Aktualitet

Nis fushata për promovimin e Ligjit për Mbrojtjen e Fëmijës

Publikuar

Shoqata Down Syndrome Kosova ka nisur fushatën për promovimin e Ligjit për Mbrojtjen e Fëmijës, me theks të veçantë promovimin e mbrojtjes së fëmijëve me aftësi të kufizuara dhe ndalimin e ndëshkimit trupor.

Sebahate Hajdini, drejtoreshë e Shoqatës Down Syndrome Kosova ka thënë se fushata ka për qëllim të sensibilizojë, në rend të parë, përfaqësuesit e institucioneve për obligimet të cilat dalin nga ky ligj, për realizimin e të drejtave të fëmijëve me aftësi të kufizuar.

“Neni 46 në Ligjin për Mbrojtjen e Fëmijës, garanton shërbime edukativo – sociale për fëmijët me aftësi të kufizuar. Gjithashtu, parashihet që për realizimin e këtij Ligji të ketë mbështetje nga aktet e tjera nënligjore. Si Shoqatë zotohemi këtu, se do të jemi shumë të zëshëm në raport me institucionet e vendit, për krijimin e këtyre akteve nënligjore të cilat do të garantojnë shërbime edukativo – sociale për fëmijët me aftësi të kufizuar”, tha ajo.

Sa i përket shërbimeve të fëmijëve me aftësi të kufizuar, Hajdini deklaroi se mbeten sfida më e madhe, ngase nuk ka një sistem të mirëfilltë në nivel institucional që garanton shërbime për secilin fëmijë me aftësi të kufizuar.
Avokati i Popullit, Naim Qelaj shpjegoi se kanë shumë aktivitete që kanë të bëjnë me këtë fushë, kanë ankesa vazhdimisht por edhe kanë raste ku kanë filluar hetimet.

Ai ka përmendur se ka shumë raste kur fëmijën me aftësi të kufizuar nuk e kanë pranuar në çerdhe ngase nuk i punojnë të dy prindërit dhe pranoi se shumë kushte për fëmijët me aftësi të kufizuara nuk plotësohen në institucionet parashkollore.

“Vitin 2021 e kam shpallur vit për mbrojtjen nga diskriminimi, duke pasur parasysh faktin se jam i pakënaqur me mënyrën se si është zbatuar ky ligj, edhe nga vet institucioni që e udhëheqi, e jo vetëm te institucionet e tjera. Qasja që institucionet e kanë pasur në raport me këtë ligj nuk ka qenë e duhura. E drejta e garantuar me këtë ligj nuk është absorbuar nga qytetarët, fillimisht nuk kanë qenë të informuar, nuk kanë funksionuar as fushtatat vëtëdijësuese, prandaj qytetarët kanë humbur shumë”, tha Qelaj, duke shtuar se është i gatshëm për bashkëpunim me fushatën e DSK-së.

Habit Hajredini nga Zyra për Qeverisje të Mirë në Zyrën e Kryeministrit të Kosovës tha se fushata e DSK-së është shumë e qëlluar ngase prek një kategori shumë të ndjeshme.

“Si Qeveri, jemi koordinuar me ministritë e linjës, që 17 aktet nënligjore që burojnë dhe derivojnë nga ky ligj të fillohet procesi i punës së tyre. Tani jemi në fazën finale të këtyre aktveve nënligjore, 10 prej tyre pothuajse janë në përfundim, disa nuk kanë filluar, disa janë në proces. Shpejt do të fillohet një fushatë nacionale për zbatimin e këtij Ligji”, deklaroi Hajredini.

Ndërsa, Bujar Kadriu nga Forumi Kosovar i Aftësisë së Kufizuar deklaroi se fëmijët me aftësi të kufizuar kanë ballafaqime dhe sfida të ndryshme, duke i’u nënshtruar diskriminimit ditor në fusha të caktuara, siç është fusha e edukimit, e mirëqenies sociale, mungesa e shërbimeve, e shumë të tjera.

“Ne synojmë të arrijmë parandalimin e diskriminimit ndaj fëmijëve, sepse diskriminimi është një fenomen jashtëzakonisht i rrezikshëm për integrimin e shoqërisë apo shtetit në mekanizma ndërkombëtar, që Kosova ka synim. Parandalimi i diskriminimit përveç që është akt ligjor dhe moral, është edhe kushtetutes, ngase kategori të caktuara të shoqërisë janë të mbrojtura nga vet Kushtetuta e Kosovës”, deklaroi ai, duke shtuar se krijimi i kushteve të përshtatshme për fëmijët me aftësi të kufizuara, pakëson problemet.

Ai ka përmendur se si fëmijët me aftësi të kufizuara marrin vetëm nga 100 euro nga shteti, e që për më shumë se 12 vite nuk është rritur kjo shumë.
Kjo fushatë organizohet në kuadër të projektit “Mbrojtja e Fëmijëve me sindromën Down”, i cili implementohet nga Down Syndrome Kosova, në partneritet me Save the Children International zyra në Kosovë dhe me financim nga Agjencia Suedeze për Bashkëpunim Ndërkombëtar për Zhvillim (SIDA).

Aktualitet

Qeveria mban mbledhje elektronike

Merr dy vendime.

Publikuar

nga

Qeveria e Kosovës ka zhvilluar sot një mbledhje elektronike, në të cilën ka marrë dy vendime.

Sipas njoftimit të Zyrës së Kryeministrit, Qeveria ka miratuar Projektligjin për Ratifikimin e Amendamentit të Marrëveshjes për Themelimin e Bankës Evropiane për Rindërtim dhe Zhvillim (“Marrëveshja”) – Neni 1.

Qeveria po ashtu ka themeluar Komisionin e Pranimit për pozitën e Sekretarit të Përgjithshëm të Ministrisë së Punëve të Jashtme dhe Diasporës, sipas konkursit të shpallur me datën 14.03.2024.

Vazhdo të lexosh

Aktualitet

Rama nis vizitën zyrtare në Paris, takim ‘kokë më kokë’ me presidentin Macron

Vizita bëhet me ftesë të presidentit Macron.

Publikuar

nga

Kryeministri Edi Rama nisi sot një vizitë zyrtare dyditore në Paris me ftesë të presidentit francez, Emmanuel Macron, ku do të zhvillojë një sërë takimesh të përqendruara kryesisht në promovimin e potencialeve dhe klimës pozitive që Shqipëria ofron për zhvillimin e investimeve të huaja, si dhe në perspektivën e bashkëpunimit mes dy vendeve në fushën e teknologjisë dhe inovacionit.

Konkretisht, ditën e premte në orën 8:30, kryeministri Rama do të zhvillojë një mëngjes pune me Unionin e Sipërmarrësve të Francës MEDEF, nën drejtimin e z. Jean-Paul Agon, president i grupit L’Oréal dhe i komitetit Francë-Shqipëri në MEDEF, me pjesëmarrjen e 35 përfaqësuesve të kompanive prestigjoze franceze, si dhe të ftuar të tjerë nga bota e biznesit. Gjatë takimit do të prezantohen disa nga fushat prioritare për investime në Shqipëri, me interes të ndërsjellë për të dy vendet dhe më pas kryeministri Rama do të zhvillojë takime individuale me drejtues të sipërmarrjeve pjesëmarrëse, shkruan Top chanel, transmeton KosovaPress.

Të premten, në orën 12:30, do të zhvillohet ceremonia zyrtare e mirëseardhjes, e më pas në orën 13.00, Kryeministri Rama do të mbërrijë në Pallatin Elysee, ku do të mikpritet nga Presidenti francez Emmanuel Macron me të cilin do të mbajnë edhe një deklaratë për shtyp.

Më pas, në praninë e Kryeministrit Edi Rama dhe Presidentit francez Macron do të nënshkruhen disa marrëveshje ndërqeveritare dhe memorandume mirëkuptimi mes vendeve.

Në orën 14:45, Kryeministri Edi Rama dhe Presidenti Francez Macron do të zhvillojnë një takim kokë më kokë mes tyre.

Axhenda do të vijojë në orën 16.00 me vizitën dhe takimet në STATION F, inkubatori më i madh në botë i startup-eve dhe inovacionit, si dhe me mbledhjen inauguruese të Këshillit të Inovacionit Francë-Shqipëri –CIFA, ku do të marrë pjesë edhe Sekretarja franceze e Shtetit për Industrinë Numerike, përfaqësues të ministrive franceze të Jashtme dhe të Ekonomisë, si edhe operatorë të ndryshëm franceze e shqiptarë në fushën e inovacionit.

Së bashku me Kryeministrin Rama pjesë e delegacionit qeveritar do të jenë Ministrja e Arsimit dhe Sportit Ogerta Manastirliu, Ministrja e Turizmit dhe Mjedisit Mirela Kumbaro, Ministri i Ekonomisë, Kulturës dhe Inovacionit Blendi Gonxhe, Ministri i Shtetit për Pushtetin Vendor Arbjan Mazniku, si dhe Ministrja e Shtetit për Administratën Publike dhe Antikorrupsionin Adea Pirdeni.

Vazhdo të lexosh

Aktualitet

​Vdes ish-gazetari Arben Rugova

AGK-ja i shpreh ngushëllime familjes, miqve dhe komunitetit. 

Publikuar

nga

Asociacioni i Gazetarëve të Kosovës me pikëllim ka marrë lajmin për vdekjen e gazetarit, Arben Rugova. Në njoftim thuhet se ai ka punuar në sektorin e arsimit dhe të politikës në disa media si Koha Ditore, Gazeta Express, Telegrafi, Gazeta Lajmi e të tjera.

Rugova punonte së fundi si Zyrtar për Qasje në Dokumente Publike në Ministrinë e Jashtme dhe të Diasporës. Për vdekjen e gazetarit Rugova, kanë njoftuar familjarët e të ndjerit në rrjetet sociale.

AGK-ja i shpreh ngushëllime familjes, miqve dhe komunitetit.

Vazhdo të lexosh

Aktualitet

Shpërthim në Lushnjë: Raportohet një i vdekur e gjashtë të plagosur, mes tyre deputeti i PS

Gjashtë të plagosurit nga shpërthimi në Lushnjë janë nisur drejt spitalit të Traumës.

Publikuar

nga

Një shpërthim i fuqishëm ka ndodhur në një magazinë në ndërtim në Lushnjë. Një person humbi jetën, shtetasi R.H. Gjithashtu raportohet për gjashtë persona janë plagosur, mes tyre edhe deputeti i PS, Bujar Çela.

Gjashtë të plagosurit nga shpërthimi në Lushnjë janë nisur drejt spitalit të Traumës.

Ministri i Brendshëm Taulant Balla ka mbërritur në spitalin e Lushnjës, ndërkohë që ende nuk dihet gjendja e të plagosurve. Ndërsa ajo që dihet deri më tani është se deputeti Bujar Çela po i nënshtrohet një ndërhyrje kirurgjikale. Në ndihmë po vijnë dhe mjekë nga spitali i Fierit dhe Beratit, bashkë me autoambulanca.

Ende nuk dihet shkaku i saktë i këtij shpërthimi, ndërsa dyshohet se gjatë punës në fabrikë, një vinç ka prekur linjën e tensionit të lartë dhe për rrjedhojë ka pasur një shpërthim.

Vazhdo të lexosh

Të kërkuara