Presidenti i Francës, Emmanuel Macron, deklaroi sot në Tiranë se “është shumë e rëndësishme të mbështetet Ukraina dhe pikë së pari armëpushimi me Rusinë”.

Në nisje të fjalës së tij në samitin e 6-të të Komunitetit Politik Europian, Macron falënderoi kryeministrin Edi Rama për organizimin e samitit.

“Faleminderit Edi që na ke mikpritur me rastin e këtij samiti, urime per rezultatin e zgjedhjeve edhe për këtë rrugëtim europian dhe besim që shpreh tek Evropa”.

Presidenti francez u shpreh se “në fakt në raport me këtë seancë më lë mbresë diçka e pashembullt, që në fakt ka një sfidë të të gjitha formave të sigurisë të Europës dhe të mbledhurit përtej Bashkimit europian. Mbledhja me të gjithë krerët e shteteve dhe të qeverive që përfaqësojmë këto vende, kjo na jep shansin e një kontinenti më të gjerë, na jep shansin që të përballemi me sfida e ta bëjmë këtë së bashku në unitet, duke pasur parasysh rrezikun e ndasisë që na kërcënon”.

Macron më tutje shtoi se “natyrisht përparësia politike është gjeostrategjike, ka rreziqe natyrisht të ndasive të luftës në Europë ndonjëherë ka edhe kërcënime të unitetit. Pikë së pari është lufta e agresionit rus në Ukrainë, Zelensky e di sa shumë jemi në krah të tij, solidarë, kemi krijuar koalicione të të vullnetshmëve dhe është shumë e rëndësishme të mbështetet Ukraina dhe pikë së pari armëpushimi”.

“Orët e fundit Rusia nuk e do këtë armëpushim, por tryesnia e europianëve dhe amerikanëve do ta bëjë këtë. Nuk do të ketë armëpushim spontan Rusia sidoqoftë duhet t’i kthehet diskutimeve që u mbajtën në 2022 natyrisht kjo do të thotë që duhet të këmbëngulim në mënyrë që të sigurojmë një paqe të qëndrueshme në Ukrainë”, nënvizoi Macron./atsh

Në nisje të Samitit të Komunitetit Politik Evropian që po zhvillohet në Tiranë, Presidenti i këshillit Europian Antonio Costa bëri thirrje për unitet dhe përkushtim në mënyrë kolektive.

Paqja në Ukrainë ishte një nga pikat kyçe në fjalimin e Costës të përbashkët për paqe, duke e cilësuar sigurinë e Ukrainës si pjesë të sigurisë së vetë Evropës.

“Titulli i takimit të sotëm është me vend. Një Evropë e re, në një botë të re. Dhe unë besoj se kjo është cështja kryesore për këtë samit të sotëm. Ky rend botëror i bazuar tek rregullat po minohet nga shumë palë. Agresioni rus kundër Ukrainës solli luftën e madhe në kontinentin europian sërish. Kjo luftë është një sulm ndaj komunitetit ndërkombëtar. Situata në Gazë është një tragjedi humanitare, e drejta ndërkombëtare po dhunohet. Bashkëpunimi ndërkombëtar dhe tregtar ka bërë që njerëzit të lidhen me njëri-tjetrin, ndërkohë që kjo ndërvarësi që kishim krijuar është shndërruar në një instrument pushteti dhe presioni“, u shpreh Costa.

“Nga ana tjetër, mënhyra sesi ne kemi funksionuar me rendin shumëpalësh ka bërë që ne të kishim paqe, siguri. Kemi promovuar të drejtat e njeriut të cilat mund të avancohen sërish vetëm nëse ne bashkëpunojmë në formë kolektive. Rendi shumëpalësh vazhdon të sulmohet dhe Europa ka për detyrë të punojë për këtë çështje, duhet të jemi të bashkuar dhe t ia dalim mbanë për të sjellë një paqe te drejtë për Ukrainën. Siguria e Ukrainës është edhe siguria jonë. Europa duhet të investojë më shumë tek mbrojtja e saj. Kemi mësuar se mbrojtja pa paqe është iluzion”, shtoi Costa.

Presidenti i Turqisë, Recep Tayyip Erdogan ka mbërritur në Samitin e Komunitetit Politik në Tiranë, ku është pritur nga kryeministri Edi Rama.

Ai u shpreh për mediat se priten vendime pozitive nga Samiti që po mbahet sot në kryeqytetin shqiptar.

“Çfarë është ajo që prisnim, presim shumë gjëra me vëllan tim shqiptar. Në Shqipëri e gjithë bota do të thërrasë zërin e paqes”, ka thënë në turqisht Erdogan./atsh

Kryeministrja e Italisë, Giorgia Meloni ka mbërritur në Samitin Politik Evropian të Tiranës ku u prit nga kryeministri Edi Rama.

Në një prononcim të shkurtër për mediet lidhur me agresionin rus në Ukrainë, Meloni tha se “mendoj se nuk do të kërkojmë alternativa, por duhet të këmbëngulim për një armëpushim të pakushtëzuar”.

“Të këmbëngulim për marrëveshje serioze paqeje që të ketë garanci dhe siguri edhe për Ukrainën. Po vazhdojmë të punojmë edhe në këtë format për këtë objektiv”, tha meloni

E pyetur nëse do të vizitojë qendrën e emigrantëve në Gjadër, Meloni tha se nuk ka pasur kohë.

“Puna po vazhdon, kjo tregon edhe shpejtësinë e funksionimit duke dëshmuar siç kishim premtuar jemi në rrugën e duhur”, theksoi ajo.