12 prill 1993

Lajm i plotë:

Një delegacion i Kongresit Amerikan në Kosovë

Një delegacion i Kongresit Amerikan, në përbërje Eliot Engëll, Sjuzan Molinari, Bill Pakson dhe Pitër King, arriti dje në Kosovë. Delegacioni i Kongresit Amerikan u takua dje pasdite me Kryetarin e Republikës së Kosovës, dr.Ibrahim Rugovën.

Në fillim të bisedimeve, dr.Rugova njoftoi kongresistët amerikanë me gjendjen aktuale në Kosovë, të cilën e përshkroi si shumë të rëndë dhe të rrezikshme. Ai theksoi se po vazhdon represioni i ashpër policor i Serbisë, që ka për qëllim provokimin e mëtejm të gjendjes edhe ashtu eksplozive. Kryetari Rugova, falënderoi kongresistët amerikanë dhe administratën amerikane për përkrahjen që i ka dhënë deri tani çështjes së Kosovës. Kjo vizitë, tha kryetari Rugova, është në vazhdën e këtij qëndrimi parimor amerikan, të cilës ne i japim rëndësi të madhe.

Kongresisti Eliot Engëll, pasi falënderoi kryetarin Rugova për pritjen, theksoi se ky ishte takimi i tij i tretë me të, pasi më parë ishin takuar në Nju-Jork dhe Uashington. Tani, tha ai, takohemi në Prishtinë dhe kjo ka domethënien e vet. Eliot Engëll theksoi se në Amerikë po kuptohet mirë çështja shqiptare dhe e Kosovës dhe lufta e tyre paqësore për liri dhe demokraci. Ai shtoi se do të vazhdojë ta përkrahë fuqishëm kauzën shqiptare në Kongresin dhe në qarqet amerikane. Me këtë rast, kongresisti Engëll ia dorëzoi kryetarit Rugova tekstin e rezolutës, të cilën ai dhe kongresisti Bonior e kongresistja Molinari e kanë paraqitur në Kogresin Amerikan për miratim. Në tekstin e rezolutës kërkohet ndërprerja e dhunës së Serbisë në Kosovë dhe miratimi i Planit Paqësor prej 10 pikash të kryetarit Rugova, që ua paraqiti OKB, organizmave ndërkombëtare dhe qeverive të shteteve perëndimore.

Në fjalën e saj, kongresistja Molinari theksoi me zë të lartë, siç tha ajo, që të dëgjohet mirë, se duam t’ua bëjmë me dije të gjithëve se shqiptarët janë të okupuar dhe se jemi të vendosur që këtë ta themi edhe në Kongresin tonë dhe se do të vazhdojmë të përkrahim luftën e drejtë të popullit të Kosvoës. Ajo falënderoi dr. Rugovën për, siç tha ajo, “që na keni lejuar të kemi nderin ta mbrojmë kauzën tuaj në Amerikë”

Edhe kongresistët Pakson dhe King ritheksuan vendosmërinë e tyre për të mbrojtur aspiratat e shqiptarëve dhe për të vazhduar angazhimin e tyre në Amerikë për realizimin e të drejtave të tyre legjitime.

Delegacioni i kongresistëve amerikanë theksoi se pozicionin e tyre për zgjidhjen e drejtë të çështjes së Kosovës ua bënë me dije edhe palës serbe në takimin djeshëm, të cilin ata e cilësuan si “takim frustues”.

Delegacionin amerikan me gjendjen në Kosovë dhe me përcaktimin politik, e njoftuan edhe përfaqësues të partive politike shqiptare, që përfaqësohen në Kuvendin shumëpartiak të Kosovës: dr.Fehmi Agani, nënkryetar i LDK-së, dr.Hivzi Islami, kryetar i Partisë Fshatare të Kosovës, dr.Abdullah Karjagdiu, nënkryetar i Partisë Shqiptare Demokristiane të Kosovës, Rifat Blaku, nënkryetar i Partisë Parlamentare të Kosovës, Shkëlzen Maliqi, nënkryetar i Partisë Socialdemokrate të Kosovës, Hydajet Hyseni, nënkryetar i Këshillit për Mbrojtjen e të Drejtave dhe Lirive të Njeriut në Prishtinë, etj.

Kryetari i Republikës së Kosovës, dr.Ibrahim Rugova, shtroi mbrëmë darkë për nder të delegacionit amerikan. Në darkë merrnin pjesë edhe deputetë të Kuvendit të Republikës së Kosovës. Sot kongremenët amerikanë do të vizitojnë disa qendra të Kosovës.

Gjatë ditës së djeshme delegacioni i kongresmenëve amerikanë u takua edhe me përfaqësuesit e serbëve në Kosovë. Në bazë të një raporti të emetuar mbrëmë në Televizionin e Serbisë, pala serbe doli shumë e pakënaqur nga ky takim.

 

Lajme të tjera:

Dr.Ibrahim Rugova: Kosova i ngjanë një bombe të kurdisur

Kumtesë e Partisë Parlamentare të Kosovës

Aeroplanët e NATO-s sot mbi Bosnjë

Këshilli i Sigurimit shqyrton rezolutën për sanksione të reja kundër Serbisë dhe Malit të Zi

Të rinjtë shqiptarë dërgohen me dhunë në ushtrisë serbe

U dërgua në burg gazetari Blerim Shala

Policia serbe shtiu me armë në familjen e Ali Hysenit në Batllavë të Podujevës

Shqipëria pranon 10.000 refugjatë nga Bosnja

Në Prishtinë u rrah rëndë Adem Borovci

Kosova në shtypin gjerman

 

 

 

12 prill 1994

Lajm i plotë:

Dr.Sali Berisha: Masakri në Peshkopi – akt armiqësor

Presidenti i Republikës së Shqipërisë, dr.Sali Berisha, dënoi dje në mënyrën më të ashpër masakrin në kazermën e rekrutëve në Peshkopinë e Epërme, e cila synon një akt armiqësor të shëmtuar dhe jashtëzakonisht të Greqisë ndaj Shqipërisë, sovranitetit dhe integritetit të saj, për pasojat e të cilit Qeveria greke mbanë përgjegjësi të plotë.

Kam kërkuar nga Qeveria, tha presidenti Berisha, që të marrë të gjitha masat e duhura për të parandaluar aktet e tilla dhe për t’iu përgjigjur në mënyrë adekuate këtij akti dhe kësaj politike. Presidenti Berisha i bëri thirrje mbarë opinionit shqiptar, qeverive të botës, institucioneve dhe opinionit publik ndërkombëtar që të dënojnë këtë akt kriminal dhe që ta dënojnë politikën e Greqisë.

Dr.Berisha vuri në dukje se Greqia me politikën e saj synon lehtësimin dhe inkurajimin e agresorëve serbë në Veri të Ballkanit dhe destabilizimin e rajonit për qëllime ekspansioniste greke në Jug të tij.

Thirrjeve të Shqipërisë për marrëdhënie të mira të miqësisë, Greqia iu është përgjigjur me seri aktesh armiqësore që kanë synuar destabilizimin e vendit.

Presidenti Berisha shprehu vendosmërinë për të insistuar me kënbëmgulje, sikundër deri tash, që politika shqiptare t’i shërbejë ruajtjes së paqes dhe stabilitetit.

Presidenti Berisha u shprehu ngushëllime familjeve të ushtarakëve të vrarë.

 

Lajme të tjera:

Qeveria greke mohon përgjegjësinë për masakrin

Përgjegjësinë e mori “Fronti për çlirimin e Epirit Verior”

Kombet e Bashkuara suspenduan urën ajrore humanitare

Admirali Leighton Smith komandant i ri i NATO-s për Evropën e Jugut

Qeveria e Kosovës përkrah me sulmet e NATO-s mbi pozicionet serbe

Në tubimin për Bosnjën në Bon u kërkua protektorat ndërkombëtar për Kosovën

Represioni në Kosovë

Policia serbe arrestoi një ish-ushtar shqiptar nga Ceroviku i Klinës

Gjatë tre muajve në Skënderaj u bastisën 107 familje

Përfunduan takimet sportive të shkollave të mesme “Prishtina ’94”

Kërkohet Mëhill Z.Gashi

 

 12 prill 1995

Lajm i plotë:

Dje e sot pati arrestime masive të udhëheqësve lokalë në Kaçanik

Gjatë ditës së djeshme, rreth 150 policë serbë nga Kaçaniku dhe Ferizaji, pasi bllokuan dje qytezën e Kaçanikut, ua bastisën shtëpitë dhe i arrestuan së paku 14 udhëheqës lokalë të LDK-së e partive të tjera dhe funksionarë të pushtetit lokal.

Komisioni për Informim i Degës së LDK-së në Kaçanik njoftoi mbrëmë se gjatë ditës ishin arrestuar këta veprimtarë:

Habib Menduh Shehu (1938), kryetar i Degës së LDK-së në Kaçanik, Maksut Kemajl Hoxha (1950), kryetar i Qeverisë komunale, Luan Ramadan Matluma (1956), aktivist i SP në kombinatin “Sharri” në Kaçanik, Mentalip Abdullah Jezerci (1957), ish-punëtor i Mbrojtjes Popullore në Kuvendin komunal të Kaçanikut, Ekrem Demir Kyçyku (1958), sekretar i Degës së LDK-së në Kaçanik dhe ish i burgosur i ndërgjegjës, Mejdi Hajrush Dalloshi (1944), sekretar komunal i arsimit, Ismet Ejup Bela (1949), punëtor në Drejtoratin e Gjeodezisë në Kaçanik, Esat Selim Muhaxheri (1950), punëtor në NT “Sharri” Kaçanik, Xhevat Misim Bela (1950), nga fshati Bob, komuna e Kaçanikut, punëtor i Mbrojtjes Popullore në Kaçanik, Rafi Veli Dema (1952) nga fshati Bob, komuna e Kaçanikut anëtar i Kryesisë së Degës së PFK-së, Baki Dullovi, nga f. Biçac, komuna e Kaçanikut, kryetar i Nëndegës së LDK-së në këtë fshat, Berat Selman Luzha (1953) nga f. Begracë, komuna e Kaçanikut, deputet i Parlamentit të Republikës së Kosovës, anëtar i Këshillit të Pëgjithshëm të LDK-së si dhe ish i burgosur politik, Ibush Isman Vishi (1959), nga fshati Dubravë, komuna e Kaçanikut, nëkryetar i Kryesisë së Degës së LDK-së në Kaçanik dhe ish i burgosur politik dhe Qerim Rexhep Guri, nga f. Nikaj, komuna e Kaçanikut, aktivist sindikal i SP të Zejtarëve dhe ekonomisë së vogël.

Komisioni për Informim i Degës së LDK-së në Kaçanik nuk përjashton mundësinë që numri i të arrestuarëve të jetë edhe më i madh se 14 persona.

Preteksti i arrestimit tash për tash nuk dihet, ndërsa ka njoftime se gjatë bastisjes dhe arrestimeve policët kanë përmendur në ndonjë rast si pretekst kërkimin e armëve.

Anëtarët e familjes së të arrestuarit Ibush Vishi, u interesuan dje dhe sot për të në Kaçanik, në Ferizaj, në Gjilan dhe në Prishtinë, por nuk mundën të marrin asnjë njoftim as për vendin se ku mbahet i arrestuar. Në Kaçanik atyre iu tha se të arrestuarit janë dërguar në Ferizaj, por në sigurimin serb në Ferizaj e mohuan këtë, duke thënë se të arrestuarit gjenden në Gjilan.

Mirëpo, edhe në Gjilan sigurimi serb mohoi se të arrestuarit gjendeshin aty. Familja kërkoi njoftime edhe në Prishtinë, por as këtu nuk mundi të mirrte asnjë informacion se ku gjendet i arrestuari.

Arrestimi masiv i veprimtarëve politikë e funksionarëve lokalë në Kaçanik, pason arrestimin e funksionarëve të pushtetit lokal në Gjilan që u bë para dy javësh.

Më parë regjimi serb ka urdhëruar arrestime të ngjashme edhe në Pejë e Prizren, ku, në mes tjerësh, janë arrestuar edhe kryetarët e kuvendeve komunale.

Gjatë vitit të kaluar ultranacionalistët dhe ekstremistët serbë në Fushë-Kosovë kanë kërkuar shpartallimin e pushtetit legal në Kosovë, të cilin ata e cilësojnë si pushtet paralel.

Në një njoftim tjetër të Komisionit për Informim të Degës së LDK-së në Kaçanik, thuhet se policia serbe me pretekst të kërkimit të armëve, dje dhe sot, bastisi edhe disa familje të tjera shqiptare në Kaçanik e rrethinë dhe arrestoi edhe disa persona të tjerë.

Dje rreth orës 5:00 të mëngjesit policia bastisi shtëpinë e Islam Q. Spahiut. Bastisja zgjati rreth gjysmë ore, ndërsa policia mori me vete Islam Spahiun, si dhe plaçkiti disa videokaseta.

Dje, në orët e hershme të mëngjesit, policia bastisi shtëpinë e Xhemajl D. Metallarit në Kaçanik. Bastisja zgjati rreth gjysmë ore, në të cilën morën pjesë 8 punëtorë të sigurimit serb. Pas bastisjes, policia arrestoi Xhemajl Metallarin, i cili është aktivist i dalluar i Aktivit të LDK-së në lagjen “Ramadan Agushi” në Kaçanik.

Pas arrestimit të Xhemajl Metallarit, dy policë serbë sot, rreth orës 9:00 të mëngjesit, bastisën shtëpinë e vëllait të Xhemajlit, Sylejman Metallarit, me pretekst se Xhemajli paskësh pranuar se tek vëllai i tij Sylejmani gjenden dy revole dhe disa fishekë. Bastisja zgjati rreth një orë.

Njoftohet se policia bastisi edhe shtëpinë e vëllait tjetër të tyre, Jonuz Metallari.

Sot rreth orës 9:00 të mëngjesit, u bastis edhe shtëpia e Ramadan Spahiut, me pretekst të kërkimit të armëve. Bastisja zgjati rreth një orë, ndërsa pas bastisjes policët arrestuan djalin e Ramadanit, Shyqri Spahiun, i cili pasi u mor në pyetje, u lirua.

 

Lajme të tjera:

Konferencë për gazetarë e Adem Demaçit në Vjenë

Fehmi Agani priti një delegacion të shoqatës Pax Christi

Konferencë për gazetarë e BSPK-së

Avdia Mehmedoviqi mohoi aktakuzën edhe si dëshmitar në procesin e Pejës

Milicia serbe nxori me dhunë nga shtëpia dr.Rasim Hoxhën

Represion gjatë muajit mars në komunën e Skënderajt

Dhuna e përditshme në Kosovë

Polemikat në parlamentin serb rreth Kosovës

Rreth 250 policë financiarë serbë erdhën në Mitrovicë

Në Gjilan përfundoi manifestimi “Vullneti ’95”

U shkarkua nga detyra një gjeneral rus i UNPROFOR-it në Kroaci

Promovohet libri “Trashëgimia etnokulturore dhe historike e Llapit”

 

 

12 prill 1997

Lajmet kryesore:

Kryetari Rugova priti ndihmëssekretarin amerikan Xhon Kornbllum

Konferencë për gazetarët e Xhon Kornbllumit

Shqipëria sot pret Lekë Zogun I

Rreth 100 shqiptarë u kapën në Pulja

Një grup ish-deputetësh dhe ish-drejtuesish të forumeve të PD-së e quajnë fajtore udhëheqjen e partisë

 

Lajm i plotë

Një i vrarë e një i plagosur në Tiranë e dy të vrarë në Fier

 Një 43 vjeçar u vra dje në mesditë në makinën e tij dhe një i ri 14 vjeçar u plagos, pas të shtënave me armë zjarri, njofton ATSH, duke iu referuar burimeve të policisë.

Dje, rreth orës 13. 30 është vrarë me armë zjarri në makinën e tij në rrugën Bajram Curri, në Tiranë, shtetasi Sabaodin Hodo, 43 vjeç. Si pasojë e të shtënave, është plagosur rastësisht një fëmijë 14 vjeç, Sentilian Pallaveshi, i cili në këtë moment ishte duke kaluar në rrugë.

Burime nga policia bëjnë të ditur se janë identifikuar autorët e vrasjes dhe policia po punon për kapjen e tyre.

Po sipas të të njëjtit burim, dje në fshatin Bishan të rrethit të Fierit janë vrarë me armë zjarri pistoletë, shtetasit Elmaz Kanani, 71 vjeç dhe i biri i tij, Lavdosh Kanani, 33 vjeç.

Burimi i policisë thotë se vrasja e babait dhe e të birit është bërë për motive hasmërie.

 

Lajme të tjera:

Fatos Nano kërkoi “autonomi për Kosovën”

Papa Gjon Pali II viziton sot Sarajevën

Raport mbi shkeljen e të drejtave e të lirive të njeriut në Kosovë gjatë muajit mars

Çka thuhet për vrasjen e zëvendësministrit serb të policisë

Në garat e pianistëve në Paris marrin pjesë katër garues nga Kosova

“Flaka”: Në horizont “Dejtoni” shqiptar

Në gjykatën e instaluar komunale në Prizren Ismail Latifi u dënua me 4 muaj burg

Rektori serb Papoviq u deklaroi diplomatëve amerikanë se s’mund të ketë universitet në “gjuhën e pakicave”

 

 

12 prill 1998

Lajmet kryesore:

Të shtëna në drejtim të fshatrave të rrethuara

Shetitje protestuese në qytetet e Kosovës

Dr. Rugova falënderohet për përgëzimet me rastin e rizgjedhjes Kryetar i Republikës së Kosovës

Policia serbe rrahu tre të rinjë për shkak se defiluan nëpër qytet

Huliganët serbë rrahën tre shqiptarë në Fushë Kosovë

Keqtrajtime e arrestime

 Foto: Fieri