Ministria e Bujqësisë dhe Zhvillimit Rural ka reaguar lidhur me debatin mediatik për situatën e cilësisë dhe sigurisë së mandarinave shqiptare duke theksuar se “për vitin 2024 janë eksportuar nga kultivimi dhe të vjelat e mandarinës shqiptare 924 kamionë në tregun europian e mbarë botëror, nga të cilët vetëm 3 ngarkesa prej totalit janë konstatuar me parregullsi për mbetje dhe janë asgjësuar”.

Reagimi i plotë zyrtar i Ministrisë së Bujqësisë dhe Zhvillimit Rural:

Ministria e Bujqësisë dhe Zhvillimit Rural nxit konsumin e produkteve shqiptare për festat e fundvitit dhe në vazhdim. Për vitin 2024 mbi 85% e prodhimit të mandarinave shqiptare është vjelë dhe është shitur në tregun e brendshëm dhe atë ndërkombëtar dhe në asnjë rast nga të gjitha kontrollet dhe analizat e kryera nuk kanë rezultuar me mbetje të pesticideve. Sot, kultivimi i mandarinave shtrihet në mbi 1,000 ha nga fermerë tregu dhe prodhues më të vegjël.

Në lidhje me debatin mediatik për situatën e cilësisë dhe sigurisë së mandarinave shqiptare në vijim të komunikimeve të mëparshme në deklaratat zyrtare të Ministrisë së Bujqësisë dhe Zhvillimit Rural, sqarojmë publikun se:

Për vitin 2024 janë eksportuar nga kultivimi dhe të vjelat e mandarinës shqiptare 924 kamionë në tregun europian e mbarë botëror, nga të cilët vetëm 3 ngarkesa prej totalit janë konstatuar me parregullsi për mbetje dhe janë asgjësuar. Ky raport nuk duhet të dëmtojë mundin dhe djersën e një viti prodhimi të fermerëve shqiptarë dhe në të njëjtën kohë të krijojë shqetësim dhe panik tek konsumatori.

Sipas njoftimit të Sistemit të Njoftimit të Shpejtë për Ushqim dhe Ushqim për Kafshë – RASFF për mbetje të pesticideve në mandarina të eksportuara nga Republika e Shqipërisë, AKU ka marrë masa të menjëhershme për gjurmueshmërinë dhe veprimet proceduriale mbi subjektet eksportues duke marrë masa dhe veprime konkrete për të asgjësuar 20.482 kg Mandarine clementine, në datën 19.12.2024, në Qarkun e Fierit, ngarkesë e cila është kthyer mbrapsht nga shteti i Kroacisë. Procedura e asgjësimit është kryer së bashku me praninë e Autoritetit Kombëtar të Mjedisit, Drejtorinë e Tatimeve, si dhe me praninë e disa mediave të ndryshme.

Në bashkëpunim me Autoritetin Kombëtar të Veterinarisë dhe Mbrojtjes së Bimëve, në datën 19.12.2024, u kryen inspektime dhe evidentime të përbashkëta në Fshatin Mursi të Bashkisë së Konispolit, ku ushtron aktivitet kultivues një nga fermerët, i cili kishte asgjësuar produktin mandarinë. Për subjektet grumbulluese të rezultuara në shkelje të dispozitave ligjore, përveç se është kryer kallëzim penal, sipas shkeljeve, janë marrë edhe masa administrative gjobë, si dhe bllokim aktiviteti. Për ndjekjen e situatës në vijim, çdo ditë janë kryer inspektime të përbashkëta në qarkun Berat, Bashkia Dimal.

Informojmë konsumatorin lidhur me dy ngarkesat e tjera, të raportuara nga shteti i Kroacisë për mbetje të pesticideve sipas njoftimit të sistemit RASFF, se njëra është asgjësuar në shtetin Kroat, ndërsa tjetra nuk është kthyer ende në vendin e origjinës. Janë njoftuar të gjitha PIK që në rast kthimi të produktit, të bëhet bllokimi i menjëhershëm i tij me destinacion asgjësimin.

Autoriteti Kombëtar i Ushqimit vijon kontrollet në subjektet që tregtojnë Produkte të Mbrojtjes së Bimëve dhe Produkte Plehëruese, ku vetëm për këtë javë janë kontrolluar dhe verifikuar 46 subjekte tregtuese të PMB-ve, në të cilat nuk u konstatuan shkelje të dispozitave ligjore. Vazhdojnë pa ndërprerje kontrollet në pikat e tregtimit, pikat e grumbullimit dhe magazinimit të fruta perimeve, ku përveç 18 mostrave të përcaktuara në planin e monitorimit të pesticideve për muajin Dhjetor, për produktin mandarinë, me qellim mbajtjen e situatës në kontroll, janë marrë edhe 7 mostra të tjera jashtë planit, për analizim në Laboratorin e Referencës – ISUV.

Inspektimi vjetor në territor nga AKU deri ditën e sotme kap shifrat 806 inspektime për tregtimin e pesticideve dhe 862 inspektime për produktet plehëruese. Për vitin 2024 janë analizuar 188 mostra gjithsej, nga këto për pesticide 28, nga të cilat 27 kanë rezultuar konform, kurse 1 është në proces analizimi. Për produkte plehëruese janë analizuar 160 mostra, nga të cilat 24 janë në proces analizimi, 134 kanë rezultuar konform dhe 2 mostra jo konform, për të cilat është ndjekur gjurmueshmëria dhe janë marrë të gjitha masat sipas legjislacionit në fuqi.

Ministria e Bujqësisë dhe Zhvillimit Rural ka të miratuar dhe në zbatim Planin e Veprimit për Përdorimin e Qëndrueshëm të Pesticideve, i cili përfshin të gjithë zinxhirin e veprimit me strukturat qëndrore dhe institucionet e vartësisë, pa përjashtuar mbështetjen e Universitetit Bujqësor të Tiranës, si dhe prodhuesve shqiptarë. Qëllimi i këtij Planit i Veprimit, është përdorimi i duhur dhe i sigurt i PMB-ve, për mbrojtjen e shëndetit të bimëve për të garantuar prodhim me cilësi dhe të sigurt për konsumatorin, si dhe mbrojtjen e mjedisit ku përdoren.

Falë punës së strukturave të Ministrisë së Bujqësisë dhe Zhvillimit Rural këtë vit territori i Republikës së Shqipërisë u mbrojt e u mbajt i pastër nga Sëmundja e Murtajës së Ruminantëve të Vegjël, edhe pse vendet kufitare patën shpërthime dhe dëme kolosale. Janë menaxhuar menjëherë në mënyrë efikase dhe pa e dëmtuar situatën epizootike në vend, rastet e shfaqjes së Influencës Aviare dhe Murtajës Afrikane të Derrave.

Ndërkohë që ka vijuar puna e vazhdueshme për ndërgjegjësim për prodhimin e produkteve biologjikisht të pastra me anë të luftës biologjike, e cila vjen edhe me një nxitje fiskale lehtësuese. Përdorimi strikt i protokolleve dhe ndalimi i përdorimit të pesticiteve të ndaluara edhe në vendet e Bashkimit Europian është fakt. Kërkohet që edhe ata pak fermerë që tentojnë në mënyrë të paligjshme përdorimin e tyre të kuptojnë se kjo mënyrë ka vetëm një mundësi: zbulimin dhe vënien përpara ligjit pasi kontrollet dhe gjurmueshmeria është shumë e lartë. Fermerët shqiptarë, prodhuesit, grumbulluesit dhe eksportuesit duhet të bashkëpunojnë për të zbatuar praktikat më të mira bujqësore në të gjithë zinxhirin e prodhimit, deri tek konsumatori.

Ministria e Bujqësisë dhe Zhvillimit Rural është transparente dhe ka të publikuar në faqen e saj zyrtare, listën e PMB-ve dhe etiketave të përdorimit, si dhe listën e produkteve plehëruese, të cilat përditësohen vazhdimisht duke i bërë të qartë fermerëve të mos përdorin produkte kontrabandë që janë të ndaluara në vendet e BE-së dhe në vendin tonë. Fermerët, çdo përdorues apo konsumator ka aksesin e mundëshëm për të marrë informacionin e plotë jo vetëm për përdorimin, por dhe pasojat nga keqpërorimi i tyre.

Iu bëjmë thirrje që për çdo rast paligjshmërie, parregullsie apo abuzimi që konstatojnë të njoftojnë në numrat e publikuar në faqet zyrtare të MBZHR apo institucioneve të varësisë, për tu bërë pjesë e përgjegjësisë së përbashkët në garantimin dhe ruajtje e sigurisë ushqimore në vend.

Kryeministrja italiane Giorgia Meloni ka paralajmëruar se kërcënimi që Rusia paraqet për Bashkimin Evropian shkon përtej sigurisë ushtarake, duke përfshirë përdorimin e emigracionit të paligjshëm dhe instrumente të tjera për të minuar stabilitetin e bllokut.

Deklaratat e saj erdhën gjatë një takimi në veri të Finlandës mes liderëve të BE-së, përfshirë kryeministrat e Finlandës, Suedisë, Greqisë dhe Italisë, si dhe shefen e Politikës së Jashtme të BE-së, ku u diskutua mbi sigurinë në rajonet nordike dhe Mesdhe si dhe sfidat e migracionit.

Duke iu përgjigjur pyetjeve për ndikimin rus, Meloni tha: “Duhet ta kuptojmë se kërcënimi është shumë më i madh nga sa mund ta marrim me mend. Ai përfshin demokracinë tonë, ndikimin në opinionin publik, lëndët e para, si dhe instrumentalizimin e migracionit.”

Ajo theksoi se rreziku për BE-në nuk do të zhduket me përfundimin e konfliktit në Ukrainë dhe bëri thirrje për një strategji më të zgjeruar sigurie që të përfshijë aspekte ekonomike dhe sociale.

Meloni kritikoi qasjen e mëparshme të BE-së ndaj emigracionit, duke thënë se trajtimi i tij vetëm në bazë solidariteti ka qenë i gabuar. Ajo bëri thirrje për masa më të forta për mbrojtjen e kufijve dhe për të penguar çdo përpjekje nga Rusia apo “organizatat kriminale” për të kontrolluar fluksin e emigrantëve të paligjshëm.

Shtete si Finlanda dhe Estonia kanë akuzuar më parë Moskën për lehtësimin e kalimit të emigrantëve të paligjshëm nga Lindja e Mesme në vendet e BE-së, një akuzë që Rusia e ka mohuar.

Kryeministri finlandez Petteri Orpo theksoi rëndësinë e sigurimit të kufirit prej 1,340 km të Finlandës me Rusinë, duke e cilësuar atë si një çështje “ekzistenciale” për BE-në dhe NATO-n.

Meloni theksoi se kërcënimet ndaj BE-së nuk kufizohen vetëm në migracion apo në rajonin e Ngushticës së Mesdheut. Ajo përmendi infrastrukturën kritike, inteligjencën artificiale, sigurinë kibernetike dhe zinxhirët e furnizimit si fusha ku BE-ja duhet të përqendrojë përpjekjet e saj.

“BE-ja ka nevojë për një politikë të jashtme dhe bashkëpunimi më efektive që përfshin gjithashtu mbrojtjen e kufijve dhe sigurinë e saj strategjike,” tha Meloni.

Ndërsa NATO mbetet një “gur themeli” për sigurinë e BE-së, Meloni nënvizoi se blloku duhet të zhvillojë strategji më të pavarura për të përballuar kërcënimet në rritje dhe të diversifikuara.

Ky takim në Finlandë pasqyron shqetësimin e vazhdueshëm të BE-së për sfidat e sigurisë, duke përfshirë edhe menaxhimin e flukseve migratore dhe ndikimet strategjike të Rusisë në Evropë.

Shqipëria bëhet vendi i parë në Evropë që ndalon përdorimin e TikTok për një vit, një vendim i ndërmarrë pas vrasjes tragjike të një adoleshenti 14-vjeçar, ngjarje që ngriti shqetësime për ndikimin negativ të platformës në shoqëri. Kryeministri Edi Rama njoftoi se ndalimi, i cili nis nga janari 2025, synon të përmirësojë sigurinë në shkolla dhe të mbrojë të rinjtë nga ndikimet e dëmshme të rrjeteve sociale.

Ngjarja tragjike, ku një adoleshent humbi jetën pas një përleshjeje të nxitur nga një debat në rrjetet sociale, ka ndezur polemika mbi rolin e TikTok. Kryeministri e cilësoi platformën “rrugaçi i lagjes” dhe akuzoi mediat sociale për ndikim negativ mbi fëmijët.

Ndërkohë, TikTok ka kundërshtuar vendimin, duke kërkuar sqarime nga qeveria dhe duke mohuar përfshirjen në incidentin tragjik. Kritikët, si deputetja Ina Zhupa nga Partia Demokratike, e kanë cilësuar vendimin si një sulm ndaj lirisë së fjalës dhe një veprim elektoral.

Ndalimi i TikTok është pjesë e një debati më të gjerë mbi ndikimin e medieve sociale në shoqëri, me masa të ngjashme të ndërmarra në vende të tjera si India dhe Australia, ndërsa SHBA po shqyrton ndalimin e platformës nëse ajo nuk shkëputet nga kompania kineze ByteDance./UBTNews/

Në një moment reflektimi dhe shprese për paqe, Papa Françesku ka bërë një thirrje të fuqishme për armëpushim në të gjitha frontet e luftës, në lutjet e tij të së dielës Angelus në Vatikan. Kjo thirrje e Papës vjen si një përpjekje për të ndalur dhunën dhe mizoritë që kanë përfshirë vende si Ukraina dhe Gaza, në vigjilje të festës së madhe të Krishtlindjes.

Nga rezidenca e tij në Santa Marta, për shkak të shëndetit delikat dhe temperaturave të ulëta, Papa theksoi rëndësinë e ndaljes së konflikteve, duke bërë apel për ndërprerjen e bombardimeve që kanë dëmtuar shkolla, spitale dhe vende të shenjta.

“Lërini armët të heshtin dhe le të kumbojnë këngët e Krishtlindjeve”, deklaroi Françesku. Ai kërkoi nga liderët botërorë dhe popujt që Krishtlindja të shënohet me paqe dhe jo me luftë, duke e bërë këtë një mesazh të fuqishëm solidariteti dhe humanizmi.

Papa i cilësoi si “mizori” bombardimet dhe dhunën ndaj civilëve, duke përmendur sulmet e fundit në Gaza që kanë goditur fëmijët, shkollat dhe spitale, si dhe sulmet në Ukrainë që kanë lënë pasoja shkatërruese mbi popullsinë civile. Ai përmendi gjithashtu përpjekjet e Kardinalit Pierbattista Pizzaballa për të hyrë në Gaza dhe për të ofruar shpresë për komunitetin e vogël të krishterë në këtë rajon, duke nënvizuar sfidat që hasen për shkak të bombardimeve.

Papa Françesku, i cili sapo ka mbushur 88 vjeç, po përgatitet për një javë të ngarkuar me aktivitete fetare dhe sociale. Festa e Krishtlindjes dhe inaugurimi i Vitit të Madh të Shenjtë janë në qendër të agjendës së tij, ndërsa të enjten pritet të vizitojë një burg në Romë për të ofruar bekimet e tij. Kjo thirrje për paqe nga lideri i Vatikanit shërben si një kujtesë e fortë për nevojën e një bote më të drejtë dhe të bashkuar, ku Krishtlindja të jetë simbol i paqes dhe solidaritetit njerëzor./Euronews/