Asambleja Rinore S!NERGY, një ngjarje e rëndësishme e organizuar nga IAYSP EUME, u mbajt nga 24 deri më 27 tetor në Budapest, Hungari. Ky event ofroi një platformë për të rinjtë nga e gjithë Europa dhe Lindja e Mesme për të prezantuar iniciativat e tyre dhe për të ndarë përvoja të çmuara.

Në fjalën e saj përshëndetëse, Prof. Dr. Denis Çelçima, dekania e Fakultetit të Psikologjisë në UBT, theksoi mbështetje të fortë për nismat që fokusohen tek të rinjtë dhe përpjekjet për ndërkombëtarizim. Dekania përcolli urimet e Rektorit Prof. Dr. Edmond Hajrizi, duke theksuar rëndësinë e angazhimit të UBT-së në zhvillimin e projekteve rinore dhe në ndihmën e tyre për të arritur qëllime ambicioze.

Ejona Icka, drejtoresha ekzekutive e YSP Balkan, foli për bashkëpunimin frutdhënës me UBT, duke e cilësuar këtë partneritet si një ndikim pozitiv në zhvillimin e projekteve rinore. Ajo theksoi se ky bashkëpunim ka krijuar mundësi për rinjtë të angazhohen në iniciativa që adresojnë çështje të rëndësishme sociale dhe zhvillimore.

Në këtë asamble, studentët e UBT-së paraqitën tre projekte të shkëlqyera, duke e bërë kështu të qartë përfaqësimin dinjitoz të Kosovës në arenën ndërkombëtare. Njëri nga këta projekte, i realizuar nga studentët Blend Reselica, Klea Vezaj, Gjergj Rexhaj dhe Vlera Krelani, u shpall fitues i vendit të parë. Ky projekt u vlerësua si më inspiruesi, duke adresuar në mënyrë efektive disa nga Objektivat e Zhvillimit të Qëndrueshëm (SDGs).

Bogdan Pammer, presidenti i IAYSP EUME, theksoi se kontributet e YSP Balkan dhe UBT kanë ndihmuar në krijimin e një platforme ndërkombëtare, ku të rinjtë e talentuar mund të angazhohen në proceset formuese dhe ndërtuese të vendeve të tyre, duke adresuar me efikasitet sfidat që i përballin.

Ky sukses u shoqërua me urime të shumta për studentët e UBT-së për arritjet e tyre të jashtëzakonshme, dhe një falënderim të veçantë për YSP Balkan për mbështetje të vazhdueshme dhe për punën e palodhur të realizuar deri tani.

Ballkani Perëndimor ishte i përfaqësuar me dinjitet, me 14 pjesëmarrës nga Shqipëria, Kosova, Maqedonia e Veriut dhe Serbia, duke demonstruar unitet dhe forcë rajonale. YSP Balkan shprehu mirënjohje për institucionet mbështetëse si UBT, Shkolla e Mesme UBT dhe Universiteti i Tetovës, të cilat luajnë një rol të rëndësishëm në avancimin e iniciativave rinore.

Me fillimin e nëntorit, YSP Balkan është e ngazëllyer për të nisur vitin e tretë të projekteve, trajnimeve dhe aktiviteteve në Ballkan. Këtë vit, organizata mirëpret partnerë dhe institucione të reja, të cilët janë të gatshëm të mbështesin iniciativat dhe programet me fokus te rinia. Kjo është një periudhë premtuese për të rinjtë, që do të kontribuojnë në zhvillimin e qëndrueshëm të rajonit./UBTNews/

Punimi “Political and Security Reasons as Factors of Implementing EU Green Policies and Directives in Kosovo to Align with the EU Acquis and Transition Towards a Greener Country,” i studiuar nga profesorët Aleksandra Palkova, Arian Kadriu dhe Visar Hoxha, i publikuar së fundi në revistë shkencore ofron një analizë të hollësishme mbi faktorët politikë dhe të sigurisë që ndikojnë në zbatimin e politikave të gjelbra të Bashkimit Evropian (BE) në Kosovë.

Ky hulumtim është një kontribut i rëndësishëm në fushën e politikave mjedisore dhe procesin e integrimit evropian të vendit. Në aspektin e përmbajtjes dhe tematikës, studimi fillon me një analizë të kontekstit politik dhe mjedisor në Kosovë, duke e theksuar nevojën për një përputhje të ngushtë me standardet e BE-së. Autorët diskutuan rëndësinë e implementimit të direktivave të BE-së si një hap të domosdoshëm për integrimin e Kosovës në strukturat evropiane dhe për forcimin e stabilitetit politik në rajon.

Punimi identifikon sfidat kryesore me të cilat përballen institucionet kosovare në zbatimin e këtyre politikave. Këto përfshijnë mungesën e stabilitetit politik, pengesat në infrastrukturë dhe burime të kufizuara financiare. Autorët analizojnë si këto faktorë mund të pengojnë përparimin në implementimin e politikave të gjelbra dhe si mund të ndikojnë në perceptimin publik rreth këtyre iniciativave. Një pjesë e rëndësishme e studimit përqendrohet në ndikimin e sigurisë mbi zhvillimin mjedisor. Politikat e energjisë dhe menaxhimi i burimeve natyrore shpesh preken nga tensionet politike dhe konflikte të mundshme. Autori shqyrton se si një ambient i sigurt mund të inkurajojë investimet në energjinë e rinovueshme dhe praktikat e qëndrueshme, duke e shndërruar Kosovën në një model për zhvillimin e qëndrueshëm.

Cila është rëndësia e hulumtimit, ndalemi në aspektin e perspektivës të re mbi ndërvarësinë mes politikës, sigurisë dhe zhvillimit mjedisor. Hulumtimi kontribuon në literaturën ekzistuese duke theksuar se politika mjedisore nuk mund të ndahen nga çështjet politike dhe të sigurisë, duke ofruar një qasje të integruar për analizën e politikave të gjelbra.

Punimi paraqet rekomandime konkrete për politikat publike që mund të ndihmojnë në përmirësimin e implementimit të politikave të gjelbra. Këto përfshijnë krijimin e një kornize ligjore më të fortë, inkurajimin e bashkëpunimit ndërmjet institucioneve lokale dhe organizatave ndërkombëtare, dhe zhvillimin e programeve edukative për rritjen e vetëdijes publike mbi rëndësinë e politikave të qëndrueshme.

Punimi gjithashtu nënvizon potencialin e politikave të gjelbra për të stimuluar zhvillimin ekonomik në Kosovë. Implementimi i praktikave të qëndrueshme në sektorët si energjia e rinovueshme, menaxhimi i mbetjeve dhe bujqësia e qëndrueshme mund të krijojë vende të reja pune dhe të ndihmojë në diversifikimin e ekonomisë.

Në përfundim, ky studim është një kontribuim i rëndësishëm në kuptimin e dinamikave komplekse që lidhen me zbatimin e politikave mjedisore në Kosovë. Ai ofron një analizë të hollësishme dhe të integruar, duke ndihmuar në formimin e politikave të ardhshme dhe në strategjitë për promovimin e zhvillimit të qëndrueshëm në vend. Me këtë punim, autorët jo vetëm që adresojnë sfidat aktuale, por gjithashtu ofrojnë një vizion të qartë për të ardhmen e Kosovës si një vend të angazhuar për zhvillimin mjedisor dhe politik të qëndrueshëm./UBTNews/D.E.

Studimin shkencor mund ta lexoni në: https://doi.org/10.25143/socr.29.2024.2.61-74

Kampionia olimpike në xhudo, Nora Gjakova, ka marrë një hap të rëndësishëm në karrierën e saj akademike duke u regjistruar në programin e Masterit për Shëndet dhe Aktivitet Fizik në UBT.

Nora Gjakova, e njohur si medaliste e artë në Lojërat Olimpike, ka treguar përkushtim të jashtëzakonshëm për sportin dhe është një inspirim për shumë sportistë të rinj. Pas suksesit të saj të madh në Tokio, ku fitoi medaljen e artë, ajo ka vendosur të investojë në edukimin e saj për të thelluar njohuritë mbi shëndetin dhe aktivitetin fizik, duke u bërë kështu një model edhe në aspektin akademik.

Programi i Masterit në Shëndet dhe Aktivitet Fizik është program që do t’i mundësojë Norës të zhvillojë aftësi dhe njohuri të reja, të cilat do t’i shërbejnë në karrierën e saj si trajnere dhe promovuese e aktiviteteve fizike dhe shëndetësore.

Gjakova shprehu emocionet e saj për këtë hap të ri në jetën e saj, duke theksuar rëndësinë e arsimit në formimin e një sportisti të suksesshëm. “Jam shumë e lumtur që kam mundësinë të studioj në UBT. Shëndeti dhe aktiviteti fizik janë të rëndësishëm për të gjithë, dhe unë shpresoj të kontribuoj në këtë fushë,” tha Nora.

Agron Thaçi, Dekan i Fakultetit të Shkencave të Sportit dhe Lëvizjes, vlerësoi se regjistrimi i Nora Gjakovës në programin e Masterit në Shëndet dhe Aktivitet Fizik është një ngjarje e rëndësishme për fakultetin dhe për komunitetin tonë akademik.

Ai theksoi se Nora është një kampione që përfaqëson vlerat më të larta të sportit dhe punës së palodhur, duke shërbyer si një inspirim për të rinjtë. “Prania e saj në radhët tona do të sjellë një energji pozitive dhe një përkushtim të jashtëzakonshëm, duke e forcuar lidhjen mes praktikës sportive dhe arsimimit. Besoj se Nora do të kontribuojë ndjeshëm në promovimin e kulturës së shëndetit dhe aktivitetit fizik, duke ndihmuar në formimin e brezit të ri të profesionistëve në këtë fushë,” tha ai.

Regjistrimi i Norës në programin e Masterit është një nxitje për sportistët e rinj, duke treguar se suksesi në sport mund të kombinohet me arsimimin dhe zhvillimin profesional. Me përkushtimin dhe pasionin e saj, Nora Gjakova vazhdon të jetë një shembull frymëzues për shumë individë që dëshirojnë të ndjekin ëndrrat e tyre, qoftë në sport, qoftë në arsim./UBTNews/

Në Qytetin e Mençur të UBT-së në Lipjan, u bë inaugurimi i Zyrës “Hub Revolution Your Start Up”. Kjo ngjarje përfaqësoi një hap të rëndësishëm në mbështetje dhe zhvillim të inovacionit, teknologjisë, dhe sipërmarrjes në rajon, duke krijuar një ambient frymëzues për të rinjtë dhe profesionistët që dëshirojnë të realizojnë idetë e tyre dhe të ndërtojnë të ardhmen.

Inaugurimi kishte për qëllim jo vetëm promovimin e vizionit të Hub Revolution Your Start Up si një qendër inovacioni dhe zhvillimi profesional, por edhe nxitjen e dialogut mes botës akademike dhe asaj të biznesit. Kjo është një mundësi për të krijuar ura bashkëpunimi që do të mundësojnë transferimin e njohurive, burimeve dhe aftësive ndërmjet këtyre dy sektorëve.

Ambasadori i Italisë në Kosovë, Antonello De Riu, vlerësoi iniciativën për themelimin e kësaj qendre, teksa nënvizoi se përmes këtij projekti, do të forcohet inovacioni dhe sipërmarrësia në rajon, duke sjellë një të ardhme më të zhvilluar dhe të shëndoshë.

“Kosova ka një popullatë të re dhe sektorë të rëndësishëm për zhvillim. UBT ka kapacitete të mjaftueshme për të edukuar në këtë nivel”, tha De Riu. Ai gjithashtu vuri në dukje kontributin e diasporës, e cila ka sjellë zhvillim dhe eksperienca të vlefshme në vend.

Ambasadori theksoi se disa organizata janë të gatshme të ndihmojnë në zhvillimin e start-up-eve dhe se është e rëndësishme të kërkohet zhvillimi përmes inovacioneve të reja dhe granteve nga Qeveria. Ai përmendi gjithashtu rëndësinë e sektorëve si agrobizneset dhe energjia e ripërtëritshme, duke ofruar zgjidhje për ndërmarrësinë.
Në përfundim, Ambasadori De Riu shprehu besimin se kjo qendër në UBT do të krijojë mundësi të reja për Kosovën dhe do të avokojë për start-up-et në Bashkimin Evropian. Kjo iniciativë ka potencialin për të transformuar peizazhin ekonomik të rajonit dhe për të inkurajuar inovacionin dhe sipërmarrjen në çdo nivel.

Rektori i UBT-së, Prof. Dr. Edmond Hajrizi, theksoi rëndësinë e inaugurimit të Zyrës “Hub Revolution Your Start Up” duke shprehur se “kjo është një ngjarje e rëndësishme sepse krijojmë një pikë të re në Kosovë, ku dëshirojmë të forcojmë bashkëpunimin me Italinë”. Ai theksoi se UBT ka ndërtuar një ekosistem inovativ me një hapësirë të shkëlqyer fizike dhe akademike, së bashku me infrastrukturë shtesë që mbështet këto partneritete.

Rektori Hajrizi vazhdoi duke theksuar se “ideja që kemi është se ka ende hapësirë për të mbështetur këtë bashkëpunim dhe për të rritur kompetencat në gjenerimin e lidhjeve me fondet për zhvillim”. Ai theksoi se bashkimi i forcave do të krijojë një qendër revolucionare, duke argumentuar se kjo është një mundësi e rëndësishme për të avancuar më tej.

Ai po ashtu theksoi rritjen e bashkëpunimeve me institucionet italiane, duke përmendur diplomat e përbashkëta dhe mobilitete të ndryshme që kanë kontribuar në ngjitjen e bashkëpunimit me industrinë italiane.

“Kemi arritur ta bëjmë gjuhën italiane gjuhë zyrtare në UBT, duke e shndërruar institucionin tonë në një qendër proaktive për lidhjet e bizneseve”, përfundoi ai, duke shprehur optimizëm për të ardhmen e bashkëpunimit me Italinë.

Massimiliano Adilardi nga d’Impresa, theksoi se “perspektiva e ndërmarrësisë në Kosovë është shumë e rëndësishme dhe çdo sipërmarrës duhet ta marrë parasysh këtë mundësi”. Ai vuri në dukje se ka shumë kapacitete te studentët e rinj dhe shprehu dëshirën për të kontribuar në këtë aspekt.
Adilardi, me një përvojë 40-vjeçare si ekspert në politikën fiskale, shprehu angazhimin e tij për të ofruar asistencë për kapacitetet që gjenden në Kosovë. “Do ta përdorim këtë si një pikë mbështetje për Universitetin UBT dhe do ta përcjellim këtë mbështetje te studentët, duke promovuar gjithashtu bashkëpunimin eurokosovar”, shtoi ai.
Ai përfundoi me një thirrje për të gjithë që të angazhohen në zhvillimin e demokracisë dhe ekonomisë në Kosovë, duke theksuar rëndësinë e këtij angazhimi për të ardhmen e vendit.

Flavio Boccia nga Flavio Boccia & Partners, theksoi rëndësinë e bashkëpunimit ndërkombëtar në projektin e ri, duke falënderuar të gjithë partnerët që kanë kontribuar me praninë e tyre. “Ne jemi këtu për t’u shndërruar në një motor të ndërmjetësimit të fondeve evropiane dhe për të zhvilluar hartën e veprimtarisë në Ballkan”, deklaroi ai. Ai e theksoi përkushtimin e kompanisë për të mbështetur zhvillimin ekonomik në rajon.
Në vijim, Paolo Stern, përfaqësues i Nexumstp – Your Next Step nga Roma, theksoi rolin e rëndësishëm të biznesit në këtë proces. “Është e rëndësishme që bizneset të jenë krijuese dhe të eksplorojnë interesat e tyre”, tha ai.

“Ne ofrojmë asistencë për të gjithë anëtarët tanë dhe do të angazhojmë ekspertët tanë për të fokusuar zhvillimin ekonomik të Kosovës, duke bashkëpunuar me partnerët tanë”. Ai gjithashtu theksoi rëndësinë e ofrimit të trajnimeve për studentët, duke theksuar se “duhet të punojmë së bashku për të kontribuar në Evropë, duke marrë parasysh edhe Kosovën”.

Në këtë ngjarje morën pjesë edhe personalitete të tjera të shquara nga fusha e politikës, biznesit dhe ekonomisë, ndër të tjera folën edhe ish-kryetari i Komunës së Preshevës, tashmë nënkryetar në këtë Komunë, Profesori Ragmi Mustafa, Kryetari i Rrjetit Global të Bizneseve të Diasporës Shqiptare, Omer Nura, Kryetari i Rrjetit të Bizneseve Shqiptare në Preshevë, Bujanoc dhe Medvegjë, Xhelal Mehmeti, si dhe Francesca Mondello nga ICE – Italian Trade Agency.

Gjithashtu në këtë ngjarje, fjalën e mori edhe gjenerali Giuseppe Morabito, i cili diskutoi mbi rëndësinë e rinisë në Kosovë dhe rolin e UBT-së në mbështetje të saj. Ai theksoi se rinia përbën një potencial të madh për zhvillimin e vendit dhe se universitetet si UBT-ja luajnë një rol kyç në formimin e liderëve të ardhshëm./UBTNews/