Tre persona kanë mbetur të lënduar në një aksident që ndodhi mëngjesin e sotëm rreth orës 08:30 në rrugën “Jusuf Gërvalla” në Prishtinë.

Sipas Policisë, në aksidentin  në afërsi të rrethit me flamur, u përfshinë tri vetura dhe të lënduarit morën trajtim mjekësor.

Rasti po hetohet nga Njësia e Trafikut të Kryeqytetit.

“Sot rreth orës 08:30 kemi pranuar informatën për një aksident trafiku me lëndime në rrugën “Jusuf Gërvalla” në Prishtinë. Në aksident janë përfshirë tri vetura. Si pasojë lëndime kanë pësuar tre persona, të cilët kanë pranuar tretman mjekësor. Me rastin po merret Njësia e Trafikut të Kryeqytetit”, thuhet në përgjigjen e policisë./S.K/EO/PK/

Ambasadori në largim i Gjermanisë në Kosovë, Jorn Rohde, javën e ardhshme e mbyll zyrtarisht mandatin e tij diplomatik në Prishtinë.

Në pritjen e organizuar me rastin e lamtumirës së tij, ku ndër të pranishmit ishte edhe Presidentja Vjosa Osmani, tha se përvoja e tij këtu  ka qenë e paharrueshme dhe se lidhjet e krijuara do t’i ruajë gjithmonë.

Ndërkohë Osmani, nënvizoi raportet e afërta që Kosova dhe Gjermania kanë ndërtuar gjatë viteve të fundit.

Rohde sipas postimit të Ambasadës gjermane në Kosovë,  tha se përvoja e tij këtu  ka qenë e paharrueshme dhe se lidhjet e krijuara do t’i ruajë gjithmonë.

Duke reflektuar mbi pesë vitet e kaluar në vend, ambasadori foli për mikpritjen që ka përjetuar, për bukuritë e natyrës që ka eksploruar në ecjet malore dhe për emocionet në fushën e futbollit, ku veçoi fitoren e fundit të Kosovës kundër Suedisë.

Ai përmendi me krenari edhe lojtarët e lindur në Gjermani që zgjodhën të përfaqësojnë rrënjët e tyre kosovare.

Në fjalën e tij, Rohde vlerësoi liberalizimin e vizave në vitin 2024, duke e quajtur atë një hap të rëndësishëm për afrimin e Kosovës me Bashkimin Evropian.

Ai po ashtu theksoi rolin e fuqishëm të diasporës kosovare, që nga sipërmarrësit, politikanët deri te artistët, në forcimin e marrëdhënieve mes dy shteteve./S.K/EO/

Kryetari i Aleancës për Ardhmërinë e Kosovës (AAK), Ramush Haradinaj, gjatë përurimit të shtatores së heroit Afrim Zhitia në Llugë të Podujevës, ka thënë se duhet të bëhet kujdes që të ruhet kujtesa historike.

“Ne duhet të qëndrojmë të kujdesshëm që kujtesa jonë historike të ruhet, që e kaluara të jetë udhërrëfyes për të ardhmen dhe sa herë që kemi mundësi, ta paraqesim ashtu siç është. Ky akt i tillë i rezistencës në kohën e lirisë e ka përshpejtuar atë që ndodhi në Prekaz me komandantin legjendar e deri te liria e Kosovës”, ka deklaruar Haradinaj.

Edhe Ish eprori i UÇK-së, njëherit kryetar i BDI-së në Maqedoninë e Veriut, Ali Ahmeti ka marrë pjesë në përurimin e shtatores së heroit Afrim Zhitisë në Llug të Podujevës dhe nga aty vlerësoi lartë rolin e kontributin e Afrim Zhitisë.

Ai tha se Afrim Zhitia ishte kryeredaktori i lajmëtarit të lirisë që punonte nën hundën e Beogradit.

“Vllezër e motra këtu , me ndihmë e institucioneve dhe angazhimin e kryetari të Podujevës po ngritët shtatorja e Afrim Zhitisë, sekretarit organizativ të Lëvizjes Kombëtare. Sot po ngritët shtatorja e kryeredaktorit të parë të gazetës ilegale ‘Minatori’, mu në ngjarjen më të mëdha që ndodheshin në Kosovë. Sot po ngritët shtarorja e Afrim Zhitisë së kryeredaktorit të lajmëtarit të lirisë, gazetë që vepronte nën hundën e Beogradit. Ky ishte kryeredaktori që kërkonim në qiell dhe ai vepronte në tokën mëm të Kosovës. Sot po ngritët shtatorja e Afrim Zhitisë, organizatorit dhe ideatorit të parë që rezistencën nga ajo në rrugë të shndërrojmë në rezistence reciprociteti në forcë i përgjigjemi pushtues janë ngrit celulat e para nga Afrim Zhitia”, u shpreh Ahmeti. /S.K/EO/

Policia e Kosovës ka arrestuar tre persona të cilët ishin në kërkim si të dyshuar për vrasje në tentativë. Rasti kishte ndodhur më 13 shtator lagjen “Arbëria” në Prishtinë.

Personat e arrestuar janë J.B, H.A, A.K, të gjithë shtetas të Kosovës.

Njësiti i hetimeve të përgjithshme, përveç arrestimeve, ka sekuestruar edhe dy armë zjarri.

“Personat e dyshuar kanë qenë në kërkim nga ana e policisë, për një rast vrasje ne tentativë, shkaktim i rrezikut te përgjithshëm, që ka ndodhur me datën 13.09.2025, në lagjen Arbëria në Prishtinë”, tha Policia në raportin 24-orësh.

Të dyshuarit, me vendim të prokurorit janë dërguar në qendrën e mbajtjes.

“Ndaj tyre janë iniciuar procedurat për veprat: Shkaktim i rrezikut të përgjithshëm dhe armëmbajtje pa leje, ndërkohë që për veprën Vrasje në tentativë policia është në kërkim të dy personave të dyshuar të cilët tashmë janë identifikuar”, bëri të ditur Policia e Kosovës të premten, më 19 shtator./S.K/KP/PK/