Arbitrazhi ndërkombëtar në Gjenevë ka marrë vendim përfundimtar në favor të KEK-ut, duke vërtetuar se KEK ka realizuar furnizimin me energji në përputhje të plotë me dispozitat e Marrëveshjes për Furnizim me Shumicë (MFSh/BSA) dhe se palët e paditura (KEDS dhe KESCO) nuk kanë kryer pagesat brenda afateve të përcaktuara për disa periudha midis viteve 2020–2024.

“Korporata Energjetike e Kosovës Sh.A. (KEK) njofton opinionin publik se Tribunali Ad Hoc i Arbitrazhit, i themeluar sipas Nenit 28 të Marrëveshjes për Furnizim me Shumicë (MFSh/BSA), ka shpallur më 24 tetor 2025 vendimin përfundimtar në rastin KEK kundër KEDS dhe KESCO (Rasti Nr. 900020-2023), duke konfirmuar plotësisht kërkesat e KEK-ut dhe refuzuar pretendimet mbrojtëse të palëve të paditura. Gjatë shqyrtimit të çështjes, Tribunali ka konstatuar faktet e pakontestuara se KEK ka realizuar furnizimin me energji në përputhje të plotë me dispozitat e Marrëveshjes për Furnizim me Shumicë (MFSh/BSA) dhe se palët e paditura (KEDS dhe KESCO) nuk kanë kryer pagesat brenda afateve të përcaktuara për disa periudha midis viteve 2020–2024”, thuhet në njoftimin e KEK.

Sipas këtij vendimi KEDS dhe KESCO do të detyrohen që të paguajnë rreth 8.3 milionë euro, për interesin e akumuluar nga pagesat e vonuara;

“Gjithashtu, Tribunali ka vërtetuar se interesi për pagesat e vonuara është i paraparë dhe i lejuar me MFSh/BSA, dhe se kërkesa e KEK-ut për këtë pagesë është bërë në përputhje të plotë me detyrimet kontraktuale. Nga ana tjetër, vonesat në pagesa nga KEDS dhe KESCO nuk janë justifikuar nga asnjë ngjarje force madhore apo krizë energjetike, ndërsa KEK nuk ka shkelur asnjë parim të mirëbesimit, drejtësisë apo përgjegjësisë kontraktuale. Në bazë të vendimit të shpallur: KEDS dhe KESCO detyrohen të paguajnë KEK-ut rreth 8.3 milionë euro, për interesin e akumuluar nga pagesat e vonuara; KEK-ut i njihen dhe do t’i kompensohen kostot e procedurës së arbitrazhit, përfshirë shpenzimet e përfaqësimit ligjor dhe të ekspertëve, të cilat do të mbulohen bashkërisht nga palët e paditura (KEDS/KESCO). Procedura e arbitrazhit është zhvilluar në përputhje me rregullat UNCITRAL Arbitration Rules (2010), ndërsa vendi i arbitrazhit ka qenë Gjeneva, Zvicër. Vendimi është përfundimtar dhe i zbatueshëm”, thuhet mes tjerash në komunikatë.

Këtë e kanë quajtur një fitore në sektorin energjetik të Kosovës.

“Një fitore me rëndësi strategjike për KEK-un dhe sektorin energjetik të Kosovës. Ky vendim përbën një precedent të rëndësishëm ligjor për sektorin energjetik të vendit, duke forcuar pozitën kontraktuale dhe kredibilitetin institucional të KEK-ut. Ai konfirmon qartësisht sjelljen e përgjegjshme, transparente dhe profesionale të KEK-ut ndaj partnerëve dhe institucioneve, si dhe angazhimin për respektim të plotë të detyrimeve ligjore dhe kontraktuale. KEK shpreh falënderim të veçantë për ekipin e përfaqësimit ligjor të Squire Patton Boggs, si dhe për ekspertët financiarë dhe ligjorë për profesionalizmin dhe përkushtimin e treguar gjatë gjithë procesit të arbitrazhit”, shprehet mes tjerash.

KEK ka falënderuar Avokaturën Shtetërore të Republikës së Kosovës për mbështetjen dhe këshillimin.

“Po ashtu, KEK shpreh mirënjohje të veçantë për Avokaturën Shtetërore të Republikës së Kosovës për mbështetjen dhe këshillimin e vazhdueshëm profesional, veçanërisht gjatë fazave të hershme të përzgjedhjes dhe themelimit të Tribunalit të Arbitrazhit, si dhe për kontributin në sigurimin e përfaqësimit të duhur ligjor gjatë gjithë procesit. KEK mbetet e përkushtuar ndaj zbatimit të ligjit, operimit transparent dhe menaxhimit të përgjegjshëm, duke vepruar me integritet të plotë si ndërmarrja shtyllë e sistemit energjetik dhe ekonomisë së Republikës së Kosovës”, përfundon komunikata./EO

Paga minimale në Kosovë pritet të bëhet 500 euro, kështu u bë e ditur pas takimit të ministrit në detyrë Hekuran Murati me përfaqësuesit e komunitetit të bizneseve ku është diskutuar çështja e rritjes së pagës minimale.

Sipas Dhomës së Industrisë dhe Tregtisë dhe Sindikatës së Punëtorëve të Sektorit Privat, në këtë takim u kërkua që ky proces të shtyhet deri kur vendi të ketë një Qeveri dhe Kuvend funksional dhe jo të bëhet në një kohë fushate.

Bëhet e ditur se në takim, ministri në detyrë Hekuran Murati ka thënë se implementimi i pagës minimale do të fillojë që nga një janari i vitit të ardhshëm.

Drejtori ekzekutiv i Dhomës së Tregtisë dhe Industrisë Kosovë, Kushtrim Ahmeti në një prononcim për media tha se përveç kërkesës për tu shtyrë ky implementim, ka kërkuar edhe të funksionalizohet Këshilli ekonomiko-social dhe ky proces i pagës të implementohet përmes saj.

Përndryshe, Ahmeti tha se kjo duket si fushatë politike, pasi që lajmi nga kryeministri ne detyrë Albin Kurti u bë të dielën kur Kuvendi duhej të votonte për formimin ose jo të Qeverisë “Kurti III”.

“Nuk jemi kundër rritjes së pagës, por momentumi dhe situata politike të cilën po përballet vendi, nuk është e favorshme, prandaj i kërkuam Muratit qe ky proces të shtyhet derisa të kemi një qeveri fuqiplotë dhe një kuvend funksional dhe të kemi një analizë të fortë te situatës aktuale ekonomike të cilën e ka vendi, duke i marrë të gjithë faktorët për këtë çështje para se të dalin me propozime të gjitha palët sa i përket pagës minimale. Gjithashtu, një kërkesë eksplicite qe kishim ishte që të funksionalizohet Këshilli ekonomiko-social i cili vazhdon ende të jetë jofunksional dhe të shkojë ky proces i pagës minimale përmes Këshillit. Kjo automatikisht i ngjan fushatës politike, ne e dimë paga e propozuar nga kryeministri ishte ditën e diel kur tentoi të bënte qeverinë Kurti 3, ishte fushatë politike… I dëgjoi, mbetet me pa se çka, më shumë konsultativ”, tha Ahmeti.

Ndërkaq, kryetari i Sindikatës se Punëtorëve të Sektorit Privat, Jusuf Azemi i cili kishte kërkuar që paga minimale të jetë 600 euro, porse siç tha ai, nuk ka marrë miratimin e Muratit.

“Ne si udhëheqës të Sindikatës së Sektorit Privat kemi kërkuar që kjo pagë minimale të jetë 600 euro. Vlerësimi i tyre është që kjo pagë duhet të jetë 500 euro dhe e kam pyetur se kur mendoni se fillon së implementuari, sipas deklarimit të ministrit në detyrë është thënë që do të fillojë së implementuari me një janar, por megjithatë nuk e ka hedhë poshtë edhe propozimin tonë dhe është thënë se do të bisedojë me akterët kryesorë. Të gjithë akterët që ishim u pajtuam që paga minimale të jetë 500 euro dhe të fillojë së implementuari nga muaji janar”, tha Azemi.

Aktualisht paga minimale në vendin tonë është 350 euro bruto. Kjo rritje u bë në gusht të vitit të kaluar, disa ditë pasi hyri në fuqi Ligji për pagën minimale, i cili parashihte një rritje të pagës minimale në 264 euro bruto. Deri në fuqizimin e Ligjit të ri, paga minimale në Kosovë ishte 130 euro për punëtorët nën 35 vjeç dhe 170 euro për punëtorët deri në 65 vjeç./KP

Në një atmosferë madhështore, mes flamujve të mbi 190 shteteve dhe duartrokitjeve të mijëra pjesëmarrësve nga e gjithë bota, flamuri i Kosovës u valëvit me krenari në ceremoninë e hapjes së First Global Challenge 2025 në Panama. Ky është momenti kur rinia e Kosovës, përmes ekipit First Kosovo, hyn në arenën botërore të inovacionit, teknologjisë dhe kreativitetit.

Në këtë ngjarje madhështore, ekipi përfaqësues i Kosovës – First Kosovo, i përbërë nga të rinj të talentuar që janë përgatitur me muaj në laboratorët e UBT-së, do të garojë për të treguar kreativitetin, dijen dhe shpirtin inovativ të rinisë kosovare. Ata do të përfaqësojnë Kosovën në një nga garat më të rëndësishme botërore në fushën e robotikës dhe teknologjisë.

Tema e sivjetshme e garës, “Biodiversiteti dhe ndryshimet klimatike”, synon të nxisë të rinjtë të krijojnë zgjidhje teknologjike që ndihmojnë në mbrojtjen e mjedisit dhe ruajtjen e jetës në planetin tonë.

UBT, si partneri institucional që ka mbështetur këtë iniciativë që nga fillimi, është vlerësuar më herët me medalje të artë ndërkombëtare për kontributin e jashtëzakonshëm në promovimin e edukimit STEM dhe pjesëmarrjen e suksesshme të ekipeve kosovare në garat globale të robotikës.

Në këtë garë të dijes dhe inovacionit, të rinjtë e Kosovës po e bëjnë vendin tonë të njihet si një forcë e re kreative në hartën teknologjike botërore.

Kryetari i Kuvendit të Republikës së Kosovës, Dimal Basha, mori pjesë dhe mbajti fjalë përshëndetëse në ceremoninë e mbrëmshme solemne të shënimit të 102-vjetorit të Republikës së Turqisë, të organizuar nga Ambasada turke në Prishtinë.

Duke përcjell urimet më të sinqerta për popullin dhe shtetin turk kryetari Basha theksoi miqësinë e thellë mes dy popujve tanë, e cila shtrihet përtej kohës dhe lidhet ngushtë me historinë tonë.

Në komunikatën për media Basha citohet të ketë thënë se shqiptarët përgjatë shekujve kanë lënë gjurmë të pashlyeshme në historinë dhe zhvillimin e Turqisë.

“Që nga ditët më të vështira të luftës, periudhës së rindërtimit e deri në forcimin e kapaciteteve shtetërore, Republika e Turqisë ka qëndruar krah nesh me mbështetje institucionale, ekonomike e humanitare. Sot, marrëdhëniet tona po ndërtohen mbi arritje konkrete, projekte zhvillimore dhe partneritet të fuqishëm politik e institucional”, deklaroi kryetari i Kuvendit, duke shprehur mirënjohje të veçantë për Gjeneralin Ulutash dhe 730 ushtarët e kontingjentit turk që shërbejnë në kuadër të KFOR-it, forca këto që, siç tha kryetari Basha, vazhdojnë të jenë të pranishme për shkak të politikave hegjemoniste të shtetit serb, i cili nuk e pranon realitetin tonë dhe vazhdon të ketë pretendime territoriale mbi ne.

“Republika e Kosovës e vlerëson Turqinë si partner strategjik me të cilin ndajmë vlera të përbashkëta për zhvillim, stabilitet rajonal dhe prosperitet për popujt tanë. Në emër të Kuvendit të Republikës së Kosovës dhe qytetarëve tanë, urojmë popullin turk për 102-vjetorin e Republikës së Turqisë, me dëshirën që miqësia dhe bashkëpunimi ynë i shkëlqyeshëm të forcohen edhe më shumë në shërbim të paqes, mirëqenies dhe të ardhmes sonë të përbashkët”, tha në fjalën e tij kryetari Dimal Basha./EO