Deputetët e Lëvizjes Vetëvendosje e lëshuan mbledhjen e Komisionit për Mbikëqyrjen e Agjencisë së Kosovës për Inteligjencë ku ishte ftuar në mbledhje të jashtëzakonshme për raportim drejtori i AKI-së Petrit Ajeti.

Deputetët e shumicës e kundërshtuan thirrjen e kësaj mbledhje që sipas tyre nuk është ftuar sipas rregullave.

Raportimi i drejtorit të AKI-së Petrit Ajeti në komision në mungesë të kuorumit po zhvillohet në seancë dëgjimore.

Kryetarja e komisionit, Ganimete Musliu tha se kjo mbledhje e jashtëzakonshme është thirrur nga 1/3 e deputetëve lidhur me dyshimet që kanë dal në opinionin publik për përndjekjen e disa gazetarëve dhe vëzhgimin e tyre si dhe mesazhet e Dejona Mihalit që kanë dal në publik e që sipas saj dyshohet për ndërhyrje në institucione.

Sali Zyba deputet nga LVV propozoi që në rend dite si pikë e parë të ofrohet sqarim nga kryetarja Musliu se prej kujt ka pasur presion nga mediat për të ftuar në raportimin drejtorin e AKI-së, Petrit Ajeti.

Sipas tij kjo mbledhje nuk është ftuar sipas rregullores.

“Cili është presioni i kryetarit e ke thirr mbledhjen e një komisioni me propagandën e sms-ve. Nuk mundem me qëndru me ta bë argatin e dreqit”, tha ai.

Ndërsa, deputeti i LDK-së, Arben Gashi tha se me rregulloren e Kuvendit nuk lejohet ndryshimi i rendit të ditës.

E pas kundërshtimeve që paraqitën edhe deputetët e tjerë të mazhorancës, ata e lëshuan mbledhjen.

Aktualisht po vazhdon raportimi i drejtorit t AKI-së, Petrit Ajeti para tre deputetëve të opozitës, Ganimete Musliu, Bekë Berisha dhe Arben Gashi.

E pas përfundimit të këtij diskutimi do të ketë konferencë për media nga kryetarja e komisionit, Ganimete Musliu.

Konsumi i sheqerit është rritur dukshëm në dekadat e fundit pasi është një përbërës kyç në shumë ushqime dhe pije të përpunuara.

Pavarësisht se ekspertët paralajmërojnë shpesh për rreziqet si: Obeziteti, diabeti dhe sëmundjet kardiovaskulare zgjedhjet tona ushqimore mbeten të ngarkuara me sheqerna.

Një studim nga Talker Research zbulon se sa sheqer konsumon një person çdo vit dhe efektet shëndetësore që i shkakton.  Sipas rezultateve individi konsumon rreth 36 kilogramë sheqer, gjë që është tronditëse dhe në të njëjtën kohë ngre pikëpyetje për efektet e këtij konsumi të tepruar në shëndetin e përgjithshëm.

Kur është më e fortë dëshira për diçka të ëmbël?

Kushtet e zakonshme janë shikimi i filmit (31%), pas ngrënies (vaktit) (31%), për të marrë më shumë energji në mes të ditës (30%) ose pas një dite të keqe (19%).

Koha më e zakonshme që pjesëmarrësit raportuan se ndjenin nevojën sheqer ishte në orën 15:00, është alarmante që personi mund t’i rezistojë një ëmbëlsire, çokollate për vetëm 13 minuta para se të dorëzohet. “Përplasja” e sheqerit, kur energjia bie ndjeshëm, ndodhi rreth 33 minuta pas konsumimit të një ëmbëlsire, ku efektet kryesore ishin lodhja (42%), keqardhja (25%) dhe mungesa e përqendrimit (21%).

Pozitive është që një pjesë e madhe e konsideron hidratimin e rëndësishëm. Në veçanti, më shumë se gjysma e pjesëmarrësve (51%) thanë se po përpiqen të pinë më shumë ujë, me synimin për të reduktuar dëshirat për sheqer dhe për të përmirësuar shëndetin e tyre të përgjithshëm. /UBTNews/

Shtetet e Bashkuara janë “thellësisht të shqetësuara” nga një legjislacion që e miratoi Parlamenti i Izraelin për ta ndaluar UNRWA-n, agjencinë kryesore të OKB-së që u sjell ndihma palestinezëve në Rripin e Gazës dhe në pjesë të tjera të Lindjes së Mesme, përfshirë në Izrael.

Duke reaguar ndaj vendimin që e ndalon punën e UNRWA-s në Izrael dhe çdo kontakt mes autoriteteve izraelite dhe këtij grupi të OKB-së, zëdhënësi i Departamentit amerikan të Shtetit, Matthew Miller, tha se Uashingtoni i ka bërë të qarta shqetësimet e veta dhe se e kundërshton këtë legjislacion.

“Ne jemi thellësisht të shqetësuar nga ky legjislacion. Ai mund ta ndalë punën e UNRWA-s në Bregun Perëndimor, në Gazë dhe në Jerusalemin lindor”, tha ai më 29 tetor.

“Kjo përbën rrezik për miliona palestinezë, të cilët varen nga UNRWA-ja për shërbime thelbësore, përfshirë kujdesin shëndetësor dhe arsimim fillor dhe të mesëm”, tha Miller.

Ai theksoi se UNRWA-ja luan rol vendimtar në ofrimin e shërbimeve për palestinezët.

Ky legjislacion u aprovua nga Parlamenti i Izraelit më 28 tetor dhe do të hyjë në fuqi brenda 90 ditësh.

Palestinezët në Rripin e Gazës janë goditur rëndë nga shpërthimi i luftës me Izraelit dhe Hamasit – grupit të shpallur terrorist nga Shtetet e Bashkuara dhe Bashkimi Evropian.

Lufta u shkaktua kur luftëtarët e Hamasit u futën në jug të Izraelit më 7 tetor 2023 dhe i vranë rreth 1.200 njerëz, si dhe i rrëmbyen afër 250 të tjerë.

Hakmarrja e Izraeli e ka shkatërruar Gazën, si dhe i ka vrarë mbi 43.000 njerëz, sipas Ministrisë së Shëndetësisë në Gazë, e cila udhëhiqet nga Hamasi.

UNRWA-ja ka paralajmëruar disa herë se Gaza është buzë krizës humanitare për shkak të luftës.

Ligjvënësit izraelitë që e miratuan ligjin për ndalimin e UNRWA-s, thanë se disa punëtorë të kësaj agjencie ishin përfshirë në sulmin e 7 tetorit kundër Izraelit.

OKB-ja tha në gusht se nëntë pjesëtarë të stafit të UNRWA-s u shkarkuan për shkak se dyshohet se mund të jenë përfshirë në sulmin e 7 tetorit.

Legjislacioni ka gjasë ta bëjë të pamundur punën e UNRWA-s në Gazë dhe në Bregun Perëndimor, i cili është i uzurpuar nga Izraeli.

Instituti për Politika Zhvillimore (INDEP) ka reaguar ndaj paralajmërimit të Qeverisë së Kosovës për rritjen e pagave për punëtorët e sektorit publik nga janari i vitit 2025. Në reagim thuhet se rritja e pagave po ndodhë për qëllime elektorale.

“INDEP shpreh shqetësimin e thellë që, për të disatën herë, partitë politike në Kosovë po përdorin ndryshimet në nivelet e pagave të sektorit publik për qëllime elektorale. Vendimi i fundit i Qeverisë për rritjen graduale të koeficientëve të pagave në sektorin publik dhe reagimet e ngjashme nga opozita janë shembull tjetër i kësaj prirjeje shqetësuese, veçanërisht në kohën kur vendi po i afrohet zgjedhjeve të reja”, thuhet në reagim.

Më tej thuhet se në kohën e diskutimit dhe miratimit të Ligjit për Pagat, INDEP kishte argumentuar se koeficientet duhet të ndërlidhen drejtpërdrejt me vlerën e pagës minimale.

“Ky model jo vetëm që do të ofronte transparencë dhe një bazë të qëndrueshme, por edhe do të siguronte një lidhje të domosdoshme mes sektorit publik dhe atij privat. Procesi për përcaktimin e pagës minimale, i cili është rezultat i propozimit nga Këshilli Ekonomiko-Social – organ ku përfaqësohen partnerët socialë, përfshirë përfaqësuesit e sektorit privat (odat ekonomike, sindikatat dhe Qeveria) – është gjithpërfshirës dhe reflekton një qasje të balancuar që garanton respektim të interesave të të gjitha palëve”, thuhet në komunikatë.

Për me tepër INDEP vlerëson se rritja e njëanshme e pagave në sektorin publik pa një ndërlidhje direkte me sektorin privat shkakton jo vetëm ndasi ekonomike, por ndikon në të gjithë ekuilibrin ekonomik të vendit.

“Këto ndryshime duhet të jenë rezultat i rritjes ekonomike të përgjithshme dhe të vendimmarrjes së përbashkët sociale, e jo premtimeve a vendimeve në prag të zgjedhjeve. Praktikat e përsëritura të partive politike për të manipuluar me pagat publike gjatë cikleve zgjedhore janë precedent i dëmshëm që minon integritetin e politikave publike dhe zhvillimin e qëndrueshëm ekonomik”, thuhet në njoftim.

INDEP apelon që rritjet e koeficientëve të pagave të jenë produkt i një metodologjie të qartë, transparente dhe të parashikueshme, të mbështetur në indikatorë ekonomikë të mirëfilltë dhe në një qasje të konsultuar me të gjitha palët.

Në fund thuhet se manovrat politike, që synojnë të shfrytëzojnë ndjeshmërinë e qytetarëve ndaj kushteve ekonomike për përfitime elektorale, e largojnë fokusin nga politikat afatgjata dhe zhvillimi i qëndrueshëm.

“Rritja e inflacionit dhe përkeqësimi i kushteve të jetesës për qytetarët kërkon një qasje të përbashkët, ku interesi publik dhe mirëqenia ekonomike e të gjithë qytetarëve janë mbi interesat partiake. Për një sistem pagash më të drejtë dhe të qëndrueshëm, INDEP edhe njëherë bënë thirrje për harmonizimin e koeficientëve me pagën minimale dhe për një politikë që bazohet në ligjvënie gjithëpërfshirëse, larg premtimeve të brishta dhe politizimit elektoral”, thuhet në fund të reagimit.

Qeveria e Kosovës dje ka vendosur që nga janari i vitit të ardhshëm t’i rrisë pagat për punonjësit e sektorit publikë për 55 euro në muaj, ndërsa nga korriku do të ketë rritje për 110 euro.

Nga kjo rritje do të përfitojnë, mësuesit, policët, infermierët, ushtarët dhe zjarrfikësit.

Sipas prezantimit të tabelës, mësuesit aktualisht kanë 616 euro pagën bazë, ndërkaq me rritje do të marrin 726 euro.

Policët nga 550 euro do të marrin 660 euro, infermierët nga 605 do të marrin 715 euro, zjarrfikësit nga 550 euro do të marrin 660 euro dhe ushtarët nga 616 euro do të marrin 726 euro.

Ndërkaq, kryeministri i Kosovës, Albin Kurti, ka bërë të ditur se buxheti i planifikuar për vitin 2025 është 3.6 miliardë euro.