Në edicionin e 8-të të Konferencës së Ambasadorëve të Republikës së Kosovës, kryeministri në detyrë Albin Kurti, bëri thirrje që në këtë projekt të unifikuar duhet të bashkëpunojmë sa më ngushtë jo vetëm me ministrin por edhe vetë me njëri-tjetrin. Kurti tha se urat e bashkëpunimit duhet të ndërtohen vazhdimisht gjatë gjithë vitit.

“Kjo shpërndarje e gjerë e përfaqësive përbën njëkohësisht edhe avantazh edhe sfidë. Avantazhi është se i mundëson shtetit tonë që të ketë 53 zëra të fuqishëm nëpër botë për të shtyrë përpara interesat më të rëndësishme të Kosovës dhe qytetarëve të saj. Sfida kryesore është se si të gjejmë një mënyrë që këta zëra tuaj të mos funksionojnë të pa ndërlidhur me njëri-tjetrin, por në harmoni të plotë si një kor i vetëm me ministrin këtu në Prishtinë në rolin e dirigjentit. Në këtë projekt të unifikuar duhet të bashkëpunoni sa më ngushtë jo vetëm me ministrin por edhe me njëri-tjetrin. Urat e bashkëpunimit duhet të ndërtohen vazhdimisht gjatë gjithë vitit”, tha Kurti.

Ndër të tjera Kurti theksoi se përpjekjet e Serbisë për të minuar sovranitetin dhe integritetin territorial të Kosovës mbeten një kërcënim serioz.

“Përpjekjet e Serbisë për të minuar sovranitetin dhe integritetin territorial të shtetit vazhdojnë të paraqesin kërcënim ndaj sigurisë tonë kombëtare. Lufta propagandistike e Serbisë, në bashkëpunim të ngushtë me Federatën Ruse po egërsohet nga dita në ditë, duke shpërndarë në mënyrë sistematike në çdo skaj të botës mesazhe të rrejshme. Duke marrë parasysh këtë veprimtari, juaja si përfaqësues të Kosovës është jetike për mbrojtje”, u shpreh ai.

E pranishme ishte edhe ministrja e Punëve të Jashtme dhe Diasporës, Donika Gërvalla, e cila tha se takimi me përfaqësuesit diplomatikë ka për qëllim përmbledhjen e punës së bërë, vlerësimin e rezultateve dhe përcaktimin e hapave për vitin e ardhshëm.

“Ky është takimi ku përmbledhim punën e bërë, vlerësojmë rezultatet dhe përcaktojmë hapat për vitin që vjen. MPJD ka kaluar një reformë thelbësore duke vendosur standarde të reja të transparencës dhe menaxhimit të përgjegjshëm financiar. Sot çdo euro e buxhetit përdoret me plane të qarta të arsyetuara dhe me kontroll të plotë. Kemi arritur të ulim shpenzimet e panevojshme. Gjatë këtij viti kemi arritur edhe dy njohje të reja të shtetësisë së Kosovës duke forcuar pozicionin ndërkombëtar. Kemi siguruar anëtarësimin në një numër të konsiderueshëm të organizatave ndërkombëtare duke zgjeruar hapësirën ku Kosova është e pranishme dhe aktive”, tha Gërvalla.

Edicionin e 8-të të Konferencës së Ambasadorëve është organizuar nga Ministria e Punëve të Jashtme dhe Diasporës në Prishtinë.

Dronët e operuar nga Drejtoria Kryesore e Inteligjencës e Ministrisë së Mbrojtjes së Ukrainës (GUR) kryen një sulm ndaj rafinerisë së naftës Lukoil në Republikën ruse Komi, e cila ndodhet dy mijë kilometra nga kufiri ukrainas.

Informacioni u konfirmua nga burime në shërbimin e inteligjencës ukrainase, shkruan Ukrainska Pravda.

Objekti i synuar në Komi është thelbësor për furnizimin e forcave ruse me karburant dhe lubrifikantë.

Burimet e inteligjencës ukrainase zbuluan se dronët goditën një rezervuar për produktet e naftës.

Po ashtu, u dëmtua një njësi përpunimi gazi dhe kondensate gazi që përdoret për të prodhuar propan-butan dhe benzinë.

Agjencia e Menaxhimit Emergjent ka njoftuar se gjatë gjashtë orëve të fundit janë regjistruar gjithsej 37 vatra zjarri në Kosovë, prej të cilave 22 mbeten aktive, ndërsa 15 janë shuar dhe 52 të lokalizuara.

Situata më e rënduar paraqitet në fshatin Kçiq i Vogël të komunës së Mitrovicës, ku është kërkuar ndërhyrje urgjente dhe ndihmë nga KFOR-i, Forca e Sigurisë së Kosovës (FSK) dhe Policia e Kosovës (PK).

Në operacionin e shuarjes së zjarreve në këtë zonë janë të angazhuara njësitë e zjarrfikësve nga: Mitrovica Jugore dhe Veriore, Zubin Potok, Prishtina, Vushtrria, Njësia Nacionale për shuarjen e zjarreve nga toka (GFFF)

“Komunikimi me Qendrat Operative Emergjente (QOE – 112) dhe Njësitë Profesionale të Zjarrfikjes dhe Shpëtimit (NJPZSH) është duke u zhvilluar pandërprerë për të siguruar ndërhyrje efikase në të gjitha vatrat e zjarrit”.

Një sulm izraelit në qytetin e Gazës mbrëmë vrau shtatë persona, përfshirë të paktën katër gazetarë nga rrjeti i lajmeve Al Jazeera.

Ushtria izraelite tha se shënjestroi dhe vrau korrespondentin e Al Jazeera-s, Anas Al-Sharif, një gazetar i shquar që ka mbuluar gjerësisht luftën nga brenda Gazës pasi e akuzoi atë për drejtimin e një qelize të Hamasit, një akuzë që Al-Sharif e kishte mohuar më parë, shkruan CNN.

Mohammed Qreiqeh, një gazetar tjetër i Al Jazeera-s në Gaza, dhe fotoreporterët Ibrahim Al Thaher dhe Mohamed Nofal u vranë gjithashtu në sulm.

“Urdhri për të vrarë Anas Al-Sharif, një nga gazetarët më të guximshëm të Gazës, së bashku me kolegët e tij, është një përpjekje e dëshpëruar për të heshtur zërat përpara pushtimit të Gazës”, tha Al Jazeera në një deklaratë pas sulmit.

Në minutat para se të vritej, Al-Sharif tha në mediat sociale: “Nëse kjo çmenduri nuk mbaron, Gaza do të shndërrohet në rrënoja, zërat e njerëzve të saj do të heshtin, fytyrat e tyre do të fshihen -dhe historia do t’ju kujtojë si dëshmitarë të heshtur të një gjenocidi që zgjodhët të mos e ndaloni”./Ubtnews