Deputeti i Partisë Demokratike të Kosovës, Bekim Haxhiu i ka bërë thirrje prokurorisë për hetim, me pretendimet siç thekson ai ‘për hajni brenda Ministrisë së Mbrojtjes’. Sipas tij, 16 pjesëtarë të ushtrisë janë dërguar në Komision Disiplinor, meqë të njëjtit janë ushqyer jashtë kazermës. Kështu u shpreh ai në seancë të jashtëzakonshme ku po diskutohet për çështjen e ushqimit në Forcën e Sigurisë së Kosovës.

Në seancën e cila është bojkotuar nga Lëvizja Vetëvendosje, Haxhiu i bëri thirrje edhe ish-ministrit të Mbrojtjes, Armend Mehaj që të tregojë arsyen e vërtetë të dorëheqjes.

“Hajnia e ka lënë ushtrinë pa bukë. Ushtarët sot janë detyruar të dalin të hanë bukë jashtë kazermës dhe 16 prej tyre janë dërguar në Komision Disiplinor, pse kanë dalë të ushqehen jashtë kazermës sepse ushqimi brenda ka qenë i pa përballueshëm dhe i pamjaftueshëm për ta. Kjo është vetëm një pjesë e asaj që është bërë publike e hajnisë, por ka këtu hajni edhe më shumë që asnjëherë nuk është bërë publike. Prandaj e ftoj Prokurorinë të merret me këto dhe e ftoj ish-ministrin, Armend Mehaj të bëjë publike arsyen e vërtetë të dorëheqjes së tij. Fondi për ushtrinë që është krijuar nga Qeveria Kurti asnjëherë nuk është bërë publik, jo sa mjete kanë qenë por as se si u shpenzuan. Qytetarët dhanë mjetet e tyre për të kontribuar për Ushtrinë e Kosovës, e këta shkojnë vjedhin edhe në pasul edhe bukë të ushtarëve. Por kanë vjedhur edhe në armatim, këtë përgjigje duhet të na ja jap ministri Armend Mehaj me arsyen e vërtetë pse ai ka dhënë dorëheqje dhe konfliktin që ka pasur brenda Ministrisë së Mbrojtjes me këta eksponentë kriminal”, deklaroi Haxhiu.

“Çmimi Nobel në Ekonomi” për vitin 2024 iu dha tre ekonomistëve të shquar — Daron Acemoglu, Simon Johnson dhe James A. Robinson — për kontributet e tyre të rëndësishme në kuptimin e lidhjeve midis institucioneve dhe zhvillimit ekonomik të vendeve.

Ky çmim, i cili njihet si Çmimi përkujtimor në Shkenca Ekonomike në Kujtim të Alfred Nobelit, u shpall nga Akademia Mbretërore Suedeze e Shkencave, duke theksuar rëndësinë jetike të institucioneve shoqërore në prosperitetin e një kombi.

Daron Acemoglu, Simon Johnson and James A. Robinson.

Hulumtimi i këtyre ekonomistëve ka treguar se shoqëritë me institucione të dobëta dhe me sundim të dobët të ligjit kanë më pak gjasa të përjetojnë rritje ekonomike apo përparim. Në vend të kësaj, ato shpesh përjetojnë shfrytëzim të popullsisë dhe varfëri të vazhdueshme.

Punimet e tyre ndihmojnë në shpjegimin e arsyes se pse disa vende janë më të prosperuara se të tjerat, duke nënvizuar rolin kyç që luajnë institucionet politike dhe ekonomike në këtë proces.

Daron Acemoglu dhe Simon Johnson punojnë në Institutin e Teknologjisë në Masaçusets (MIT), ndërsa James A. Robinson është pjesë e Universitetit të Çikagos. Studimet e tyre kanë dhënë një kontribut të madh në kuptimin tonë të mënyrës sesi struktura institucionale ndikon në rritjen ekonomike dhe zhvillimin afatgjatë të vendeve.

Edhe pse Çmimi Nobel në Ekonomi nuk ishte pjesë e pesë çmimeve origjinale të themeluara nga Alfred Nobel, ai u krijua në vitin 1968 nga Banka Qendrore e Suedisë për të nderuar arritjet në fushën e ekonomisë. Çmimi, si gjithmonë, do të ndahet zyrtarisht më 10 dhjetor, në përvjetorin e vdekjes së Alfred Nobelit.

Era Deva, studente e vitit të dytë në Fakultetin e Shkencave të Sportit dhe Lëvizjes në UBT, ka arritur një sukses të jashtëzakonshëm duke publikuar disa punime shkencore në revista ndërkombëtare. Kjo arritje e jashtëzakonshme është realizuar nën mentorimin e profesorit Milaim Berisha, i cili ka kontribuar në zhvillimin e saj akademik dhe hulumtues.

Disa nga publikimet e saj të fundit përfshijnë:

“Impact of arm technique and elastic force on vertical jump performance in physical education students: a convergent validation study”, ky hulumtim analizon ndikimin e teknikave të krahëve dhe forcës elastike në performancën e skokut vertikal të studentëve të edukatës fizike.

“The effect of ground reaction forces in different phases of the ski turn: A systematic review”, ky punim shqyrton efektet e forcave të reagimit të tokës gjatë fazave të ndryshme të kthesës në ski, duke ofruar një analizë të thelluar mbi mekanizmat e lëvizjes.

“Risk factors Associated with Shoulder Injuries in Swimmers: A Systematic Review”, ky publikim adreson faktorët e rrezikut të lidhur me dëmtimet e shpatullave te notuesit, duke ndihmuar në kuptimin e sfidave të trajtimit dhe parandalimit.

“Active Learning: Is it possible to learn English while Exercising?”, studimi eksploron mundësinë e mësimit të gjuhës angleze gjatë ushtrimeve fizike, duke nxjerrë në pah lidhjen ndërmjet mësimit dhe aktiviteteve fizike.

Era ka paraqitur gjithashtu punime në konferenca ndërkombëtare, si: “The Impact of Ground Reaction Forces Across Ski Turn Phases: A Systematic Review”, paraqitur në Konferencën Ndërkombëtare të UBT-së mbi Biznesin, Teknologjinë dhe Inovacionin në Prishtinë, tetor 2023.

“Analyzing the Execution style of the Jump Types as a Key Factor of Performance”, prezantuar në Kongresin Ndërkombëtar mbi Shkencat Natyrore, Shëndetin dhe Teknologjinë në Tetovë, Prishtinë, prill 2024.

Prof. Milaim Berisha shprehet se ky sukses i Erës është një arritje e madhe për të gjithë departamentin dhe fakultetin, si dhe për Kosovën në përgjithësi. “Ne jemi të gëzuar që studentë si Era po kontribuojnë në zhvillimin e hulumtimeve shkencore dhe po e vendosin Kosovën në hartën ndërkombëtare të akademisë. Kjo tregon se potenciali ynë është i madh dhe se ne jemi në rrugën e duhur për të promovuar shkencën dhe edukimin e lartë,” thotë ai.

Suksesi i Erës në publikimet shkencore në një fazë të hershme të karrierës së saj akademike, tregon jo vetëm talentin e saj, por edhe mbështetje të fortë nga profesorët e Fakultetit të Shkencave të Sportit dhe Lëvizjes në UBT. Ky është një shembull frymëzues për të gjithë studentët e tjerë, duke treguar se përkushtimi dhe puna e palodhur sjellin rezultate të shkëlqyera. UBT-ja vazhdon të mbështesë studentët e saj në ndjekjen e excellencës akademike dhe hulumtuese./UBTNews/D.E.

Presidenti ukrainas, Volodymyr Zelensky, pretendoi se Koreja e Veriut ka dërguar ushtarë dhe armë në Rusi për të mbështetur luftën e Moskës në Ukrainë.

Mediat ukrainase së fundi kanë raportuar se gjashtë pjesëtarë të personelit ushtarak të Koresë së Veriut u vranë në një sulm ajror ukrainas në rajonin ukrainas të Donjeckut – të pushtuar nga Rusia – më 3 tetor.

Raportimet e mediave ukrainase nuk kanë mundur të verifikohen në mënyrë të pavarur, por gjatë adresimit të tij në orët e vona të 13 tetori, Zelensky për herë të parë përsëriti këtë pretendim.

Presidenti ukrainas, Volodymyr Zelensky.

“Kjo më nuk është çështje vetëm e transferimit të armëve. Tashmë ka të bëjë me transferimin e njerëzve nga Koreja e Veriut për te forcat e ushtrisë okupuese”, tha ai.

Zelensky nuk ofroi dëshmi për të mbështetur këtë pretendim, por spekulimi mbi rolin e Koresë së Veriut në konflikt është rritur në mesin e shenjave se Moska po forcon lidhjet me shtetet sikurse Koreja e Veriut dhe Irani, pas pothuajse 32 muajsh që kur Rusia nisi pushtimin në shkallë të plotë të Ukrainës.

Instituti për Studim të Luftës, me seli në Uashington, së fundi ka raportuar se qindra trupa të Koresë së Veriut kanë arritur në Rusi dhe po përgatiten.

Koreja e Veriut raportohet se i ka ofruar Moskës armë dhe municion, që Rusia i përdor kundër Ukrainës.

Shërbimi i inteligjencës së Koresë së Jugut ka pretenduar se Pheniani e ka furnizuar Moskën me municione të artilerisë dhe raketa me rreze të shkurtër veprimi. Kremlini ka hedhur poshtë këto pretendime, por nuk ka komentuar lidhur me deklaratën e Zelenskyt.

Zelensky tha se dislokimi vë në pah nevojën e Ukrainës për “më shumë mbështetje” nga partnerët e saj perëndimorë për të “rritur presionin ndaj Rusisë” dhe për të parandaluar “një luftë më të madhe”.

Presidenti ukrainas javën e kaluar vizitoi Britaninë, Gjermaninë, Francën dhe Italinë dhe u kërkoi partnerëve të Kievit që të vazhdojnë mbështetjen ushtarake për Kievin.

Situata në Ukrainë dhe Lindjen e Mesme pritet të jetë në krye të agjendës gjatë takimit mes presidentit amerikan, Joe Biden, dhe udhëheqësit gjerman, Olaf Scholz, gjatë vizitës në Berlin më vonë gjatë javës./REL/