Një incident që ka rezultuar me lëndime trupore është regjistruar në komunën e Leposaviqit. sipas raportit zyrtar 24-orësh të Policisë së Kosovës.

Ngjarja ka ndodhur rreth orës 19:00, pas një konflikti verbal mes dy personave.

“Viktima burrë kosovar ka pranuar tretman mjekësor në spitalin e Mitrovicës Veri, pasi që i njëjti dyshohet se pas një mosmarrëveshje është sulmuar fizikisht nga i dyshuari mashkull kosovar”, sipas raportit të policisë.

Menjëherë pas raportimit të rastit, njësitë policore kanë shoqëruar personat e përfshirë për intervistim.

Pas ekzaminimit të rrethanave dhe konsultimit me organet e drejtësisë, rasti ka kaluar në fazë hetimore të rregullt.

Sipas policisë, “palët janë intervistuar dhe me vendim të prokurorit janë liruar në procedurë të rregullt”. Rasti po trajtohet nga autoritetet kompetente si “Lëndim i lehtë trupor”.

Gjatë 24 orëve të fundit, Policia e Kosovës ka regjistruar tri raste të ndara të dhunës në familje në Prishtinë, Fushë Kosovë dhe Skenderaj, të cilat kanë rezultuar me arrestimin e të dyshuarve dhe konfiskimin e armëve.

Sipas raportit policor, rasti i parë ka ndodhur në Prishtinë rreth orës 03:00, ku “është arrestuar një i dyshuar burrë nën dyshimin se ka sulmuar fizikisht viktimën grua kosovare”, me ç’rast i dyshuari është dërguar në mbajtje me vendim të prokurorit.

Një situatë e ngjashme është raportuar edhe në Fushë Kosovë, ku një mosmarrëveshje ka agravuar në kanosje dhe sulm fizik.

Policia ka bërë të ditur se i dyshuari ka sulmuar viktimën grua, e cila “ka pranuar tretman mjekësor ndërsa i dyshuari pas intervistimit me vendim të prokurorit është dërguar në mbajtje”. Ky rast është cilësuar si “Dhunë në familje & kanosje”, duke reflektuar rrezikshmërinë e lartë të kanosjeve brenda ambienteve familjare.

Ndërkaq, në Skenderaj, policia ka ndërhyrë pas raportimeve për dhunë të vazhdueshme psikike.

“I dyshuari mashkull kosovar në vazhdimësi është duke ushtruar dhunë psikike ndaj viktimës femër kosovare”.

Gjatë hetimit të këtij rasti, zyrtarët policorë kanë ndërmarrë masa parandaluese duke konfiskuar dy armë zjarri dhe 12 fishekë, për të cilat i dyshuari posedonte leje.

Për dallim nga dy rastet e para, me vendim të prokurorit, ky rast në Skenderaj “vazhdon të trajtohet në procedurë të rregullt”.

Një person ka humbur jetën si pasojë e një aksidenti të rëndë komunikacioni që ka ndodhur mbrëmjen e së dielës në aksin rrugor Prizren-Gjakovë, saktësisht në fshatin Piranë.

Sipas raportit zyrtar 24-orësh të Policisë së Kosovës, ngjarja ka ndodhur rreth orës 18:20, ku u përfshi një automjet dhe një këmbësor.

Policia ka konfirmuar se lidhur me rastin “është arrestuar i dyshuari mashkull kosovar pasi që i njëjti duke drejtuar automjetin dyshohet se nga pakujdesia ka goditur këmbësorin mashkull kosovar”.

Përkundër ndërhyrjes, goditja ka rezultuar fatale për këmbësorin, “të cilit i ka shkaktuar lëndime vdekjeprurëse, vdekjen e të cilit e ka konstatuar ekipi mjekësor”.

Menjëherë pas aksidentit, në vendngjarje kanë dalë njësitë relevante të policisë dhe prokurori kompetent për të kryer ekzaminimet e nevojshme.

Me vendim të prokurorit, “trupi i pajetë është dërguar në IML për obduksion ndërsa i dyshuari është dërguar në mbajtje”.

Hetimet po vazhdojnë për të zbardhur rrethanat e plota të këtij aksidenti tragjik në komunikacion.

Ka shkuar në tre numri i të vdekurve nga ngjarja tragjike që tronditi fshatin Majac të Podujevës të dielën mbrëma.

Së fundmi, është konfirmuar vdekja edhe e personit të tretë, 31-vjeçares që dyshohej për përfshirje në këtë rast.

Lajmin për vdekjen e saj e ka konfirmuar zëdhënësja e QKUK-së, Mirlinda Qyqalla për Ekonomin Online.

Sipas njoftimeve të fundit, 31-vjeçarja A.G. nuk ka arritur t’u mbijetojë plagëve, duke u bërë viktima e tretë e këtij rasti.

Kujtojmë se gjatë mëngjesit të sotëm, në Qendrën Klinike Universitare ndërroi jetë edhe viktima tjetër, M.G., ndërsa në vendin e ngjarjes të dielën ishte konfirmuar i vdekur edhe viktima me inicialet I.B.

Policia e Kosovës dhe Prokuroria janë duke vazhduar hetimet intensive për të zbardhur rrethanat e plota dhe motivet që çuan deri te kjo vrasje e dyfishtë që përfundoi me tri viktima.

Vrasje e dyfishtë në Podujevë, Prokuroria jep inicialet e viktimave

Ngjarja tragjike që ndodhi mbrëmjen e së dielës në fshatin Majac të Podujevës është konfirmuar tashmë si vrasje e dyfishtë.

Prokuroria Themelore në Prishtinë dhe Policia e Kosovës kanë dalë me njoftim zyrtar, duke zbardhur rrjedhën e operacionit dhe identitetin e pjesshëm të viktimave.

Sipas komunikatës së fundit nga Prokuroria, si pasojë e të shtënave me armë zjarri kanë humbur jetën dy persona me inicialet I. B. dhe M. G., ndërsa e dyshuara për këtë akt ndodhet në gjendje të rëndë shëndetësore.

Edhe pse hetimet intensive po vazhdojnë, institucionet konfirmojnë se “motivi i këtij rasti ende nuk është i njohur”. Rasti po trajtohet me prioritet të lartë nën cilësimin penal “Vrasje e rëndë” dhe “Mbajtje në pronësi, kontroll ose posedim të paautorizuar të armëve”.

Shkon në dy numri i të vdekurve në Podujevë, ndërron jetë në QKUK edhe viktima e dytë

Policia e Kosovës ka njoftuar se rasti i ndodhur mbrëmjen e së dielës në fshatin Majac të Podujevës është ri-cilësuar si “Vrasje e rëndë” dhe “Mbajtje në pronësi, kontroll ose posedim të paautorizuar të armëve”, pas vdekjes së personit të dytë në Qendrën Klinike Universitare të Kosovës (QKUK).

Operacioni policor ka nisur rreth orës 18:40, pas pranimit të një informate fillestare se “në fshatin Majac të komunës së Podujevës, dyshohet që një person i cili gjendet në një veturë është pa shenja jete”.

Njësitë relevante, përfshirë hetuesinë dhe forenzikën, kanë identifikuar në vendngjarje një automjet të tipit VW me targa lokale, pronë e një burri nga Obiliqi, i cili u konstatua pa shenja jete nga ekipi mjekësor.

Gjatë zhvillimit të hetimeve intensive, autoritetet kanë rrethuar një shtëpi banimi në të cilën ndodhej një person i armatosur.

Sipas raportit policor, “dyshohet që një person i gjinisë femërore është brenda në një shtëpi, posedon armë zjarri dhe nuk pranon të komunikojë me askënd, e cila paraqet rrezik jete për vetën e saj dhe për të tjerët”.

Për të vënë situatën nën kontroll, janë angazhuar Njësia Speciale Intervenuese dhe zyrtarët për ndërmjetësim.

Pas ndërhyrjes, brenda shtëpisë janë gjetur dy persona të gjinisë femërore me plagë të rënda, të cilat u dërguan për trajtim mjekësor nën mbikëqyrje policore.

Megjithatë, Policia ka konfirmuar se sot rreth orës 03:35, “viktima femër kosovare ka ndërruar jetë në QKUK, vdekjen e të cilës e ka konstatuar mjeku kujdestar”.

Me urdhër të Prokurorit kompetent nga Departamenti i Krimeve të Rënda, trupat e pajetë janë dërguar në Institutin e Mjekësisë Ligjore (IML) për obduksion. Hetimet për zbardhjen e plotë të rrethanave të këtij rasti janë duke vazhduar nga njësitë përkatëse.