Presidenti serb, Aleksandër Vuçiq, njoftoi se sanksionet e Shteteve të Bashkuara ndaj Industrisë së Naftës të Serbisë (NIS), për shkak të pronësisë ruse, janë shtyrë për 30 ditë.

“Ne kemi pranuar një shtyrje për 30 ditë për Industrinë e Naftës të Serbisë. Lajm i mirë për qytetarët e Serbisë”, shkroi Vuçiq në Instagram.

Në letrën e Departamentit amerikan të Thesarit, që Vuçiq e publikoi, thuhet se sanksionet kundër NIS-it janë shtyrë deri më 28 mars.

Më 10 janar, SHBA-ja e vendosi NIS-in nën sanksione për shkak të aksioneve të kompanisë ruse të naftës, Gazprom Neft, në mënyrë që të parandalojë Rusinë që të përdorë të ardhurat nga energjia për luftën në Ukrainë.

NIS është e vetmja kompani në Serbi që është e përfshirë në nxjerrjen, prodhimin dhe rafinimin e naftës, si dhe në prodhimin e gazit natyror.

Më herët gjatë shkurtit, kompania dorëzoi kërkesë në Zyrën për Kontrollin e Aseteve të Huaja të Qeverisë amerikane për të shtyrë vendosjen e sanksioneve.

Kërkesa për të shtyrë sanksionet për minimum 90 ditë, në mënyrë që të zgjidhet çështja e pronësisë, u mbështet nga Qeveria e Serbisë dhe ajo e Hungarisë.

Që atëherë, struktura pronësore e NIS-it ka ndryshuar.

Siç njoftoi Bursa e Beogradit më 26 shkurt, Gazprom Neft ka transferuar të paktën 5 për qind të aksioneve të tij te Gazpromi, një kompani ruse që nuk është subjekt i sanksioneve perëndimore.

Dokumentet e publikuara në ueb-faqen e Bursës së Beogradit tregojnë se Gazprom Neft ka zvogëluar përqindjen e aksioneve në NIS nga 50 në rreth 44.85 për qind.

Në të njëjtën kohë, Gazpromi ka rritur përqindjen e aksioneve në NIS nga 6.15 në 11.30 për qind.

Sa i përket pjesës tjetër të aksioneve, 29.87 për qind janë në pronësi të shtetit të Serbisë dhe pjesa tjetër janë në pronësi të qytetarëve, punëtorëve aktualë dhe ish-punonjësve dhe hisedarëve të tjerë më të vegjël.

Presidenti i Ukrainës Volodymyir Zelensky tha se ekipet po punojnë me Shtetet e Bashkuara ndërsa po përgatiten për negociatat këtë të premte.

Ai marrëveshjen e së premtes me SHBA e quan mbështetje të vendit dhe të popullit ukrainas.

“Sot është bërë shumë punë ndërkombëtare. Ekipet tona po punojnë me Shtetet e Bashkuara ndërsa përgatitemi për negociatat këtë të premte. Marrëveshja me SHBA-në Mbështetja e vendit dhe popullit tonë. Garancitë e paqes dhe sigurisë janë çelësi për të siguruar që Rusia nuk mund të shkatërrojë më jetët e kombeve të tjera”, shtoi Zelensky.

Ai vlerësoi se është e rëndësishme që mbështetja e SHBA-së mos të ndalet.

“Për mua dhe për të gjithë ne në botë, është e rëndësishme që mbështetja e SHBA-së të mos ndalet. Nevojitet forca në rrugën drejt paqes. Unë jam mirënjohës për të gjithë partnerët që vazhdojnë të na mbështesin dhe për të gjithë njerëzit tanë që besojnë në Ukrainë”, ka shkruar Zelensky në rrjetin social X.

Edhe presidenti i SHBA-së, Donald Trump, kishte thënë se ai po pret që presidenti i Ukrainës, Volodymyr Zelensky, të nënshkruajë këtë javë një marrëveshje “shumë të madhe” për mineralet me SHBA-në.

Komisioni Qendror i Zgjedhjeve po vazhdon numërimin e votave të ardhura nga përfaqësitë diplomatike.

Sipas të dhënave të fundit të publikuara mbrëmë nga KQZ, rezulton se deri në ora 23:48 janë numëruar 44.19 për qind e votave nga përfaqësitë diplomatike.

Sipas këtyre votave 81.89 për qind është votuar Lëvizja Vetëvendosje, 7.21 për qind të votave kanë shkuar për Lidhjen Demokratike të Kosovës, 5.75 për qind për Partinë Demokratike të Kosovës, derisa Aleanca për Ardhmërinë e Kosovës ka marr 1.54 për qind të votave.

Në Qendrën e Numërimit dhe Rezultateve ka filluar të mërkurën procesi i numërimit të fletëvotimeve nga votimi jashtë Kosovës në 30 përfaqësi diplomatike me gjithsej 43 vendvotime.

Ky proces i votimit u zhvillua më 8 shkurt 2025 dhe morën pjesë 15 mijë e 352 votues apo 75.57 për qind e numrit që ishin regjistruar si votues.