Pothuajse dy mijë dronë të paidentifikuar janë regjistruar mbi Gjermani që nga fillimi i vitit, sipas raporteve të sigurisë të parë nga Die Welt, Bild dhe Axel Springer Academy.

Në një hetim të përbashkët, mediat identifikuan një model që lidh një numër të madh dronësh me lëvizjet e tre anijeve të lidhura me Rusinë, që operojnë në Detin Baltik dhe Detin e Veriut.

Autoritetet gjermane kanë dokumentuar 1072 incidente që përfshijnë 1955 dronë të paidentifikuar. Ata më shpesh fluturonin mbi vendet ushtarake të Bundeswehr, fushat e stërvitjes së NATO-s dhe objektet kritike të infrastrukturës.

Analiza e të dhënave të trafikut detar tregoi se një numër i vogël anijesh ishin në afërsi të menjëhershme të fluturimeve të regjistruara dhe në të njëjtat orë kur u raportuan incidentet.

Një shembull janë shtatë dronët e parë më 16 maj pranë anijes mallrash me flamur rus Lauga, e cila ka një ekuipazh tërësisht nga shtetas rusë.

Kur anija më vonë u ankorua në Belgjikë, autoritetet e kontrolluan, por nuk gjetën asgjë. Përpara se të hynte në ujërat gjermane, Lauga u ankorua në portin sirian Tartus, ku ndodhet një bazë ushtarake ruse, dhe më pas në Shën Petersburg, në një terminal të lidhur me korporatën shtetërore bërthamore Rosatom.

Sipas hetimit, Rosatom zotëron dronë me një rreze veprimi deri në 200 kilometra, të pajisur me kamera video dhe termike. Ato përdoren zyrtarisht për të monitoruar operacionet në Arktik.

Dy anijet e tjera të përmendura në raport, HAV Snapper dhe HAV Dolphin, janë zyrtarisht në pronësi të një kompanie norvegjeze, por të dyja janë servisuar disa herë në kantierin detar Pregolya në Kaliningrad të Rusisë, dhe ekuipazhi i HAV Dolphin përbëhet ekskluzivisht nga shtetas rusë.

Grupe të mëdha dronësh u vunë re mbi Gjirin Kiel në Baltikun Jugperëndimor, në të njëjtën kohë kur anijet po lëviznin në zonë.

Agjencitë e sigurisë, dokumentet e të cilave u përdorën nga media, thanë se ishte e pamundur që dronët të operoheshin nga individë privatë.

Në shumicën e rasteve, operatorët e dronëve ishin të paidentifikuar. Zyrtarët evropianë të inteligjencës konfirmuan për gazetarët se besonin se HAV Snapper dhe HAV Dolphin “ka shumë të ngjarë të veprojnë në interes të Rusisë.”

Ministria e Brendshme gjermane tha se kishte arsye për të besuar se aktorë të huaj shtetërorë ishin të përfshirë në disa nga fluturimet e dronëve.

Dronë të paidentifikuar janë vërejtur gjithashtu mbi instalime ushtarake dhe infrastrukturë kritike në Danimarkë, Norvegji, Belgjikë dhe Holandë./S.K/KP/

Bashkimi Evropian ka vendosur të ngrijë për një kohë të pacaktuar asetet e Bankës Qendrore Ruse me vlerë 210 miliardë euro.

Masa, bazuar në një klauzolë për emergjenca ekonomike, synon të parandalojë përpjekjet e jashtme për të liruar fondet para se Moska t’i paguajë dëmshpërblime lufte Kievit.

Me këtë veprim, BE dëshiron të sigurojë kontrollin mbi asetet e ngrira mes shqetësimeve se SHBA-të mund të përpiqen t’i përdorin këto fonde në një marrëveshje paqeje të ardhshme me Moskën.

Ngrirja afatgjatë u ra dakord nga ambasadorët e shteteve anëtare sot, duke u thirrur në nenin 122 të Traktatit të BE-së. Ky nen lejon që një vendim të merret me shumicë të kualifikuar, duke anashkaluar Parlamentin Evropian dhe veton e mundshme të shteteve individuale.

Rregullorja e re ndalon transferimin e 210 miliardë eurove përsëri në Bankën Qendrore Ruse. Pjesa më e madhe e aseteve, rreth 185 miliardë euro, mbahen në Euroclear, depozitën qendrore të letrave me vlerë në Bruksel, ndërsa 25 miliardë eurot e mbetura mbahen në banka private.

Deri më tani, fondet janë ngrirë përmes regjimit standard të sanksioneve, i cili kërkonte një vendim unanim nga të 27 shtetet anëtare dhe rinovohej çdo gjashtë muaj, duke e bërë atë të prekshëm ndaj bllokimeve.

Sipas vendimit, fondet do të lirohen vetëm pasi veprimet e Rusisë objektivisht të pushojnë së paraqituri rreziqe të konsiderueshme për ekonominë evropiane dhe kur Moska t’i paguajë kompensim Ukrainës pa pasoja ekonomike dhe financiare për BE-në.

Duke ngrirë asetet me shumicë të kualifikuar, BE-ja do të jetë në një pozicion më të fortë për t’i rezistuar presionit të jashtëm dhe për të parandaluar vetot e padëshiruara.

Ambasadorët aktualisht po shqyrtojnë tekstet ligjore, me qëllim zgjidhjen e sa më shumë çështjeve të jetë e mundur para një samiti vendimtar të udhëheqësve të BE-së më 18 dhjetor, kur ata do të vendosin se si të mbledhin 90 miliardë euro për të mbuluar nevojat e Ukrainës për vitet 2026 dhe 2027./S.K/KP/

Kryeministri i Bullgarisë, Rosen Zhelyazkov, ka paraqitur dorëheqjen e qeverisë së tij të enjten, pas disa javësh protestash në rrugë kundër politikave ekonomike dhe dështimit të perceptuar për të luftuar korrupsionin.

Zhelyazkov e bëri të ditur vendimin në një deklaratë të transmetuar drejtpërdrejt, vetëm pak minuta para se parlamenti të votonte mocionin e mosbesimit ndaj qeverisë, raporton Reuters.

Dorëheqja vjen në prag të anëtarësimit të Bullgarisë në eurozonë më 1 janar.

“Koalicioni ynë u mblodh dhe diskutuam situatën aktuale, sfidat dhe vendimet që duhet t’i marrim me përgjegjësi”, tha Zhelyazkov. “Dëshira jonë është të jemi në nivelin që shoqëria pret. Pushteti buron nga zëri i popullit”.

Të mërkurën mbrëma, mijëra qytetarë dolën në protesta në Sofje dhe dhjetëra qytete të tjera, në vazhdën e demonstratave që kanë nxjerrë në pah pakënaqësinë e thellë ndaj korrupsionit endemik dhe dështimit të qeverive të njëpasnjëshme për ta luftuar atë.

Javën e kaluar, qeveria e Zhelyazkov tërhoqi planin e buxhetit për vitin 2026, të parin e hartuar në euro, për shkak të protestave. Opozita dhe organizata të ndryshme kundërshtuan planet për rritjen e kontributeve të sigurimeve shoqërore dhe taksave mbi dividendët, të cilat ishin paraparë për të mbuluar rritjen e shpenzimeve shtetërore.

Megjithatë, edhe pas tërheqjes së qeverisë nga plani buxhetor, protestat nuk janë ndalur, në një vend që ka mbajtur shtatë zgjedhje parlamentare në katër vitet e fundit, më së fundi në tetor 2024, në një klimë të thellë përçarjesh politike dhe shoqërore.

Këtë javë, edhe presidenti Rumen Radev kërkoi dorëheqjen e qeverisë. Në një mesazh drejtuar deputetëve, ai shkroi: “Mes zërit të popullit dhe frikës nga mafia. Dëgjoni sheshet!”.

Sipas kushtetutës bullgare, presidenti Radev ka kompetenca të kufizuara, por tani do t’u kërkojë partive parlamentare të tentojnë formimin e një qeverie të re. Nëse, siç pritet, dështojnë, ai do të emërojë një administratë të përkohshme që do të drejtojë vendin deri në mbajtjen e zgjedhjeve të reja.

Tre migrantë kanë humbur jetën mëngjesin e sotëm në kufirin mes Kroacisë dhe Bosnjë Hercegovinës.

Sipas policisë, informatën për një varkë të fundosur në lumin Sava në Slavonski Brod e kanë pranuar në orën 05:20 të së enjtes.

Siç raportohet oficerët e policisë kanë dalë menjëherë në vend të ngjarjes ku kanë arritur të nxjerrin nga lumi 13 persona (shtetas të huaj), njëri prej të cilëve nuk tregonte shenja jete.

12 të tjerët janë dërguar në spitalin në Slavonski Brod.

Policia po vazhdon hetimin penal për të përcaktuar faktet dhe rrethanat, ndërsa u tha po ashtu se është gjetur një dokument udhëtimi që i përkiste njërit prej individëve dhe autoritetet po punojnë për ta gjetur atë person../S.K/EO/