Lajmet

Pse Japonia ka shumë pak raste të sulmeve me armë?

Sulmi i sotëm ndaj ish-kryeministrit Shinzo Abe, nga ku ky i fundit mbeti i vdekur, tronditi popullin japonez.

Published

3 years ago

July 8, 2022

Betim Gashi

Japonia ka pothuajse zero tolerancë ndaj posedimit të armëve, që e bën atë vendin me nivelin më të ulët të dhunës me armë në botë.

Sulmi i sotëm ndaj ish-kryeministrit Shinzo Abe, nga ku ky i fundit mbeti i vdekur, tronditi popullin japonez.

Një ligj i pasluftës i vitit 1958 për posedimin e shpatave dhe armëve të zjarrit thotë: “Askush nuk duhet të posedojë armë zjarri ose shpata”.

Rruga drejt zotërimit të armëve në Japoni kërkon 13 hapa. Së pari, pronarët e mundshëm të armëve duhet të bashkohen në një klub gjuetie ose qitjeje, dhe më pas ata duhet të marrin pjesë në një klasë për armë zjarri dhe të kalojnë një provim me shkrim, para se të marrin një mjek për të deklaruar se janë të aftë mendërisht dhe nuk kanë histori të varësisë nga droga.

Më pas, ata duhet të aplikojnë për të marrë një kurs të plotë ditor se si të gjuajnë një armë dhe ta ruajnë atë në mënyrë të sigurt. Më pas, policia interviston pronarët e mundshëm të armëve se pse duan një armë zjarri dhe kryen një kontroll të plotë të historikut që përfshin intervistimin e anëtarëve të familjes së personit, marrëdhëniet e tyre me fqinjët, historinë e punësimit dhe gjendjen e tyre financiare.

Nëse kalojnë, atëherë mund të aplikojnë për një leje dhe të marrin një certifikatë nga një tregtar se çfarë lloj arme duan. Më pas ata duhet të blejnë një dollap municioni dhe kasafortë armësh, të cilat inspektohen nga policia, e cila më pas bën një tjetër kontroll të historisë.

Ndër përjashtimet e pakta janë pushkët për gjueti dhe sport. Edhe atëherë, pronarët e mundshëm duhet të ndjekin mësimet dhe të kalojnë provimet me shkrim dhe praktike. Më pas ata duhet t’i nënshtrohen vlerësimeve psikologjike për të përcaktuar se janë të aftë për të zotëruar një armë zjarri. Kontrollet e historisë së policisë janë rraskapitëse, dhe madje përfshijnë marrjen në pyetje të të afërmve të pronarëve të armëve.

Sipas policisë, ka pasur 21 arrestime për përdorim të armëve të zjarrit në vitin 2020, 12 prej tyre të lidhura me bandat, raporton Guardian, transmeton Klankosova.tv.

Ka pasur gjashtë vdekje të raportuara me armë në Japoni në vitin 2014, dhe numri rrallë kalon 10, në një vend me 126 milionë banorë. Në vitin 2006, vetëm dy persona u vranë në sulme me armë.

Një raport i vitit 2022 nga Universiteti i Uashingtonit tregoi se teksa ShBA kishte më shumë se katër vrasje me armë zjarri për 100,000 kokë banori në vitin 2019, Japonia kishte pothuajse zero.

Në vitin 2013, vendi arriti një rekord të lartë për krimin me armë, me 40 raste kriminale të gjuajtjes me armë, por ka ndjekur një trend në rënie që nga ajo kohë.

Bota

Zelensky dhe Macron bien dakord të takohen pas samitit Trump-Putin

Published

2 hours ago

August 15, 2025

UBTnews

Presidenti ukrainas Volodymyr Zelensky dhe presidenti francez Emmanuel Macron folën sot, sipas Pallatit Élysée.

Të dy udhëheqësit ranë dakord të takohen “në momentin kur do të jetë më i dobishëm dhe efektiv” pas takimit të presidentit të SHBA-së Donald Trump dhe presidentit rus Vladimir Putin, thuhet në deklaratë.

Zelensky u takua këtë javë në Berlin me kancelarin gjerman Friedrich Merz dhe në Londër me kryeministrin britanik Keir Starmer.

Bota

Trump para se të nisej për në Alaska: Rreziqet janë të larta

Published

2 hours ago

August 15, 2025

UBTnews

“Rrezik i lartë!!!”: shkroi presidenti i Shteteve të Bashkuara të Amerikës, Donald Trump në platformën e tij të mediave sociale, Truth, pak para se të nisej nga Uashingtoni për në Alaska, ku do të takohet me Vladimir Putinin.

Numërimi mbrapsht për takimin historik midis Donald Trump dhe Vladimir Putin po i afrohet fundit. Samiti i mesit të gushtit në Alaska përqendrohet në Ukrainë, por udhëheqësi i Kremlinit dëshiron ta përdorë atë si një mundësi për të rigjallëruar marrëdhëniet me Shtetet e Bashkuara. Axhenda e Rusisë, e cila përfshin bashkëpunimin dhe armët, është shumë më e gjerë se ajo “e zhveshur” amerikane, e cila ka një pikë të vetme në agjendë: fundin e konfliktit në Ukrainë.

Takimi midis Donald Trump dhe Vladimir Putin në Anchorage, në bazën ushtarake Elmendorf-Richardson, do të fillojë në orën 21:30 sipas kohës italiane. Vlerësohet – nëse gjithçka shkon mirë – se i gjithë takimi mund të zgjasë të paktën tre deri në katër orë, shkruan ANSA.

Putini do të shoqërohet nga tre ministra dhe disa zyrtarë besnikë: këshilltari i Kremlinit Yuri Ushakov, këshilltari për investimet e huaja Kirill Dmitriev, ministri i jashtëm Sergei Lavrov, ministri i mbrojtjes Andrei Belousov dhe ministri i financave Anton Siluanov. Delegacioni i Trump do të përfshijë gjithashtu Sekretarin e Shtetit Marco Rubio dhe të Dërguarin Special Steve Witkoff.

Samiti do të hapet me një takim ballë për ballë midis dy udhëheqësve pas dyerve të mbyllura: vetëm në një dhomë përveç përkthyesve, siç ndodhi në Helsinki. Takimi dypalësh do të pasohet nga një drekë pune dhe diskutime midis dy delegacioneve. Ai do të përfundojë me një konferencë për shtyp, e cila pritet të jetë e përbashkët, përveç nëse dialogu ndërlikohet.

Lajmet

Sunderlandi e zyrtarizon kapitenin e ri Granit Xhaka

Published

3 hours ago

August 15, 2025

UBT News

Ylli kosovar Granit Xhaka i cili u transferua pak javë më parë në ekipin e Sunderlandit, po konsiderohet si një lider i lindur, pasi që përfaqësuesit zviceran iu besua edhe shiriti i kapitenit, duke e pasur parasysh lidershipin e tij dhe përvojën e madhe.

Madje klubi anglez përmes rrjeteve sociale e zyrtarizoi vendimin që mesfushorit me tipare defanzive t’ia besojë shiritin e kapitenit.

“Granit Xhaka, kapiten i ri i Sunderland AFC”, shkroi klubi anglez.

E ish-futbollisti i Baselit, Borussia Monchengladbachut, Arsenalit dhe Bayer Leverkusenit, tha se ndihet krenar që iu besua kjo përgjegjësi dhe privilegj.

“Më bën jashtëzakonisht krenar që jam kapiten i këtij klubi dhe i kësaj skuadre. Shpresoj të tregoj lidershipin tim brenda dhe jashtë fushës, duke ndihmuar shokët e mi të skuadrës në qendrën stërvitore dhe në të gjithë klubin”, u shpreh 32 vjeçari.

Lajmet

Edhe dy javë për regjistrimin e votuesve jashtë Kosovës, deri tani janë regjistruar 5 mijë e 445 votues

Published

3 hours ago

August 15, 2025

UBTnews

Vetëm edhe dy javë, deri më 29 gusht 2025, kanë mbetur për regjistrimin e votuesve jashtë Kosovës.

Deri më tani, ky proces, i cili ka filluar më 23 korrik, ka ngjallur pak interesim, pasi vetëm rreth 5,500 shtetas të Kosovës nga diaspora janë regjistruar për votim me postë në zgjedhjet lokale të 12 tetorit.

Zëdhënësi i KQZ-së, Valmir Elezi, ka treguar për Ekonomia Online të dhënat e fundit nga procesi i regjistrimit të votuesve jashtë Kosovës.

“Deri më sot (e premte, 15 gusht, ora 12:00) përmes platformës elektronike https://diaspora.kqz-ks.org janë pranuar 7,026 aplikime për regjistrim për votim me postë, prej të cilave janë aprovuar 5,445, ndërkaq janë refuzuar 1,581”, tregoi Elezi.

Sipas tij, “në shumicën e rasteve të refuzuara, aplikuesit nuk kanë paraqitur njërin nga dokumentet që dëshmon adresën e tij jashtë Kosovës (dokument identifikues në të cilin është e shënuar adresa e banimit, vërtetim i adresës nga autoriteti lokal, kontratë të qirasë, faturë shërbimesh, dokument i lëshuar nga banka apo kompania e sigurimit, dokument që dëshmon adresën e personit tek i cili qëndrojnë përkohësisht, dëshmi tjetër banimi për rastet specifike (rezervim hoteli, konvikti etj.))”.

Po sipas të dhënave nga KQZ, komuna me më së shumti votues të regjistruar jashtë Kosovës është Suhareka me 526, Deçani me 442, Dragashi 440 dhe Istogu, Gjakova e Klina me mbi 300 votues të regjistruar.

Numri më i madh i votuesve të regjistruar është nga shteti i Gjermanisë (2,767), i pasuar nga ai i Zvicrës (1,121), e të tjera.