Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Serbëve shpeshherë u pengoi edhe Teatri Popullor i Kosovës

17 qershor 1993

Havë Ajeti viktimë e një shpërthimi në shtëpinë e saj në Prishtinë

Havë Ajeti, nga Prishtina, e lindur më 1942, nënë e katër fëmijëve, vdiq sot në orën dhjetë nga plagët që iu shkaktuan nga një shpërthim i fuqishëm i një lënde eksplozive të hedhur në shkallët e shtëpisë së saj.

Ajet (Ahmet) Ajeti, bashkëshort i të ndjerës, tha se lënda eksplozive, tash për tash e paidentifikuar, shpërtheu në orën 7,30 min. kur e ndjera deshi ta largonte një qese najloni, ngjyrë të gjelbër, në të cilën ishte maskuar lënda shpërthyese në shkallët e shtëpisë. Se si u gjet kjo lëndë shpërthyese në shkallët e shtëpisë së familjes Ajeti, tash për tash nuk dihet. Nga eksplodimi i fuqishëm, Haves iu shkaktuan plagë vdekjeprurëse në bark dhe, ndonëse u dërgua menjëherë në spital, ajo vdiq në orën dhjetë.

Dëshmitarët thonë se eksplodimi në shtëpinë e Ajet Ajetit, që gjendet në rrugën “Zef Lush Marku” nr. 1 në Prishtinë, ishte shumë i fuqishëm. Gjurmë të eksplodimit kanë mbetur në shumë vende në shtëpinë e Ajet Ajetit.

Policia serbe shkoi në vendin e ngjarjes në orën tetë.

Eksplodim pati edhe në Fushë-Kosovë

Parmbrëmë, rreth orës 1 pas mesnates, në portën e oborrit të shtëpisë së Gani Beqirit, rruga e “Drenicës”, nr. 1, në Fushë-Kosovë, u bë një shpërthim i një lënde eksplozivi. Shpërthimi dëmtoi një pjesë të portës dhe të murit.

Policët serbë dolën pas disa orësh në vendin e ngjarjes, hetuan rastin, por deri tash nuk dhanë kurrfarë informacioni për këtë ngjarje.

17 qershor 1994

U hoqën të gjitha mbishkrimet shqipe në Teatrin Popullor të Kosovës

Sot në orën 10 “drejtuesit” e instaluar në Teatrin Popullor të Kosovës urdhëruan heqjen e të gjitha mbishkrimeve në gjuhën shqipe, duke përfshirë edhe mbishkrimin “Teatri Popullor i Kosovës”. U hoqën edhe pllakatet e pakëta të shfaqjeve shqipe që i kishte përgatitur Drama Shqiptare e këtij teatri.

Gjendja e Dramës Shqiptare në këtë teatër është bërë e padurueshme pas vendosjes së Radoslav Stojanoviqit për drejtor të dhunshëm. Ai dëboi nga teatri aktorin e njohur dhe drejtorin e Dramës Shqiptare Dibran Tahirin dhe aktoren Drita Boshnjaku.

Ndërsa heqja e gjuhës shqipe nga komunikimi publik tashmë është në përfundim e sipër.

Muajëve të fundit, me qindra pronarëve shqiptarë të firmave janë dënuar me pretekst se nuk i kanë shkruar me alfabet cirilik emrat e firmave të tyre.

17 qershor 1995

Dhuna e përditshme në Kosovë

Mitrovicë: – Më 14 qershor, katër policë, me pretekst të kërkimit të armëve, shkuan në shtëpitë e Musli B. Ibishit (72), Riza I. Beqirit (60) dhe Mehmet E. Beqirit (50), në fshatin Tërstenë të Mitrovicës.

Me këtë rast, policët morën me vete Musli Ibishin, të cilin në stacionin e policisë në Stantërg e rrahën deri në alivanosje dhe e liruan me kusht që në polici të paraqitet sërish më 19 qershor. Thirrje për t’u paraqitur në polici me këtë datë, policët i lanë edhe Mehmet Beqirit.

Gjilan: – Më 14 qershor, një patrullë e policisë sebre shkoi në shtëpinë e Xhymshit Arifit (1924) në fshatin Bilincë të Gjilanit, nga i cili kërkuan të dorëzojë një pushkë. Por, meqë ai u deklarua se një revole e ka dorëzuar para një viti, policët e urdhëruan që, së bashku me vajzën e tij Bislimen (16), të paraqitet në stacionin e policisë në Gjilan.

Më 16 qershor, në polici u mor Ramadan Hashani (1945) nga fshati Verbicë. Me pretekst se duhet të dorëzojë një automatik, ai u mbajt në polici rreth dy orë dhe gjatë kësaj kohe u keqtrajtua edhe fizikisht.

Ai u urdhërua që në polici të paraqitet sërish sot.

Viti: Më 13 qershor, policia serbe, me pretekst të kërkimit të armëve mori në shtëpinë e tij, Tafë Mustafën nga fshati Lubishtë, i cili u dërgua në stacionin e policisë në Viti.

Në stacionin e policisë ai u keqtrajtua nga polici Rajko Bullatoviq.

Pas gjysmë ore ai u dërgua në stacionin e policisë në Gjilan, ku u mbajt deri të nesërmen në mesditë dhe u keqtrajtua rëndë nga kusilingu Ramadan Sermaxhaj e Sërgjan Gjorgjeviqi.

Tafë Mustafa është liruar, por prej tij është kërkuar që të paraqitet sërish më 16 qershor në stacionin e policisë në Gjilan.

17 qershor 1997

Dhuna e përditshme në Kosovë

Kaçanik: – Më 11 qershor, policia serbe me pretekst të dorëzimit të armëve ishte në shtëpinë e Arif Samakovës në fshatin Kërbliq. Njoftohet se policët serbë morën Arifin dhe djemtë e tij Emrushin e Muhabiun, të cilët u dërguan në stacionin e policisë serbe në Kaçanik dhe rreth tri orë ata janë keqtrajtuar brutalisht.

Njoftohet se Arifi dhe djemtë e tij Emrushi e Muhabiu nga keqtrajtimet e rënda fizike kërkuan ndihmë mjekësore, ndërsa janë liruar me urdhër që të paraqiten sërish sot në polici.

Deçan: – Dje, në stacionin e policisë serbe në Deçan, për herë të tetë u mor në të ashtuquajturën bisedë informative, Hilmi Muçaj, aktivist i KKF-së në Deçan. Njoftohet se z. Muçaj është pyetur rreth mënyrës së grumbullimit të mjeteve, si dhe për çështje të tjera.

Mitrovicë: – Dje, rreth orës 17 të mbrëmjes, në afërsi të tregut në Mitrovicë, policia ndaloi të rinjtë Shemsi R. Kola 918) dhe Arsim M. Seferi (18) dhe i mbajti në rrugë rreth gjysmë ore, për shkak se ata nuk kishin letërnjoftimet. Policët i provokuan ata duke u thënë se do t’i lirojnë nëse u tregojnë se kush ka armë në fshatin e tyre dhe i kërcënuan ata se do t’i arrestojnë dhe do t’i dënojnë me burg për shkak të mosposedimit të dokumenteve personale.

Ferizaj: – Më 13 qershor, inspektorët serbë morën në pyetje Rrustem Sefedinin, kryetar i KKA dhe anëtar i Kryesisë së Degës së LDK-së në Ferizaj. Z. Sefedini nga inspektorët e sigurimit serb u pyet për veprimtarinë e Degës së LDK-së dhe Këshillit komunal për Arsim të Ferizajt. Ai u urdhërua që të paraqitet sërish nesër në polici.

Po këtë ditë, në postkomandën e policisë serbe në Shtërpcë u mor në pyetje edhe Afrim Mehmeti, ish i dënuar në procesin politik të Paraçinit nga fshati Firajë. Ai nga inspektorët serbë u pyet pse pse është dënuar, ku e ka vuajtur dënimin, si e kishin pritur fshatarët lirimin e tij nga burgu, kush e ka vizituar pasi është liruar etj.

17 qershor 1998

Deçan: Dihet edhe për 7 të vrarë gjatë ditëve të fundit

Gjatë luftimeve të djeshme dhe të pardjeshme në rajonin e Vokshit supozohet se ka të vrarë, por nuk dihet numri e as identiteti i tyre.

Ndërkohë sot u bë e ditur se në luftimet e javës së kaluar janë vrarë edhe shtatë të vrarë, kështu që numri i të vrarëve ditëve të fundit në Deçan nga 58 ngjitet në 65, numër ky që nuk mund të jetë përfundimtar.

Mësohet të vrarit janë Mire Lataj (80), motra e saj 75-vjeçare, nëna e Have Balajt (80) dhe Cufë Balaj (85), ndërkohë që supozohet se personat e vrarë e të dërguar në Bashkësinë Islame në Pejë mund të jenë persona të vrarë në luftimet e ditëve të fundit në komunën e Deçanit.

Ushtarët serbë vranë Ymer R. Krasniqin nga Caralluka e Malishevës

Dje, rreth orës 17, ushtria serbe vrau me snajper Ymer Ramë Krasniqin (41) nga Caralluka e Malishevës. KI i Degës së LDK-së njofton se z. Krasniqi u vra në mes fshatit Bllacë dhe Sllapushan të Suharekës nga ushtarët që shtinë nga vendi i quajtur Bregu i Dushit. I ndjeri që nga ditët e para ishte i angazhuar në radhët e forcave mbrojtëse dhe la pas vetes dhjetë fëmijë.

Dje në kufirin Kosovë-Shqipëri janë vrarë pesë shqiptarë

Dje në orët e hershme të mëngjesit në kufirin Kosovë-Shqipëri afër karakollit “Likeni” në një incident kufitar janë vrarë tre shqiptarë, njofton shtypi i sotëm serb duke cituar burimet ushtarake serbe. Me atë rast është konfiskuar një sasi e madhe armësh.

Ndërkaq, në një incident tjetër që ndodhi poashtu dje pas mesnatës, agjencia Beta njofton se ushtarët serbë kanë vrarë dy shqiptarë dhe kanë konfiskuar një sasi të madhe armatimi e municioni. Në vendin e ngjarjes janë gjetur edhe dokumentet e gazetarit norvegjez Pal Refsdal, nga stacioni TV2 Bergen.