Përkundër kritika të partive opozitare, Komisioni për Shëndetësi ka dërguar për në seancë Projektligjin për Sigurimin e detyrueshëm të Kujdesit Shëndetësor.

Opozita e cilësoi të vonuar dhe pa zgjidhje të qëndrueshme, ndërsa nga partia në pushtet konsiderojnë se “reforma në shëndetësi po merr një dinamizëm më të madh”.

Deputeti i Lidhjes Demokratike të Kosovës, Armend Zemaj ka theksuar se ky projektligj është i obligueshëm në bazë të rregullores së punës së Kuvendit dhe pa marr parasysh verdiktin ky projektligj detyrimisht shkon në Kuvend për shqyrtim.

Zemaj theksoi se projektligji për sigurime shëndetësore është i vonuar dhe se i njëjti në përmbajtje nuk ofron zgjidhje të qëndrueshme.

“Më shumë është përgatitur për të mbuluar dështimin katërvjeçar të qeverisë në sektorin e shëndetësisë dhe ky ligj nuk mund të improvizohet në fund të mandatit sa për të mbuluar procedurën legjislative”, ka theksuar Zemaj.

Deputeti i Grupit Parlamentar të Vetëvendosjes, Haxh Avdyli ka theksuar se reforma në shëndetësi po merr një dinamizëm më të madh.

“Besoj që deri në fund të mandatit do të kemi edhe ligjin për shëndetësi, ligjin për inspektoratet po edhe ligjin për sigurimet shëndetësore të cilat do të rrumbullakojmë reformën në shëndetësi”, ka theksuar Avdyli.

Sipas tij, ky projektligj i ka adresua të gjitha mangësitë të cilat kanë penguar që Kosova deri më sot mos të ketë sigurime shëndetësore.

Kurse deputeti i Aleancës për Ardhmërinë e Kosovës, Shemsedin Dreshaj tha se do të jetë shumë e vështirë që të përjetësohet në praktikë, sepse sipas tij ka ardhur vonë dhe nuk është koha të amandamentohet.

Sipas tij për të realizuar sigurime shëndetësore nevojiten minimumi katër vite që të grumbullohet fondi dhe që të funksionalizohet procesi.

“Është e çuditshme pse pas tri viteve qeverisje sillet këtu, sikur ta kishim pasur në fillim të vitit 2021 vërtetë do të kishim dhënë kontributin tonë”, theksoi Dreshaj

Dreshaj u shpreh se ky projektligj me të gjitha premisat është i paraparë të dështoj.

Kryetari i Aleancës për Ardhmërinë e Kosovës, Ramush Haradinaj, ka bërë homazhe te varri i Heroit të Kosovës, Afrim Bunjaku, me rastin e njëvjetorit të rënies së tij.

Haradinaj ka thënë se porosia e rënies së Heroit Bunjaku është që Kosova ka njerëz që mbrojën gjithë territorin e saj, rendin e ligjin, të drejtat kushtetuese edhe shtetin ligjor.

“Në njëvjetorin e rënies së rreshterit të Policisë tashmë Heroit të Kosovës Afrim Bunjaku, në sulmin terrorist në Banjskë, e nder të varri i tij. Porosia e rënies heroike të tij është që Kosova ka njerëz që mbrojnë Kosovën, e mbrojtën gjithë territorin e Kosovës, rendin dhe ligjin të drejtat kushtetuese edhe shtetin ligjor. Afrim Bunjaku me jetën e tij e dërgoj këtë porosi, i përulemi me respekt”, u shpreh Haradinaj.

Mujë Bunjaku, vëllai i heroit të Kosovës, Afrim Bunjaku ka folur sot në njëvjetorin e sulmit në Banjskë. Ai u shpreh se ka qenë një vit i vështirë për ta, mirëpo u shpreh se kanë pasur shumë përkrahje.

“Dhimbja është e madhe, mirëpo ndihem krenar që kem pasur kësi vëllai, kësi trimi, krenaria po na mbanë, përkrahja është e madhe nga të gjitha anës, jemi falënderuar ndaj të gjithëve”, tha ai.

“Ka qenë një vit shumë i vështirë, por jemi krenarë, përkrahja është e madhe, duke filluar nga institucionet, popullata, Shqipëria, deri në Australi të largët, Shtetet e Bashkuara të Amerikës, Kanada, nga të gjitha anët dhe kjo po na mban shumë, përkrahja është e madhe edhe krenaria është e madhe. Afrimi nuk ishte vetëm djali ynë, por i krejt kombit shqiptar”, u shpreh tutje Mujë Bunjaku.

Të paktën 40 fluturime brenda dhe jashtë aeroportit kryesor të Bejrutit, Rafic Hariri, janë anuluar që nga mëngjesi i së martës.

Shumica e fluturimeve të anuluara janë për dhe nga shtetet sikurse Gjermania, Arabia Saudite, Emiratet e Bashkuara Arabe, Turqia, Etiopia, Zvicra, Franca, Jordania, Egjipti, Iraku dhe Katari.

Autoritetet libaneze të aviacionit kanë mohuar raportet për pezullime të plota të fluturimeve dhe kanë sqaruar se disa linja ajrore zgjodhën të ndalojnë operacionet në Bejrut për shkak të sulmeve izraelite gjatë ditëve të fundit./UBTNews/