Lajmet

Punëtorët e “Ferronikelit” paralajmërojnë protesta edhe më të ashpra

“Ferronikeli” ka ndërprerë punën e tij përkohësisht.

Published

4 years ago

October 28, 2021

Betim Gashi

Rreth një mijë punëtorë kanë mbetur pa punë, pasi kompania “Ferronikeli” ndërpreu punimet për shkak të krizës energjetike. Punëtorët po kërkojnë mbështetje nga qeveria, meqë thonë se kanë mbetur në rrugë. Sot ata kanë protestuar para objektit të qeverisë, duke kërkuar që të bëhet një zgjidhje.

Edhe pas katër shkresave ndaj qeverisë, nuk kanë marrë përgjigje. Në rast se nuk gjejnë mbështetje nga institucionet, ata kanë paralajmëruar protesta jo paqësore.

“Ka krizë energjetike, por ka edhe zgjidhje”, “Qeveri reflekto, dëgjo kërkesat tona”, “Nuk duam të jemi në rrugë, por në fabrikë”, kanë qenë disa nga thirrjet e punëtorëve të “Ferronikelit” në Drenas.

Përfaqësuesi i punëtorëve në këtë protestë, Rifat Latifi u shpreh se ndërprerja e punës ka shpërfaqur edhe shumë probleme të tjera.

“Pas krizës energjetike globale ku çmimi ka shënuar ngritje katërfish për një kohë relativisht të shkurtër dhe trend të rritjes në vijimësi me shpejtësi të ngritjes të çmimit, pa limit kohe, detyroi dhunshëm ndërprerjen e prodhimit sepse kostoja ishte e papërballueshme. Kjo situatë ndërpreu aktivitetin punues të afro një mijë punëtorëve të rregullt si dhe një mijë punëtorëve kontraktues që në total dy mijë persona. Dy mijë familje duke rrezikuar standardin ekzistues të tyre”, ka thënë ai.

Sipas tij, pas ndërprerjes së punës nuk kanë marrë pagat e rregullta, janë dëmtuar pajisjet, si dhe ka ndikuar në humbjen e tregut.

“Deri më tani qeverisë ju kemi drejtuar katër herë me shkresa për mbështetje. Duke filluar nga data 8, 9 deri më 19 tetori 2021. Për hulumtimin e mundësive për tejkalimin e krizës. Por jemi mbetur pa përgjigje. Këto përpjekje gjatë tërë zhvillimeve të deritanishme janë manifestuar në formë të lutjeve për tejkalimin e situatës. Fatkeqësisht, deri tani nuk janë trajtuar nga ana e qeverisë. Ndërkohë që impakti i rrezikimit të standardeve të punëtorëve që kanë siguruar të ardhura për familjet e tyre ka reflektuar rënie nga shkaku që paga e muajit tetor do të jetë 50 për qind më e ulët. Ndërsa, për muajt tjerë në vijim mund të mbetemi edhe pa kompensimin e 50 për qind”, ka thënë ai.

Kryetari i Sindikatës, Fehmi Nika ka thënë se problemi më i madh është çështja e punëtorëve, të cilët nuk kanë të ardhura.

“Sa i përket ngritjes së çmimit, kjo ka filluar prej vitit të ri e këndej. Kemi mbijetuar derisa ka arritur në këtë limit. 130 euro kur ka qenë megavat-i për energji kemi mbijetuar, por kur ka shkuar 160 për megavat, kurse ka shkuar edhe deri në 270 euro dhe nuk kemi pasur mundësi të operojmë, është detyruar të ndalet prodhimi e punëtorët të shkojnë në shtëpi. Punëtorët nuk kanë të ardhura për të mbijetuar, janë në kredi. Kështu që menaxhmenti nuk ka siguruar më veç për tetor. Kurse për muajt tjerë nuk kemi siguri që a do të paguhemi apo jo”, ka thënë Nika.

Ai madje ka paralajmëruar edhe radikalizim të masave ditët në vazhdim nëse nuk gjendet një zgjidhje.

“Ne si sindikatë edhe si klasë punëtore i kemi mekanizmat tonë sindikalë, të cilët do t’i ndërmarrim në vijimësi… Mekanizmat sindikalë janë presione të ndryshme edhe deri te radikalizimi i punëtorëve. Sepse nuk mund të qëndrojnë kështu të qetë”, ka deklaruar ai.

Punëtorët kanë ftuar kryeministrin Albin Kurti për një takim para objektit të qeverisë, por asnjë nga përfaqësuesit e ekzekutivit nuk është takuar me ta.

“O kryeministër, hajde na jep përgjigje, o kryeministër! Ne nuk jemi të privatizuar, ne jemi qytetarët Republikës së Kosovës që mbajmë familjet tona”, ka thënë Rifat Latifi.

Javë më parë për shkak të krizës energjetike në Evropë dhe ngritjes së çmimeve të energjisë elektrike në tregjet globale, “Ferronikeli” ka ndërprerë punën e tij përkohësisht.

Lajmet

Sllovenia miraton ligjin që njeh pantentë shoferët e Kosovës

Published

3 hours ago

November 25, 2025

UBTnews

Ministrja e Punëve të Jashtme në detyrë Donika Gërvalla, ka njoftuar se Asambleja Nacionale e Sllovenisë, ka miratuar ligjin me anë të së cilit njihen pantentë shoferët e Republikës së Kosovës.

“Sot Asambleja Nacionale e Republikës së Sllovenisë miratoi ligjin që njeh patentë-shoferët e Republikës së Kosovës. Lajm i mirë për qytetarët tanë dhe mërgatën në Slloveni. Urime!”, ka shkruar Gërvalla në një postim në Facebook.

Lajmet

Besim Kelmendi padit Këshillin Prokurorial, kërkon anulimin e vendimit

Published

4 hours ago

November 25, 2025

UBTnews

Besim Kelmendi i cili në mbledhjen e 20 nëntorit 2025 të Këshillit Prokurorial të Kosovës (KPK) u shkarkua nga pozita e ushtruesit të detyrës së Kryeprokurorit të Shtetit, ka ushtruar padi ndaj KPK-së, duke kërkuar anulimin e vendimit të Këshillit.

Po ashtu, Kelmendi ka propozuar edhe caktimin e masës së përkohshme të sigurisë- pezullimin e zbatimit vendimit të KPK-së dhe të vazhdojë ushtrimin e pozitës së U.D Kryeprokurorit të Shtetit deri në vendosjen meritore në këtë çështje administrative.

Shkarkimi i Kelmendit nga kjo pozitë, u bë me votat e pesë anëtarëve të zgjedhur të KPK-së të cilët ishin të pranishëm në takimin e 20 nëntorit, pasi fillimisht takimi u mbyll në mungesë kuorumi me largimin e Kelmendit dhe katër anëtarëve tjerë nga kjo mbledhje.

Sipas padisë për inicimin e konfliktit administrativ me propozimin për caktim të masës së përkohshme, përkundër se vendimi i të paditurës KPK është për shkarkimin e paditësit, meqë nuk është ndjekur procedurë disiplinore dhe vendimi si i tillë nuk paraqet Vendim për masë disiplinore për paditësin, paditësi nuk mund të ushtrojë të drejtën e mjetit juridik të ankesës në Gjykatën Supreme. siç e garanton neni 19 paragrafi 4 i Ligjit Nr. 06/L-056 për Këshillin Prokurorial të Kosovës, raporton Betimi për Drejtësi.

Në padi thuhet se KPK-ja në vendimin për shkarkimin e paditësit nuk e ka trajtuar rastin në kuptimin disiplinor, por nga vetëm 5 prej 10 anëtarëve e zgjedhur të KPK-së është marrë si kinse një nga vendimet e zakonshme të KPK-së, që përbëjnë akt administrativ.

Andaj, duke qenë se KPK është institucion i pavarur siç e garanton Kushtetuta dhe nuk ka organ epror për të shqyrtuar ankesën ndaj vendimeve të tij, paditësi paraqiti drejtpërdrejt këtë padi në këtë Gjykatë.

Ndërsa, sot në një konferencë për media, kryesuesi i Këshillit Prokurorial të Kosovës (KPK), Ardian Hajdaraj, tha se ish-ushtruesi i detyrës së Kryeprokurorit të Shtetit, Besim Kelmendi, është shkarkuar nga kjo pozitë shkak i qëndrimeve të njëanshme dhe denigruese në takimet e KPK-së dhe prononcimet që kishte bërë në media pas vendimit për ta larguar nga pozita e ud Kryeprokurorit të Shtetit./KP

Lajmet

Aktakuzë për vrasje të rëndë në tentativë

Published

4 hours ago

November 25, 2025

UBTnews

Prokuroria Themelore në Prizren, ka ngritur aktakuzë kundër të pandehurit B.G., për shkak të dyshimit të bazuar mirë se i njëjti ka kryer veprat penale “Vrasja e rëndë në tentativë” dhe “Mbajtja në pronësi, kontroll ose posedim të pa autorizuar të armëve”.

Sipas aktakuzës, më datë 17.10.2025, rreth orës 00:10min, në banesën familjare në Prizren, pas një konflikti të çastit me motive xhelozie, i pandehuri B.G., e sulmon me thikë me gjatësi tehu prej 13 cm, bashkëshorten M.A., duke e goditur gjashtë herë dhe duke i shkaktuar dëmtime serioze të organeve të brendshme. Gjithashtu, i pandehuri e godet me thikë edhe vajzën e mitur të viktimës, e cila kishte tentuar të ndërhynte, duke i shkaktuar lëndime të rënda në zonën e krahërorit dhe barkut. Lëndimet e shkaktuara ndaj të dy viktimave janë konfirmuar nga ekspertiza mjeko-ligjore e datës 24.11.2025.

“Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartcekur për veprat penale për të cilat akuzohet të shpallet fajtor dhe të dënohet sipas ligjit”, thuhet në njoftim./KP

Lajmet

Gati 300 ushtarë të KFOR-it marshojnë 30 kilometra në Bondsteel në nderim të të rënëve

Published

6 hours ago

November 25, 2025

UBTnews

KFOR ka njoftuar se gati 300 ushtarë nga Shtetet e Bashkuara, Gjermania, Danimarka, Bullgaria, Mbretëria e Bashkuar, Turqia, Zvicra, Kroacia, Letonia, Sllovakia dhe Polonia, kanë marrë pjesë në Marshimin Norvegjez në Kampin Bondsteel.

Ky marshim që ka përfshirë 30 kilometra me një çantë shpine prej 11 kilogramësh dhe u zhvillua në nder të ushtarëve të rënë, duke pasqyruar përkushtimin, qëndrueshmërinë dhe profesionalizmin e ushtarëve të KFOR-it.

Gati 300 ushtarë nga Shtetet e Bashkuara, Gjermania, Danimarka, Bullgaria, Mbretëria e Bashkuar, Turqia, Zvicra, Kroacia, Letonia, Sllovakia dhe Polonia, që shërbejnë nën Komandën Rajonale – Lindje brenda misionit të udhëhequr nga NATO, KFOR, morën pjesë në Marshimin Norvegjez me Pajisje në Kampin Bondsteel, Kosovë.

Marshimi përfshiu 30 kilometra me një çantë shpine prej 11 kilogramësh dhe u zhvillua në nder të ushtarëve të rënë, duke pasqyruar përkushtimin, qëndrueshmërinë dhe profesionalizmin e ushtarëve të KFOR-it.

KFOR vazhdon të zbatojë mandatin e tij – të bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar për një ambient të sigurt dhe të qëndrueshëm për të gjithë njerëzit që jetojnë në Kosovë dhe për lirinë e lëvizjes, në çdo kohë dhe paanshmërisht. KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili në rolin e vet si përgjegjës për sigurinë./EO