Eurodeputeti holandez Thijs Reuten rikonfirmoi mbështetjen e tij për rrugën e anëtarësimit të Kosovës në Bashkimin Europian.

Në dhjetor të vitit 2022 Kosova aplikoi zyrtarisht për pranim në Bashkimin Europian gjatë Presidencës Çeke, por asnjë hap nuk është ndërmarr për shqyrtimin e saj.

Eurodeputeti Reuten deklaroi për A2 CNN tha se nuk ka asnjë justifikim që aplikimi i Kosovës të mbetet kaq gjatë në sirtar.

“Një nga hapat e rëndësishëm është që aplikimi i Kosovës për anëtarësim më në fund të vihet në proces. Nuk e përballoj dot faktin që ka mbetur në sirtar kaq gjatë. Nuk ka absolutisht asnjë arsye për këtë. Ne mund ta vazhdojmë procesin, pavarësisht se disa shtete anëtare të BE-së ende nuk e njohin Kosovën. Kjo është e vërtetë, por megjithatë mund të ecim përpara me shqyrtimin e aplikimit për anëtarësim”, shprehet Thijs Reuten.

Reuten u shpreh optimist edhe për heqjen e masave ndëshkuese të Bashkimit Europian ndaj Kosovës tashmë që në komunat veriore pritet të kthehen kryetarët serbë.

“Tani që zgjedhjet lokale kanë përfunduar, së pari duhet të hiqen masat ndaj Kosovës. Sipas meje, ato s’duhej të ishin vendosur fare dhe duhej të ishin hequr prej kohësh. Por tani që shumë shpejt do të kemi kryetarë të rinj komunash që marrin detyrën në komunat përkatëse, mendoj se ky është momenti që Komisioni dhe vendet anëtare t’i heqin sanksionet”, deklaron eurodeputeti.

Në lidhje me dialogun mes Kosovës dhe Serbisë, eurodeputeti holandez, pjesë e Grupit të Aleancës Progresive të Socialistëve dhe Demokratëve në Parlamentin Evropian, shpreson që procesi të marr një drejtim të ri.

“Për dialogun, është e qartë se nevojitet një momentum i ri. Nuk mund të vazhdojmë me rutinën e viteve të fundit. Shpresoj që Komisionerja Kos, edhe në këtë drejtim, të ndërmarrë hapa përpara dhe që me ndërmjetësin e ri të dialogut [Peter Sorensen] të ndryshojë procesi dhe të zgjidhet lidhja e tepruar që i është bërë progresit drejt anëtarësimit, sepse kjo jep shumë hapësirë për bllokime si për Serbinë, por sidomos për Kosovën që të ecë përpara drejt statusit të vendit kandidat dhe anëtarësimit”, tha ai.

Reuten mendon se dialogu nuk duhet të kthehet në pengesë për avancimin e aplikimit të Kosovës në Bashkimin Europian, duke i kërkuar ndërmjetësuesit të këtij procesi të jetë i barabartë.

“Bashkimi Evropian duhet të jetë strikt dhe i barabartë në qasjen ndaj të dy vendeve, gjë që s’ka ndodhur. Ka pasur një qasje të pabalancuar. Megjithatë, ajo që na duhet nga të gjithë, edhe nga pala e Kosovës, është ta mbyllim këtë kapitull dhe të angazhohemi realisht për të bërë hapa përpara. Por që kjo të ndodhë, BE-ja duhet të jetë e qartë për atë që kërkon nga ky proces dhe të mos e lidhë kaq ngushtë me progresin në rrugën e anëtarësimit”, shprehet Thijs Reuten.

Kosova prej kohësh kërkon që aplikimi i saj të shqyrtohet, t’i jepet pyetësori dhe statusi i vendit kandidat për anëtarësim në Bashkimin Europian, por këto kërkesa nuk janë marr parasysh./KP

Komisioni Qendror i Zgjedhjeve (KQZ) si kurrë më parë, do të përballet për të katërtën herë me procesin zgjedhor, e këtë herë me zgjedhjet e jashtëzakonshme parlamentare që do të mbahen më 28 dhjetor.

Zëdhënësi i KQZ-së, Valmir Elezi në një intervistë për Ekonomia Online ka treguar se ka në dispozicion 37 ditë për ‘i organizuar zgjedhjet, ndryshe nga zgjedhjet e rregullta parlamentare të 9 shkurtit dhe ato lokale të 12 tetorit, kur KQZ kishte muaj të tërë kohë për përgatitje, për zgjedhjet e parakohshme parlamentare të 28 dhjetorit.

Afati i subjekteve politike për të dorëzuar listën e kandidatëve për deputetë, kohëzgjatja e fushatës zgjedhore, regjistrimi dhe votimi jashtë Kosovës, koha për deklarim të koalicioneve dhe të gjitha aktivitetet tjera zgjedhore do të organizohen në afate tepër të shkurtra kohore.

“Meqenëse këto janë zgjedhje të parakohshme dhe KQZ ka në dispozicion vetëm 37 ditë për organizimin e tyre, një nga vendimet e para të KQZ-së për këtë proces zgjedhor do të jetë ndryshimi i afateve kohore apo përshtatja e tyre sipas nevojës në pajtim me rrethanat. Kjo është një e drejtë që KQZ-së ia jep Ligji për Zgjedhjet e Përgjithshme. Pra, të gjitha aktivitetet duhet të organizohen brenda këtyre ditëve”, tha Elezi.

Sipas Elezit, KQZ së shpejti do të vendosë për afatet kohore të të gjitha aktiviteteve zgjedhore, përfshirë edhe kohëzgjatjen e fushatës zgjedhore për subjektet politike.

“Së shpejti, KQZ do të marrë vendim për caktimin e afateve kohore të aktiviteteve për organizimin e zgjedhjeve të parakohshme për Kuvendin e Kosovës. Pra, përmes këtij vendimi, KQZ do të caktojë afatin për partitë për të formuar koalicione zgjedhore, afatin për subjektet politike për t’u certifikuar dhe dorëzuar listën e kandidatëve për deputetë, si dhe periudhën e fushatës zgjedhore. Po ashtu, KQZ do të vendosë për periudhën e regjistrimit të votuesve jashtë Kosovës, votimin përmes postës dhe në përfaqësi diplomatike, afatet për akreditimin e vëzhguesve, e të tjera”, tha Elezi.

Zgjedhjet e parakohshme parlamentare të 28 dhjetorit, janë procesi i katërt zgjedhor brenda vitit, pas zgjedhjeve të rregullta parlamentare të 9 shkurtit dhe atyre lokale më 12 tetor dhe raundit të dytë më 9 nëntor./EO

Sot mbushen tri dekada nga nënshkrimi i Marrëveshjes së Paqes për Bosnjë dhe Hercegovinë, njohur si Marrëveshja e Dejtonit.

Marrëveshja u nënshkrua në bazën ushtarake amerikane “Wright Peterson” në Ohajo, më 21 nëntor 1995.

Një nga parimet kryesore të kësaj marrëveshje, ishte në ndarjen e BeH në 51 për qind në territorin e Federatës së BeH-së dhe 49 për qind në Republikën Serbe.

Nënshkruesit u zotuan për të rregulluar marrëdhëniet e ndërsjella sipas Kartës së Kombeve të Bashkuara, Aktin Final të Helsinkit dhe dokumentet e tjera të OSBE-së, si dhe respekt reciprok për sovranitetin dhe zgjidhjen e kontesteve në mënyrë paqësore.

Ky dokument mundësoi që t’i jepet fund luftës disa vjeçare, ku kishin humbur jetën më shumë 300 mijë qytetarë të BeH-së, e cila luftë kishte filluar pas shpalljes së pavarësisë së Bosnjës nga Jugosllavia.

Agresioni u krye nga Ushtria e Jugosllavisë që udhëhiqej nga Serbia, në mbështetje të serbëve të Bosnjës, që synonin ta mbanin nën kontrollin e tyre territorin e BeH-së./S.K/KP/

SHBA-ja nuk do të merr pjesë në samitin G20 më 22-23 nëntor në Afrikën e Jugut, deklaroi zëdhënësja e Shtëpisë së Bardhë, Karoline Leavitt.

Vërejtjet e saj erdhën pasi presidenti i Afrikës së Jugut Cyril Ramaphosa tha se SHBA dhe Afrika e Jugut po diskutojnë pjesëmarrjen e Uashingtonit në samit pas një ndryshimi të mendjes.

“Do të isha e lumtur të shpjegoja pasi nuk ka ndonjë ndryshim. Shtetet e Bashkuara nuk po marrin pjesë në bisedimet zyrtare në G20 në Afrikën e Jugut. E pashë presidentin e Afrikës së Jugut duke folur pak kundër Shteteve të Bashkuara dhe Presidentit të Shteteve të Bashkuara më herët sot, dhe kjo gjuhë nuk vlerësohet nga presidenti ose ekipi i tij”, tha Leavitt.

“Ambasadori ose përfaqësuesi i Ambasadës në Afrikën e Jugut është thjesht atje për të njohur se Shtetet e Bashkuara do të jenë pritësit e G20; ata po e marrin atë përshëndetje në fund të ngjarjes, ata nuk janë atje për të marrë pjesë në bisedime zyrtare pavarësisht asaj që presidenti i Afrikës së Jugut po pretendon në mënyrë të rreme”, shtoi ajo.

Afrika e Jugut është vendi i parë afrikan që udhëheq G20, pasi mori presidencën vjetore me rotacion të grupit dhjetorin e kaluar.

Marrëdhëniet midis Uashingtonit dhe Pretorisë zyrtare kanë qenë të ftohta pas mosmarrëveshjeve mbi disa çështje të jashtme dhe të brendshme. Më parë këtë muaj, Trump tha se asnjë zyrtar amerikan nuk do të merrte pjesë në samitin e Johanesburgut, duke akuzuar Afrikën e Jugut për “abuzime me të drejtat e njeriut” kundër afrikano-amerikanëve të bardhë.

Afrika e Jugut ka hedhur poshtë vazhdimisht akuzat, duke thënë se pretendimet për persekutim sistematik ose konfiskime tokash që synojnë afrikano-amerikanët e bardhë nuk mbështeten nga provat./S.K/KP/