Pianistja nga Kosova, Melisa Ibrahimi, është vlerësuar me dy tituj ndërkombëtarë nga World Piano Association Spain, duke shënuar një tjetër sukses në karrierën e saj artistike në arenën evropiane.

Ibrahimi është nderuar me titujt “Award of Supreme Excellence” dhe “Artistic Ambassador of Kosovo – Spain”, të cilët i janë dhënë në shenjë vlerësimi për kontributin e saj artistik dhe përfaqësimin e Kosovës përmes muzikës.

Përmes një reagimi në rrjetet sociale, pianistja ka theksuar se ndihet thellësisht e nderuar nga ky vlerësim, duke e cilësuar atë si një simbol të rëndësishëm të lidhjes kulturore mes Kosovës dhe Spanjës.

“Jam thellësisht e nderuar nga World Piano Association Spain me këtë titull prestigjioz. Ky vlerësim përfaqëson një simbol të fuqishëm të përfaqësimit të Kosovës në Spanjë, një urë e ndërtuar përmes muzikës, përkushtimit dhe pasionit të palëkundur,” ka deklaruar Ibrahimi.

Ajo ka shtuar se mbajtja e këtij titulli përfaqëson përgjegjësi për të vazhduar ndërtimin e një karriere ndërkombëtare dhe për të përfaqësuar vendin e saj me dinjitet në skenën artistike.

Pianistja ka shprehur mirënjohje për të gjithë mbështetësit dhe institucionet që e kanë përkrahur gjatë rrugëtimit të saj artistik në Spanjë prej tre vitesh, duke veçuar profesorin Giuseppe Devastato për mbështetjen e vazhdueshme, si dhe z. Pierro për dorëzimin e çmimit.

Ky vlerësim konsiderohet një tjetër hap i rëndësishëm në karrierën e Melisa Ibrahimit, duke forcuar prezencën e artistëve kosovarë në skenën ndërkombëtare të muzikës klasike.

Më 15 prill 1923, në qytetin e Shkodrës nisi botimin gazeta e përjavshme “Ora e Maleve”, një nga botimet më me ndikim në jetën politike, shoqërore dhe kulturore të kohës.

Deri në vitin 2026, janë bërë plot 103 vjet nga dalja e numrit të parë të saj, duke e kthyer këtë gazetë në një pjesë të rëndësishme të historisë së shtypit shqiptar.

“Ora e Maleve” u shndërrua shpejt në një platformë të fuqishme mendimi, ku pasqyroheshin zhvillimet politike dhe ekonomike të vendit, me theks të veçantë në rajonin e Shkodrës. Gjatë ekzistencës së saj, gazeta botoi 51 numra, deri në fund të vitit 1924.

Në faqet e saj shkruan figura të njohura si Luigj Gurakuqi dhe Hilë Mosi, të cilët promovuan ide për një Shqipëri demokratike dhe kontribuan në formësimin e mendimit politik të kohës.

Gazeta luajti një rol të rëndësishëm edhe në mbrojtjen e integritetit territorial të vendit, duke u bërë njëkohësisht zëri i opozitës liberale. Ajo ndërthurte analizën serioze politike me elemente satire, duke kritikuar fenomenet negative si prapambetja dhe korrupsioni.

“Ora e Maleve” pasqyroi gjithashtu zhvillimet e vrullshme të vitit 1924, përfshirë edhe programin qeverisës të Fan Nolit, duke mbetur një dëshmi e rëndësishme e historisë shqiptare.

Është ndarë nga jeta në moshën 87-vjeçare piktori i njohur shqiptar, Skënder Kamberi, një nga figurat më të spikatura të artit pamor në vend.

Me një karrierë të gjatë dhe të përkushtuar ndaj pikturës, duke lënë pas një trashëgimi të pasur artistike.

Një pjesë e konsiderueshme e veprave të tij, kryesisht kompozime, ruhen sot në fondin e Galerisë Kombëtare të Arteve në Tiranë, si dhe në koleksione private brenda dhe jashtë vendit. Arti i tij ka kapërcyer kufijtë, duke u prezantuar në ekspozita ndërkombëtare në vende si Egjipti, Franca, Anglia, Turqia, Italia dhe Greqia.

Ndër veprat më të njohura të tij përmenden “Ndihma e shokut” (1966), “Betimi i Vrana Kontit” (1968), “Buka e duarve tona” (1976), “Në Belvedere në Vjenë sikur pashë Skënderbenë” (1977), “Otranto, 1997”, si dhe portretet e luftëtarit Sali Vranishti (1971) dhe të poetes Maro Pasho (1973).

Skënder Kamberi lindi më 2 shkurt 1939 në Vlorë. Ai përfundoi studimet në Liceun Artistik në vitin 1960 dhe më pas ndoqi Institutin e Lartë të Arteve, ku u diplomua në vitin 1965.

Pas përfundimit të studimeve, u rikthye në qytetin e lindjes, ku së bashku me piktorin Nestor Jonuzi dha një kontribut të rëndësishëm në zhvillimin dhe përhapjen e artit pamor në Vlorë.

Ndarja e tij nga jeta përbën një humbje të madhe për artin dhe kulturën shqiptare.

Turneu i Baletit Kombëtar të Kosovës në Amerikën Qendrore dhe Latine është zgjeruar me një tjetër ndalesë të rëndësishme. Eshtë konfirmuar edhe një shfaqje në Cali, Kolumbi.

Më 19 maj, trupa do të ngjitet në skenën e Arena Carlos Andrés Pérez Galindo (USC), ku do të prezantojë veprën madhështore “Carmina Burana”, me koreografi nga Toni Candeloro.

Kjo shfaqje shtesë vjen si rezultat i kërkesës në rritje dhe konsiderohet një tjetër hap i rëndësishëm në prezantimin ndërkombëtar të artit skenik kosovar, duke forcuar praninë e tij në skenat prestigjioze të rajonit latino-amerikan.