Rripi i Gazës është nën sigurinë e Forcave të Mbrojtjes së Izraelit [IDF] dhe çdo lloj inspektimi trupash atje bëhet përmes Forcës Ndërkombëtare Stabilizuese dhe ushtrisë izraelite. Kemi dërguar një skuadër për të parë nga afër vendndodhjen dhe situatën në terren, që të kuptojmë se ku dhe si mund të vendosemi”, u shpreh ai.

Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Rripin e Gazës.

Nufi bëri të ditur se Shtabi i Përgjithshëm i Forcave të Armatosura të Shqipërisë ka përgatitur planin konkret që pritet të zhvillohet në disa nivele dhe faza sa i përket angazhimit të Shqipërisë në Gazë, por nuk zbuloi më shumë rreth tij.

Shefi i Shtabit të Përgjithshëm, Arben Kingji, tha se aktualisht Shqipëria është në fazën e procedimit dhe hartimit të praktikës dhe dokumenteve ligjore për dërgimin e trupave në mision.

“Shtabi i Përgjithshëm po bën vlerësimin e saktë në lidhje me misionin, detyrat, sigurinë e personelit, rregullat e angazhimit dhe mbështetjen logjistike. Kontingjenti i parë shqiptar që mund të dislokohet në Gazë do të jetë pjesë e shtabit të Forcës Ndërkombëtare Stabilizuese, ndërsa më pas do të shqyrtohet mundësia e një kontributi më të gjerë me trupa”, u shpreh Kingji.

Në fillim të majit u bë e ditur se një ekip ushtarësh të Kosovës është dërguar në Gazë, për të bërë vlerësimin e vendit ku do të veprojë si pjesë e misionit paqeruajtës.

Ministri Nufi theksoi se Shqipëria mbetet një aleate e palëkundur e NATO-s dhe një partnere aktive në sigurinë rajonale dhe ndërkombëtare.

Duke folur për bashkëpunimin në fushën e mbrojtjes mes Shqipërisë, Kosovës dhe Kroacisë – shtete që kanë nënshkruar një deklaratë bashkëpunimin në fushën e sigurisë dhe mbrojtjes vitin e kaluar – po hyn në një fazë më konkrete, me zhvillimin e tre stërvitjeve të përbashkëta ushtarake gjatë këtij viti.

“Dy stërvitje do të zhvillohen në Kroaci ku jemi në fazën e planifikimit, kemi dhënë dakordësinë për t’u zhvilluar stërvitjet. Po kështu, një stërvitje do të zhvillohet në Shqipëri. Nuk do të jenë vetëm tre shtete pjesëmarrëse [Shqipëri-Kosovë-Kroaci], por do të ketë edhe shtete të tjera nga NATO-ja, qoftë edhe shtete partnere me të cilat bashkëpunojmë”, tha Kingji.

Bashkëpunimin mes Prishtinës, Tiranës dhe Zagrebit, Serbia e sheh si aleancë kundër serbëve dhe Serbisë – pretendim që është hedhur poshtë nga shtetet nënshkruese të deklaratës për bashkëpunim.

Po ashtu, autoritetet e mbrojtjes bënë të ditur se Shqipëria ka nisur zyrtarisht përgatitjet për organizimin e samitit të NATO-s që do të mbahet vitin e ardhshëm në Tiranë.

“Kemi ngritur një task-forcë për zhvillimin e samitit të NATO-s. Nuk e kemi ende të përcaktuar vendndodhjen e samitit, por NATO merr masa të jashtëzakonshme sigurie për organizimin e këtyre ngjarjeve”, deklaroi ministri i Mbrojtjes i Shqipërisë, Ermal Nufi. /REL/