

Botë
Trump kërcënon BE-në dhe Kinën me tarifa nga 1 shkurti
Published
9 months agoon
By
UBTnewsPresidenti i Shteteve të Bashkuara të Amerikës, Donald Turmp, është zotuar të martën se do të vendosë tarifa ndaj Bashkimit Evropian dhe Kinës.
Ai ka thënë se administrata e tij po shqyrton një tarifë ndëshkuese prej 10 për qind ndaj importeve kineze, sepse fentanili po dërgohet nga Kina në SHBA përmes Meksikës dhe Kanadasë.
Trump bëri kërcënimet e tij të fundit për tarifa para gazetarëve në Shtëpinë e Bardhë, një ditë pasi mori pushtetin pa vendosur menjëherë tarifa, siç kishte premtuar gjatë fushatës zgjedhore, raporton Reuters.
Tregjet financiare dhe grupet tregtare shijuan përkohësisht qetësinë të martën, por komentet e tij të fundit theksuan dëshirën e kamotshme të Trumpit për tarifa më të gjera dhe një afat të ri – 1 shkurt – për tarifa prej 25 për qind ndaj Kanadasë dhe Meksikës, si dhe tarifa ndaj Kinës dhe BE-së.
Presidenti amerikan ka thënë se BE-ja dhe vendet e tjera kanë, po ashtu, tregti të çekuilibruar dhe shqetësuese me SHBA-në.
“Bashkimi Evropian është shumë, shumë i keq me ne”, është shprehur Trump, duke përsëritur komentet e bëra të hënën. “Do të ketë tarifa për ta. Kjo është e vetmja mënyrë… do të ketë barazi”.
Trump ka thënë të hënën se po konsideronte vendosjen e tarifave ndaj Kanadasë dhe Meksikës, përveç nëse ato ashpërsojnë masat ndaj trafikimit drejt SHBA-së të emigrantëve ilegalë dhe të fentanilit, përfshirë kimikalet përbërëse nga Kina.
Këshilltari për tregti i Shtëpisë së Bardhë, Peter Navarro, i ka thënë televizionit CNBC, të martën, se kërcënimi i Trumpit për tarifa ndaj Kanadasë dhe Meksikës është për t’i bërë trysni dy vendeve.
“Arsyeja pse ai po shqyrton 25, 25 dhe 10 [për qind], apo çfarëdo që të jetë, ndaj Kanadasë, Meksikës dhe Kinës, është sepse 300 amerikanë vdesin çdo ditë” nga mbidoza me fentanil, ka thënë Navarro.
Të hënën, Trump ka njoftuar ashpërsim të masave ndaj imigracionit, përfshirë një ndalim të gjerë të azilit.
Ai, po ashtu, ka nënshkruar një memorandum tregtar dhe ka detyruar agjencitë federale që të bëjnë një shqyrtim gjithëpërfshirës të një varg çështjeve tregtare deri më 1 prill.
Këtu përfshihen analiza të deficiteve të vazhdueshme tregtare të SHBA-së, praktikat e tregtisë së pabarabartë dhe manipulimin e valutave në mesin e vendeve partnere, përfshirë Kinën.
Meksika dhe Kanadaja kanë reaguar me tone të buta ndaj afatit të 1 shkurtit të vënë nga Trump.
Presidentja meksikane, Claudia Sheinbaum, ka thënë se do të nënvizojë sovranitetin dhe pavarësinë e Meksikës, dhe se do t’i përgjigjet veprimeve amerikane “hap pas hapi”.
Por, ajo ka shtuar se marrëveshja e tregtisë së lirë SHBA-Meksikë-Kanada nuk mund të rinegociohet deri më 2026, një koment që kishte për synim parandalimin e ideve që Trump të kërkojë një ndryshim të parakohshëm të paktit që gjeneron mbi 1.8 trilionë dollarë çdo vit./REL/
Botë
Kallas: Ukraina nuk duhet të heqë dorë nga territori në këmbim të paqes me Rusinë
Published
6 hours agoon
October 21, 2025By
UBTnews
Kaja Kallas, Përfaqësuesja e Lartë e BE-së për Punët e Jashtme dhe Politikën e Sigurisë, ka deklaruar se Ukraina nuk duhet të heqë dorë nga territoret e saj si pjesë e ndonjë marrëveshjeje paqeje me Rusinë.
Duke folur me gazetarët në Luksemburg pas një takimi të ministrave të Jashtëm të BE-së, Kallas theksoi se tregtia me territoret ukrainase është e papranueshme.
“Nëse thjesht i japim territoret, atëherë kjo u jep një mesazh të gjithëve se mund të përdorni forcë kundër fqinjëve tuaj dhe të merrni atë që dëshironi. Mendoj se kjo është shumë e rrezikshme. Kjo është arsyeja pse kemi ligjin ndërkombëtar në vend, [në mënyrë] që askush të mos e bëjë këtë.”, tha Kallas.
Gjatë një takimi të premten e kaluar, Steve Witkoff, i Dërguari Special i presidentit të SHBA-së, Donald Trump, sugjeroi që presidenti ukrainas Volodymyr Zelensky duhet të heqë dorë nga Donbasi si pjesë e një marrëveshjeje armëpushimi.
Vetë Trump tha në një intervistë me Fox News të dielën se Rusia do të mbante një pjesë të territorit që pushtoi gjatë luftës.
Sipas një burimi të Politico, udhëheqësit e BE-së shprehën mbështetjen e tyre për Zelensky pas takimit në Shtëpinë e Bardhë, megjithatë, ishin të kujdesshëm në deklaratat e tyre lidhur me atë nëse Ukraina duhet ta mbajë të gjithë territorin e saj në një marrëveshje të mundshme paqeje./EO
Lajmet
Ish-presidenti Nicolas Sarkozy zyrtarisht në burg, i pari në historinë e Francës
Published
9 hours agoon
October 21, 2025By
UBT News
Ish-Presidenti francez Nicolas Sarkozy është zyrtarisht në burg që nga mëngjesi i së martës për të vuajtur dënimin prej pesë vjetësh për konspiracion kriminal në një çështje që lidhet me financimin libian të fushatës së tij zgjedhore në vitin 2007.
Sarkozy mbërriti në burgun La Santé në Paris, duke u bërë presidenti i parë francez që përjetëshëm shkon në burg, raporton transmetuesi i BFM TV.
Më shumë se 100 vizitorë u mblodhën pranë shtëpisë së tij për të shprehur mbështetje, ndërsa avokati i Sarkozy¬s, Christophe Ingrain, i tha BFM TV-së se një kërkesë për lirimin e tij do të paraqitet shumë shpejt, duke theksuar se ai do të qëndrojë tre javë deri një muaj në paraburgim para se gjykata e apelit të vendosë.
Para se të largohej nga shtëpia, Sarkozy shpërndau një mesazh përmes kompanisë amerikane të mediave sociale X, duke u zotuar të vazhdojë të denoncojë skandalin gjyqësor.
“Do të vazhdoj të denoncoj këtë skandal gjyqësor, këtë përvojë që po përjetoj për më shumë se dhjetë vjet. Këtu kemi një rast financimi të paligjshëm pa asnjë financim! Një hetim gjyqësor që zgjat prej kohësh, nisur në bazë të një dokumenti që tani është vërtetuar se është i falsifikuar”, tha ai.
Sarkozy theksoi se nuk kërkon asnjë përfitim dhe asnjë favor.
“Këtë mëngjes ndjej një trishtim të thellë për Francën, e cila është poshtëruar nga një shprehje e hakmarrjes që ka ngritur urrejtjen në një nivel të paprecedentë. Nuk kam dyshim. E vërteta do të triumfojë. Por çfarë çmimi i tmerrshëm do të jetë paguar”, shtoi ai.
Ish-presidenti francez ishte shpallur fajtor muajin e kaluar me dënim pesë vjet për konspiracion kriminal, por u shpall i pafajshëm për korrupsion pasiv dhe për akuza të tjera për financim të paligjshëm zgjedhor.
Sarkozy ishte zgjedhur president i Francës në vitin 2007 dhe shërbeu deri në vitin 2012./S.K/KP/
Lajmet
BE nën kritika për pezullimin e sanksioneve ndaj Izraelit
Published
9 hours agoon
October 21, 2025By
UBT News
Bashkimi Evropian është kritikuar për vendimin për të pezulluar sanksionet ndaj qeverisë izraelite, pas përpjekjeve të Donald Trump për paqe në Lindjen e Mesme, ndërsa armëpushimi mbetet i brishtë.
Pas takimit me ministrat e jashtëm të BE-së, shefja e politikës së jashtme, Kaja Kallas, njoftoi se BE do të ndalë përkohësisht planet për të pezulluar tregtinë preferenciale me Izraelin dhe për të vendosur sanksione ndaj personave përgjegjës për nxitjen e konfliktit.
Ajo tha se situata ka ndryshuar dhe se masat nuk hiqen nga tryeza, por nuk zbatohen tani.
Ish-përfaqësuesi i BE-së në territoret palestineze, Sven Kuhn von Burgsdorff, kritikoi vendimin duke thënë se sanksionet janë një mjet ligjor për t’iu përgjigjur shkeljeve të ligjit ndërkombëtar.
Sipas The Guardian, ai kujtoi se BE-ja kishte përfunduar në qershor se Izraeli kishte shkelur detyrimet për të drejtat e njeriut dhe duhet të respektojë opinionin e Gjykatës Ndërkombëtare që kërkon përfundimin e pushtimit të territoreve palestineze. 414 ish-diplomatë dhe zyrtarë të BE-së nënshkruan një deklaratë duke kërkuar veprim të fortë kundër ekstremistëve në të dyja anët.
Ish-këshilltarja e BE-së, Nathalie Tocci, paralajmëroi se heqja dorë nga sanksionet do të ishte “gabimi më i madh”, pasi është momenti për të mbajtur presionin, ndërsa plani i Trump është ende i pasigurt.
BE-ja mbetet e ndarë mes vendeve pro-palestineze, si Spanja e Irlanda, dhe atyre që mbështesin Izraelin, si Hungaria e Çekia. Megjithatë, protestat masive në Evropë kanë nxitur kërkesa për veprim më të ashpër kundër Izraelit.
Zyrtarët e BE-së duan që blloku të përfshihet në bordin e paqes të Trumpit dhe të ndihmojë në rindërtimin e Gazës, që mund të kushtojë rreth 70 miliardë dollarë.
Një mandat i fortë i OKB-së pritet të mundësojë dërgimin e trupave ndërkombëtare, me Egjiptin në krye./S.K/KP/
Lajmet
Trump- Kinës: Do nënshkruajë një marrëveshje tregtare, ndryshe do të përballet me tarifa të reja
Published
12 hours agoon
October 21, 2025By
UBT News
Presidenti amerikan Donald Trump deklaroi se beson që Kina do të ulet në tryezën e negociatave dhe do të arrijë një marrëveshje tregtare me Shtetet e Bashkuara, duke paralajmëruar gjithashtu tarifa të reja nëse kjo nuk ndodh.
Në një konferencë për shtyp, Trump u pyet nga një gazetar mbi pasojat e mundshme nëse Kina nuk luan drejt në tregtinë globale, dhe Trump u përgjigj se tarifat mbeten një armë e fuqishme ekonomike në duart e Amerikës dhe se është i bindur që Pekini do të zgjedhë rrugën e bashkëpunimit.
“Ata do të na paguajnë qindra miliona dollarë në vit nëse nuk bëjnë një marrëveshje. Por unë besoj se do të bëjnë”, tha Trump, duke shtuar se ka një marrëdhënie të mirë personale me presidentin kinez Xi Jinping.
Presidenti theksoi se Kina i ka trajtuar ata me shumë respekt, por nuk e përjashtoi mundësinë e vendosjes së tarifave të reja ndaj mallrave kineze nëse negociatat dështojnë.
Deklarata vjen në një kohë kur tensionet mes Kinës dhe fqinjëve të saj janë përshkallëzuar, veçanërisht në Detin e Kinës Jugore, ku përplasjet me forcat australiane dhe të tjera rajonale kanë tërhequr vëmendjen ndërkombëtare./S.K/KP/

Rreziqet e fshehura në shtëpinë tuaj, 5 produkte të zakonshme

Porsche prezanton drejtuesin e ardhshëm të kompanisë

Rama nga Londra: Kosova s’duhet të merret me Serbinë, por të përmbushë detyrimet ndaj BE-së

Supremja: Pranohet ankesa e kandidatit të pavarur për kryetar të Kllokotit, rrëzohet vendimi i PZAP-së

Të dielën e kësaj jave, akrepat e orës kthehen 60 minuta pas

Rrahje dhe gjuajtje me armë zjarri në qendër të Podujevës, policia jep detaje

Ky ilaç është premtues për humbje në peshë

Vdes në moshën 29-vjeçare kampioni amerikan i shahut

Tre kampione sporti apel për kryerjen e mamografisë falas
Të kërkuara
-
Lajmet2 months ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Rajoni4 weeks ago
Policia, FSK-ja dhe Shërbyesit Civilë përfitojnë bursë 20 për qind në programet Master Shkenca Politike dhe Studime të Sigurisë në UBT
-
Lajmet nga UBT2 months ago
Votoni për UBT-në dhe Rektorin Hajrizi në Triple E Awards: Dy nominime të reja ndërkombëtare për institucionin dhe Kosovën
-
Rajoni2 months ago
Profesori i UBT-së fiton grant prestigjioz kërkimor në Universitetin Çarls të Pragës