Prokurori i Përgjithshëm i Ukrainës, Andriy Kostin, ka dhënë dorëheqje mes hetimeve që gjetën se dhjetëra zyrtarë qeveritarë kishin shmangur shërbimin ushtarak, duke kërkuar që të marrin përfitime për aftësi të kufizuara.

Mobilizimi është një çështje shumë e ndjeshme në Ukrainë, pasi numri i ushtarëve të këtij shteti është varfëruar, teksa lufta e nisur nga Rusia kundër Ukrainës po vazhdon që dy vjet e gjysmë.

Kostin njoftoi për dorëheqjen e tij më 22 tetor përmes Telegramit, pas një takimi të Këshillit të Sigurisë Kombëtare të Ukrainës, ku mori pjesë presidenti Volodymyr Zelensky, i cili tha se Kostin “duhet të marrë përgjegjësi” për situatën e krijuar.

“Mendoj se qëndrimi i presidentit Zelensky është absolutisht i drejtë… dhe po ashtu mendoj se është korrekte që të njoftoj për dorëheqjen time si prokuror i Përgjithshëm”, tha Kostin përmes Telegramit.

Më herët gjatë këtij muaji, hetuesit gjetën se një numër i prokurorëve publikë në rajonin perëndimor të Kmelintskit jashtëligjshëm kishin marrë dokumente për të dëshmuar në mënyrë të rreme se kishin aftësi të kufizuara, në mënyrë që të merrnin përfitime nga shteti.

Pak pas dorëheqjes së Kostinit, kryeministri Denis Shmyhal, njoftoi për shkarkimin e disa zyrtarëve të lartë që mbikëqyrin shërbimet, dhe zyrtarë të Ministrisë së Shëndetësisë që koordinojnë aktivitetet me komisionet lokale./REL/

Në një arritje të jashtëzakonshme shkencore, Kina ka realizuar magnetin më të fuqishëm në botë, me një fuqi prej 42.02 Tesla. Ky magnet është në gjendje të gjenerojë një fushë magnetike 800 mijë herë më të lartë se graviteti i Tokës, duke e bërë atë një instrument të rëndësishëm për kërkime të avancuara.

Aktivizimi i këtij magneti ka kërkuar një konsum të konsiderueshëm energjie prej 32.3 megavat, e barabartë me nevojën e një qyteti të tërë për energji. Magneti është i kategorisë resistive, duke e bërë atë relativisht të lehtë për t’u realizuar dhe të aplikueshëm në fusha të ndryshme, nga kërkimet biomjekësore deri te fizika e elementëve.

Sipas autorëve të projektit nga Akademia e Shkencave të Kinës, arritja e këtij rekordi përfaqëson një sfidë komplekse dhe do të kontribuojë në avancimin e studimeve mbi materien. Për më tepër, kjo do të ndihmojë në përmirësimin e teknikave për të krijuar magnetë më të vegjël, por shumë të fuqishëm, të cilët kanë përdorim të gjerë në makineritë dhe aparaturat mjekësore për rezonancë magnetike./UBTNews/

Grupimi i ekonomive të zhvilluara tani përfshin, përveç Brazilit, Rusisë, Indisë, Kinës dhe Afrikës së Jugut, edhe liderë të tjerë, duke përfshirë Xi Jinping, Narendra Modi dhe Vladimir Putin, të cilët kanë intensifikuar takimet mes tyre.

Nga 1 janari, Egjipti, Etiopia, Irani, Arabia Saudite dhe Emiratet e Bashkuara Arabe iu bashkuan grupit, duke krijuar një bllok që përbën 37% të GDP-së globale dhe që ka një tendencë që bie ndesh me atë të grupimeve të tjera si G7-a apo NATO.

Sipas ekspertëve, kërcënimi ndaj hegjemonisë amerikane dhe ndikimit evropian nuk është imediat, pasi BRICS është më tepër një klub informal që ka bashkuar vende që e shohin si rival Perëndimin. Ata kanë unifikuar forcat kundër një rendi ekonomik, të cilit i kundërvihen dhe që është kundër tyre.

Me përplasjet për tregtinë e lirë, pushtimin e Ukrainës dhe tensionet në Tajvan, marrëdhëniet e BE-së me Kinën po fragmentarizohen. Nga ana tjetër, Rusia nuk është në gjendjen e saj më të mirë.

Madje, ekspertët paralajmërojnë se zgjerimi i mëtejshëm i BRICS mund ta dobësojë aleancën, pasi diversiteti mes vendeve anëtare do ta bëjë edhe më të vështirë për ta rënë dakord. Në këtë aspekt, mbeten serioze përplasjet mes Kinës dhe Indisë, si dhe ato mes anëtarëve të rinj si Arabia Saudite dhe Irani, të cilët kanë qenë armiq historikë.