Lajmet

​DhTIK: Rritja e tatimit barrë shtesë për bizneset, kompanitë nuk përfitojnë nga “Superpuna”

Nga Dhoma e Tregtisë kanë reaguar ndaj Qeverisë edhe për mënyrën e implementimit të projektit “Superpuna”.

Publikuar

Dhoma e Tregtisë dhe Industrisë në Kosovë ka ngritur shqetësimin e saj për rritjen e tatimin në pronën e paluajtshme.

Drejtues të kësaj dhome në një konferencë për media kanë theksuar se shtrenjtimi i tatimit në pronë do të jetë një goditje e rëndë për bizneset në vend.

Kryetari i Bordit të Dhomës së Tregtisë dhe Industrisë (DhTIK), Skënder Krasniqi ka fajësuar Qeverinë e Kosovës për mungesë të bashkëpunimit me bizneset sa i përket plotësimit ndryshimit të ligjeve në vend, veçanërisht atë për pronën e paluajtshme. Krasniqi ka theksuar se situata pas pandemisë COVID-19, dhe agresionit rus në Ukrainë, bizneset janë në situatë të vështirë.

Përkitazi me këtë, ai ka shprehur shqetësimin e tij për mungesë të bashkëpunimit nga ana e Qeverisë me bizneset. Madje, ai ka ftuar kryeministrin Albin Kurti dhe ministrin e Financave, Hekuran Murati, që të jenë më pran komunitetit të biznesit.

Përveç kësaj, Krasniqi ka reaguar ndaj Qeverisë edhe për mënyrën e implementimit të projektit “Superpuna”.

“Ne si Dhomë e Tregtisë duam të shprehim shqetësim publik për mungesën e bashkëpunimit të mjaftueshëm me institucionet e Kosovës në lidhje me situatën jo të mirë të të bërit biznes në Kosovë dhe situatën jo të mirë në përgjithësi në botë dhe ndryshimet e mëdha që po ndodhin sidomos gjatë këtyre tre vjetëve nga pandemia COVID, lufta në Ukrainë dhe për nevojë të jashtëzakonshme që kemi ndryshime dhe reagime më të shpejta të qeverisë. Ftojmë kryeministrin, Albin Kurti, ministrat, e sidomos ministrin e Financave, Hekuran Murati që të na vizitojë dhe të diskutojmë më shumë para se të marrin vendime të tilla ose propozime për ndryshimin e ligjeve ose plotësim ndryshimin e ligjeve të cilat po shkojnë pa e pas një reagim ose bashkëpunim të mjaftueshëm me biznese”, tha Krasniqi.

Sekretari i përgjithshëm në DhTIK, Shyqiri Bytyqi theksoi se rritja e tatimit në pronë do të pengojë në zhvillimin e bizneseve.

“Marrë parasysh këto rrethana, rritja e barrës tatimore do të pengojë zhvillimin e këtyre bizneseve. Kjo na detyron neve si do të reagojmë me kohë që të tërheqim vëmendjen publikisht që këto gjëra të mos ndodhin, por të bëhen angazhime në krijimin e një klime të favorshme për biznese, në mënyrë që ta tejkalojnë krizën që është shkaktuar dhe vazhdon të shkaktohet. Pra, bizneset tona nga kriza që ka ekzistuar deri më tani akoma nuk janë këndellë dhe nuk janë ato biznese që kanë një siguri në qëndrueshmërinë e tyre”, theksoi Bytyqi.

Ish-ministri i Arsimit, Bytyqi ka thënë po ashtu se ri-vlerësimi i pronave për rezidentët nuk janë vlerësime reale. Ai tha se me plotësim-ndryshimin e Ligjit në pronë që pritet të ketë shkallë progresive dhe rritje të tatimit në pronë, do të ndikon tepër negativisht në zhvillimin e qëndrueshmërisë së bizneseve në Kosovë.

“Nga informacionet që tashmë ne kemi ajo që ka ndodhur në rivlerësimin e pronave për rezidentët, është parë që është rritur një vlerë e madhe e pronave duke u bazuar në çmimin e tregut ashti siç kanë dalë me deklarim Ministria e Financave. Ne e kemi tërheq vërejtjen për tregun prapë, sepse këto rivlerësime kanë ndodhë për shkak të rritjes së çmimeve si pasojë e krizës dhe nuk janë vlerësime reale. Sepse brenda një periudhe me stabilizimin e krizës këto çmime mund të bien, dhe i bie që edhe kostoja e pasurive mund të ndryshojë. E njëjta gjë do të pritet në vlerësimin e pronave komerciale me formën teknike që janë zbatuar tek prona rezidente ku do të ndikonte edhe në rritjen e vlerës së pronave të bizneseve. Dhe rrjedhimisht nga plotësim ndryshimi i ligjit në pronë që pritet të ketë shkallë progresive dhe rritje të tatimit në pronë do të ndikon shumë negativisht në zhvillimin e qëndrueshmërisë së bizneseve në Kosovë. Nga propozimi i draft plotësimit të ligjit pritet që shkalla progresive për tatimin në pronë të kenë një rritje nga 0.10 që është shkalla minimale deri në 0.50, që i bie që të ketë një rritje pothuajse 50 për qind e tatimit në pronë si shkallë tatimore, por jo si vlerë”, theksoi ai.

Bytyqi po ashtu ka shpjeguar rritjen e tatimit në pronë nga 200 mijë në 700 mijë euro.

“Në analizën që ne kemi bërë një biznes, i cili aktualisht në Kosovë mund të ketë një metrazh diku rreth 60 mijë metra katror e që tashmë në Prishtinë tatimi në pronë është rreth 200 mijë euro, me futjen, nëse miratohet kështu si është draft propozim ligji për plotësim ndryshimin e ligjit të tatimit në pronë do të ketë një rritje të barrës të tatimit në pronë rreth 700 mijë euro. Pra, shihet se 300 për qind kemi rritje të menjëhershme vetëm me futjen e shkalles progresive pa e futur edhe mundësinë e rritjes së vlerës së aseteve. Dhe kjo barrë e rëndë padyshim se do të ndikojë shumë negativisht tek bizneset. Barra e rëndë tatimore jo vetëm që do të krijojë jostabilitet, por do të jetë një pengesë e madhe në investimet e planifikuara. Do të fillojnë që të ndërpriten investimet e planifikuara, do të ketë rrezik të shkurtimit të vendeve të punës, dhe falimentimit të bizneseve. Është shumë e arsyeshme reagimi me kohë që derisa është ende në Parlament t’i bëjmë ftesë deputeteve ta shqyrtojnë me kujdes këtë plotësim ndryshim të ligjit dhe mos të dëmtohen bizneset, sepse me këto shkallë dëmtimi më i madh do të jetë për bizneset më të mëdha”, tha Bytyqi.

Në këtë konferencë për media, kryetari i Bordit, Krasniqi theksoi po ashtu se janë të shqetësuar edhe për mënyrën e zbatimit të projektit “SuperPuna”. Ai theksoi se po kushtëzohen bizneset për të përfituar nga ky projekt, që sipas tij, shumica e bizneseve nuk po arrijnë të marrin mbështetjen nga “SuperPuna”.

“Ne si Dhomë e Tregtisë kemi shprehur shqetësimin tonë edhe për projektin e punësimit “Superpuna” dhe për metodat që qeveria ka bërë për mënyrën e përfitimit, ku për këtë nuk ka mjaftueshëm kërkesa për punësim ose shumica e bizneseve nuk po i plotësojnë kërkesat, për shkak se detyrimi që së pari biznesi të paguaj dhe pastaj shteti të alokojë mjetet te biznesi, është një ngarkesë, sepse sikur biznesi të kishte mundësi financiare, ne i kishim punësuar dhe nuk kishte pasur nevojë me marrë përkrahje prej shtetit. Prandaj, kjo pagesë do të duhej që automatikisht të kalojë te biznesi apo te punëtori dhe të mos pritet një apo dy muaj të dalin ato mjete”, theksoi Krasniqi.

Edhe Arsim Selmonmusaj nga DhTIK tha se nëse qeveria e Kosovës vazhdon me këto politika fiskale, ekziston rreziku që bizneset të ikin nga vendi.

“Deri më tani e dimë se një pjesë e madhe e rinisë dhe një pjesë e profesionistëve kanë ikur nga Kosova dhe çdo ditë po vazhdon ky trend. Nëse vetëm vazhdohet me këto politika fiskale dhe me këto trendë të rritjes dhe vështirësive te të bërit biznes në Kosovë, atëherë dhe biznesi fillon që të largohet në një ambient më të favorshëm sesa këtu”, tha Selmonmusaj.

Projektligji për tatimin në pronën paluajtshme është në Kuvendin e Kosovës, i cili ka kaluar në lexim të parë në Komisionin për Buxhet. Shtrenjtimi i tatimit në pronë mbi 100 për qind e në disa raste edhe mbi 700 për qind ka hyrë në fuqi nga janari i këtij viti, i cili është kundërshtuar nga qytetarët, opozita dhe bizneset. 

Vazhdo të lexosh

Lajmet

QUINT: Kosova të mos ndërmarrë masa të reja për hyrje me forcë në ndërtesat komunale

QUINT përësriti deklaratën e 26 majit, kur dënoi vendimin e Kosovës “për të hyrë me forcë në ndërtesat komunale në veri, pavarësisht thirrjeve tona për përmbajtje”.

Publikuar

nga

Shtetet e QUINT-it dhe Bashkimi Evropian thanë se presin që Qeveria e Kosovës të mos ndërmarrë asnjë masë të re “për hyrje me forcë në ndërtesat” komunale në veri të Kosovës.

QUINT përësriti deklaratën e 26 majit, kur dënoi vendimin e Kosovës “për të hyrë me forcë në ndërtesat komunale në veri, pavarësisht thirrjeve tona për përmbajtje”.

“Në këtë kontekst, QUINT-i dhe BE-ja presin që Qeveria e Kosovës nuk do të ndërmarrë asnjë masë të re për hyrje me forcë në ndërtesat e Komunës së Leposaviqit, Zubin Potokut dhe Zveçanit. Kryetarët e zgjedhur duhet po ashtu të tregojnë përmbajtje dhe të ndërmarrin veprime të menjëhershme për të treguar përkushtimin e tyre dhe përgjegjësinë për të përfaqësuar dhe për t’iu shërbyer të gjithë anëtarëve të komuniteteve të tyre”, thuhet në deklaratën e përbashkët të Shteteve të Bashkuara, Francës, Gjermanisë, Italisë, Mbretërisë së Bashkuar dhe Bashkimit Evropian të lëshuar më 28 maj.

Më 26 maj, grupe të serbëve lokalë kundërshtuan shkuarjen në zyra të kryetarëve të rinj shqiptarë të Zveçanit, Zubin Potokut dhe Leposaviqit.

Kryetarët e rinj u shoqëruan nga Policia e Kosovës, e cila u përlesh me grupet e serbëve. Gjatë përleshjeve, forcat policore përdorën shok-bomba dhe gaz lotsjellës, ndërkaq serbët lokalë hodhën gurë në drejtim të forcave të rendit.

Të paktën pesë policë u lënduan, ndërkaq disa vetura policore u dogjën.

QUINT tha po ashtu se u bën thirrje të gjitha palëve që të jenë të kujdesshme ndaj kërcënimeve të tjera apo veprimeve që mund të kenë ndikim në një mjedis të sigurt “përfshirë edhe lirinë e lëvizjes, që mund të ndezë tensionet dhe të prodhojë konflikt.

“Ne veçanërisht jemi të shqetësuar lidhur me sigurinë dhe mirëqenien e civilëve, zyrtarëve policorë, pjesëtarëve të EULEX-it dhe KFOR-it. Çdo veprimi i ri i njëanshëm do të ketë ndikim negativ në raportet me shtetet e QUINT-it dhe BE-së”, u tha në deklaratë.

Shtetet e QUINT-it po ashtu theksuan se dialogu mes Kosovës dhe Serbisë, që ndërmjetësohet nga Bashkimi Evropian, është “rruga që çon drejt normalizimit” të raporteve “dhe anëtarësimit në BE”. Në deklaratë iu bë thirrje palëve që të punojnë për zbatimin e Marrëveshjes drejt normalizimit, që Kosova dhe Serbia arritën në shkurt, dhe aneksit të saj, por edhe marrëveshjes për themelimin e Asociacionit.

Shkuarjen e kryetarëve të rinj të komunave në veri në zyrat komunale e kanë dënuar ashpër edhe Shtetet e Bashkuara, që i kanë bërë thirrje Kosovës që të heqë dorë “nga masat e dhunshme”.

Kryeministri i Kosovës, Albin Kurti, ka deklaruar se i kupton shqetësimet e partnerëve ndërkombëtarë, por ai ka thënë se çdo opsion tjetër do të ishte mospërmbushje e obligimeve kushtetuese.

Në katër komunat në veri të Kosovës, në zgjedhjet lokale të 23 prillit u zgjodhën katër kryetarë të rinj shqiptarë, pasi në këto zgjedhje të jashtëzakonshme nuk morën pjesë partitë serbe.

Zgjedhjet u mbajtën pas dorëheqjes së kryetarëve nga radhët e Listës Serbe – partisë më të madhe të serbëve të Kosovës – në nëntor të vitit të kaluar.

Kjo parti i braktisi të gjitha institucionet e Kosovës, për shkak të vendimit të Qeverisë në Prishtinë për të kryer procesin e riregjistrimit të makinave me targa ilegale serbe.

Zgjedhjet u bojkotuan nga popullata shumicë serbe në atë zonë, e cila tani nuk i pranon rezultatet, përkatësisht kryetarët e rinj.

Pjesëmarrja në zgjedhjet e prillit ishte 3.47 për qind e numrit të përgjithshëm të votuesve të regjistruar./REL

Vazhdo të lexosh

Lajmet

​Erdogan shpall fitoren në zgjedhjet presidenciale në Turqi

Erdogan para simpatizantëve të tij ka thënë se sot ka fituar populli i Turqisë.

Publikuar

nga

Edhe pse janë numëruar vetëm 70 përqind të votave, presidenti turk, Recep Tayyip Erdogan ka shpallur fitoren në balotazhin për zgjedhjet presidenciale, të mbajtura sot në Turqi. Erdogan kishte kundër-kandidat Kemal Kilicdaroglun.

Erdogan para simpatizantëve të tij ka thënë se sot ka fituar populli i Turqisë.

Udhëheqësit e Katarit, Hungarisë, Somalisë dhe Pakistanit, Azejbergjanit, ishin ndër krerët e parë të shteteve dhe qeverive që uruan Presidentin Rexhep Tajip Erdogan, i cili kryeson në balotazhin e zgjedhjeve presidenciale.

Votimi filloi në orën 8 të mëngjesit me orën lokale dhe përfundoi në orën 17:00.

Më shumë se 64.1 milionë njerëz kishin të drejt vote, duke përfshirë mbi 1.92 milion votues jashtë shtetit që kanë hedhur tashmë votat e tyre dhe 4.9 milionë votues për herë të parë.

Vazhdo të lexosh

Lajmet

Borrell për situatën në veri: Kosova mos të ndërmarrë hapa të njëanshëm dhe destabilizues

Borrell ka shkruar në Twitter se ata pajtohen që Prishtina duhet të depërshkallëzojë dhe mos të ndërmarrë hapa të njëanshëm dhe destabilizues.

Publikuar

nga

Përfaqësuesi i lartë i Bashkimit Evropian, Josep Borrell ka diskutuar me Sekretarin e Përgjithshëm të NATO-s, Jens Stoltenberg lidhur me situatën në veri të Kosovës. 

Borrell ka shkruar në Twitter se ata pajtohen që Prishtina duhet të depërshkallëzojë dhe mos të ndërmarrë hapa të njëanshëm dhe destabilizues. 

Ai gjithashtu ka vlerësuar koordinimin e mirë të vazhdueshëm ndërmjet EULEX-it dhe KFOR-it në sigurimin e një mjedisi të sigurt dhe të qetë.

Vazhdo të lexosh

Lajmet

Numërohen 54.6% të votave në Turqi

Votimi filloi në orën 8 të mëngjesit me orën lokale dhe përfundoi në orën 17:00.

Publikuar

nga

Presidenti turk, Recep Tayyip Erdogan kryeson balotazhin e zgjedhjeve të së dielës me 54.47% të votave, ndërsa kandidati i opozitës, Kemal Kilicdaroglu ka 45.53%, nga 54.6% të votave të numëruara në mbarë vendin.

Ahmet Yener, kryetari i Këshillit të Lartë Zgjedhor (YSK), dha rezultatet zyrtare në numërimin e votave deri më tani për gazetarët në kryeqytetin Ankara. 

Votimi filloi në orën 8 të mëngjesit me orën lokale dhe përfundoi në orën 17:00.

Më shumë se 64.1 milionë njerëz kishin të drejt vote, duke përfshirë mbi 1.92 milion votues jashtë shtetit që kanë hedhur tashmë votat e tyre dhe 4.9 milionë votues për herë të parë.

Votuesit kanë vendosur midis Erdoganit, i cili kërkon rizgjedhjen, dhe kandidatit kryesor të opozitës Kemal Kilicdaroglu.

Zgjedhjet presidenciale janë mbajtur fillimisht më 14 maj, ku Erdogan mori 49.52% të votave, ndërsa Kilicdaroglu doli i dyti me 44.88% dhe Sinan Ogan i Aleancës ATA mori 5.17%, derisa sot është zhvilluar edhe votimi në balotazh, ku ai që merr shumicën e plotë, më shumë se gjysmën e totalit të votave, do të jetë presidenti i ardhshëm.

Vazhdo të lexosh

Të kërkuara