Rektori dhe Presidenti i UBT-së, Prof. Dr. Edmond Hajrizi është nominuar për çmimin Triple E Awards në kategorinë “University Leader of the Year – European Award”, për udhëheqjen e suksesshme dhe lidershipin e treguar në rrugëtimin sfidues të UBT-së deri në konsolidimin e tij si një universitet inovativ, sipërmarrës dhe me ndikim të jashtëzakonshëm në zhvillimin shoqëror dhe ekonomik të vendit.

Rrugëtimi sfidues, por edhe inspirues i UBT-së, pasqyron një rritje dhe zhvillim të vazhdueshëm dhe dinamik, duke e rimenduar dhe transformuar peizazhin arsimor dhe ekonomik të Kosovës së pas luftës përmes sipërmarrjes, inovacionit dhe vizionit strategjik.

Kjo histori suksesi dhe përkushtimi pasqyron po ashtu edhe rrugëtimin inspirues të rimëkëmbjes të gjithëanshme të shoqërisë kosovare. Nën udhëheqjen e Rektorit Hajrizi, UBT është rritur nga vetëm 29 studentë në vitin 2004 në mbi 12,000 sot, duke u shndërruar në njërin prej universiteteve më të mëdha në vend dhe rajon, si dhe në një qendër rajonale të ekselencës.

Vizioni i tij sipërmarrës ka rezultuar në krijimin e mbi 100 ndërmarrjeve spin-off, themelimin e shumë strukturave mbështetëse ndaj biznesit dhë ndërmarrësisë, të tilla si UBT Accelerator, Digital Innovation Hub, si dhe vet Kampusit Inovativ – një model i universitetit të së ardhmes që integron arsimin, ndërmarrësinë, teknologjinë dhe angazhimin për komunitetin.

Triple E Awards përfaqësojnë një nga platformat më prestigjioze globale që vlerëson universitetet të cilat, përtej arsimit dhe kërkimit klasik shkencor, krijojnë ndikim të drejtpërdrejtë në zhvillimin ekonomik, promovimin e ndërmarrësisë, si angazhohen për komunitetin në forma dhe me mjete të ndryshme.

Ndërsa kategoria “University Leader of the Year – European Award”, vlerëson dhe nderon personalitetet që tregojnë lidership të jashtëzakonshëm duke udhëhequr universitetet e tyre në rrugëtime të guximshme dhe transformuese, shpesh në kontekste të veçanta sfiduese.

Ky çmim nderon vizionarët që, përmes vizonit, përkushtimit dhe angazhimit të tyre shoqëror, kanë arritur të formësojnë institucione me ndikim të shumëanshëm në zhvillimin ekonomik dhe socio-kulturor, duke e tejkaluar rolin tradicional të universiteteve.

Për UBT-në, kjo është një dëshmi e qartë e angazhimit të tij për të ndërtuar një universitet të së ardhmes – të angazhuar, sipërmarrës dhe me ndikim të qëndrueshëm shoqëror.

Në Pallatin e Kongreseve në Tiranë, u bë hapja e ekspozitës kushtuar jetës dhe veprës së inxhinierit vizionar Karl Gega, një ngjarje kulturore dhe shkencore me rëndësi të veçantë. Ekspozita është organizuar nga UBT në bashkëpunim me Akademinë e Shkencave të Shqipërisë dhe Fondacionin Musei Civici di Venezia, duke sjellë në vëmendje trashëgiminë evropiane të kësaj figure kyçe të shekullit XIX.

Në ceremoninë e hapjes morën pjesë përfaqësues të lartë nga UBT, Akademia e Shkencave, Fondacioni, si dhe Ambasada e Hungarisë në Shqipëri dhe institucione të tjera kulturore dhe shkencore. Rektori dhe Presidenti i UBT-së, Prof. Dr. Edmond Hajrizi, në fjalën e tij nënvizoi rëndësinë e bashkëpunimit ndërinstitucional për promovimin e dijes dhe kulturës, si dhe rolin e rëndësishëm që luajnë studentët dhe stafi akademik i Fakulteteve të Artit dhe Medias Digjitale, Arkitekturës dhe Planifikimit Hapësinor dhe Dizajnit të Integruar në realizimin e kësaj ekspozite.

Ekspozita përmbledh jo vetëm dimensionin historik të veprës së Karl Gegës, por edhe ndikimin e tij kulturor në lidhjen e komuniteteve evropiane. Përveç ekspozitës në Tiranë, e njëjta do të vijë në Kosovë, në Parkun Shkencor, Inovativ dhe Teknologjik të UBT-së në korrik, duke shënuar një ngjarje me rëndësi rajonale dhe globale.

Angazhimi i studentëve dhe profesorëve të UBT-së në fushat e artit, medias digjitale, arkitekturës dhe dizajnit është kyç për përgatitjen dhe prezantimin e kësaj ekspozite. Puna e tyre profesionale dhe kreative jo vetëm që pasuron ngjarjen, por edhe forcon kapacitetet institucionale të UBT-së për të organizuar ekspozita ndërkombëtare me ndikim të gjerë.

Ky organizim nënvizon edhe një herë rëndësinë e bashkëpunimeve ndërkombëtare dhe rolin e universiteteve si ura lidhëse mes kulturave dhe shkencave të ndryshme, duke kontribuar në ruajtjen dhe promovimin e trashëgimisë historike dhe teknologjike.

Rektori i UBT-së, Prof. Dr. Edmond Hajrizi, ishte pjesë e panelit të rëndësishëm “Kosovo – The Heart of Crypto Communities in the Balkans”, në kuadër të konferencës së organizuar nga Binance, platforma më e madhe qendrore për shkëmbim të kriptomonedhave në botë, me mbi 275 milionë përdorues aktivë globalisht.

Konferenca mblodhi liderë të industrisë, përfaqësues të institucioneve dhe anëtarë të komunitetit kripto nga Kosova dhe rajoni i Ballkanit, për të diskutuar mbi zhvillimet më të fundit në fushën e teknologjive blockchain, mundësitë që ofron Binance për përdoruesit dhe të ardhmen e ekosistemit kripto në Evropën Juglindore.

Në panelin ku mori pjesë Rektori Hajrizi, së bashku me Shkëlqim Dushi (Shine), Memli Krasniqi dhe Sandro Slukan, u diskutua gjerësisht për pozicionin gjithnjë e më të rëndësishëm që po merr Kosova në skenën ndërkombëtare të kriptomonedhave, si dhe për ndikimin që komunitetet lokale kanë në nxitjen e inovacionit digjital dhe zhvillimit ekonomik.

Në fjalën e tij, Prof. Dr. Edmond Hajrizi theksoi rolin e edukimit dhe institucioneve akademike në ndërtimin e një kulture të qëndrueshme digjitale. Ai vuri në pah përkushtimin e UBT-së për të përfshirë teknologjitë më të avancuara, përfshirë blockchain dhe kriptovalutat, në proceset mësimore dhe kërkimore, me qëllim fuqizimin e brezit të ri në epokën digjitale.

Tematika e përgjithshme e konferencës u përqendrua rreth veçorive inovative të Binance dhe rritjes së komunitetit të kriptovalutave në Kosovë dhe Ballkan, duke e shndërruar këtë event në një pikë takimi të rëndësishme për ide, vizione dhe bashkëpunime të reja në sektorin e teknologjisë financiare.

Rektori i UBT-së, Prof. Dr. Edmond Hajrizi mori pjesë në Tech Fest 2025, një ngjarje e madhe e organizuar nga London School në bashkëpunim me DKA dhe DKRS në Universitetin e Mitrovicës.

Në këtë ngjarje u diskutuan temat më të fundit mbi programimin, robotikën dhe inteligjencën artificiale.

Gjatë pjesëmarrjes së tij, Prof. Dr. Edmond Hajrizi foli për mundësitë e shumta që ofron tregu i punës në Kosovë dhe më gjerë, veçanërisht në sektorin e teknologjisë së informacionit dhe inovacionit digjital.

Ai theksoi angazhimin e UBT-së për t’i përgatitur studentët dhe të rinjtë me aftësitë dhe njohuritë më të avancuara, duke i pajisur ata me kapacitete të nevojshme për t’u integruar me sukses në tregun e punës dhe për të kontribuar në zhvillimin ekonomik dhe teknologjik të rajonit.

Tech Fest 2025 mblodhi një grup të madh folësish të nivelit të lartë – nga drejtues institucionesh, CEO dhe inxhinierë, deri te ekspertë të edukimit dhe zhvillimit teknologjik. Ata ndanë përvojat dhe njohuritë e tyre, duke frymëzuar brezin e ri të profesionistëve në Kosovë.