Një zgjidhje e qëndrueshme për krizën në Ukrainë nuk mund të gjendet vetëm përmes një armëpushimi ose ndërprerjes së armiqësive përgjatë vijës së kontaktit, shkroi Ministri i Jashtëm rus Sergej Lavrov në një artikull për revistën The International Affairs .

“Dua të falënderoj miqtë vietnamezë për qëndrimin e tyre të ekuilibruar në zgjidhjen e krizës në Ukrainë. Vetëm një armëpushim ose një pauzë në armiqësitë përgjatë vijës së angazhimit nuk mund të sjellë një zgjidhje të qëndrueshme për këtë problem”, argumentoi Lavrov në artikullin e tij të titulluar “Rusia dhe Vietnami: 75 vjet miqësi, besim dhe ndihmë të ndërsjellë”. “Për një paqe të qëndrueshme, shkaqet rrënjësore të konfliktit duhet të eliminohen”, shpjegoi ai.

Sipas diplomatit më të lartë të Rusisë, kërcënimet ndaj sigurisë së vendit që lindën për shkak të zgjerimit të NATO-s drejt lindjes dhe përpjekjeve për të tërhequr Ukrainën në Aleancën e Atlantikut të Veriut duhet të kenë përparësi.

“Nuk është më pak e rëndësishme të arrihet respektimi i plotë i të drejtave të njeriut në territoret që mbeten nën kontrollin e regjimit të Kievit, i cili, pas marrjes së dhunshme të pushtetit në vitin 2014, nisi të shfaroste gjithçka që lidhej me Rusinë dhe botën ruse, duke përfshirë gjuhën, kulturën, traditat, ortodoksinë kanonike dhe median në gjuhën ruse”, theksoi ai.

Kryeministri i Pakistanit, Shebaz Sharif, është zotuar se do të kundërpërgjigje, pas sulmeve ajrore të Indisë, që lanë të vdekur dhjetëra persona, teksa tensionet mes dy fuqive – që kanë armë bërthamore – kërcënojnë që të përshkallëzohen edhe më shumë.

Takimi i Komitetit Kombëtar për Siguri i Pakistanit më 7 maj përfundoi me vendimin për të autorizuar ushtrinë e shtetit për t’u kundërpërgjigjur.

“Komiteti Kombëtar për Siguri i bën thirrje komunitetit ndërkombëtar të njohë peshën e veprimeve të paprovokuara dhe ilegale të Indisë dhe ta mbajë përgjegjëse për shkeljen flagrante të normave ndërkombëtare dhe ligjeve”, u tha në deklaratën e lëshuar nga zyra e Sharifit.

Në njoftim u shtua se India “edhe një herë ka nxitur zjarr në rajon”.

Disa orë para këtij njoftimi, forcat indiane goditën caqe në mbarë Kashmirin, e administruar nga Pakistani, dhe në provincën Punxhab të Pakistanit.

India tha se kreu sulme “precize” kundër “terroristëve” pas një sulmi në Kashmirin, e administruar nga India, dy javë më parë, kur u vranë 26 turistë hindu.

India tha më herët se dy ose tre të dyshuar të atij sulmi ishin shtetas pakistanezë, por nuk dhanë detaje apo ndonjë dëshmi. Pakistani ka mohuar se është i përfshirë në këtë sulm.

Ushtria pakistaneze tha se vetëm civilë u vranë gjatë sulmeve ajrore të 7 majit, duke shtuar se numri i viktimave është 26, ndërkaq 46 të tjerë janë plagosur.

Më pas, grupi militant me seli në Pakistan, Jaish-e-Mohammed, përmes një deklarate tha se dhjetë anëtarë të familjes të liderit të grupit, Maulana Masood Azhar, janë vrarë gjatë sulmeve.

Ky njoftim nuk ka mundur të konfirmohet në mënyrë të pavarur.

Ndërkaq, Pakistani ka pretenduar se ka rrëzuar disa avionë indianë dhe të dyja palët kanë vazhduar të garantojnë përtej Vijës së Kontrollit – kufirit de facto në Kashmir – që nisën që nga sulmi i prillit.

Këto janë luftimet më të ashpra mes dy palëve në më shumë se dy dekada. Pakistani ka thënë se sulmet e Indisë janë “akt flagrant i luftës”./REL/

Mbretëria e Bashkuar dhe Franca kanë reaguar në lidhje me përplasjen e armatosur mes Indisë dhe Pakistanit.

Kryeministri britanik Sir Keir Starmer kërkoi nga India dhe Pakistan që të angazhohen në një dialog të drejtpërdrejtë për të ulur tensionet në rritje mes dy shteteve, duke theksuar se “askush nuk fiton” nga një përshkallëzim i mëtejshëm i situatës.

Starmer theksoi se qeveria britanike është angazhuar intensivisht në dialog me të dyja vendet, duke inkurajuar një zgjidhje paqësore dhe mbrojtjen e civilëve.

Sekretari i Jashtëm i Mbretërisë së Bashkuar, David Lammy, shtoi se qeveria po i bën thirrje Indisë dhe Pakistanit të tregojnë përmbajtje dhe të angazhohen në një dialog të drejtpërdrejtë, për të arritur një zgjidhje diplomatike të shpejtë.

Në një reagim tjetër, Ministri i Jashtëm i Francës, Jean-Noel Barrot, i bëri thirrje të dy vendeve të tregojnë vetëpërmbajtje. Islamabadi i ka cilësuar goditjet me raketa si një “sulm frikacak” dhe ka njoftuar se do t’u përgjigjet atyre “në kohën dhe vendin që do të zgjedhë vetë”.

Edhe Rusia reagoi në lidhje me konfliktin, duke i bërë thirrje palëve të ulin tensionet.

Kardinalët katolikë romanë janë mbledhur të mërkurën për ta nisur detyrën e zgjedhjes së një pape të ri. Ata do të qëndrojnë të ngujuar larg botës derisa ta zgjedhin njeriun që shpresojnë se mund ta bashkojë një kishë botërore të larmishme, por të ndarë.

Në një ritual që ka rrënjët në mesjetë, kardinalët do të futën në Kapelën Sistine të Vatikanit, pas një meshë publike në Bazilikën e Shën Pjetrit dhe do ta nisin këshillin e fshehtë për ta zgjedhur pasardhësin e Papa Françeskut, i cili vdiq muajin e kaluar.

Asnjë papë nuk është zgjedhur në ditën e parë të këshillit, e njohur si konklava e fshehtë, prej shekujsh, prandaj votimi mund të vazhdojë për disa ditë para se ndonjëri nga princat me kapele të kuqe të kishës t’i marrë shumicën e nevojshme prej dy të tretat e votave për t’u bërë papa i 267-të.

Të mërkurën do të ketë vetëm një votim. Në ditët në vijim, kardinalët mund të votojnë deri në katër herë brenda ditës.

Në fund, ata i djegin fletët e votimit dhe, nëse nga oxhaku mbi çatinë e kapelës del tym i zi, nënkuptohet se papa i ri nuk është zgjedhur ende. Tymi i bardhë dhe kambanat që bien tregojnë se kisha me 1.4 miliardë anëtarë ka një udhëheqës të ri.

Në meshën e mëngjesit të së mërkurës në Bazilikën e Shën Pjetrit, përpara hyrjes në konklavë, kardinalët u lutën që Zoti t’i ndihmojë ta gjejnë një papë që do të ushtrojë një “kujdes vigjilent” mbi botën.

Në predikimin e tij, kardinali italian Giovanni Battista Re u tha kolegëve të tij se duhet ta lënë mënjanë “çdo vlerësim personal” gjatë zgjedhjes së papës së ri dhe të kenë parasysh “vetëm të mirën e kishës dhe të njerëzimit”.

Re, dekan i Kolegjit të Kardinalëve, është 91 vjeç dhe nuk do të marrë pjesë në konklavë, sepse pjesë e saj mund të jenë vetëm kardinalët nën moshën 80-vjeçare.

Kardinalët, gjatë ditëve të fundit, kanë dhënë vlerësime të ndryshme për atë që kërkojnë tek papa i ardhshëm.

Derisa disa kanë bërë thirrje për vazhdimësi me vizionin e Françeskut për më shumë reforma dhe të qenit të hapur, të tjerë kanë kërkuar rikthim tek traditat e vjetra. Shumë kanë shprehur dëshirën për një papat më të parashikueshëm dhe të matur.

Një rekord prej 133 kardinalësh nga 70 vende do të hyjnë në Kapelën Sistine, në krahasim me 115 nga 48 vende në konklavën e vitit 2013 – një rritje që pasqyron përpjekjet e Françeskut për të zgjeruar ndikimin e kishës në rajone të largëta me pak katolikë.

Ende nuk ka favorit të qartë, megjithëse kardinali italian Pietro Parolin dhe kardinali filipinas Luis Antonio Tagle konsiderohen ndër pretendentët kryesorë.

Ashtu si në kohët mesjetare, kardinalëve do t’u ndalohet komunikimi me botën e jashtme gjatë konklavës, dhe Vatikani ka ndërmarrë masa të teknologjisë së lartë për të siguruar fshehtësinë, duke përfshirë pajisje që bllokojnë sinjalet për të parandaluar përgjimin.

Gjatësia mesatare e dhjetë konklavave të fundit ka qenë pak më shumë se tri ditë, dhe asnjë nuk ka zgjatur më shumë se pesë ditë. Konklava e vitit 2013 zgjati vetëm dy ditë.

Kardinalët do të përpiqen ta mbyllin procesin shpejt edhe këtë herë, për të shmangur përshtypjen se janë të përçarë ose se kisha pa udhëheqje./REL/