Procesi i numërimit të votave të kandidatëve për deputetë ka vazhduar të enjten në komunën e Mitrovicës Veriore.

Në qendrën për numërimin e votave, që është palestra e sporteve, po bëhet verifikimi i votave të subjekteve politike nga formularët të cilët janë plotësuar në vendvotime dhe në të njëjtën kohë po numërohen votat e kandidatëve për deputetë.

Gjithçka deri tani është duke shkuar sipas planit dhe nuk është evidentuar ndonjë problem.

Kryetarja e KKZ-së në Mitrovicën Veriore, Ivana Kompiroviq, nuk ka pranuar të flasë për KosovaPress, me arsyetimin se nuk është e autorizuar për një gjë të tillë.

Në anën tjetër, mësohet se janë mbi tetë mijë fletëvotime të cilat do të numërohen në këtë qendër, ndërsa jo zyrtarisht bëhet e ditur se procesi i numërimit këtu do të përfundojë të premten deri në mesnatë.

Nga 258 kuti të rregullta të votimit, 7 me kusht dhe 11 nga ekipe mobile sa gjenden në Qendrën Komunale të Numërimit në Sallën “1 Tetori” në Prishtinë, janë numëruar 13 kuti me vota të kandidatëve për deputetë. Ndërkaq, 8 prej tyre janë në proces.

Kështu ka bërë të ditur, kryesuesja e Komisionit Komunal Zgjedhor në Prishtinë, Fatmire Bajrami.

Numërimi në këtë qendër ishte paraparë të zgjasë deri në shtatë ditë, por për shkak të problemeve teknike, Bajrami tha se nuk dihet me saktësi se kur do të përfundojë.

Sot është dita e tretë prej kur ka nisur numërimi i votave të kandidatëve për deputetë në Qendrën Komunale të Numërimit në Prishtinë, në Obiliq, në Lipjan dhe Partesh.

Këto ditë janë karakterizuar me telashe teknike, derisa sistemi ka rënë disa herë në Qendrën Komunale të Numërimit në Prishtinë. Kjo ka bërë që të ripërsëritet numërimi.

Përveç kësaj, edhe të martën kur ka filluar procesi, por edhe dje, është raportuar për përleshje në mes të vëzhguesve nga Lëvizja Vetëvendosje dhe Lidhja Demokratike e Kosovës.

Procesi i numërimit gjatë këtyre ditëve ka filluar me vonesë për shkak të telasheve teknike.

Përveç komisionerëve dhe vëzhguesve të subjekteve politike, të pranishëm në këtë qendër janë edhe vëzhguesit e Bashkimit Evropian.

Në këtë objekt po qëndrojnë edhe pjesëtarë të Policisë së Kosovës.

Përveç në Prishtinë, numërimi i votave të kandidatëve për deputetë, njëkohësisht verifikimi i votave për subjekte politike, të martën ka filluar edhe në Obiliq, Lipjan dhe Partesh.

Ndërkaq, Komisioni Qendror i Zgjedhjeve të mërkurën ka njoftuar se ka filluar procesi i numërimit të votave të kandidatëve për deputetë dhe verifikimit të votave të subjekteve politike në 14 komuna të tjera.

Të mërkurën, procesi i numërimit ka filluar në Qendrat Komunale në Deçan, Gjakovë, Drenas, Gjilan, Fushë Kosovë, Kamenicë, Mitrovicë e Jugut dhe Veriut, Skenderaj, Shtërpc, Viti, Vranidoll, Kllokot dhe Han të Elezit.

Ndërkaq, ende nuk është bërë e ditur se kur do të fillojë numërimi i votave në komunat e tjera.

Presidentja e Kosovës, Vjosa Osmani, ka udhëtuar për në Gjermani për të marrë pjesë në Konferencën e Sigurisë në Mynih (MSC), një nga forumet më prestigjioze globale për çështjet e sigurisë dhe politikës së jashtme.

Gjatë qëndrimit të saj në Mynih, presidentja Osmani do të zhvillojë takime me liderë botërorë, përfaqësues të organizatave ndërkombëtare dhe personalitete të rëndësishme të politikës globale, me fokus forcimin e partneritetit strategjik dhe avancimin e interesave të Republikës së Kosovës në arenën ndërkombëtare.

“Përveç takimeve bilaterale, Presidentja Osmani do të marrë pjesë edhe në panele diskutimi që organizohen përgjatë konferencës”, thuhet në njoftimin e Zyrës së Presidentes.

Konferenca e Sigurisë në Mynih, e themeluar në vitin 1963, është një platformë e pavarur që synon promovimin e zgjidhjeve paqësore të konflikteve, dialogut ndërkombëtar dhe bashkëpunimit në mes shteteve.

Bordi i Drejtorëve Ekzekutivë të Bankës Botërore miratoi Programin e Dytë të Politikave për Qëndrueshmëri dhe Zhvillim të Gjelbër (DPL), me një financim prej 120 milionë dollarë për forcimin e qëndrueshmërisë fiskale dhe nxitjen e zhvillimit të qëndrueshëm në Shqipëri.

Ky është financimi i dytë i një serie prej dy fazash që ndihmon Shqipërinë të përmirësojë qëndrueshmërinë fiskale dhe atë mjedisore.

BB bën të ditur se, Programi i ri do të mbështesë Shqipërinë në tri fusha kryesore reformash, të cilat synojnë: Forcimin e hapësirave fiskale, përfshirë përmirësimin e administrimit të taksave dhe raportimit të ndërmarrjeve shtetërore mbi rreziqet e mundshme sociale dhe mjedisore, zgjerimin e tregut të energjisë, duke nxitur burimet e rinovueshme dhe rritjen e efiçencës së energjisë dhe mbrojtjen e mjedisit dhe uljen e emetimeve të karbonit.

Ky program është në përputhje me Kuadrin e Partneritetit të Vendit për periudhën 2023-2027, çka përforcon angazhimin e Bankës Botërore për zhvillimin e qëndrueshëm të Shqipërisë dhe përmirësimin e cilësisë së jetës për qytetarët e saj.

“Paketa e reformave që mbështesim përmes këtij programi synon të forcojë perspektivat e zhvillimit të Shqipërisë,” tha Richard Record, Menaxheri në detyrë i Bankës Botërore për Shqipërinë.

“Ky financim do ta ndihmojë vendin të adresojë sfidat kryesore në sektorin e energjisë si dhe të rrisë aftësinë e qeverisë për të menaxhuar rreziqet fiskale dhe për të mbështetur më mirë shtresat në nevojë të popullsisë”, theksoi ai, përcjell ATSH, transmeton KosovaPress.

“Programi reflekton aspiratat e Shqipërisë për anëtarësim në Bashkimin Evropian, Programin e Reformave Ekonomike 2024-2026 dhe angazhimet ndërkombëtare të vendit për klimën. Masat kryesore përfshijnë forcimin e qëndrueshmërisë fiskale, përmirësimin e sistemit të ndihmës sociale dhe nxitjen e reformave në sektorin e energjisë. Kuadri i politikave makroekonomike të Shqipërisë mbetet i qëndrueshëm, i karakterizuar nga deficit fiskali menaxhueshëm, borxh publik në rënie, politikë monetare e qëndrueshme e mbështetur nga masa dhe mbikëqyrje e kujdesshme”, thekson BB në njoftimin për shtyp publikuar në faqen zyrtare të BB.