Kronika e zezë

​Arrestohen tetë persona nga aksioni policor, lëndohen gjashtë policë në veri të Mitrovicës

PK-ja thotë se grupet kriminale të organizuara kishin bllokuar rrugët.

Publikuar

Policia e Kosovës ka zhvilluar një aksion policor për luftimin e mallrave të kontrabanduara. Derisa në disa qytete të Kosovës gjithçka shkoi mirë, në veri të Mitrovicës policët u përballën me qytetarët. Nga ky aksion u arrestuan tetë persona, ndërsa gjashtë zyrtarë policorë janë lënduar.

Policia e Kosovës nëpërmjet një komunikate për medie thotë se grupet kriminale të organizuara kishin bllokuar rrugët me mjete të ndryshme transportuese. Ata përdorën bombola gazi, shok bomba e kanë shtënë me armë zjarri e granata dore. Krejt kjo për të penguar sulmin ndaj zyrtarëve doganorë dhe policorë. Megjithëkëtë tashmë thuhet se situata në veri është qetësuar.

“Operacioni policor është realizuar në rajonin e Prishtinës, Pejës, Mitrovicës së Jugut dhe Mitrovicës së Veriut. Përderisa në të gjitha rajonet tjera operacioni policor ka kaluar pa probleme, në Mitrovicë Veri grupe kriminale në mënyrë të organizuar janë grumbulluar, kanë krijuar bllokime të rrugëve me mjete të ndryshme transportuese, kanë përdorur bombola gazi, shok bomba, të shtëna me armë zjarri e granata dore, me qëllim të pengimit dhe sulmit ndaj zyrtarëve doganorë dhe policorë, të cilët kanë qenë në kryerje të detyrës zyrtare. Referuar situatës së krijuar, rrezikimit të drejtpërdrejt të zyrtarëve, bllokimeve të rrugëve, përdorimit të bombolave të gazit, shok bombave, përdorimit të armëve të zjarrit e granatave të dorës nga persona të dyshuar si dhe dëmtimit/zjarrvënies së automjeteve zyrtare, Policia e Kosovës është detyruar të ndërmarrë veprime policore duke përdorur mjetet e nevojshme ligjore, me qëllim të ofrimit të sigurisë ndaj zyrtarëve të përfshirë në operacion, qytetarëve në atë zonë dhe krijimit të mundësisë së lëvizjes e qarkullimit të lirë”, thuhet në komunikatën e policisë.

Tutje bëhet e ditur se “Si pasojë e gjuajtjeve me mjete të ndryshme vdekjeprurëse drejt zyrtarëve policorë, deri më tani janë raportuar se (6) zyrtarë policorë kanë pësuar lëndime trupore, prej tyre (5) zyrtarë të nacionalitetit shqiptar dhe (1) i nacionalitetit serb. Bazuar në informacionet fillestare një nga personat e përfshirë në sulm ndaj zyrtarëve policorë, është lënduar. Deri në këtë fazë janë arrestuar dhe shoqëruar tetë (8) persona; R. K. (1957) mashkull kosovar/shqiptarë nga rajoni i Pejës, A. K. (1979) mashkull kosovar/shqiptarë nga rajoni i Prishtinës, M.N. (1990) mashkull kosovar/shqiptarë nga rajoni i Mitrovicë Jugu, I.Z. (1982) mashkull kosovar/shqiptarë nga rajoni i Mitrovicë Jugu, A.D. (1995) mashkull kosovar/shqiptarë nga rajoni i Mitrovicë Jugu, M. Dz.(1958) mashkull kosovar/boshnjak nga rajoni i Mitrovicës Veri, I. H. (1975) mashkull kosovar/shqiptarë nga rajoni i Mitrovicës Veri, M. L. (1978) mashkull kosovar/serbe nga rajoni i Mitrovicës Veri”.

Poashtu janë sekuestruar mallra dhe dëshmi të ndryshme të kontrabanduara në vlerë prej qindra mijëra euro, të cilat shërbejnë si prova materiale, të cilat kanë qenë të vendosura në lokacione të ndryshme, lokale afariste, magazina/depo etj.

“Operacioni policor ka përfunduar, situata në pjesën veriore të Mitrovicës është qetësuar, përderisa veprimet e mëtejme policore janë duke u realizuar në bashkëpunim dhe koordinim me Doganën e Kosovës dhe organet e drejtësisë”, përfundon komunikata e policisë.

Ndërsa kryeministri i Kosovës, Albin Kurti ka reaguar duke thënë se krimi dhe grupet kriminale nuk do të tolerohen dhe do të luftohen. Kontrabandën do ta luftojmë e do ta parandalojmë.

“Aksion i Policisë kundër krimit e kontrabandës në Prishtinë, Pejë dhe në veri e jug të Mitrovicës. Herët në mëngjesin e sotëm, Policia e Kosovës, me qëllim të luftimit të kontrabandës ka filluar operacione bastisjeje në disa lokacione të ndryshme në Prishtinë, Pejë e Mitrovicë (si në jug ashtu edhe në veri). Këto veprime policore janë paraprirë nga hetimet intensive dhe janë me urdhër e të bashkërenduara me prokuroritë dhe gjykatat kompetente. Janë sekuestruar mallra e dëshmi të tjera që paraqesin edhe prova materiale. Krimi dhe grupet kriminale nuk do të tolerohen dhe do të luftohen. Kontrabandën do ta luftojmë e do ta parandalojmë. Aksioni i sotëm policor ka përfunduar. U bëj thirrje qytetarëve në komunën veriore të Mitrovicës që të mos bien pre e disa medieve në Serbi që e mbrojnë krimin, korrupsionin dhe kontrabandën dhe duan ta politizojnë dhe etnizojnë atë”, ka shkruar Kurti. 

Kronika e zezë

Tri raste të dhunës në familje në 24 orët e fundit

Gjatë 24 orëve janë raportuar tre raste të dhunës në familje në tre qytete të Kosovës.

Publikuar

nga

Në Gllogoc një grua ka raportuar se është kanosur nga bashkëshorti i tij. I dyshuari është intervistuar dhe me vendim të prokurorit është liruar në procedurë të rregullt.

Ndërsa në Prizren është arrestuar një burrë pasi kishe sulmuar fizikisht nënën e tij. Viktima nuk ka pësuar lëndime, thotë Policia e Kosovës, ndërsa me vendim të prokurorit i dyshuari është dërguar në mbajte.

Dhunë ndaj bashkëshortes, dyshohet të ketë shkaktuar edhe një mitrovicas. Sipas raportit policor, raportohet se pas një mosmarrëveshje midis dy bashkëshortëve i dyshuari ka shtyrë bashkëshorten e tij e cila është rrezuar. Viktima pas sulmit të pësuar ka pranuar tretman mjekësor.

Me vendim të prokurorit pas intervistës palët janë liruar dhe rasti ka shkuar në procedurë të rregullt.

Vazhdo të lexosh

Kronika e zezë

Tre muaj burg për rrahje

I pandehuri është dënuar për shkak të veprës penale lëndim i lehtë trupor.

Publikuar

nga

Gjykata Themelore në Ferizaj ka dënuar me tre muaj heqje lirie të pandehurin A.Rr., shtetas i Kosovës, për shkak të veprës penale lëndim i lehtë trupor.

I pandehuri akuzohet se më 21.10.2019, në oborrin e shkollës së mesme profesionale në Shtime, së bashku me dy të mitur, pas një mosmarrëveshje, ka sulmuar të dëmtuarit SH.A., D.M., A.M., duke u shkaktuar lëndime trupore, të cilat rezultojnë me pasoja të përkohshme për shëndetin.

Kundër këtij aktgjykimi, palët kanë të drejtë ankese në afat prej 15 ditëve nga dita e pranimit të aktgjykimit në formë të shkruar.

Vazhdo të lexosh

Kronika e zezë

Hajni që thyente muret e banesave dënohet me 18 muaj burg

Kundër këtij aktgjykimi, palët kanë të drejtë ankese në afat prej 15 ditëve.

Publikuar

nga

Gjykata Themelore në Ferizaj ka dënuar me një vit e gjysmë burg dhe 200 euro gjobë të pandehurin G.P., për shkak të veprës penale vjedhje e rëndë.

I pandehuri akuzohet se gjatë muajit maj 2018 në Ferizaj me qëllim përvetësimi të pasurisë së luajtshme, hap një vrimë të madhe në banesën e fqinjës së tij N.E., depërton brenda ku pastaj përmes kësaj banese hap një vrimë tjetër dhe depërton në banesën e F.F., ku ka vjedhur dy çanta Sfarovski në vlerë 2000 euro, një orë dore në vlerë 350 dollarë, një hekur për hekurosje të rrobave në vlerë 40 euro, rroba të ndryshme, si dhe ka tentuar që të marrë edhe një TV, por pasi nuk ka arritur, i njëjti është dëmtuar tërësisht, vlera e të cilit sillet rreth 600 euro.

I pandehuri po ashtu më 2.05.2018 në Ferizaj, së bashku me një të mitur, në banesën e N.E., kanë thyer murin duke depërtuar në banesë dhe kanë marrë dy valixhe, tre tepihë, pesë palë perde të ndryshme, 40 bluza të ndryshme dhe ngjyra të ndryshme për femra, një palë gjygyma, 10 palë sandale për gra, një fyell për fëmijë, një kitare, një pallto, një këmishë, dy kutia të kozmetikës, një rrip, një kapëse (element kuzhinës), një palë vathë bizhuterie, një laps, një kaçavidë, një fustan, një palë pantallona, katër minifund për femra, dy shami, një palë pantallona për fëmijë, dy komplete për femra, tri palë çizme për femra, dy palë këpuca për femra, një tharëse të flokëve, një makinë për shpageta, pesë fletore të ndryshme, tri tenxhere, një tepsi, dy kullesa metalike, një palë doreza të plastikes, dy qese me tela për larjen e enëve, një ombrellë, me ç’rast të dëmtuarës, i ka shkaktuar dëm material.

Kundër këtij aktgjykimi, palët kanë të drejtë ankese në afat prej 15 ditëve nga dita e pranimit të aktgjykimit në formë të shkruar. 

Vazhdo të lexosh

Kronika e zezë

​Rrahet një mësimdhënëse në Ferizaj

Rasti sipas policisë ka ndodhur pasi vajza e së dyshuarës, nxënëse në këtë shkollë, kishte marrë një vërejtje.

Publikuar

nga

Policia e Kosovës ka arrestuar sot një person pasi që ka rrahur një mësimdhënëse në shkollën e mesme të ulët “Naim Frashëri” në Zaskok të Ferizajt.

Personi i arrestuar B.P., femër e moshës 35-vjeç, rreth orës 08:05, ka sulmuar H.L., femër e moshës 58-vjeç, mësimdhënëse në këtë shkollë, duke i shkaktuar lëndime trupore si pasojë e së cilave edhe ka marrë tretman mjekësor në Qendrën Emergjente në Ferizaj.

Rasti sipas policisë ka ndodhur pasi vajza e së dyshuarës, nxënëse në këtë shkollë, kishte marrë një vërejtje.

E dyshuara, pasi është intervistuar nga policia me vendim të Prokurorit të Prokurorisë Themelore në Ferizaj është dërguar në mbajtje për 48 orë, për procedura të mëtejme hetimore dhe rasti është iniciuar lëndim trupor dhe vetëgjyqësi.

Vazhdo të lexosh

Të kërkuara