Lajmet

Murati sqaron çështjen e shtesave

Murati tha se 105 euro është koeficienti i pastër, teksa kjo vlerë sipas tij shkon më lartë për ata që kanë përvojë pune.

Published

4 years ago

on

Komisioni për Buxhet, Punë dhe Transfere ka miratuar Projektligjin për ndarjet buxhetore për vitin 2023, i cili mundëson rritjen e pagave në sektorin publik, në bazë të vlerës së koeficientit 105 euro.

Para komisionit, Projektligjin e arsyetoi ministri i Financave, Hekuran Murati, i cili sqaroi edhe çështjen e shtesave të punëtorëve në sektorin publik në bazë të Ligjit për Paga.

Ministri Murati theksoi se 105 euro është koeficienti i pastër, teksa kjo vlerë sipas tij shkon më lartë për ata që kanë përvojë pune.

Për ata që kanë dhjetë vjet përvojë pune, Murati tha se shtesa e përvojës së punës është 2.5 për qind, apo koeficienti përkthehet në 107.6 euro, për ata 20 vjet koeficienti i bie të jetë 111,6 euro, për ata me 30 vjet, koeficienti do të jetë 116.8 euro, teksa koeficienti më i lartë është për ata me 40 vjet përvojë pune, që koeficienti përkthehet në 122 euro.

“Shpeshherë kur po bëhen krahasime, po bëhen krahasime të pagës bruto me të gjitha shtesat që është aktuale me vetëm pagën bazë bruto. Natyrisht ky është krahasim i pasaktë për shkak se nuk është krahasimi i njëjtë. Psh nëse e marrim vetëm shtesën e përvojës së punës tani që llogaritet mbi pagën bazë dhe nëse do ta transferoni në koeficient, ta zëmë nëse dikush ka përvojë pune 0 vite, e ka vetëm koeficientin e pastër bazë 105. Por, nëse dikush do të kishte 10 vite përvojë pune, shtesa e përvojës së punës është 2.5 përqind ose nëse shumëzohet me koeficient do të dilte 107.6 koeficienti. Nëse do të kishte 20 vjet përvojë pune, shtesa për përvojën e punës për 20 vite është 6.25 përqind apo koeficienti do të përkthehej në 111.6 ose nëse shkojmë deri në 40 vjet përvojë pune, shtesa e përvojës së punës është 16.25 përqind ose nëse do të shumëzohej me koeficientin, do të kishim një koeficient 122. Pra dikush me 40 vjet përvojë pune, normalisht paguhet më shumë si rezultat i shtesës së përvojës dhe kjo është vetëm njëra nga shtesat që është shtesë universal. Për 30 vite, është 11.25 për qind që i bie nëse përkthehet te vlera e koeficientit, shumëzohet është 116.8 apo afërsisht 117”, tha ai.

Krahas kësaj, shefi i kuletës së shtetit, nënvizoi se rritja e sivjetme e pagave në sektorin publik është enorme dhe se këso rritje nga viti në vit nuk ka pasur në asnjë vit paraprak.

“Si përqindje po, por edhe si vlerë absolute nëse e marrim edhe nëse shkojmë vite tutje prapa. Shifra prej 105 milionë euro nuk paraqitet të ketë pasur rritje nga vitit në vit në asnjë prej viteve paraprake. Pra kjo është një rritje enorme”, shtoi Murati.

Por atij i reagoi anëtari i komisionit, deputeti i PDK-së, Mërgim Lushtaku, i cili ishte edhe i vetmi nga opozita që mori pjesë në këtë mbledhje.

Ai kritikoi Muratin, siç tha për zvogëlim të pagave në sektorin e drejtësisë, profesorëve universitar dhe administratës së Kuvendit. Sipas tij, koeficienti i vlerës së pagës në sektorin publik duhet të jetë 130 euro.

“Administratës së Kuvendit i keni zvogëluar pagat rreth 40 për qind. Nuk e di a keni këtu inati politike brenda partisë që me goditë sektorin ku punon një udhëheqë të juaj siç është Glaku si kryetar i Kuvendit, apo e keni bërë vetëm për t’iu hakmarrë administratës, e kjo është tallje për mendimin tim”, theksoi ai.

Në anën tjetër, anëtari i komisionit nga radhët e Lëvizjes Vetëvendosje, Visar Korencia, ngriti si shqetësim hendekun e madh që po krijohet mes sektorit privat dhe atij publik.

“Shqetësimi im kryesor është sektori privat. Me këtë po krijohet një hendek jashtëzakonisht i madh dhe nuk po krijojmë konkureshmëri në treg”, tha ai.

Me këtë konstatim u pajtua edhe ministri Murati, por tha se nëse vlera e koeficientit do të bëhej 130, siç po kërkon opozita, atëherë mesatarja e pagës në sektorin publik do të ishte 900 euro, apo dyfish më shumë se sektori privat.

“Kjo flet shumë për kërkesat që partitë opozitare kanë kur thonë se koeficienti duhet të shkojë në 120 apo 130 euro. Psh me një koeficienti 130 siç propozojë deputeti Lushatku apo PDK-ja, paga mesatare në sektorin publik do të shkonte në 900 euro. Më shumë se dyfishi i pagës në sektorin privat dhe ku do të merreshin këto para, ato do të merreshin në sektorin privat”, tha ai.

Ai përsëriti sërish se mesatarja e pagës në sektorin publik gjatë këtij vitit është 730 euro.

Related Topics:
Continue Reading

lajme

Shkarkohet Blerim Isufaj nga posti i Kryeprokurorit të Prokurorisë Speciale

Published

8 hours ago

on

October 2, 2026

By

Kryeprokurori i Prokurorisë Speciale, Blerim Isufaj, është shkarkuar të premten nga Këshilli Prokurorial i Kosovës (KPK), ka mësuar KOHA.

Gjatë ditës ishte bërë e ditur se KPK-ja do të mblidhej në një takim të jashtëzakonshëm, ku në rend dite ishte diskutimi për performancën e Isufajt.

Isufaj ishte zgjedhur për herë të parë në krye të Prokurorisë Speciale në vitin 2019, ndërsa ishte rizgjedhur në këtë pozitë në vitin 2023.

Gjatë mandatit të tij, Isufaj ka qenë një prej figurave më të kritikuara në sistemin prokurorial nga Lëvizja Vetëvendosje. Ai ishte votuar edhe nga Këshilli Prokurorial për pozitën e Kryeprokurorit të Shtetit, por procesi kishte mbetur pezull dhe nuk ishte dekretuar nga ish-presidentja Vjosa Osmani.

Kryeministri Albin Kurti kishte deklaruar më herët se në sistemin prokurorial “shumica e problemeve kanë emër të përveçëm”, duke iu referuar Isufajt.

Më 2 shtator, Isufaj pati një përplasje me disa anëtarë të Këshillit Prokurorial të Kosovës. Përplasjet u zhvilluan gjatë shqyrtimit të raportit të punës së Prokurorisë Speciale për vitin 2025, i cili më pas u rrëzua nga KPK-ja.

D.L

Continue Reading

Aktualitet

Nis takimi mes Kurtit dhe Hamzës

Published

8 hours ago

on

October 2, 2026

By

Ka nisur takimi mes kryeministrit Albin Kurti dhe kryetarit të Partisë Demokratike të Kosovës (PDK), Bedri Hamza.

Në takim pritet të diskutohen çështja e zgjedhjes së presidentit të ri dhe ndryshimet e mundshme në Ligjin për Dhomat e Specializuara të Kosovës.

Hamza është parë duke hyrë në objektin e Qeverisë i shoqëruar nga deputeti i PDK-së, Rrahman Rama.

Kuvendi i Kosovës ka afat deri më 6 tetor për zgjedhjen e presidentit të ri. Nëse presidenti nuk zgjidhet brenda këtij afati, vendi shkon në zgjedhje të reja.

D.L

Continue Reading

lajme

“Jo në emrin tim” para Ministrisë së Drejtësisë “Voto Ligjin”, kërkohet miratimi i ligjit për mbrojtjen e UÇK-së

Published

9 hours ago

on

October 2, 2026

By

Protestuesit e iniciativës “Jo në emrin tim” kanë zhvilluar sot një aksion simbolik para Ministrisë së Drejtësisë, ku kanë vendosur një baner me mbishkrimin “Voto Ligjin”, duke kërkuar procedimin dhe miratimin e ligjit për mbrojtjen e UÇK-së.

Aktivisti Rron Kafegjolli deklaroi se qytetarët prej 17 ditësh po kërkojnë miratimin e këtij ligji, duke e cilësuar vonesën si të papranueshme.

Sipas Kafegjollit, bazuar në deklarimet e kryeministrit Albin Kurti, ligji po mbahet i bllokuar në Ministrinë e Drejtësisë dhe Ministrinë e Financave.

“Ky nuk është një udhëzim çfarëdo që mund ta kaloni lart e poshtë nëpër zyra. Sepse bëhet fjalë për ligjin që mbron të vërtetën e UÇK-së dhe ne nuk do të lejojmë zvarritjen e tij”, u shpreh ai.

Kafegjolli kritikoi ministren Donika Gërvalla dhe ministrin Hekuran Murati, duke kërkuar nga institucionet që të veprojnë në përputhje me kërkesat e qytetarëve.

“Institucionet e këtij shteti nuk mund të mbeten peng i inateve apo bindjeve personale të ministres Gërvalla dhe ministrit Murati. Shteti nuk është pronë private e dikujt”, tha Kafegjolli.

Duke iu referuar afatit për zgjedhjen e presidentit, i cili skadon më 6 tetor, ai i bëri thirrje Qeverisë që të mos e zvarrisë më tej procesin e miratimit të ligjit.

“Qeveria duhet ta dijë se rinia po ju vëzhgon dhe 6 tetori po afron me shpejtësi. Mos e provokoni durimin tonë”, deklaroi ai.

Kafegjolli e përmbylli fjalimin duke i bërë thirrje Qeverisë që ta dëgjojë zërin e protestuesve dhe të veprojë lidhur me kërkesën për miratimin e ligjit.

D.L

Continue Reading

Lajmet

Master në Gjuhë, Media dhe Komunikim në UBT: Formimi profesional për liderët e së ardhmes

Published

9 hours ago

on

October 2, 2026

By

Në një epokë ku media dhe komunikimi po transformohen me ritme të shpejta, profesionistët e së ardhmes kanë nevojë për njohuri të avancuara, mendim kritik dhe aftësi praktike.

Pikërisht për këtë, UBT ofron programin Master në Gjuhë, Media dhe Komunikim, të konceptuar për të përgatitur profesionistë të aftë për të udhëhequr në sektorin e medias, komunikimit dhe marrëdhënieve me publikun.

Programi Master në Gjuhë, Media dhe Komunikim ndërthur në mënyrë strategjike shkencat sociale, teknologjinë e informacionit, gazetarinë, Marrëdhëniet me Publikun (PR) dhe krijimin e përmbajtjes digjitale.

Përmes kombinimit të njohurive teorike me përvojën praktike dhe hulumtimin shkencor, studentët zhvillojnë kompetenca të avancuara për t’u përballur me kërkesat e tregut modern të punës, si në Kosovë ashtu edhe në tregun global.

Një rëndësi e veçantë i kushtohet etikës profesionale, mendimit kritik dhe aftësisë për të analizuar, interpretuar dhe menaxhuar komunikimin dhe imazhin e institucioneve dhe organizatave.

Kjo e bën programin një mundësi të përshtatshme për të gjithë ata që synojnë të avancojnë profesionalisht në media, gazetari, komunikim strategjik, PR, marketing dhe përmbajtje digjitale.

Përveç mundësisë për të ndjekur një program Master të orientuar drejt zhvillimit profesional, UBT ofron edhe një mbështetje të rëndësishme financiare për studentët. Përmes bursës Engaged Scholarship, studentet që janë pjesë e kësaj fushe përfitojnë 20% zbritje në tarifën e studimeve gjatë gjithë periudhës së programit Master.

Kjo bursë përfaqëson një mundësi konkrete për studentët që duan të investojnë në arsimimin e tyre të avancuar, duke pasur njëkohësisht mbështetje financiare gjatë gjithë rrugëtimit akademik.

Master në Gjuhë, Media dhe Komunikim në UBT është një mundësi për të zgjeruar njohuritë, për të zhvilluar kompetenca profesionale dhe për të ndërtuar bazat e një karriere të suksesshme në një sektor që ndryshon vazhdimisht.

Apliko në programin Gjuhë, Media dhe Komunikim -Master dhe përfito 20% bursë përmes Engaged Scholarship.

Continue Reading

Të kërkuara