Presidenti i Këshillit Evropian, Charles Michel ka thënë se platforma e Komunitetit Politik Evropian duhet të ketë rol të rëndësishëm në uljen e konflikteve për të ndihmuar në zgjidhjen e tyre, veçanërisht midis Kosovës dhe Serbisë. Sipas tij, konfliktet si ai mes Kosovës e Serbisë janë problem për rajonin dhe më gjerë.

Michel në Grenada ku po mbahet samiti i Komunitetit Politik Evropian theksoi se konfliktet nuk janë problem vetëm për ata që janë drejtpërdrejt të përfshirë në to, por sipas tij ato janë një sfidë për rajonin dhe më gjerë. Ai tha se është përgjegjësi e BE-së për të garantuar paqe, siguri dhe mirëqenie.

“Besoj se kjo platformë e Komunitetit Politik mund të luajë dhe duhet të luajë një rol të rëndësishëm në uljen e konflikteve dhe për të ndihmuar në zgjidhjen e tyre, veçanërisht… dhe midis Serbisë dhe Kosovës, sepse konfliktet nuk janë vetëm problem për ata që janë drejtpërdrejt të përfshirë, ato janë një problem për rajonin dhe për kontinentet tona. Ne duhet ta përdorim këtë platformë unike për të ndërtuar më shumë besim, më shumë besim mes nesh, më shumë paqe, më shumë stabilitet, më shumë parashikueshmëri. Bota po shikon kontinentin tonë evropian dhe disa shpresojnë që do të dështojnë, por shumë të tjerë shpresojnë se do të kenë sukses. Qytetarët tanë duan që ne të udhëheqim dhe të jemi një forcë ndryshimi në përmirësimin e jetës së përditshme. Dhe kjo është përgjegjësia jonë si udhëheqës për të treguar se ne mund të punojmë së bashku për të garantuar paqen, sigurinë dhe për të përmirësuar mirëqenien, dhe për t’i afruar të katër anët e kontinentit tonë. Dhe unë mendoj se ky komunitet i veçantë është një vizion për të ardhmen. Pra, vizioni për një Evropë, që është e bashkuar, që është paqësore, e qëndrueshme dhe e begatë”, theksoi ai.

Në këtë samit, ka marr pjesë edhe presidentja e Kosovës, Vjosa Osmani, e cila deklaroi se nuk ka arsye për ta takuar presidentin e Serbisë, Aleksandër Vuçiq para se të vendosen sanksione, pas agresionit të Serbisë në veri të Kosovës.

Pak para nisjes së një mbledhjeje në Granadë të Spanjës, në kuadër të Komunitetit Politik Evropian, Osmani theksoi se mbështetja e një agresori, për të cilin ka prova të qarta nga 24 shtatori, nuk do të ndihmojë paqen dhe stabilitetin.