Ambasadori i Gjermanisë, Jorn Rohde, ka thënë se liberalizimi i vizave për Kosovën është vonuar ndërsa ka theksuar se 1 janari i vitit 2024, dita kur kosovarët fillojnë të lëvizin lirshëm, do të jetë e mrekullueshme. Ai ka marrë pjesë në hapjen e fushatës informuese për liberalizimin e vizave, organizuar nga Qeveria e Kosovës.

“Jam këtu sot me disa nga kolegët e mi nga BE, nga Sllovenia, nga Franca dhe Italia. Dhe është mirë që qeveria nis fushatën për të informuar për liberalizimin e vizave, i cili po ndodh më në fund. E kam thënë në një intervistë, mendoj vitin e kaluar, se do të jem ambasadori i fundit gjerman që ju duhet ta pyesni për viza dhe mendoj se 1 janari i vitit 2024është një ditë e mrekullueshme për Kosovën, por është gjithashtu një ditë e mrekullueshme për ambasadën sepse liberalizimi i vizave është vonuar shumë dhe siç thashë në festën time kombëtare dy ditë më parë, vitin e ardhshëm është kampionati evropian i futbollit në Gjermani dhe dëshiroj që sa më shumë kosovarë të mund të udhëtojnë lirshëm për t’iu bashkuar kësaj feste të madhe të futbollit dhe miqësisë”, ka thënë Rohde.

Diplomati gjerman nuk ka dashur të komentojë zhvillimet e fundit që lidhen sulmin terrorist në veri të vendit derisa është pyetur nëse Serbia duhet të sanksionohet pas këtyre zhvillimeve.

“Po flasim për viza sot, jo për politikë. Unë dua të jem shumë pozitiv sot. Faleminderit”, ka thënë Rohde.

Qeveria e Kosovës ka hapur fushatën informuese për liberalizimin e vizave. Nga 1 janari i vitit të ardhshëm kosovarët do të mund të lëvizin pa viza në zonën Schengen. Më 18 prill të këtij viti Parlamenti Evropian miratoi vendimin që qytetarët e Kosovës të lëvizin pa viza nga 1 janari i vitit 2024. Ndërsa një ditë më vonë, më 19 prill është nënshkruar akti ligjor për liberalizimin e vizave për Kosovën.