Lajmet

​Ibishi: Kosova detyrimisht duhet të blejë armatime të reja

Ai tha se Kosova duhet të pajiset me të gjitha armët në mënyrë që Kosova në të ardhmen të jetë e gatshme të mbrojë sovranitetin e vendit.

Publikuar

Serbia po armatoset çdo ditë e më shumë jo vetëm me armë mbrojtëse por edhe me armë sulmuese. Ndërsa, së fundmi ka propozuar edhe rikthimin e shërbimit ushtarak të detyrueshëm. Në këtë situatë, të nevojshme blerjen e armëve e ka edhe Kosova, jo për qëllim sulmues, por për të prodhuar paqe dhe siguri në vend. Kështu ka vlerësuar eksperti i sigurisë, Nuredin Ibishi, i cili tha se Ministria e Mbrojtjes duhet të pajiset me të gjitha armët në mënyrë që Kosova në të ardhmen të jetë e gatshme të mbrojë sovranitetin e vendit.

Ibishi në një intervistë ka përmendur edhe sulmet e fundit të cilat po ripërsëriten në veri të Mitrovicës. Ai theksoi se edhe pse janë kacafytje në mes të qytetarëve serbë, ato duhet të parandalohen nga Policia e Kosovës sepse të njëjtat mund të ngritin tensione në vend. Ibishi ka komentuar edhe propozimin e Serbisë për të rikthyer shërbimin ushtarak të detyrueshëm, derisa shton se shteti serb ka blerë armatime nga më të ndryshme por se i mungon faktori njeri dhe se vet ajo e ka pranuar një gjë të tillë.

Hedhja e granatës në veri të Mitrovicës, sipas ekspertit të sigurisë, Ibishi edhe pse ka qenë një situatë në mes të serbëve, ka efektin e ngritjes së tensionit në vend.

“Këto janë hapje hesapesh në mes grupeve, pra të komunitetit serb në veriun e Mitrovicës, por normal që policia duhet të kryej punën e vet edhe në aspektin e parandalimit të këtyre veprave, por edhe zbulimit dhe ndërmarrjeve të masave rreth zënies dhe procedimit të tyre, në procedurën e prokurorit dhe gjykatësit. … Këto i menaxhon mirë policia, edhe vet rasti, reagimi dhe pra procedimi më tej në zbulim të rastit, pasi që ushtrojmë kontrollin e plotë edhe në aspektin e mbajtjes së qetësisë publike por edhe sigurisë personale. Normal këto janë momente në pamundësi parandalimi, këto janë si rrjedhojë e ndarjes së hesapeve të grupeve të caktuara të mëhershme kriminale që kanë akoma efekte, pra të ngritjes së tensioneve, realisht përdorimi i granatës përfundon me pasoja të lëndimeve të rënda, të një personi dhe plagosjen tjetër. Kjo tregon një situatë akoma që policia ka punë si në parandalim edhe në qasje të reagimit në kuptim të ndalimit të këtyre veprave”, tha Ibishi.

Po ashtu, Ibishi ka thënë se Serbia ka propozuar rikthimin e shërbimit ushtarak për shkak se asnjë qytetarë serbë nuk është i gatshëm të sakrifikohet më sikur në kohën e Millosheviqit. Ai theksoi se Serbia e ka bërë vlerësimin e situatës dhe për këtë arsyeje ka kërkuar trupa shtesë për ushtri.

“Serbia çdoherë e bënë vlerësimin e situatës me qëllim të ngritjes të kapaciteteve njerëzore, pasi që ato i mungojnë. Nga pjesa që kanë deri 30,000 forca të armatosura, aktive nuk i kanë as 20,000 mijë, mandej pjesën rezervë nuk e kanë ende, që 13 vite e kanë hequr nga sistemi çështjen e shërbimit të detyrueshëm ushtarak. Kanë blerë armatim gjithandej, kanë investuar dhe në pajisje dhe armatim luftarak edhe nga perëndimi dhe lindja dhe Rusia, Kina, Irani. Mungesa e faktorit njeri, tashmë ata kanë vërejtur ngase njerëzit me të gjitha këto kërcënime që i bëjnë ndaj Kosovës, askush nuk është i gatshëm, të sakrifikohet më, sikur në kohën e Millosheviqiçit… Ajo vet deklarohet që ka mungesë të konsiderueshme, gati 1/3 i mungon nga pjesa aktive e forcës së armatosura, këtë boshllëk mundohet të përmbush me shërbim të detyrueshëm ushtarak”, theksoi Ibishi.

Ndërkaq sa i përket armatimeve të ushtrisë së Kosovës, Ibishi tha se Kosova është dashur të pajiset qysh moti me sistem raketor.

“Forca e Sigurisë së Kosovës pajiset çdoherë dhe ajo është në planin e zhvillimit lidhur me armatimin luftarak, ndër to është kjo një sistem i raketës (antiblin) që është treguar i suksesshëm në luftimet mes Rusisë dhe Ukrainës, nga ana Ukrainës dhe është treguar shumë efektive dhe mendoj që detyrimisht, është dashur të pajisemi më herët por kemi pasur një model të ngjashëm nga Turqia, me këtë pajisje t’i bëjmë me dije Serbisë që nëse mendon dhe një herë të ndërhyj në Kosovë, do të ballafaqohet me një sistem të kundërvënies, reagimit të shpejt. Edhe, shoferët sikur paralajmëron të autoblindave vështirë ka t’i integrojë në sistem ngase ata ia dinë frikën nga një sistem i tillë raketor (antiblin)”, shtoi Ibishi.

Ministria e Mbrojtjes së Kosovës ka bërë të ditur se përveç 246 raketave kundërtanke të tipit “Javelin”, ka bërë kërkesë për blerjen edhe të armëve të tjera nga SHBA-ja.

Lajmet

Kryetari i Bashkisë së Portos, Rui Moreira, nderohet nga UBT me çmimin “Leadership Excellence Award”

Publikuar

nga

Në një ceremoni të mbajtur me rastin e ndarjes së Çmimit Tradicional të UBT-së “Leadership Excellence Award”, kryetari i Bashkisë së Portos, Rui Moreira, u nderua për kontributin e tij të shquar në zhvillimin dhe udhëheqjen e qytetit të Portos.

Vendimi për të ndarë këtë çmim u mor nën patronatin e Presidentit të UBT-së, Prof. Dr. Edmond Hajrizi, dhe u bë i ditur nga Këshilli Akademik i Universitetit.

Rektori Hajrizi u përqendrua në rëndësinë e roli të liderëve në përmirësimin e jetës shoqërore dhe zhvillimin e komuniteteve gjatë një deklarate të tij të fundit. Ai vlerësoi kontributin themelor të kryetarit Rui Moreira në avancimin dhe transformimin e qytetit të Portos, duke e cilësuar atë si një model frymëzimi për liderët e tjerë në Evropë dhe më gjerë.

Hajrizi theksoi se kryetari Moreira ka shërbyer si një shembull i mirë për të treguar se si një lider mund të ndikojë në zhvillimin e qytetit dhe të kontribuojë në rritjen e cilësisë së jetës për banorët e tij. Ai gjithashtu e përshkroi kryetarin si një person frymëzues për të tjerët, duke inkurajuar liderët e tjerë të marrin masa dhe të promovojnë inovacionin dhe përparimin në komunitetet e tyre.

Në këtë kontekst, rektori Hajrizi theksoi se bashkëpunimi dhe shkëmbimi i përvojave me liderë të suksesshëm si Rui Moreira ka qenë një nga elementët kyç për suksesin dhe avancimin e UBT-së si një universiteti i inovacionit dhe arsimit të lartë në Kosovë dhe rajon.

Në anën tjetër, kryetari Rui Moreira, duke pranuar këtë çmim të lartë, shprehu mirënjohjen e tij për njohjen e dhënë dhe theksoi rëndësinë e bashkëpunimit të ngushtë mes institucioneve akademike dhe autoriteteve lokale.

Rui Moreira theksoi se UBT është një institucion i arsimit të lartë që ndihmon në promovimin e një shoqërie të bazuar në dije dhe zhvillimin e kapitalit njerëzor për të krijuar prosperitet dhe cilësi të jetës për popullatën. Ai vlerësoi rolin e UBT-së si një nga institucionet më inovative jo vetëm në Kosovë, por edhe në rajonin e gjerë.

UBT, sipas kryetarit Moreira, është një universitet prestigjioz që ka një rol kyç në përmirësimin e cilësisë së arsimit dhe në zhvillimin e një mjedisi të përshtatshëm për rritjen e aftësive akademike dhe profesionale të studentëve të saj. Ky institucion është konsideruar si një shembull i suksesshëm për inovacionin dhe përparimin e arsimit të lartë në rajon.

“UBT është padyshim një nga institucionet më inovative të arsimit të lartë, jo vetëm në Kosovë por në rajon. Është një universitet prestigjioz me rëndësi qendrore për rajonin, domethënë për promovimin e një shoqërie të bazuar në njohuri dhe trajnimin e kapitalit njerëzor të aftë për të gjeneruar prosperitet, qëndrueshmëri dhe cilësi të jetës për popullatën”, u shpreh Moreira, kryetari i Portos.

Ky akt nderi tregon për respektin dhe vlerësimin e shfaqur ndaj kontributit të kryetarit Moreira në përmirësimin e jetës urbane dhe si model tek qytetarët për zhvillim të qëndrueshëm dhe frymëzim të tjerëve në fushën e udhëheqjes./UBTNews/

 

Vazhdo të lexosh

Lajmet

OKB: Firmat që dërgojnë armë në Izrael mund të konsiderohen bashkëpunëtore në abuzime

Publikuar

nga

Një grup ekspertësh të Organizatës së Kombeve të Bashkuara kanë paralajmëruar prodhuesit e armëve dhe municioneve që të mos marrin pjesë në dërgimin e armëve në Izrael, teksa thonë se kjo mund t’i bëjë ata bashkëpunëtorë në abuzimet e të drejtave të njeriut dhe shkeljet e ligjit ndërkombëtar.

Grupi prej 30 ekspertësh, duke përfshirë disa raportues të posaçëm të OKB-së, tha se prodhuesit e armëve që furnizojnë Izraelin duhet të ndalojnë transferimet e tyre të materialit luftarak “edhe nëse ato ekzekutohen sipas licencave ekzistuese të eksportit”.

“Këto kompani, duke dërguar armë, pjesë, komponentë dhe municione për forcat izraelite, rrezikojnë të jenë bashkëpunëtore në shkelje të rënda të të drejtave ndërkombëtare të njeriut dhe ligjeve ndërkombëtare humanitare”, thanë ekspertët në një deklaratë./UBTNews/

Vazhdo të lexosh

Lajmet

Konjufca në SEECP: Kosova të njihet nga të gjitha vendet e Evropës Juglindore

Publikuar

nga

Kryetari i Kuvendit të Kosovës, Glauk Konjufca, mori pjesë në seancën e 11-të plenare të Asamblesë Parlamentare të Procesit të Bashkëpunimit të Evropës Juglindore (SEECP PA) në Shkup.

Konjfuca tha se vizioni për bashkëpunim dhe për arritje të aspiratave të përbashkëta përmban ndër të tjera në vetvete edhe njohjen e Kosovës nga të gjitha vendet e këtij rajoni, në mënyrë që t’i hapet rruga e bashkëpunimit të plotë.

Ai theksoi nevojën për të mbështetur aspiratën e Kosovës për anëtarësim në struktura ndërkombëtare, duke përfshirë edhe Këshillin e Evropës, në frymën e përkushtimit për një rajon sa më të bashkuar.

“Një gjë e tillë u arrit më herët me liberalizimin e vizave për qytetarët e vendit tonë, gjë për të cilën jemi mirënjohës dhe kjo duhet të përsëritet, në frymën e të ardhmes së përbashkët”, tha Konjufca.

Ai potencoi se sulmi terrorist në Banjska më 24 shtator 2023 ishte goditje e rëndë jo vetëm për bashkëpunimin, por edhe për sigurinë dhe stabilitetin rajonal, andaj ky akt duhet dënuar nga të gjithë pa përjashtim, ndërsa përgjegjësit që po strehohen dhe mbrohen nga Serbia duhet të vihen përballë drejtësisë.

Pa këto qëndrime dhe veprime, do të jetë e vështirë të arrihen synimet e SEECP”, tha Konjufca.

Në vazhdim të fjalës së tij kryetari i Kuvendit të Kosovës potencoi përparimin e jashtëzakonshëm që ka bërë Kosova në zhvillimin ekonomik dhe shoqëror, në qeverisjen demokratike dhe të drejtat e njeriut, në luftën kundër korrupsionit, në rritjen e transparencës dhe llogaridhënies.

“Strategjia për Evropën Juglindore 2030 duhet të përmbushë premtimin e saj për të mos lënë askënd pas dhe për të nxitur një rajon ku çdo shtet mund të lulëzojë”, tha ai.

Në përmbyllje të punimeve të seancës së 11-të plenare të Asamblesë Parlamentare të Procesit të Bashkëpunimit të Evropës Juglindore pjesëmarrësit dolën me një deklaratë të përbashkët finalizuese.

Vazhdo të lexosh

Lajmet

Forumi Ekonomik Kosovë – Portugali në UBT: Vizioni për inovacion dhe zhvillim ekonomik  

Publikuar

nga

Forumi Ekonomik Kosovë – Portugali me temë “Roli i arsimit në rritjen dhe zhvillimin ekonomik”, u mbajt më 20 qershor në Kampusin Inovativ të UBT-së në Lipjan. Ky forum mblodhi figura të shquara nga fusha e arsimit dhe zhvillimit ekonomik, të cilët diskutuan mbi rëndësinë e arsimit në promovimin e rritjes dhe zhvillimit ekonomik.

Folësit kryesorë ishin Elvira Fortunato, Prorektore e Universitetit NOVA, Edmond Hajrizi, Rektor i UBT-së, Rodrigo Martins, President i Akademisë Evropiane të Shkencave, Nelson Fernandes, Komisioner nga Dhoma Ekonomike Evropiane EEIGCham dhe Rui Vinhas da Silva, Drejtor për Zgjerimin Global, Studime Ekzekutive ISCTE.

Rektori i UBT-së, Edmond Hajrizi, foli për rëndësinë e inteligjencës artificiale në përdorimin e njohurive ekzistuese dhe nevojën për të vazhduar kërkimet dhe testet në fusha të ndryshme për të përparuar teknologjinë. Ai theksoi se teknologjia është e domosdoshme për të përshpejtuar proceset dhe për të rritur volumet, por theksoi gjithashtu se arsimimi dhe kompetenca e njerëzve janë kyçe për rritje dhe zhvillim.

Rektori Hajrizi gjithashtu foli për rëndësinë e revolucioneve konvergjente, ku bashkimi i njohurive ekzistuese krijon njohuri të reja, dhe për rolin e uljes së kostos së teknologjisë në nxitjen e kreativitetit dhe përfshirjen e vendeve të vogla në zhvillimin global. Hajrizi thekson gjithashtu rëndësinë e sistemit dhe kompleksitetit të ri në zhvillim, e që sipas tij kjo nuk mund të ndodh nëse nuk i çojmë përpara gjërat.

“Zhvillimi nuk mund të ndodhë nëse nuk i çojmë përpara gjërat. Niveli i përparimeve ka nevojë për sisteme të reja dhe kompleksitet të ri, dhe kjo është diçka me të cilën duhet të merremi. Nuk është e lehtë. Njerëzit sot po jetojnë më mirë dhe nuk duan të punojnë në punë fizike. Kjo është një sfidë. Jetojmë më mirë, duam të rritemi dhe të kemi një cilësi më të mirë jete, por ndonjëherë kemi ende nevoja bazë që duhen përmbushur. Ky është një kompleks interesant për t’u zgjidhur dhe për të gjetur se si do ta bëjmë këtë”, theksoi rektori i UBT-së, Edmond Hajrizi.

Elvira Fortunato, Prorektore e Universitetit NOVA, theksoi se mentaliteti dhe pjesa e problemit qëndrojnë brenda nesh, jo brenda industrive apo shoqërive. Ajo nënvizoi nevojën që universitetet dhe institucionet politeknike të angazhohen më shumë me botën reale dhe të lënë pas kulla e fildishtë. Një pjesë e madhe e problemit, sipas saj, është mungesa e komunikimit efektiv.

“Sigurisht, jemi këtu për të zgjidhur problemet. Për shembull, kemi një problem të madh sepse nuk komunikojmë siç duhet. Ne thjesht informojmë. Problemi është se jemi të dobët në komunikim. Në dy vitet e fundit, në funksionin tim të mëparshëm, kam pasur privilegjin të udhëtoj shumë, për shembull, në Portugali. Kam zbuluar shumë gjëra të reja, shumë kompani të reja dhe startup-e. Këto gjëra nuk janë të njohura. Duhet të diskutojmë më shumë dhe të promovojmë këto ambiente, jo vetëm brenda universiteteve, por edhe brenda rajoneve dhe komuniteteve. Duhet të jemi më të angazhuar dhe të përfshirë. Ky është mesazhi im kryesor”, u shpreh Fortunato.

Rodrigo Martins, President i Akademisë Evropiane të Shkencave, vuri në dukje se për të realizuar çdo projekt, nevojiten fonde. Ai është krenar për kontributin e tij në hartimin e strategjive që lejojnë universitetet të angazhohen në mësim dhe kongrese. Ndërsa strategjitë dhe kurset tradicionale janë të rëndësishme, kreativiteti dhe inovacioni shpesh mungojnë dhe kërkojnë rrjetëzim.

“Ideja është të identifikohen fushat strategjike dhe të krijohen rrjete bashkëpunimi. Ky është një pilot-projekt dhe është i hapur tani për të aplikuar. Mendoj se Kosova mund të përfitojë nga kjo. Qëllimi nuk është të jemi të izoluar, por të krijojmë rrjete në katër fusha që Europa i konsideron kritike: ndërtimi, lëvizshmëria, energjia dhe elektronika. Këto fusha janë të rëndësishme për zhvillimin dhe përmirësimin e teknologjisë. Projekti është i hapur për aplikime dhe mund të gjeni strategjitë dhe mundësitë e rrjetëzimit në fushën e materialeve të avancuara. Qëllimi nuk është të jemi të izoluar, por të përziejmë dhe të zhvillojmë bashkëpunime efektive, duke respektuar fondet dhe duke u përqendruar në krijimin e vlerës”, vlerësoi Martins.

Në fund të Forumit Ekonomik Kosovë – Portugali mbi temën “Roli i arsimit në rritjen dhe zhvillimin ekonomik”, u zhvillua një sesion i pyetjeve dhe përgjigjeve me pjesëmarrësit.

Diskutimet u përqendruan në çështje të ndryshme si: “Roli i inteligjencës artificiale në arsim dhe zhvillim ekonomik, Nevoja për bashkëpunim më të ngushtë mes institucioneve akademike dhe sektorit privat, Rrjetëzimi dhe inovacioni në fushën e materialeve të avancuara dhe teknologjisë. Mënyrat për të përmirësuar komunikimin dhe përfshirjen e komunitetit në inovacione dhe startup-e”.

Pyetjet dhe diskutimet ofruan një platformë për të theksuar sfidat dhe mundësitë për të ardhmen e arsimit dhe zhvillimit ekonomik në Kosovë dhe më gjerë./UBTNews/

DIONESA EBIBI

Vazhdo të lexosh

Të kërkuara