Rripi i Gazës është shndërruar në një “tokë dëshpërimi” pas 50 ditësh të një bllokade totale nga autoritetet izraelite, e cila ka ndalur të gjitha furnizimet me ndihma humanitare dhe mallra jetike për popullsinë palestineze. Kështu deklaroi Philippe Lazzarini, Komisioneri i Përgjithshëm i Agjencisë së Kombeve të Bashkuara për Ndihmën dhe Punët për Refugjatët Palestinë (UNRWA).

Në një postim në rrjetin social X, Lazzarini theksoi se “uria në enklavë po përhapet dhe po thellohet – kjo është një situatë e krijuar qëllimisht nga njeriu.” Ai shtoi se ndihma humanitare është shndërruar në “mjet pazari dhe armë lufte”, ndërsa miliona civilë mbeten të bllokuar pa akses në kujdes shëndetësor apo ndihma bazë.

Sipas Lazzarinit, mbi 2 milionë palestinezë, shumica prej tyre gra dhe fëmijë, janë privuar nga ndihma mjekësore. Ndërkohë, rreth 3,000 kamionë me ndihma emergjente të UNRWA-s janë të gatshëm për të hyrë në Gaza, por pengohen nga bllokada e vendosur.

Kriza humanitare përkeqësohet më tej pas rifillimit të operacioneve ushtarake izraelite më 18 mars, kur Forcat Mbrojtëse të Izraelit (IDF) nisën një seri sulmesh ajrore mbi objektivat e Hamasit në Gaza. Kjo erdhi pas përfundimit të një armëpushimi që ishte vendosur në janar, pasi – sipas zyrës së kryeministrit Benjamin Netanyahu – Hamasi hodhi poshtë propozimet e ndërmjetësuara nga SHBA.

Zyra e Netanyahu deklaroi se qëllimi i operacioneve është sigurimi i lirimit të pengjeve dhe çmontimi i infrastrukturës së Hamasit. Megjithatë, përfaqësues të Hamasit dhe kritikë të tjerë në rajon kanë akuzuar Shtetet e Bashkuara për mbështetje të ofensivës izraelite dhe për përshkallëzimin e krizës humanitare.

Autoritetet zvicerane kanë shtuar tetë media ruse në listën e tyre të sanksioneve, thuhet në një dokument të publikuar në faqen e internetit të Sekretariatit të Shtetit për Çështjet Ekonomike të vendit (SECO).

Ndër të tjera, lista e sanksioneve përfshin faqen e lajmeve në internet Lenta.ru, kanalin televiziv Zvezda dhe gazetën Krasnaya Zvezda, si dhe agjencinë e lajmeve News Front, faqen e internetit SouthFront, RuBaltic.ru dhe Fondacionin Strategic Culture. Ai specifikoi se kufizimet do të hyjnë në fuqi më 23 prill.

Më 24 shkurt, Bashkimi Evropian prezantoi paketën e 16-të të sanksioneve individuale dhe ekonomike kundër Rusisë. Në kuadër të kësaj pakete, Brukseli pezulloi licencat e transmetimit të një sërë mediash ruse, duke përfshirë Eurasia Daily, News Front, SouthFront, RuBaltic.ru, Lenta,ru, Zvezda dhe Fondacionin Strategic Culture.

Një tërmet me magnitudë 6.2 ballë të shkallës Rihter goditi brigjet e Indonezisë, njoftoi Shërbimi Gjeologjik i SHBA-së (USGS).

Tërmeti ka ndodhur në orën 19:17 me orën lokale në një thellësi prej 117 kilometrash.

Epiqendra e tërmetit ishte afër ishujve Talaud të Indonezisë, në distancë të barabartë midis ishujve Maluku të Indonezisë dhe Filipineve jugore, tha USGS.

Nuk është lëshuar paralajmërim për cunami dhe nuk ka informacion për viktima të mundshme apo dëme materiale.

Një sulm me dronë nga forcat ruse ka goditur një ndërtesë banimi në qytetin e Odesës në Ukrainë, në një zonë të dendur me popullsi, duke lënë të lënduar të paktën tre banorë, përfshirë një fëmijë.

Sulmi u krye gjatë një periudhë kur po vazhdojnë tentimet diplomatike për ta siguruar një armëpushim për luftën në Ukrainë, pas pushtimit të paprovokuar nga Rusia në vitin 2022.

Kryetari i komunës së Odesës, Hennadiy Trukhaniv, shkroi në rrjetet sociale më 22 prill se shumë apartamente janë dëmtuar dhe se “banorët janë në shok.”

Shërbimet e emergjencës publikuan foto dhe video të ekipeve zjarrfikëse që luftonin zjarret në atë që u përshkrua si infrastrukturë civile.

Në mbarë vendin, Forca Ajrore e Ukrainës raportoi dhjetëra sulme me dron gjatë natës.

Në një deklaratë thuhej se “38 dronë Shahed janë rrëzuar në lindje, veri, jug dhe qendër të vendit”. Po ashtu u tha se janë kapur edhe 16 dronë të tjerë.

Sulmet erdhën një ditë pasi presidenti rus, Vladimir Putin, pranoi se forcat e tij po sulmonin caqe civile në Ukrainë.

Duke folur më 21 prill për një sulm në qytetin verior Sumi javën e kaluar, ku u vranë 35 persona, ai tha se caku ishte një ndërtesë civile — por se aty ndodheshin ushtarë.

Pas sulmit, kreu i administratës ushtarake lokale ukrainase u shkarkua pas akuzave se kishte organizuar një ceremoni dekorimi ushtarak në qytet.

Më 22 prill, autoritetet në Kiev raportuan gjithashtu dëme në shtëpi dhe automjete pas sulmeve të natës nga Rusia. Por, kreu i administratës ushtarake rajonale, Mykola Kalashnyk, tha se nuk ishte goditur asnjë cak i infrastrukturës kritike.

“Gjashtë shtëpi private, katër makina, tre ndërtesa ndihmëse dhe tre garazhe u dëmtuan si pasojë e një sulmi armik. Ka pasur gjithashtu një zjarr në një kantier ndërtimi”, shkroi ai në Telegram.

Më vonë, sirenat e alarmit ajror u dëgjuan sërish në mes të raportimeve të reja për praninë e dronëve rusë.

Rusia gjithashtu kreu sulme të gjera me raketa të hënën e Pashkëve, më 21 prill, pas përfundimit të një armëpushimi 30-orësh të shpallur prej saj. Kievi pretendoi se forcat ruse e shkelën armëpushimin 3.000 herë.

Më 22 prill, ministri i Jashtëm francez, Jean-Noel Barrot, e hodhi poshtë armëpushimin si një “operacion marketingu” nga Putini, i cili synonte kryesisht presidentin amerikan, Donald Trump, që është shprehur i irrituar për vazhdimin e sulmeve ruse, ndërsa ai shtyn përpjekjet diplomatike për të arritur një armëpushim.

“Armëpushimi i Pashkëve, i cili u shpall disi papritur, ishte një operacion marketingu, një operacion simpatik, që synonte të ndalonte padurimin dhe zemërimin e presidentit Trump”, u citua të thoshte Barrot nga agjencia e lajmeve AFP në televizionin FranceInfo.

Ministri i Jashtëm ukrainas, Andriy Sybiha, tha se kishte biseduar me Barrot një natë më parë për të koordinuar qëndrimet përpara një takimi në Londër më 23 prill.

Takimi në Londër ka për qëllim të mbledhë së bashku Britaninë, Francën, Gjermaninë, Ukrainën dhe Shtetet e Bashkuara, pas një mbledhjeje në Paris më 18 prill — bisedimet e para të përbashkëta në këtë format që prej marrjes së detyrës nga Trumpi.

Barrot tha për FranceInfo se vendet evropiane përdorën atë takim për t’i komunikuar Uashingtonit vijat e tyre të kuqe për një marrëveshje. Trump ka thënë se shpreson që një marrëveshje të përfundojë këtë javë, gjë që shumë vëzhgues e shohin si tepër ambicioze.

Por, si një tjetër shenjë që diplomacia po merr vrull, Putini tha më 21 prill se ishte gati për bisedime të drejtpërdrejta me Zelenskyn – diçka që ai e kishte refuzuar deri kohët e fundit.

Kjo u prit me skepticizëm nga analisti politik ukrainas, Ihor Reiterovich, i cili i tha Current Time të Radios Evropa e Lirë se ishte “manipulim standard – një përpjekje për ta paraqitur Rusinë si forcë paqeruajtëse, gjë që në fakt duket tepër cinike”./REL/