Qendrat për shpërndarjen e ndihmës në Gazë do të mbyllen përkohësisht më 4 qershor, njoftoi fondacioni që udhëheq ato, teksa ushtria izraelite paralajmëroi se rrugët që çojnë drejt qendrave “konsiderohen zona të luftës”.

Njëzet e shtatë persona u vranë në jug të Gazës të martën, kur ushtria izraelite hapi zjarr pranë një qendre të ndihmës që drejtohet nga Fondacioni Humanitar për Gazën (GHF), që mbështetet nga Shtetet e Bashkuara.

Së fundi, Izraeli ka lehtësuar bllokadën në enklavën palestineze, por Kombet e Bashkuara kanë paralajmëruar se e gjithë popullsia e territorit është në rrezik nga zia e bukës.

Të mërkurën, Këshilli i Sigurimit i OKB-së pritet të votojë një rezolutë që bën thirrje për armëpushim dhe qasje humanitare në Gazë, një masë për të cilën SHBA-ja pritet të vendosë veto.

GHF-ja tha se “qendrat e shpërndarjes do të mbyllen për rinovim, riorganizim dhe përmirësim të efikasitetit të punës” të mërkurën dhe operacionet do të rinisin të enjten.

Ushtria izraelite, që ka konfirmuar mbylljen e përkohshme, paralajmëroi njerëzit kundër kalimin “në rrugët që çojnë drejt qendrave të shpërndarjes, të cilat konsiderohen zona të luftës”

GHF-ja nisi operacionet një javë më parë, por OKB-ja dhe grupet e tjera të mëdha të ndihmës kanë refuzuar që të bashkëpunojnë me të, duke ngritur shqetësime se kjo organizatë është krijuar për t’u përshtatur me qëllimet ushtarake të Izraelit.

Pas incidentit vdekjeprurës të së martës afër një qendre të GHF-së, sekretari i Përgjithshëm i OKB-së, Antonio Guterres, e cilësoi “të papranueshme” vrasjen e palestinezëve që po shkojnë për të marrë bukë në qendrat e shpërndarjes.

Autoritetet izraelite dhe GHF-ja – që përdor personel amerikan të sigurisë – kanë mohuar akuzat se ushtria izraelite qëllon ndaj civilëve që shkojnë për të marrë pako me ndihma në qendrat e GHF-së. Ushtria izraelite tha se ngjarja e së martës është duke u hetuar.

Izraeli ka intensifikuar përpjekjet për të mposhtur Hamasin – grupin palestinez të shpallur organizatë terroriste nga SHBA-ja dhe Bashkimi Evropian – i cili sulmoi Izraelin tetorin e vitit 2023, duke nxitur luftën në Gazë.

Ministria e Shëndetësisë në Gazën e udhëhequr nga Hamasi ka thënë se të paktën 4.240 persona janë vrarë që kur Izraeli ka rinisur ofensivën në territorin palestinez më 18 mars, teksa numri i përgjithshëm i viktimave në Gazë që kur ka nisur lufta ka arritur në mbi 54.000.

Ndërkaq, gjatë sulmit të Hamasit në jug të Izraelit u vranë afër 1.200 persona dhe u rrëmbyen afër 250 të tjerë.

Përveç incidentit në qendrën e ndihmës, agjencia për mbrojtje civile në Gazë të martën ka raportuar edhe për 19 të vrarë.

Ndërkaq, ushtria izraelite tha se tre ushtarë janë vrarë në veri të Gazës, duke shtuar se numri i përgjithshëm i ushtarëve izraelitë të vrarë që nga nisja e luftës është 424./REL/

Tarifat e importit të çelikut dhe aluminit nga SHBA-ja do të dyfishohen nga ora 04:01 sot në mëngjes, pas njoftimit të presidentit të SHBA-së Donald Trump.

Shkalla e tarifës do të rritet nga 25 në 50% të vlerës së mallrave, ndërsa Trump kërkon të korrigjojë çekuilibrat e dyshuara tregtare dhe të forcojë industrinë vendase në Shtetet e Bashkuara të Amerikës.

Masa ka të ngjarë ta bëjë më të vështirë importimin e produkteve në fjalë – dhe të çojë në çmime më të larta.

Në vitin 2024, SHBA-ja ishte importuesja më e madhe e çelikut në botë pas Bashkimit Evropian.

Sipas qeverisë amerikane, vendet më të rëndësishme të origjinës janë Kanadaja, Brazili dhe Meksika. Gjermania është gjithashtu midis 10 eksportuesve më të mëdhenj në SHBA.

Sipas Shoqatës Gjermane të Industrisë së Çelikut, SHBA-ja përbën tregun më të rëndësishëm të shitjeve për industrinë evropiane të çelikut.

Shtetet e Bashkuara të Amerikës furnizohen me alumin kryesisht nga Kanadaja, Emiratet e Bashkuara Arabe, Kina dhe Koreja e Jugut.

Trump tashmë ka njoftuar, kërcënuar ose zbatuar tarifa të shumta të tjera me qëllimin për të siguruar marrëveshje më të mira tregtare.

Mbetet e paqartë se si do t’i përgjigjet BE-ja masës së fundit.

Komisioni Evropian kritikoi ashpër njoftimin e presidentit amerikan në fundjavë dhe kërcënoi me një kundërpërgjigje para verës.

Megjithatë, sipas informacioneve të fundit, bisedimet kanë vazhduar dhe janë përshkruar si “shumë konstruktive”.

Një tjetër takim midis komisionerit të Tregtisë të BE-së, Maroš Sefcovic, dhe përfaqësuesit të Tregtisë së SHBA-së, Jamieson Greer, është planifikuar sot në Paris.

Nëse Trump i përmbahet vendimit të tij, BE mund të vendosë kundër-tarifa në një njoftim të ardhshëm./atsh

Lideri suprem i Iranit, Ajatollah Ali Khamenei, tha më 4 qershor se Teherani nuk do të heqë dorë nga pasurimi i uraniumit, duke refuzuar një kërkesë kyç të Shteteve të Bashkuara që synon zgjidhjen e mosmarrëveshjeve të kamotshme bërthamore.

Ai tha se ndalimi i pasurimit të uraniumit është kundër interesave të Iranit.

Propozimi i SHBA-së për një marrëveshje të re bërthamore iu prezantua Iranit të shtunën nga Omani, që ndërmjetëson bisedimet mes ministrit të Jashtëm iranian, Abbas Araqchi, dhe të dërguarit amerikan për Lindjen e Mesme, Steve Witkoff.

Pas pesë runde bisedimesh, disa çështje kyç mbeten të pazgjidhura, përfshirë insistimin e Iranit për të vazhduar pasurimin e uraniumit dhe refuzimin e Teheranit për të larguar stoqet ekzistuese me uranium të pasuruar në nivel të lartë, që është lëndë e mundshme për prodhimin e bombave bërthamore.

“Pasurimi i uraniumit është kyç në programin tonë bërthamor dhe armiqtë tanë janë përqendruar në pasurim”, tha Khamenei gjatë një fjalimi televiziv. Propozimi i SHBA-së “bie ndesh me besimin e shtetit tonë në vetëmjaftueshmëri dhe në parimin ‘ne mundemi’”, tha ai.

“Udhëheqësit e pasjellshëm dhe arrogantë të Amerikës vazhdimisht kërkojnë që ne nuk duhet të kemi një program bërthamor. Kush janë ata që të vendosin nëse Irani duhet të ketë pasurim”, shtoi ai.

Teherani tha se dëshiron të perfeksionojë teknologjinë bërthamore për qëllime paqësore dhe prej kohësh ka mohuar akuzat e fuqive perëndimore se po synon të zhvillojë armë bërthamore.

Presidenti amerikan, Donald Trump, ka rinisur fushatën e tij të “presionit maksimal” ndaj Teheranit që kur është rikthyer në Shtëpinë e Bardhë në janar. Kjo fushatë përfshin sanksione, por edhe kërcënime për ta bombarduar Iranin, nëse bisedimet nuk prodhojnë një marrëveshje.

Gjatë mandatit të parë më 2018, Trump u largua nga marrëveshja bërthamore që Teherani arriti më 2015 me gjashtë fuqi bërthamore. SHBA-ja rivendosi sanksionet e ashpra që kanë dëmtuar ekonominë e Iranit. Ndërkaq, Teherani u kundërpërgjigj me pasurimin e uraniumit përtej kufijve të përcaktuar në marrëveshjen bërthamore./REL/