Lajmet

Vendosja e reciprocitet për targat me Serbinë, kërkohet që Kosova t’iu bëjë ballë trusnive

Njohësit e sigurisë kërkojnë që Qeveria e Kosovës të jetë konsistente.

Published

5 years ago

September 20, 2021

Betim Gashi

Vendosja e masës së reciprocitetet me Serbinë për targat e automjeteve nuk pritet ta destabilizojë situatën në veri të Kosovës. Kështu të paktën po vlerësojnë njohësit e sigurisë, të cilët këtë masë po e konsiderojnë si veprim të duhur, por edhe pak të ngutshëm. Ata kërkojnë që Qeveria e Kosovës të jetë konsistente dhe mos ta tërheqë këtë masë përkundër çdo lloj trusnie, qoftë edhe nga Bashkimi Evropian apo dikush tjetër.

Në bazë të vendimit, nga sot obligohet që të gjitha automjetet që mbajnë targa të Serbisë dhe hyjnë në Kosovë, të pajisen me targa të përkohshme. Sipas këtij vendimi, pajisja me këto targa bëhet në të gjitha pikat kufitare të Kosovës.

Targat duhet të vendosen në vende të dukshme dhe për pajisjen me këto targa duhet paguar taksa prej 5 eurove. Vlefshmëria e tyre është 60 ditë.

Njohësi i çështjeve të sigurisë, Nuredin Ibishi derisa e konsideron si vendim të duhur vendosjen e masës së reciprocitetet me targat e automjeteve me shtetin serb, thotë se nuk ka kurrfarë arsye që të destabilizohet situata në pjesën veriore.

Sipas tij, pas këtij veprimit, UNMIK-u do të bëjë presion që të vazhdohet regjistrimi i automjeteve me tabelat KS.

“Nuk ka kurrfarë shkaku apo arsye të destabilizohet situata, organet e rendit kryejnë detyrat e veta, kanë të drejtë që kushdo qoftë të protestoj në këtë rast edhe serbët por realisht puna po kryhet ashtu siç duhet dhe ta duhet t’i pëlqejnë apo respektojnë ato masa çfarë janë bërë. Nuk ka ndalesa në kufi kurrfare, atyre iu jepet mundësia që menjëherë të zëvendësojnë tabelat dhe të vazhdojnë rrugëtimin e tyre…..Vendim shumë të duhur dhe mendoj se duhet vetëm të jetë konsistent, vendimi mos të bie në trusni, qoftë nga BE apo edhe dikush tjetër, sidomos UNMIK-u që do kërkoj vazhdimin e regjistrimit të tabelave KS, por përfundimisht të merret një qëndrim dhe ai të jetë një masë e reciprocitetit, sepse tash me siguri priten edhe masa të tjera çfarë ka premtuar kjo parti në fazën e fushatës”, theksoi Ibishi.

Ibishi po ashtu thotë se nuk është e drejtë nga Bashkimi Evropian që Kosovës t’i bëjë presion që të mos shkaktojë tensionet, pasi këto tensione po shkaktohen nga pjesëtarët serbë që janë të lidhur me Qeverinë e Serbisë.

Eksperti i sigurisë, Nuredin Ibishi vlerëson se Kosova ka kapacitet për të mbikëqyrë këtë masë.

“Është jo ferr edhe nga Bashkimi Evropian dhe të tjerët që të ulen tensionet, tensionet duhet të ulen nga reagimet e komuniteti serb në Kosovë me përfaqësuesit e Beogradit, Lista Srpska dhe establishment tjetër por edhe reagimet e Serbisë që pa asnjë nevojë reagojnë duke thirr Këshillin e Sigurisë dhe mundësinë çfarë ata shpesh bëjnë me çështjet të koncentrimit të forcave në kufi…I ka të gjitha kapacitetet mendoj se ka qenë neglizhencë që ajo nuk ka vepruar ose ka qenë në trusni qoftë të Kombeve të Bashkuara gjegjësisht UNMIK-ut që çdoherë ka vazhduar prej një mandate në mandate në tjetri me tabela KS”, u shpreh ai.

Ndonëse e përkrah si vendim, eksperti tjetër i sigurisë, Drizan Shala, vendosjen e masës së reciprocitetit ndaj Serbisë sa i përket targave të automjeteve, e konsideron të ngutshëm.

Shala thotë se me këtë vendim më të atakuarit janë banorët shqiptar që jetojnë në Luginën e Preshevës, për të cilët kërkoi që të lirohen nga kjo masë.

“Mendoj se është veprimi drejtë sa i përket masës së ndërmarrë nga Qeveria për reciprocitet sa i përket targave, por është mirë që ky veprim të ishte marr në një interval kohor të mëvonshëm sepse jemi në proces të dialogut, kemi një fushatë zgjedhore të nivelit lokal kemi shumë çështje të padefinuar sa i përket kësaj mase të reciprocitetit ku ne kemi shumë qytetar tanë të Luginës të cilët më se janë të atakuar në mënyrë të drejtpërdrejt sa i përket kësaj mase. Një veprim i ngutshëm por i drejtë nga ana e ministrisë së Punëve të Brendshme. Tash mendoj se duhet të ulen tensionet dhe vendimit të revidohet apo të gjenden disa alternativa që të gjithë ata qytetar të Kosovë që jetojnë në Luginë Preshevë, Medvegj targat e tyre të mos atakohen nga kjo masë e reciprocitetit. Ndërsa, sa i përket pjesës më të madhe të shtetit serb është mirë që të zbatohet kjo masë”, theksoi ai.

Pas vendimit të Qeverisë së Kosovës përmes të cilit ka nisur zbatimi i masës së reciprocitetit, sa i përket targave të Serbisë, Bashkimi Evropian u bëri thirrje të dyja palëve që të ndërmarrin masa, në mënyrë që të ulen tensionet në veri të Kosovës.

Në anën tjetër në pikat kufitare në Jarinjë dhe Bërnjak këtë masë e kanë kundërshtuar qytetarë të shumë serbe duke vendosur kamionë në rrugë, ndërsa qysh në mëngjes në këto vendkalime kufitare kanë dal edhe njësia speciale e Policisë së Kosovës.

Ndërsa, tash e sa vitet qytetarët e Kosovës që kalonin në pikat kufitare të Serbisëështë dashur t’i heqin targat e tyre ‘RKS’ dhe të vendosin targa të përkohshme.

lajme

30 për qind bursë për ish-studentët e UBT-së në programet më inovative Master – regjistrohu sot!

Published

14 hours ago

August 12, 2026

ubtnews

UBT po u ofron të gjithë të diplomuarve të tij një mundësi të veçantë për të vazhduar rrugëtimin akademik dhe profesional, duke përfituar 30% bursë për studimet Master në UBT.

Në një treg pune që po ndryshon me shpejtësi, avancimi i vazhdueshëm profesional po bëhet gjithnjë e më i rëndësishëm. Për këtë arsye, ish-studentët e UBT-së kanë mundësinë të rikthehen në universitet për të thelluar njohuritë, fituar specializime të reja dhe zhvilluar kompetenca të avancuara, tashmë me një përfitim të veçantë prej 30% bursë.

Kjo mundësi vlen për programet Master të UBT-së, të cilat përfshijnë disa nga fushat më të kërkuara dhe inovative të tregut bashkëkohor, duke u dhënë të diplomuarve mundësinë të zgjedhin një program që përputhet me profesionin, interesat dhe objektivat e tyre të karrierës.

Programet Master në UBT përfshijnë:

Menaxhment, Biznes dhe Ekonomi
FinTech dhe Menaxhimi i Inovacionit
Shkenca Kompjuterike dhe Inxhinieri
Sistemet e Informacionit dhe Menaxhment
Inxhinieri e Mekatronikës
Inxhinieri e Ndërtimit dhe Infrastrukturë
Inxhinieri e Trafikut dhe Transportit
Inxhinieri e Energjisë dhe Mjedisi
Arkitekturë dhe Planifikim Hapësinor
E Drejta Penale
E Drejta Civile dhe Pronës
E Drejta Komerciale
Gjuhë, Media dhe Komunikim
Politika Publike dhe Menaxhim
Shkenca Politike
Studime të Sigurisë
Psikologji
Shkencat dhe Teknologjia e Ushqimit
Shëndet Publik dhe Menaxhim
Biokimi
Shkencat Paramjekësore
Agrikulturë dhe Mjedis
Shëndet dhe Aktivitet Fizik

Përmes programeve të orientuara drejt inovacionit dhe nevojave të tregut, UBT synon që studentët Master të fitojnë jo vetëm njohuri të avancuara akademike, por edhe kompetenca profesionale të aplikueshme në praktikë.

Për ish-studentët e UBT-së, kjo është mundësia për ta vazhduar aty ku e nisën – duke e kthyer përvojën universitare në një nivel të ri profesional.

Regjistrohu sot dhe përfito 30% bursë!

Vendi

PDK paralajmëron veprime jashtë Kuvendit pas refuzimit të kërkesës për seancë

Published

14 hours ago

August 12, 2026

UBTNews

Sekretarja e Përgjithshme e Partisë Demokratike të Kosovës ka deklaruar se refuzimi për thirrjen e seancës më 12 gusht është një model i sjelljes politike nga Lëvizja Vetëvendosje dhe kryesuesi Avni Dehari, e jo thjesht një incident procedural. Sipas saj, shkelja e afatit 30-ditor dhe shpërfillja e rregullit për vazhdimin e seancës çdo 48 orë përbëjnë zbatim selektiv të Kushtetutës dhe bllokim të mandatit të deputetëve të zgjedhur më 7 qershor.

Ajo i bëri thirrje Albin Kurtit që ta kthejë vendin në binarë kushtetues, duke theksuar se PDK-ja nuk kërkon pushtet apo marrëveshje partiake, por funksionalizimin e shtetit. Gjithashtu, ajo bëri me dije se PDK-ja do të dorëzojë sërish kërkesë zyrtare për seancë pas 48 orësh dhe do të jetë çdo ditë në Kuvend.

Paralelisht me punën në Kuvend, ajo paralajmëroi zhvendosjen e aktivitetit politik edhe jashtë tij, përmes bashkëbisedimeve me qytetarë dhe grupe të ndryshme shoqërore. Në fund, ajo denoncoi edhe cënimin e integritetit fizik të disa deputetëve të PDK-së nga mbrojtja e afërt, duke njoftuar se për këtë rast do t’i drejtohen Inspektoratit Policor të Kosovës. /E.A/

Vendi

Prokuroria Speciale ngre aktakuzë për krime lufte në Vushtrri

Published

15 hours ago

August 12, 2026

UBTNews

Prokuroria Speciale e Republikës së Kosovës ka ngritur aktakuzë ndaj të pandehurit me inicialet S.S., i cili akuzohet për veprën penale “Krime lufte kundër popullsisë civile”.

Sipas aktakuzës, i pandehuri S.S., më 6 prill 1999 në fshatin Reznik të Vushtrrisë, në bashkëpunim me pjesëtarë të tjerë të forcave serbe, mori pjesë në vrasjen e nëntë civilëve shqiptarë. Në këtë ngjarje përfshihet edhe S.T., i cili tashmë është i dënuar nga Gjykata Themelore në Prishtinë.

Lidhur me këtë rast, Prokuroria Speciale bën me dije se dërgimi i lëndës në gjykatë është hap i rëndësishëm drejt drejtësisë: “Sjellja e përgjegjësve para drejtësisë mbetet prioritet yni kryesor për të vendosur të vërtetën dhe për të sjellë lehtësim për familjarët e viktimave.”

Rasti tanimë i është kaluar Organeve të Drejtësisë për shqyrtim të mëtejshëm gjyqësor. /E.A/

Lajmet

Etnofest përmbyll edicionin e 16-të me ndarjen e 21 çmimeve artistike

Published

16 hours ago

August 12, 2026

UBTNews

Mbrëmë është mbyllur edicioni i 16-të i EtnoFest-it, ku janë ndarë çmimet për 21 performanca dhe kategori të ndryshme artistike.

Para ceremonisë së ndarjes së çmimeve, publiku pati mundësinë të ndiqte performancën artistike “Echoes of Origin”, me Flaka Gorancën, e cila solli këngë të njohura shqiptare në një ndërthurje mes traditës dhe muzikës klasike.

Juria profesionale e përbërë nga Bislim Muçaj (kryetar), Artan Arifi (anëtar) dhe Agron Gerguri (anëtar), ndau çmimet në kategoritë e mëposhtme:Etnoperformanca më e mirë: “Echoes of Origin” – Flaka Goranci, për trajtimin artistik të rrënjëve, ku zëri unik dhe ndërthurja e traditës me modernen krijuan një lidhje të veçantë me kujtesën kulturore.

Etnoansambli më i mirë: “Vullkani i Istogut” – Istog, për energjinë, autenticitetin dhe ruajtjen e traditës së Istogut përmes një interpretimi të fuqishëm skenik.

Instrumentisti më i mirë: Blerim Grubi, për mjeshtërinë e lartë në interpretim dhe stilin e veçantë që i jep muzikës tradicionale.

Instrumentistja më e mirë: Lule Elezi, për teknikën e sigurt në piano dhe interpretimin e përpunuar, duke përcjellë melodinë me qartësi, finesë dhe emocion.

Kostumografia më e mirë: Ansambli “Devolli” – Korçë, për kostumet tradicionale të Korçës, të pasura me ngjyra, ornamente dhe të punuara me kujdes.

Koreografia më e mirë: Gjergj Prevazi me “Void”, për kombinimin e lëvizjes, ritmit dhe hapësirës në një koreografi të saktë dhe të fuqishme skenikisht.

Valltaret më të mira: Katerina Gogadhe dhe Chiara Xoxi, për harmoninë e rrallë skenike, sinkronizimin dhe komunikimin e natyrshëm përmes lëvizjes.

Valltari më i mirë: Vasjar Hysa me ansamblin “Afërdita” – Belsh, për ritmin e sigurt, lëvizjet e fuqishme dhe prezencën e spikatur skenike.

Këngëtarja më e mirë: Arta Jashari, për zërin me ngjyra unike, interpretimin dhe ndjeshmërinë e veçantë që përcjell këngën me origjinalitet.

Këngëtari më i mirë: Mustafë Ramaj, për vokalin e fuqishëm dhe interpretimin emocionues, të realizuar me mjeshtëri skenike.

Orkestra më e mirë: Ansambli “Dardanus” nga Tetova, për harmoninë instrumentale dhe interpretimin elegant të trashëgimisë muzikore.

Koncerti artistik më i mirë: Grupi “Tavera” – Izrael, për koncertin që solli në skenë tingujt e traditës së tyre muzikore, duke krijuar një atmosferë të veçantë për publikun.

Shfaqja më e mirë: “Pylli”, produksion i Teatrit “Bekim Fehmiu” në Prizren, për realizimin mbresëlënës skenik dhe trajtimin e thellë të emocioneve njerëzore.

Regjia më e mirë: Ilir Bokshi, me shfaqjen “Pesë fytyrat e heshtjes”, produksion i Teatrit “Migjeni” në Shkodër, për vizionin e ndërtuar me mjeshtëri dhe ndjeshmëri të thellë regjisoriale.

Aktori më i mirë: Adrian Morina, me shfaqjen “Pesë fytyrat e heshtjes”, për interpretimin bindës, emocionet e fuqishme dhe thellësinë psikologjike të rolit.

Aktorja më e mirë: Hajat Toçilla, me shfaqjen “Pylli”, për interpretimin plot emocione dhe vërtetësi që i dha personazhit.

Skenografia më e mirë: Bekim Korça, me shfaqjen “Pylli”, për konceptin pamor origjinal dhe krijimin e një universi skenik funksional e domethënës.

Çmimi për inovacion artistik: “Soloist of GOB” nga Bolonja, Itali, për trajtimin artistik dhe inovativ të motiveve të frymëzuara nga okarina e Runikut, një prej instrumenteve më të hershme të gjetura në trojet shqiptare.

Çmimi special i EtnoFest-it: Armend Baloku me performancën “Lahuta e Malcís”, për një performancë të jashtëzakonshme që përcolli fuqinë e trashëgimisë epike shqiptare dhe mbajti publikun të përfshirë.

Çmimi i karrierës: Selman Jusufi, për një karrierë mbi katër dekada, më shumë se 200 role dhe një kontribut të çmuar në skenën artistike, duke lënë gjurmë të veçanta në teatrin dhe kinematografinë shqiptare.

Me këtë ceremoni, edicioni i 16-të i EtnoFest-it u përmbyll duke vlerësuar artistë, ansamble dhe krijues nga Kosova, Shqipëria e vende të tjera, të cilët përmes artit dhe performancës kontribuojnë në ruajtjen e trashëgimisë kulturore. /A.M/