Forcat e armatosura të Ukrainës kanë kryer një seri sulmesh në tetë rrethe të rajonit të Belgorodit në Rusi gjatë 24 orëve të fundit, duke përdorur 107 dronë dhe 48 municione, njoftoi guvernatori Vyacheslav Gladkov.

Sipas tij, sulmet shkaktuan dëme në disa zona, duke përfshirë shkatërrimin e shtëpive private, ndërtesave të infrastrukturës dhe automjeteve. Në fshatin Tserkovny, një person u plagos nga një dron shpërthyes, ndërsa një tjetër u lëndua në fshatin Repyakhovka pas një sulmi me dron FPV në një objekt bujqësor.

Sulme intensive u raportuan edhe në distriktet Krasnoyaruzhsky, Shebekinsky, Graivoronsky, Borisovsky, Valuysky, Veidelevsky dhe Volokonovsky, ku u dëmtuan banesa, objekte publike dhe linja elektrike. Autoritetet ruse po vlerësojnë dëmet dhe situatën në terren.

Presidenti i Shteteve të Bashkuara, Donald Trump, po planifikon të ndërpresë angazhimin e SHBA me Këshillin e të Drejtave të Njeriut të Kombeve të Bashkuara dhe të zgjasë ndalimin e financimit të agjencisë së OKB-së për refugjatët palestinezë, UNRWA.

Mediat amerikane, përfshirë Politico dhe NPR, raportuan se Trump pritej të nënshkruante një urdhër ekzekutiv për tërheqjen nga dy organet e OKB-së në të njëjtën ditë që Shtëpia e Bardhë pritet të presë kryeministrin izraelit Benjamin Netanyahu.

Që nga marrja e detyrës më 20 janar, Trump ka tërhequr SHBA-në nga Organizata Botërore e Shëndetësisë dhe marrëveshja e Parisit për klimën, nga e cila ai u tërhoq gjithashtu gjatë mandatit të tij të parë një lëvizje që më vonë u anulua nga administrata Biden.

Një tjetër tërmet me magnitudë 4.8 ballë Rihter është regjistruar në orët e para të mëngjesit në Greqi, duke shtuar dhe më tej panikun e banorëve, një pjesë e madhe e të cilavë kanë zgjedhur ta kalojnë natën në çadra.

Sipas EMSC, epiqendra e tërmetit këtë herë ishte 24 km në lindje të Oia, në një thellësi fokale prej 14 km.

Autoritetet në Santorini mbeten në gatishmëri dhe janë mobilizuar, pasi aktiviteti sizmik në ishullin e njohur grek mbetet i lartë, me tërmete të njëpasnjëshme.

Ndërkohë, qytetarë dhe turistë duket se kanë zgjedhur ta braktisin ishullin përmes rrugëve ajrore dhe detare dhe në portin e ishullit është vënë re mbipopullim.

Presidenti i OASP-së, Efthimis Lekkas duke folur për “Mega-n” u kërkoi njerëzve që të mos kenë panik, pasi ishulli nuk do të përjetojë një tërmet shkatërrimtar si ai i vitit 1956.

“Aktiviteti sizmik që po zhvillohet tani pranë Amorgos do të zgjasë disa ditë, duke ruajtur të njëjtat përmasa. Duhen mijëra vjet për të mbushur çarjen. Nuk do të prodhojë tërmete të mëdha. Mund të shohim magnituda jo më të mëdha se 5 e shkallës Rihter. Njerëzit të mos bëjnë panik, nuk do të ketë tërmet si ai i vitit 1956”, tha Lekkas.

Profesori i Fatkeqësive Natyrore në Universitetin Teknik të Kretës lidhur me aktivitetin e shtuar sizmik në zonat midis Santorinit dhe Amorgos tha se një nga skenarët është se aktiviteti sizmik vjen nga një vullkan nënujor.

“Një mundësi është që të jetë aktivizuar një çarje, diçka e ngjashme me atë që shkaktoi tërmetin e madh të vitit 1956. Me fjalë të tjera, një vazhdimësi e thyerjes. Ky ishte tërmeti që arriti në 7.5 ballë. Por nëse një tërmet ndodh tani, nuk mendoj se dikush e pret të jetë kaq i madh. Pra, ky është një skenar. Skenari tjetër është aktivizimi i vullkanit që ndodhet brenda kalderës së ishullit të Santorinit dhe tjetri është një vullkan nënujor i quajtur Kolumbo, i cili ndodhet pak në veri të Santorinit, afërsisht 5 dhe 8 kilometra nga maja veriore e Santorinit, pra, duke shkuar drejt Ios. Aty ndodhet vullkani nënujor i quajtur Columbo. Pra, këta janë tre skenarët dhe ndikimet e mundshme që mund të kenë. Kjo është ajo që u ekzaminua në zonë.”

Forcat Ajrore të Shteteve të Bashkuara dhe të Filipineve kanë mbajtur patrullime të përbashkëta mbi Detin e Kinës Jugore, duke e zemëruar Kinën.

Edhe vetë Kina kreu një “patrullim rutinor” mbi një cekëtinë të kontestuar.

Nën presidentin Ferdinand Marcos Jr., Filipinet dhe Shtetet e Bashkuara e kanë rritur angazhimin për sigurinë, pas rritjes së tensioneve mes Filipineve dhe Kinës në rrugën e dendur ujore.

Ushtrimi njëditor mes dy vendeve aleate u zhvillua në Detin e Filipineve Perëndimore, tha zëdhënësja e Forcave Ajrore të Filipineve, Maria Consuelo Castillo, duke e përdorur termin e Manilës për ujërat në Detin e Kinës Jugore, të cilat shtrihen brenda zonës së saj ekonomike.

“Synimi i ushtrimit ishte përmirësimi i koordinimit operacional, rritja e ndërgjegjësimit mbi hapësirën ajrore dhe forcimi i aftësive për përdorimin fleksibil të forcës luftarake midis dy forcave ajrore“, tha Castillo në një deklaratë.

Castillo tha se në ushtrim morën pjesë tre avionë luftarakë filipinas, FA-50, dhe dy bombardues amerikanë B1-B, duke përfshirë një fluturim mbi cekëtinën Scarborough, ku forcat ajrore kineze gjithashtu kryen atë që e quajtën patrullë rutinore.

Ushtria e Kinës i akuzoi Filipinet se iu bashkua patrullimeve që, sipas saj, ishin organizuar nga vende të huaja për ta “minuar paqen dhe stabilitetin në Detin e Kinës Jugore”.

Njësitë e forcave ajrore kineze do të “jenë në gatishmëri të lartë, do ta mbrojnë me vendosmëri sovranitetin territorial dhe të drejtat detare të Kinës dhe do ta kontrollojnë çdo aktivitet ushtarak që destabilizon Detin e Kinës Jugore”, shtoi ajo.

Kina pretendon se pothuajse e gjithë kjo rrugë ujore strategjike është e saj, pavarësisht pretendimeve nga Indonezia, Malajzia, Filipinet dhe Vietnami. Kjo rrugë ujore është rrugëkalim për tregti vjetore në vlerë 3 trilionë dollarë.

Në një konferencë për shtyp të martën, marina filipinase tha se po i “vëzhgon nga afër” tri anije të marinës kineze brenda zonave detare të Manilës, përfshirë një fregatë të pajisur me raketa.

“Prania e Marinës së Ushtrisë Çlirimtare Popullore pasqyron shpërfilljen e plotë të ligjit ndërkombëtar nga Republika Popullore e Kinës ndaj dhe minon paqen dhe stabilitetin në rajon“, tha zëdhënësi i marinës, John Percie Alcos.

Të hënën, agjencia shtetërore e lajmeve Xinhua tha se kalimi i flotës kineze ishte në përputhje me ligjin ndërkombëtar, duke cituar një zëdhënës të Komandës së Zonës Jugore të PLA-së.

Një tribunal ndërkombëtar i arbitrazhit vendosi në vitin 2016 se pretendimet e Kinës, të bazuara në hartat e saj historike, nuk kanë asnjë bazë ligjore ndërkombëtare, por Pekini nuk e njeh këtë vendim./REL/