Boksierja kosovare Donjeta Sadiku ka fituar medaljen e artë në turneun e 77-të ndërkombëtar të boksit “Strangja 2026”, i cili u zhvillua në Sofje, Bullgari.

Sadiku triumfoi në finale ndaj brazilianes Rebeca De Santos në kategorinë -60 kg, duke shënuar gjithsej katër fitore gjatë turneut. Ky është suksesi i saj i dytë radhazi në këtë turne, pasi kishte fituar medaljen e artë edhe vitin e kaluar.

Turneu “Strangja” është më i vjetri në Evropë dhe tërheq boksierët më të mirë të kontinentit, duke e bërë arritjen e Donjetës edhe më të rëndësishme.

Urime të mëdha Donjetës Sadiku për këtë sukses fantastik dhe për përfaqësimin e shkëlqyer të Kosovës në arenën ndërkombëtare!

Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka ndarë çmimin tradicional “Ylli i Javës”, i cili vlerëson futbollistin më të dalluar të javës në Superligë.

Për javën e 22-të, ky çmim i është ndarë për herë të dytë Mario Ilievski nga FC Prishtina, pas një eurogoli spektakolar nga mbi 40 metra në ndeshjen kundër FC Drita, që përfundoi 1:1.

Vlerësimi është bërë nga Komisioni i Veteranëve të Futbollit, i cili vlerësoi kontributin dhe paraqitjen e jashtëzakonshme të Ilievskit.

Pas marrjes së çmimit, Ilievski tha:

“Fillimisht, faleminderit për vlerësimin. Kam shënuar një gol të çmendur dhe nuk dija as si të veproja; vetëm kam vrapuar tek fansat që të festojmë bashkë. Është një gol që nuk shënohet çdo herë.
Kemi edhe 14 ndeshje dhe çdo ndeshje është një finale për ne. Nuk jemi të lumtur me rezultatet, sepse e dimë që mund të bëjmë më mirë, por do të luftojmë në çdo ndeshje që të dalim në vendin e parë.
Dua këtë çmim t’ua dedikoj tifozëve Plisat, të cilët na dhuruan një atmosferë të zjarrtë dje dhe shpresoj që do të jenë në çdo ndeshje për të na dhuruar një atmosferë të tillë.”

Ky çmim thekson paraqitjet më të mira të futbollistëve në Superligën e Kosovës dhe mbetet një motiv shtesë për lojtarët që të japin më të mirën në fushë.

Sporti ajror i Kosovës ka shkruar një faqe të re historie! Pilotja e jashtëzakonshme Lisjeta Thaqi arriti të renditet numër 1 në botë në kategorinë e femrave në paragllajding, duke vënë Kosovën në majat e skenës ndërkombëtare të këtij sporti.

Ky sukses nuk është vetëm një arritje personale, por një fitore për gjithë komunitetin e aviacionit sportiv të Kosovës dhe për të gjithë ata që besojnë në punën e palodhur, disiplinën dhe ëndrrat e mëdha.

Triumfi i Thaqit erdhi nën udhëheqjen e trajnerit dhe rekordmenit botëror e evropian Fanol Shala, i cili ka ndërtuar një ekip kampionësh dhe ka dhënë një kontribut të madh në zhvillimin e sportit ajror në vend.

Nën ombrellën e Federata Aeronautike e Kosovës, arritja e Lisjeta Thaqit tregon se Kosova është një forcë serioze në paragllajdingun e precizionit dhe në garat ndërkombëtare.

Ky moment është një shkëlqim krenarie kombëtare: dëshmon se me pasion, punë dhe bashkëpunim, edhe vendet e vogla mund të arrijnë majat e botës.

Urime Lisjeta Thaqi – Kosova është krenare me ty!

Futbollisti kosovar Edon Zhegrova pati një paraqitje të shkëlqyer në barazimin 3-3 të Juventus ndaj Roma në kuadër të xhiros së 27-të.

Zhegrova hyri në minutën e 72-të në vend të Francisco Conceição dhe brenda pak minutash tregoi klas. Ai ishte i përfshirë në dy golat e Juventusit: në minutën e 78-të harkoi nga krahu i djathtë, topi u largua nga mbrojtësi i Romës dhe Jeremie Boga shënoi për 3-2.

Më vonë, Zhegrova harkoi sërish në zonë dhe Federico Gatti shfrytëzoi gabimin e mbrojtësve për të barazuar rezultatin 3-3, duke shpëtuar një pikë të çmuar për Juventusin në transfertë.

Për Romën shënuan Wesley França, Evan Ndicka dhe Donyell Malen, duke dhuruar një ndeshje të mbushur me tension dhe gola.

Pas këtij barazimi, Juventusi qëndron në vendin e gjashtë me 47 pikë, ndërsa Roma mban vendin e katërt me 51 pikë.

Në këtë ndeshje, Zhegrova tregoi pse është një nga lojtarët më të shquar kosovarë në Serie A dhe një element kyç i Juventusit.