Sonte zyrtarisht ngrihet perdja e edicionit 2025/26 të Ligës së Evropës, ku do të luhen nëntë ndeshje të para të fazës së ligës, ndërsa të enjten do të zhvillohen edhe nëntë duele të tjera të kësaj xhiroje hapëse.

Pas javës së kaluar që solli emocionet e kthimit të Ligës së Kampionëve, tani vëmendja zhvendoset te kompeticioni i dytë më prestigjioz për klube në kontinent.

Ashtu si çdo vit, takimet janë të ndara në dy orare, disa fillojnë nga ora 18:45, ndërsa pjesa tjetër nga 21:00.

Përballjet kryesore të ditës konsiderohen Dinamo Zagreb-Fenerbahçe, Braga-Feyenoord dhe Real Betis-Nottingham Forest.

Nga ana tjetër, Roma do të përballet në transfertë me Nice, Malmö do të presë Ludogorets, Freiburg sfidon Baselin, Celtic shkon në Beograd përballë Crvena Zvezdës, PAOK-u luan ndaj Maccabi Tel Avivit, ndërsa Midtjylland mat forcat me Sturm Grazin.

Kujtojmë se trofeun e edicionit të kaluar e ngriti Tottenham Hotspur, që në finalen angleze mposhti Manchester Unitedin dhe siguroi pjesëmarrjen në Ligën e Kampionëve për këtë sezon./S.K/KP/

Zëvendësambasadori i Gjermanisë në Kosovë, Christian Böttcher, ka kritikuar politikën në vend dhe ka theksuar rëndësinë e respektimit të Kushtetutës si dhe përgjegjësinë e përfaqësuesve politikë për të garantuar funksionimin normal të shtetit.

Ai ka vënë theksin mbi nevojën që parlamenti të formojë një qeveri të qëndrueshme, duke paralajmëruar se çdo vonesë mund të ndikojë negativisht në interesin e investitorëve dhe në mirëqenien e qytetarëve.

Böttcher ka theksuar se është përgjegjësi e partive politike dhe e deputetëve të parlamentit të përmbushin pritjet e qytetarëve dhe të konstituojnë kuvendin në përputhje me Kushtetutën.

“Dua të them diçka kritike për politikën këtu. Pra, është përgjegjësi e partive politike dhe e anëtarëve të parlamentit që të përmbushin pritjet e qytetarëve. Është përgjegjësi e anëtarëve të parlamentit që ta konstituojnë Kuvendin në përputhje me kushtetutën dhe të formojnë e zgjedhin një qeveri që ta drejtojë vendin. Dhe nëse Kuvendi konstaton se rruga më e mirë përpara janë zgjedhjet e parakohshme, atëherë le të jetë ashtu”, tha ai.

Ai ka paralajmëruar se çdo vonesë në formimin e qeverisë dhe avancimin e tranzicionit energjetik rrezikon interesin e investitorëve dhe sjell humbje të drejtpërdrejta ekonomike.

“Çdo ditë vonese në formimin e qeverisë dhe në avancimin e tranzicionit energjetik, Kosova rrezikon të humbasë interesin e investitorëve. Dhe kjo nënkupton humbje reale në para, në vende pune dhe në mirëqenie të ardhshme”, ka shtuar Böttcher.

Ai këto deklarata i bëri gjatë organizimit dy ditor të Kosova Energy Forum dhe Green Business Expo 2025, ngjarje kjo që synon të ofrojë një platformë për diskutime mbi tranzicionin energjetik, liberalizimin e tregut të energjisë dhe sfidat për tërheqjen e investimeve në sektorin e energjisë së pastër dhe bizneset e qëndrueshme./D.B/EO

Në mungesë të kuorumit ka dështuar të mbahet mbledhja e jashtëzakonshme në Kuvendin Komunal të Prishtinës, e cila ishte thirrur nga kryetari Përparim Rama, për miratimin e buxhetit për vitin 2026.

Mungesën e kuorumit e konstatoi kryesuesi i Kuvendit Komunal, Fehmi Kupina.

“Konstatoj se nuk kemi kuorum për mbajtjen e kësaj mbledhje. Ju falënderoj për pjesëmarrje dhe me kaq e konstatoj të mbyllur këtë seancë,” tha ai.

Përkundër kësaj, fjalën e mori kryetari i Prishtinës, i cili e shfrytëzoi foltoren e Kuvendit Komunal të kryeqytetit për t’i bërë thirrje qytetarëve që në zgjedhjet lokale të 12 tetorit, siç tha, “t’ia tregojnë vendin asamblistëve që po sabotojnë miratimin e buxhetit për vitin 2026”.

“Po e shihni që opozita në mënyrë destruktive po vazhdon të sabotojë proceset e zhvillimit të kryeqytetit, po vazhdon të jetë bllokuese. Për këtë arsye, ftoj qytetarët e kryeqytetit të reflektojnë që me 12 tetor t’ia tregojnë vendin secilit asamblistë që ka bllokuar dhe vazhdon të sabotojë këtë proces demokratik të transformimit të kryeqytetit. Prandaj, me 12 tetor uroj të kemi një shumicë me të cilën do të vazhdojmë me transformimin e kryeqytetit, siç kemi bërë këto katër vite,” tha ai.

Grupi i asamblistëve të LVV-së më herët ka bërë të ditur se nuk do të marrin pjesë në këtë mbledhje, derisa kanë arsyetuar vendimin e saj duke thënë se kryetari i Komunës së Prishtinës, Përparim Rama, e ka dërguar për votim buxhetin në mënyrë të njëanshme, pa asnjë konsultim paraprak dhe duke i anashkaluar anëtarët e Kuvendit Komunal dhe qytetarët e Prishtinës./D.B/KP

Pas përfundimit të ndeshjeve të raundit të dytë të Kupës së Italisë, janë përcaktuar disa nga çiftet e 1/8-ve të finales, ku skuadrat e mëdha si Juventusi, Milani dhe Napoli tashmë njohin kundërshtarin e tyre.

Milani u kualifikua pas një fitoreje të pastër 3-0 ndaj Lecces në “San Siro”.

Falë këtij suksesi, kuqezinjtë do të përballen me Lazion në raundin e ardhshëm, me ndeshjen që do të zhvillohet në “Stadio Olimpico”, pasi bardhekaltrit e mbyllën sezonin e kaluar mbi Milanin në renditje.

Juventusi, nga ana tjetër, do të presë në “Allianz Stadium” skuadrën e Udineses, e cila eliminoi Palermon me shifrat 2-1.

Ndërkohë, kampionët në fuqi të Serie A, Napoli i Antonio Contes, do të ndeshen me Cagliarin, që triumfoi 4-1 ndaj Frosinones.

Ndeshjet e raundit të 1/8-ve të Kupës së Italisë do të zhvillohen në mesjavë, duke nisur nga 3 dhjetori./S.K/KP/