Finlanda ka vendosur të tërhiqet nga Traktati i Otavës, i cili ndalon përdorimin e minave kundër personelit (anti-njeri), për shkak të shqetësimeve të sigurisë të shkaktuara nga Rusia, transmeton Anadolu.

Sipas agjencisë finlandeze të lajmeve YLE, në Parlamentin finlandez u mbajt një votim për t’u tërhequr nga Traktati i Otavës, i cili ndalon përdorimin e minave kundër personelit.

Vendimi për t’u tërhequr nga Traktati i Otavës u miratua me 157 vota pro dhe 18 kundër në një votim ku morën pjesë 175 deputetë. Vendimi duhet të miratohet nga presidenti. Finlanda do të fitojë të drejtën për të grumbulluar dhe vendosur mina 6 muaj pasi të njoftojë OKB-në dhe vendet e tjera palë për vendimin.

Raporti i përgatitur nga Komisioni Parlamentar i Punëve të Jashtme mbi propozimin e qeverisë për t’u tërhequr nga Traktati i Otavës theksoi se minat janë një mjet mbrojtës për Finlandën dhe janë bërë të nevojshme në mjedisin e sigurisë në dobësim.

Ministri finlandez i Mbrojtjes, Antti Edvard Hakkanen në një postim në llogarinë e tij në mediat sociale, përgëzoi deputetët që morën pjesë në votim duke thënë: “Mesazhi është i qartë: Finlanda është e bashkuar dhe e vendosur për të forcuar aftësitë e saj mbrojtëse”.

Presidenti finlandez Alexander Stubb e kishte mbrojtur tërheqjen nga traktati me arsyetimin se është fqinj me Rusinë, të cilën e cilësoi si një “shtet agresiv dhe imperialist”. Ndërkohë, në Parlament u votua edhe mendimi shtesë i komisionit se Finlanda do të vazhdojë mbështetjen e saj të fortë për aktivitetet humanitare, siç është pastrimi i minave në rajonet e krizës.

Polonia, Lituania, Estonia dhe Letonia njoftuan gjithashtu se kanë planifikuar tërheqjen nga Traktati i Otavës për shkak të shqetësimeve për sigurinë në rajon.

– Traktati i Otavës

Traktati i Otavës, i cili hyri në fuqi më 1 mars të vitit 1999, që njihet ndryshe shkurtimisht si “Traktati i Ndalimit të Minave”, është një Traktat për “Ndalimin, përdorimin, Grumbullimin (stokut), Prodhimin dhe Transferimin e Minave Anti-Personel dhe lidhur me Shkatërrimin e Tyre”.

Në Traktatin e Otavës janë palë 164 vende ndërsa 132 e kanë nënshkruar dhe ratifikuar traktatin.

Asnjë nga vendet që kanë nënshkruar traktatin nuk prodhon mina tokësore. Ndërsa 12 vendet që nuk i janë bashkuar traktatit janë: Rusia, Kina, SHBA-ja, Kuba, India, Pakistani, Irani, Mianmari, Koreja e Veriut, Koreja e Jugut, Singapori dhe Vietnami. Këto vende ende rezervojnë “të drejtën për të prodhuar mina”.

Turqia ka forcuar ndjeshëm sigurinë përgjatë kufirit të saj lindor me Iranin, ndërsa tensionet mes Teheranit dhe Tel Avivit vazhdojnë të përshkallëzohen. Lajmi u bë publik nga Reuters, i cili citoi një burim nga Ministria e Mbrojtjes Kombëtare të Turqisë.

Duke folur në kushte anonimiteti, burimi tha se Ankaraja nuk ka parë ende ndonjë fluks të parregullt migracioni nga territori iranian, por po ndërmerr masa parandaluese për të ruajtur sigurinë dhe qëndrueshmërinë rajonale.

“Po zhvillojmë një sistem të shtresëzuar dhe të integruar të mbrojtjes ajrore dhe raketore, duke përdorur sisteme të prodhuara në vend,” tha burimi, duke theksuar se objektivi është ruajtja e gatishmërisë së mundshme luftarake në një nivel të lartë.

Masat përfshijnë aktivizimin e avionëve të Reagimit të Shpejtë, të cilët janë ngritur në fluturim që nga momenti kur Izraeli nisi sulmet ndaj Iranit, një fqinj juglindor të Turqisë. Sipas burimit të Ministrisë së Mbrojtjes, avionët patrullojnë në mënyrë të vazhdueshme kufirin për të monitoruar çdo shkelje të mundshme të hapësirës ajrore nga forcat izraelite.

Kjo lëvizje e Turqisë vjen në një moment tejet delikat, kur rajoni po përballet me mundësinë e një konflikti të gjerë ushtarak mes Iranit dhe Izraelit, që mund të përfshijë aktorë të tjerë ndërkombëtarë si SHBA-ja.

Presidenti rus Vladimir Putin dhe presidenti kinez Xi Jinping zhvilluan një bisedë telefonike të gjatë dhe strategjike këtë të enjte, duke trajtuar disa nga çështjet më të mprehta ndërkombëtare të momentit.

Në qendër të bisedës ishte situata në përkeqësim në Lindjen e Mesme, ku të dy liderët dënuan veprimet ushtarake të Izraelit, duke i cilësuar si shkelje të normave ndërkombëtare dhe të Kartës së OKB-së. U theksua se kriza mes Iranit dhe Izraelit nuk mund të zgjidhet me mjete ushtarake, dhe se vendet e tyre janë të gatshme për ndërmjetësim diplomatik.

Në lidhje me Samitin e G7 në Kanada, Putini dhe Xi ndanë bindjen se takimi nuk arriti të prodhojë qëndrime të bashkuara, ndërsa komentuan vizitën e presidentit ukrainas Volodymyr Zelensky si “jo të suksesshme”.

Dy udhëheqësit u angazhuan gjithashtu për thellim të bashkëpunimit në Azinë Qendrore, duke e konsideruar këtë rajon si një pikë kyçe për stabilitetin dhe zhvillimin ekonomik ndërkombëtar.

Takimi i radhës mes tyre do të zhvillohet në Pekin më 2 shtator, në kuadër të Samitit të Organizatës së Bashkëpunimit të Shangait dhe festimeve për 80-vjetorin e fitores ndaj Japonisë në Luftën e Dytë Botërore.

Japonia po dërgon dy avionë shtarakë në Afrikën Lindore për një operacion të mundshëm evakuimi të shtetasve të saj nga Lindja e Mesme, në mes të tensioneve në rritje mes Iranit dhe Izraelit, deklaroi të enjten ministri i Mbrojtjes, Gen Nakatani.

Dy avionët transportues C-2 të Forcave të Mbrojtjes Vetjake (SDF), me rreth 120 anëtarë ekuipazhi, do të fluturojnë drejt një baze të SDF-së në vendin e Bririt të Afrikës, Xhibuti, dhe do të qëndrojnë aty në gatishmëri, raportoi agjencia Kyodo News me bazë në Tokio.

Vendimi u mor pas një kërkese nga ministri i Jashtëm, Takeshi Iwaya.

Avionët pritet të nisen nga Japonia të shtunën, sipas Anadolu.

“Situata në Lindjen e Mesme është bërë më e tensionuar pasi Izraeli dhe Irani vazhdojnë sulmet e ndërsjella,” tha Nakatani.

Ai theksoi se qeveria “është ende në fazën përgatitore për një transport të mundshëm” të shtetasve japonezë.

Ministria po përpiqet të konfirmojë se sa nga rreth 280 shtetasit japonezë në Iran dhe 1,000 në Izrael dëshirojnë të largohen nga këto vende.

Japonia po planifikon gjithashtu të evakuojë me autobus rreth 90 shtetas dhe anëtarë të familjeve të tyre nga kryeqyteti iranian Teheran drejt Azerbajxhanit fqinj, ndërsa po u ofron gjithashtu atyre që jetojnë në Izrael mundësinë e evakuimit me autobus drejt Jordanisë.

Tensionet rajonale janë përshkallëzuar që nga e premtja, kur Izraeli ndërmori sulme ajrore mbi disa pika në Iran, përfshirë objekte ushtarake dhe bërthamore, duke nxitur përgjigje hakmarrëse nga Teherani.

Autoritetet izraelite thanë se të paktën 24 persona janë vrarë dhe qindra janë plagosur që nga ajo kohë nga sulmet me raketa iraniane. Ndërkohë, sipas mediave iraniane, në Iran janë vrarë 585 persona dhe më shumë se 1,300 janë plagosur nga sulmet izraelite.