Lajmet

Kërkohet ndërtimi i spitalit për të burgosurit, MD thotë se nuk e ka në plan

Ministria e Drejtësisë nuk e ka në plan ndërtimin e këtij spitali.

Published

3 years ago

August 10, 2022

Betim Gashi

Rreth 40 të burgosur në qendrat korrektuese vuajnë nga sëmundje të rënda. Kështu shprehet kryetari i Këshillit për Mbrojtjen e të Drejtave dhe Lirive të Njeriut, Behgjet Shala. Ai në intervistën për KosovaPress thekson nevojën për ndërtimin e një spitali brenda Shërbimit Korrektues të Kosovës. Megjithatë, Ministria e Drejtësisë nuk e ka në plan ndërtimin e këtij spitali, meqë nuk ka numër të pacientëve për të arsyetuar themelimin e spitalit.

Këshilli për Mbrojtjen e Drejtave të Lirive të Njeriut gjatë ditës ka reaguar për vdekjen në kohë të shkurtër të dy të burgosurve.

Kryetari i KMDLNJ-së, Behgjet Shala thotë për KosovaPress se Ministria e Drejtësisë dhe ajo e Shëndetësisë duhet të krijojnë kushte për trajtimin e të burgosurve me sëmundje.

“Ata duhet të krijojnë kushte brenda këtij departamenti duke siguruar një përkrahje më të madhe profesionale. Mjekë të profileve të ndryshme dhe një kërkesë e ripërsëritur e jona, duhet të ndërtohet një spital brenda sistemit korrektues të Kosovës. Për disa të burgosur, të cilët nuk paraqesin rrezikshmëri të lartë është lehtë edhe të dërgohen në spital rajonal apo në QKUK. Mirëpo, disa të burgosur që kanë një rrezikshmëri të lartë, aty duhet një përcjellje permanente, është e kushtueshme dhe kërkon kohë. Mandej edhe Forenzika Psikiatrike në Prishtinë edhe brenda QKUK-së nuk ka hapësirë të mjaftueshme për të burgosur. Është një hapësirë simbolike dhe nuk është në rregull që në një vend ku parësore është shëndeti publik për qytetarët, të sillet aty policia dhe të burgosurit”, thotë Shala.

Më tej, ai thekson se janë rreth 40 të burgosur të cilët kanë sëmundje të rënda.

“Është e pamundur që Shërbimi Korrektues i Kosovës, sipas vlerësimit tonë i ka minimumin 40 të burgosur, të cilët kanë sëmundje të rëndë, por edhe ndoshta edhe më shumë që kanë çrregullime mendore. Por, është e pamundur që me këtë staf që e kanë të kujdesen më seriozisht. Këta mundohen të mirëmbajnë situatën, por nuk kanë kapacitet për më shumë, sepse nuk kanë as bazë materiale e as mjek të profilit të duhur. Pastaj përgjegjësia kryesore kur të ndodhë ndonjë rast i shkon Shërbimit Shëndetësor të burgjeve”, shprehet ai.

Megjithatë, Ministria e Drejtësisë nuk ka në plan ndërtimin e spitalit për burgje.

“Në planin zhvillimor dhe legjislativ, nuk parashihet ndërtim i spitalit për burgje duke pasur parasysh specifikat që ka shërbimi dhe kapacitetet ekzistuese. Është në plan zgjerimi i stacionarit, ndërsa shërbimet spitalore, për të qenë ekuivalente me shërbimet e sektorit publik, parashihet të bëhen në spitale publike. Po ashtu, nuk ka numër të pacientëve për të arsyetuar themelimin e spitalit, marrë parasysh edhe kapacitetet humane”, thuhet në përgjigjen e kësaj ministrie.

KosovaPress gjatë ditës ka tentuar të merr një përgjigje edhe nga drejtori i Departamentit Shëndetësor të Burgjeve, Milazim Gjocaj, por nuk i njëjti nuk ka qenë i qasshëm.

Shëndetësia në burgje menaxhohet përmes 10 Njësive Shëndetësore në Burgje. Kujtojmë se në të gjitha institucionet korrektuese janë rreth 1 mijë e 500 persona.

Lajmet

Shëndeti i zorrëve, si ta mbroni sistemin tretës?

Published

20 minutes ago

July 11, 2025

UBT News

Gjatë dy dekadave të fundit, studimet kanë treguar se shëndeti i zorrëve ndikon drejtpërdrejt në mirëqenie, përmes mekanizmave që përfshijnë sistemin imunitar, mendor, humorin, lëkurën dhe madje edhe zhvillimin e sëmundjeve si kanceri.

Në një kohë kur stili i jetës modern përfshin konsum të ushqimeve të përpunuara, mungesë gjumi dhe stres të vazhdueshëm, është e rëndësishme të dini si të mbroni sistemin tretës, përpara se trupi të dërgojë sinjale alarmi.

Luftoni stresin

Stresi kronik është një nga faktorët më dëmtues për shëndetin e zorrëve. Ulni nivelet e ankthit përmes teknikave relaksuese si:

meditimi, joga, ecja në natyrë
masazhe relaksuese
kalimi i kohës me njerëz të dashur ose kafshë shtëpiake
dhe pse jo, duke qeshur – një refleks që sjell përfitime të shumta për trupin.

Përmirësoni cilësinë e gjumit

Mungesa prish ekuilibrin e zorrëve, dhe kjo, në kthim, ndikon negativisht në cilësinë e gjumit. Flini 7-8 orë çdo natë, në mënyrë të pandërprerë. Nëse kjo nuk është e mundur, kërkoni ndihmën e një specialisti.

Mos hani me nxitim

Përtypja e ngadaltë dhe e mirë i jep organizmit kohën e duhur për tretje e thithje të lëndëve ushqyese. Kjo zakon sjell përfitime kundër fryrjes, dispepsisë dhe problemeve të tjera gastrointestinale.

Qëndroni të hidratuar

Konsumoni mjaftueshëm ujë gjatë ditës për të forcuar mukozën e zorrëve dhe për të ruajtur ekuilibrin e mikrobiomës – komunitetit të baktereve të dobishme që jetojnë në zorrët tona.

Konsideroni probiotikët dhe prebiotikët

Prebiotikët janë fibra bimore të patretshme që ushqejnë probiotikët. Probiotikët janë mikroorganizma të gjallë që mbështesin florën bakteriale të zorrëve.

Mund të merren përmes ushqimeve ose suplementeve, por gjithmonë me rekomandimin e mjekut për të siguruar dozat dhe përbërjen e duhur.

Kontrolloni për ndjeshmëri ushqimore

Simptoma si fryrje, dhimbje barku, diare, skuqje të lëkurës, të përziera, lodhje apo refluks mund të tregojnë intolerancë ndaj ushqimeve. Mbani një ditar ushqimor për të identifikuar dhe shmangur ato që ju shkaktojnë probleme.

Adoptoni një plan të shëndetshëm ushqimor

Ndryshimet e thjeshta në dietë mund të sjellin përmirësime të ndjeshme. Filloni duke:

shmangur ushqimet e përpunuara dhe me përmbajtje të lartë sheqeri apo yndyre
shtuar më shumë fibra bimore dhe proteina të dobëta
duke konsumuar ushqime të tilla si:
– Të pasura me fibra: bishtajore, fasule, bizele, tërshërë, banane, manaferrat, asparagus, pras

– Hudhër dhe qepë: me veti antiinflamatore dhe imuno-fortuese

– Ushqime të fermentuara: kimchi, lakër turshi, kos, miso, kefir – burime natyrale të probiotikëve

Shëndeti i zorrëve është shumë më tepër se tretje e mirë është themeli i mirëqenies suaj mendore dhe fizike. Kujdesuni për të përditë, sepse ndikon në çdo aspekt të jetës suaj.

Lajmet

Vdes një person nga aksidenti në rrugën Prishtinë-Podujevë

Published

17 hours ago

July 10, 2025

UBTnews

Një person ka vdekur dhe katër të tjerë janë lënduar nga aksidenti që ka ndodhur mes një veture dhe traktori në rrugën Prishtinë-Podujevë.

Policia e Kosovës konfirmoi për KosovaPress se aksidenti ka ndodhur rreth orës 14:00.

“Si pasojë e aksidentit në vendin e ngjarjes ka humbur jetën një person dhe janë lënduar katër të tjerë. Personat e lënduar janë dërguar për tretman mjekësor ndërkohë që me rastin po merret njësiti i trafikut rajonal”.

Lajmet

Range Rover tashmë ka një logo të re

Published

17 hours ago

July 10, 2025

UBT News

Range Rover ka një logo të re. Megjithëse, një që nuk do ta shihni në një veturë.

Logo u shfaq kohëve të fundit për investitorët dhe është zhvilluar si një simbol për vendet ku nuk përshtatet shenja e njohur e markës si p.sh në një etiketë dhe brenda hapësirave të ngjarjeve ku një emblemë është më e përshtatshme.

Ndryshe, ajo që Range Rover po bën këtu nuk është pa precedent. BMW pesë vjet më parë debutoi një version të ri të logos së saj ikonike që e përdor në markë, por jo në vetura. Shumë marka makinash po debutojnë gjithashtu logo të reja.

Vetëm javën e kaluar, pamë për herë të parë logon e re të Bentley. Dhe Jaguar mori një logo të re si pjesë e transformimit total që është duke u zhvilluar aktualisht. Ky do të jetë një vit i madh për Range Rover, me mbërritjen e afërt të modelit kryesor tërësisht elektrik.

Do të duket identik me Range Rover-in e madh me benzinë. Logo dhe gjithçka.

Lajmet

KQZ miraton 566 kërkesa për ndërrim të qendrave të votimit

Published

18 hours ago

July 10, 2025

UBTnews

Në mbledhjen e Komisionit Qendror të Zgjedhjeve të mbajtur të enjten, më 10 korrik, u bë e ditur se është duke u zhvilluar periudha për ndërrimin e Qendrës së Votimit brenda komunës, për zgjedhjet lokale që do të mbahen me 12 tetor. Nga 28 qershori deri më 9 korrik 2025, janë pranuar 633 kërkesa – prej të cilave 566 janë aprovuar, ndërkaq 66 të tjera janë refuzuar.

Drejtori në Zyrën për Regjistrim, Certifikim dhe Kontrollin Financiar të Subjekteve Politike, Besnik Buzhala tha se janë refuzuar për shkak se nuk kanë bashkangjitur fotografinë e tyre duke mbajtur në dorë dokumentin identifikues.

“Periudha e shërbimeve të votuesve e cila ka filluar me datë 28 qershor dhe deri dje me datë 9 korrik 2025 në orën 16:00 janë parashtruar gjithsej 633 kërkesa për ndërrimin e qendrës së votimit nga të cilat 566 janë aprovuar, ndërsa 66 janë refuzuar për shkak se votuesit nuk kanë bashkangjitur fotografinë së bashku me dokumentet identifikues në dorë”, tha Buzhala.

Po ashtu, anëtarët e KQZ-së, u njoftuan nga Buzhala edhe për periudhën e aplikimit online për certifikimin e subjekteve politike dhe kandidatëve të tyre, e cila ka filluar më 26 qershor dhe do të përfundojë më 13 gusht 2025.

Deri më tani, Zyra për Regjistrim, Certifikim dhe Kontrollin Financiar të Subjekteve Politike u ka krijuar qasje në platformën për certifikim 47 subjekteve politike të regjistruara, 6 iniciativave qytetare dhe 1 kandidati të pavarur.

“Po ashtu periudha e aplikimit për certifikimin e subjekteve politike dhe kandidatëve të tyre që ka filluar me datë 26 qershor dhe do të përfundoj më 13 gusht 2025. I kemi shpërnda të gjitha të dhënat për hapjen e llogarive me qëllim të aplikimit për certifikim. Deri më datën 9 korrik 2025 janë hapur llogari të cilat janë aktive për 47 subjekte politike të regjistruara, gjashtë iniciativa qytetare dhe një kandidat të pavarur, totali i llogarive të hapura në total është 54”, tha Buzhala.

Anëtari i KQZ-së nga PDK-ja, Ilir Gashi, kërkoi nga Buzhala që në mbledhjen e radhës të ketë një raport shtesë për buxhetin shtesë për dërgimin e fletëvotimeve te qytetarët në diasporë, për të shikuar se a ka buxhet të mjaftueshëm.

“Po bëhen pothuajse katër javë që keni dërguar një kërkesë shtesë në institucione të Kosovës për me nda një buxhet shtesë për faktin se në rregulloret tona, ne kemi parapa që fletëvotimet e qytetarëve tanë në diasporë tua dërgojmë secilit në shtëpitë e tyre. Ky operacion kërkon buxhet shtesë dhe është një operacion i cili ka për synim të kthimit të integritetit të procesit në diasporë. Prandaj unë mendoj që ju do të duhej në mbledhjen e radhës të na bini një raport shtesë të detajuar sa i përket kësaj çështje sepse mos ndarja e këtij buxheti nënkupton edhe mos mundësinë e realizimit ë këtij operacioni. Ju duhet të na tregoni se a do të mundemi t’i tërheqim fletëvotimet me një operator të suksesshëm apo do të përballemi me problematikën e njëjtë”, theksoi Gashi.

KQZ u njoftua se është përzgjedhur operatori fitues në procesin e prokurimit “Auditimi i raporteve financiare të fushatës së zgjedhjeve për Zgjedhjet për Kuvendin e Kosovës 2025”. Së shpejti, auditorët do të fillojnë auditimin e raporteve financiare të subjekteve politike dhe raportet e audituara do të publikohen nga KQZ.

Gjithashtu në këtë mbledhje u miratua edhe vendimi për çregjistrimin e partisë politike “Lëvizja për Bashkim” e cila ka paraqitur në Zyrën për Regjistrim, Certifikim dhe Kontrollin Financiar të Subjekteve Politike (ZRCKFSP) vendimin dhe dokumentacionin mbështetës për pushimin e të gjitha aktiviteteve politike.

Pas këtij vendimi, Zyra do të njoftojë Bankën Qendrore të Kosovës për bllokimin dhe deri në mbylljen e llogarisë bankare dhe Administratën Tatimore për fshirjen e numrit fiskal.