Lajmet

​Prokuroria Speciale kërkon që gjykimi ndaj Mustafës të nisë në korrik, mbrojtja e kundërshton

Published

5 years ago

on

Zyra e Prokurorisë Speciale në Hagë ka kërkuar që më 12 korrik të këtij viti të nisë gjykimi në rastin e ish-pjesëtarit të Ushtrisë Çlirimtare të Kosovës, Salih Mustafa, por këtë datë e ka kundërshtuar mbrojtja e të akuzuarit, e cila propozoi që fillimi i gjykimit të nis pas pushimeve verore.

Në konferencën përgatitore për gjykim në rastin e Salih Mustafës, ZPS-ja ka propozuar krahas fillimit të gjykimit, më 15 korrik të nisë edhe marrja e dëshmive të dy dëshmitarëve.

“Prokuroria kërkon që gjyqi të fillojë në korrik. Ne kemi dhënë datën 12 korrik të këtij viti, atë ditë mund të bëhet parashtrimi ose deklarata hyrëse e prokurorisë dhe pastaj Prokuroria mund të fillojë me hyrjen e dëshmitarëve dhe marrjen dëshmive me datën 15 korrik. Prokuroria planifikon që të marrë në pyetje dy dëshmitarë para se të fillojë pushimi veror i gjykatës pastaj të tjerët do të bëhen pas pushimit apo në shtator. Megjithatë nëse ju vendosni datë tjetër për fillimin e gjykimit apo marrjen në pyetje të dëshmitarëve të fillojë në shtator atëherë do kërkonim që deklarata hyrëse dhe dëshmitarët e prokurorisë të bëhen nga shtatori. Nëse nuk bëhen data që thamë, mirë është që të fillojë në shtator. Ne nuk duam t’i ndajmë argumentet tona hyrëse nga provat dhe dëshmitë që do marri” tha ZPS-ja.

Por ky propozim nuk u mbështet nga mbrojtja e ish-pjesëtarit të Ushtrisë Çlirimtare të Kosovës, Salih Mustafa.

Avokati Julius Von Bonne tha se fillimi i gjykimit ndaj klientit të tij duhet të nisë pas pushimit veror të Dhomave të Specializuara, pasi siç tha ai, nxjerrja e materialeve fillon javën e ardhshme.

“Ne nuk jemi dakord me afatin kohor, njoftimi është shumë i shkurtër dhe në fakt kemi planifikuar disa misione gjatë kësaj periudhe dhe do na bëhej shumë më e ngarkuar puna nëse do të duhej ta ndërprisnim atë që kemi planifikuar. Për këtë arsye nuk dua që të fillojmë procesin gjyqësor në datën e propozuar nga Prokuroria, por pas pushimit të verës së Dhomave së Specializuara, do ishte më mirë një proces të vijueshëm në vend që të kemi një fragment njëherë dhe të kemi pastaj pushimin e gjykatës dhe pastaj të vijojmë sërish… Besoj se do ishte e pamundur që ne të mund të fillonim më 12 korrik sepse nxjerrja e materialeve duhet të fillojë javën që vjen, nuk besoj që data 12 korrik është datë realiste. Do ishte mirë që procesin e gjykimit të nisim pas pushimit të verës së gjykatës”, tha ai.

Von Bone tutje deklaroi 15 gushtin si afat për përfundimin e hetimeve nga pala mbrojtëse.

“Ne do bëjmë hulumtime në dy materiale të tjera do intervistojmë një numër personash dhe kjo do varet edhe nga disponueshmëria e personave që do intervistohen, do të punojmë gjatë gjithë kohës së verës dhe besojmë që misioni ynë i fundit do jetë të jetë deri në javën e parë të gushtit dhe besoj që deri atëherë t’i kemi përfunduar hetimet tona kemi përcaktuar si datë të fundit 15 gusht por besoj që do jemi gati edhe më herët. Pak a shumë do jetë data e përfundimit të pushimit të Gjykatës. Sigurisht jo gjithmonë njerëzit janë të disponueshëm apo kanë kohë kur i duam ne për t’u intervistuan disa mund të mos jenë në Kosovë, prandaj do të na duhet më tepër kohë. Pak a shumë ky afat që kemi përcaktuar vetës”, u shpreh ai.

Trupi gjykues i interesua të di se përse këto hetime nuk kanë përfunduar gjatë procedurës paraprake, por me këtë rast avokti i komandat “Calit” tha se arsyet e moskryerjes së hetimeve i ka parashtruar tek një seancë e mëhershme gjatë procedurës paraprake.

Edhe mbrojtësja e viktimave, Anni Pues u pajtua që gjykimi të fillojë pas pushimit të verës.

Nëse trupi gjykues vendos të fillojë gjykimi në korrik, Pues tha se do të përmbush afatet për të përgatitur deklaratën hyrëse.

“Nga pikëpamja e viktimave është më mirë që të fillohet para pushimit të verës dua të shtoj që sigurisht viktimat duhet të bëhet drejtësia kanë pritur 22 vite dhe mirë është të fillohet me këtë çështje e një përgatitje sa më të mirë dhe të gjithanshme dhe kjo është në interes të të gjithëve dhe në interes të drejtësisë. Për mua është e rëndësishme…Për të bërë një deklaratë hyrëse sa më të plotë duhet të kemi kohë sa për tu përgatitur por kështu them se avantazhi I fillimit të gjyqit pas pushimit të verës është që në atë mënyrë ne të gjithë do jemi të përgatitur dhe mund të fillojmë me procedura ashtu siç duhet. Në vend që të bëjmë një pjesë të vogël të gjykimit të fillohet para pushimit të verës dhe pastaj të bëhen procedura të gjata”…Kjo do varet nga koha se kur do fillojmë nëse trupi gjykues vendos që të fillojmë në korrik do e përmbush këto afate por unë me kënaqësi do e bëja deklaratën time hyrëse në fillim të gjykimi pasi ka bërë prokurori deklaratën hyrëse”, tha ajo.

Në konferencën përgatitore për gjykim në rastin e Salih Mustafës e cila është mbajtur sot Prokuroria Special ka propozuar edhe një dëshmitar shtesë.

“Kemi përmendur faktin se po përgatisim një kërkesë për trupin gjykues për të shtruar disa prova në listën e provave materiale dhe kemi përmendur gjithashtu dy intervista shtesë që kemi bërë me dëshmitarë të Prokurorisë në fund të javës së kaluar dhe është bërë edhe një shtesë e mëtejshme intervistë me dëshmitarë është shtuar që do të ketë për pasojë shtimin e 1 një dëshmitari në listën e dëshmitarit të Prokurorisë. Ne këtë kërkesë do e bëjmë së bashku me disa kërkesa të tjera, pra kërkesa për shtimin e disa provave materiale në listën e provave materiale dhe përfshirjen e këtij dëshmitari në listën e dëshmitarëve”, theksoi Prokuroria.

Zyra e Prokurorisë Speciale dhe mbrojtja e viktimave kanë kërkuar që të vizitojnë vendngjarjen e cekur në aktakuzë, ku pretendohet se ka ndodhur ngjarja.

Prokuroria tha se është e nevojshme të bëhet një vizitë e tillë nëse kjo i ndihmon trupit gjykues dhe se kjo vizitë duhet të bëhet pasi Prokuroria dhe mbrojtja t’i ketë paraqitur argumentet e tyre.

“Është e nevojshme të bëhet vizitë në vendndodhje dhe nëse kjo do e ndihmoj trupit gjykues të krijoj mendimin e vetë çështjen për vendndodhjen, gjeografinë e vendit ne do propozimin që kjo të bëhet pasi prokuroria dhe mbrojtja të kenë paraqitur argumentet e tyre. Arsyeja për këtë është që gjykata të ketë një ide të qartë dhe një kuptim të qartë të çështjes dhe pasi të bëhet kjo vizitë që të kuptojnë se ku ishin këta në prill të vitit 1999 sepse faktikisht atje tani nuk asgjë që mund të shihet dhe prandaj është e rëndësishme që ju të kuptoni njëherë bazat e çështjes pastaj të shkoni për vizitë“, tha ZPS-ja.

Me propozimin e ZPS-së u pajtua edhe mbrojtja e viktimave, Anni Pues e cila tha se shihen se ku kanw ndodhur ngjarjet.

“Jam për një vizitë në vendndodhje dhe e mirëpresë propozimin e prokurorit që kjo të bëhet pasi të ketë mbaruar parashtrim i argumenteve nga prokuroria. Është mirë të vizualizohet se ku ndodhen ngjarjet, të shikohet sa ftoftë, sa ngrohtë dhe sa errët ka qenë, si mund të jenë ndjerë personat që kanë qenë aty, sa të lënduar mund të kenë qenë nga trupi dhe shpirti. Domethënë të gjitha ato që janë të bazuara në aktakuzë. Kjo është e rëndësishme për të përcaktuar përgjegjësinë dhe fajësinë në atë që do vendosi trupi gjykues”, tha ajo.

Por sipas mbrojtësit të Salih Mustafës, Julius Von Bonne nuk është e nevojshme një vizitë e tillë në vendndodhje.

Ai tha se edhe Prokuroria por edhe mbrojtja kanë thënë material të bollshëm për vendngjarjen. Mbrojtja e komandat “Calit”, kërkoi që nëse ndodh një vizitë e tillë të realizohet para se të ftohen për të dhënë dëshminë e tyre dëshmitarët.

“Ne nuk mendoj se ka gjë për të parë në vendndodhjen e krimit të pretenduar. Prokuroria dhe mbrojtja kanë dhënë shumë materiale për të parë se si ka qenë ai vend në ato kohë, dhe për të nëse do bëhet vizitë atje nuk ka asgjë për të parë është vetëm një ndërtesë e vogël që është aty e parëndësishme sa i përket aktakuzës, nëse do e shikojmë atë vendndodhje mund ta shikojmë edhe me video me në tre dimensione, kemi fotografi edhe Prokuroria nga të gjitha këndet, jemi më se të përgatitur për të filluar gjykimin pa pasur nevojë për një vizitë të tillë. Nëse mbrojtja e viktimave dëshiron të vizitojë vendndodhjen, ajo është e mirëpritur të shikojë atje dhe ta shikojw ashtu siç tha mbrojtja dhe Prokuroria por nuk mendoj që ka ndonjë çështje që ka mbetur pa diskutuar apo që nuk është vënë re në lidhje me të. Edhe Prokuroria, edhe mbrojtja kanë dhënë material të bollshëm në lidhje me këtë. Pra, pak a shumë kjo është pikëpamja, nëse bëhet ndonjë vizitë pavarësisht nga çështje logjistike mendoj kjo duhet të bëhet përpara se të thirren dëshmitarët për të dhënë dëshminë, nëse dëshmitarët do të flasin për atë hapësirë apo vend të jetë e qartë ku është, unë mendoj që nëse e bëjmë këtë në fund të paraqitjes së çështjes nga Prokuroria nuk është e dobishme”, tha ai.

Salih Mustafa, i njohur si komandati “Cali” ishte arrestuar në shtator të vitit 2020 dhe që nga ajo datë po vazhdon të mbahet në paraburgim në Hagë. Aktakuza kundër Mustafës u konfirmua më 12 qershor. Më 28 shtator, ish-eprori i UÇK-së, Salih Mustafa u paraqit para gjykatësit të procedurës paraprake.

Related Topics:
Continue Reading

Lajmet

UBT: Shkencë dhe teknologji për një jetë më të mirë

Published

11 hours ago

on

April 11, 2026

By

Programi i studimit në Shkencat e Ushqimit dhe Bioteknologji në UBT përfaqëson një platformë elitare arsimore, e cila është projektuar në përputhje të plotë me misionin institucional për të kultivuar liderë dinamikë dhe inovatorë në mjedisin akademik të shekullit të 21-të.

Ky program është i përkushtuar ndaj avancimit të njohurive dhe ekspertizës përmes një qasjeje shumëdisiplinore, duke i përgatitur studentët për të adresuar sfidat komplekse të industrisë ushqimore globale, shëndetit publik dhe sistemeve të qëndrueshme të ushqyerjes.

Përmes një kurrikule bashkëkohore, e cila është e krahasueshme me programet më të mira në Bashkimin Evropian dhe SHBA, UBT garanton një arsimim cilësor ku puna laboratorike, kërkimi shkencor dhe bashkëpunimi i ngushtë me industrinë janë prioritetet kryesore.

Studentët përfitojnë mundësi të shumta për lëvizshmëri ndërkombëtare dhe ndërveprim me një staf akademik ndërdisiplinor, gjë që siguron një kuptim të thellë të të gjithë zinxhirit ushqimor.

Përtej aspektit akademike, ky program ofron një mjedis mbështetës që nxit rritjen intelektuale dhe profesionale. Përmes programeve të mentorimit, projekteve praktike dhe praktikave në industri, studentët pajisen me aftësitë e nevojshme për tu zhvilluar në një peizazh global që ndryshon me shpejtësi.

Një pikë e fortë e këtij drejtimi është vetëqeverisja me pjesëmarrje, ku studentët përfshihen aktivisht në proceset vendimmarrëse, duke krijuar një ndjenjë përgjegjësie të përbashkët dhe transparence.

Ky fokus në lidership dhe perspektivë globale u mundëson të diplomuarve të zotërojnë njohuri të avancuara në kiminë e ushqimit, mikrobiologjinë dhe bioteknologjinë, duke i bërë ata të aftë të krijojnë dhe ruajnë artikuj ushqimorë të sigurt dhe me cilësi të lartë.

Programi luan gjithashtu një rol transformues në komunitet dhe rajon, duke shërbyer si një urë lidhëse mes shkencës dhe nevojave praktike të popullatës.

Për të mbështetur zhvillimin e gjeneratave të reja, UBT ofron mundësi të shkëlqyera financiare, duke përfshirë një bursë prej 20% për tre vitet e studimit për studentët e rinj që regjistrohen në këtë fakultet.

Përmes projekteve kërkimore të fokusuara në sfidat specifike rajonale, si praktikat e qëndrueshme bujqësore dhe siguria ushqimore, UBT kontribuon direkt në zhvillimin strategjik dhe ekonomik të Kosovës. Duke i pajisur studentët me kompetenca për të zgjidhur probleme komplekse dhe duke i nxitur ata drejt mësimit të vazhdueshëm, ky program siguron që çdo i diplomuar të jetë një agjent i ndryshimit pozitiv, i aftë për të udhëhequr me integritet dhe vizion në tregun ndërkombëtar të punës.

Aplikimet e hershme kanë filluar, këtu gjeni linkun për me shumë informata.

Continue Reading

Kujtesë

DITARI: Çfarë lajmesh kemi lexuar në çdo 11 prill, në vitet nëntëdhjetë 

Published

13 hours ago

on

April 11, 2026

By

11 prill 1994

Lajm i plotë:

NATO shënoi përmbushjen e vendosmërisë amerikane për veprim konkret kundër serbëve

Lajmi i parë që mbrëmë dhe sot u transmetua në masmediumet gjermane është bombardimi i objektivave ushtarake serbe në periferi të Gorazhdës nga ana e aeroplanëve bombardues amerikanë. Sulmi i aeroplanëve amerikanë u bë me pëlqimin e sekretarit të përgjithshëm të OKB-së, Butros Gali, i cili të shtunën deklaroi se duhet të përdoren të gjitha mjetet për t’i detyruar serbët që të ndalin pushtimet.

Sot TV Gjerman e dha me storie filmike procesin e bombardimit mbi objektivat ushtarake serbe, ku më së paku u shkatërruan dy tanke serbe. Si rezultat i këtij aksioni serbët u detyruan të ndërprejnë sulmet mbi popullsinë boshnjake të Gorazhdes.

Sulmin kundër serbëve e përshëndeti presidenti amerikan, Bill Klinton. Ai theksoi se ky aksion i NATO-s shënoi përmbushjen e vendosmërisë amerikane për të vepruar konkretisht kundër serbëve. Ai tërhoqi vërejtjen se në rast se serbët nuk ndalen, ata përsëri do të ndeshen me kundërgoditje të ngjashme nga NATO-ja.

Emërues i përbashkët i komentatorëve gjermanë të cilët mbrëmë paraqitën pikëpamjet e tyre qoftë nga Uashingtoni, Brukseli apo Boni, është se fillimi i veprimit të NATO-s përmes hedhjes së bombave kundër serbëve shënon hapin e parë që dëshmon se NATO-ja është e vendosur të veprojë edhe herave të tjera në mënyrë të ngjashme kundër agresorit serb. Edhe pse aksioni i NATO-s, i cili u ekzekutua përmes aeroplanëve luftarakë amerikanë, u vlerësua si veprim i vonuar, përkatësisht në momentin e fundit, kundër agresorit serb, me shpresë se ky rast nuk do të jetë i fundit.

Përderisa në Perëndim ky aksion i NATO-s kundër serbëve u mirëprit, ndërkaq në Moskë presidenti rus, i cili është përgatitur për udhëtim në Madrid, deklaroi se proteston ashpër kundër aksionit amerikan mbi serbët. Jelcini ishte i prekur sidomos pse SHBA-të para se të intervenonin në objektivat ushtarake serbe nuk janë konsultuar me Rusinë, prandaj, theksoi ai, ka biseduar për këtë me presidentin amerikan dhe ka kërkuar që për aksionet e ngjashme në ish-Jugosllavi Rusia të konsultohet paraprakisht.

 

Lajme të tjera:

Kryetari i Turqisë: Do ta përkrahim Kosovën e Shqipërinë në rast të agresionit serb

Demaçi prezentoi çështjen e Kosovës në një tubim ndërkombëtar në Veneci

Terroristët grekë vranë dy e plagosën tre ushtarë shqiptarë

Gjatë marsit në komunën e Gjilanit policia serbe bastisi 40 familje

Stërvitje të forcave serbe në Landovicë të Prizrenit

Në fshatrat e Opojës së Dragashit policia ndjek aktivistët

Represioni në Kosovë

Kryqi i Kuq i Suedisë: Të mos kthehen refugjatët shqiptarë

Në demonstratën e boshnjakëve në Bon morën pjesë edhe shqiptarë nga Kosova

Sanie Matoshi fituese e festivalit “Kosovarja këndon ’93-94”

Grupi folklorik dhe Dega e LDK-së në Nju-Jork dhanë 5.060 dollarë për Fondin e Kosovës

Ekstremisti serb Sheshel në Kosovë

 

Lajm i plotë:

Policët malazias vranë kolegun e tyre duke menduar se po shtijnë në një shqiptar

Gazeta serbe “Veçernje novosti” ka njoftuar ditëve të fundit për një proces gjyqësor në Podgoricë, në të cilin dy policë malazias, Velizar Darmanoviqi (34) dhe Predrag Vuçiniqi (22) u liruan nga akuza për vrasjen e kolegut të tyre Miodrag Rackoviq më 15 mars të vitit 1992 në Sukobinë të Ulqinit.

Siç njoftonte kjo gazetë në numrin e së shtunës “vrasja kishte ndodhur afër mesnatës më 15 mars 1992 në kufirin jugosllavo-shqiptar, ku patrulla e ministrisë së punëve të brendshme të Ulqinit ishte nisur për të arrestuar një qytetar shqiptar, i cili duhej të sillte material propagandistik në Jugosllavi. Patrulla ishte ndarë në dy grupe dhe kur këto ishin takuar në terr në një çufrrajë – kishin shtënë me armë në njëra-tjetrën, duke menduar se në anën tjetër është armiku nga Shqipëria”, ku u vra polici Miodrag Rackoviq.

 

 

11 prill 1995

 

Lajmet kryesore:

Kryetari Rugova arriti në Tiranë

Unioni Evropian intensifikon përpjekjet kundër keqësimit të mëtejshëm të gjendjes në Kosovë

David Atkinsonit nuk iu dha viza për të vizituar Kosovën

Mbledhje me udhëheqësit e nëngedëve të LDK-së në Skënderaj

Adem Demaçi: Kemi nevojë për një organizim më të mirë

Shqipëria respekton sanksionet

Një delegacioni i Pax Christit nga Holanda u takua me përfaqësuesit e FR të LDK-së

Gazeta “Nju-Jork Tajms” për situatën aktuale në Kosovë

Frika e një lufte të zgjeruar në Ballkan

Vazhdon procesi i montuar në Pejë

 

Lajm i plotë:

 

Në Bllacë të Suharekës humbën jetën dy fëmijë

Dje, rreth orës 16:30 minuta në lagjen “Zekolli” të fshatit Bllacë të Suharekës ndodhi një tragjedi e rëndë, me ç’rast humbën jetën Nexhat Abdyl Zekolli (1985) dhe Shpend Mehmet Zekolli (1986), njofton Komisioni për Informim i Degës së LDK-së në Suharekë.

Të dy fëmijët, duke u kthyer nga shkolla shkuan për t’u larë në vendin e quajtur “Lugu i botës”, ku Milaim Zekolli me ekskavator kishte hapur një pus për ujë.

Edhe pse Nexhati u nxor i gjallë nga uji i ftohtë, ai vdiq rrugës për në ambulancën e Suharekës, ndërsa të gjitha përpjekjet e fshatarëve për ta shpëtuar Shpendin ishin të kota.

 

Lajme të tjera:

Dhuna e përditshme në Kosovë

Policia serbe arrestoi dy dezertorë nga ish-ushtria jugosllave

Policia në Gjilan ndërpreu një ndeshje futbolli dhe burgosi Shemsedin Mustafën

Policia ndërhyri sërish në SHMT ” Marin Beçikemi” në Vushtrri

Policia rrahu arsimtarin Man Veliqi

Policia serbe sërish plaçkiti mall në tregun e plaçkave në Prishtinë

Po vazhdon xhirimi i filmit artistik të Ekrem Kryeziut

Persona të shumtë u arrestuan nën pretekst të dhënies e marrjes së ryshfetit

Kërkohet Haxhi Bytyçi

 

 11 prill 1997

Lajmet kryesore:

Konferencë për gazetarë e kryetarit të Republikës së Kosovës, dr. Ibrahim Rugova

Në Durrës arritën dy anije ushtarake italiane

Parlamenti turk mbështet dërgimin e trupave në Shqipëri

Danimarka e gatshme të marrë pjesë në misionin ushtarak shumëkombësh në Shqipëri

Parlamenti gjerman mbështet misionin e forcave shumëkombëshe në Shqipëri

OSBE‑ja rithekson rëndësinë e mbledhjes së armëve në Shqipëri

Nikollas Hill e Majkëll Mekllellen vizituan Universitetin e Prishtinës

Reagimet e shtypit serb pas tryezës së Nju Jorkut

Kryeministri maqedonas u takua me kancelarin gjerman

Presione në Kaçanik kundër pronarëve të ndërmarrjeve e dyqaneve

Për armëmbajtje u dënua me një vit burg

Dhuna e përditshme në Kosovë

 

 

Lajm i plotë:

Dje në Baicë të Gllogocit persona të panjohur vranë Ramiz Lekun

Dje, në orët e mëngjesit në fshatin Baicë, persona të panjohur me armë zjarri vranë Ramiz Ymer Lekun, punëtor në Kuvendin e instaluar komunal serb në Gllogoc, njofton KI i Degës së LDK-së në Gllogoc.

Bëhet e ditur se pas vrasjes së Ramiz Lekut, në afërsi të vendit të ngjarjes janë stacionuar forca të armatosura të policisë serbe, të cilat ishin të pajisura edhe me automjete, ndërsa me vete kishin edhe dy qenë nuhatës.

Gjatë ditës së djeshme pas vrasjes së Ramiz Lekut, forca të shtuara të policisë serbe u stacionuan edhe nëpër rrugë e udhëkryqe të qytezës së Gllogocit.

Ndërkaq, dje rreth orës 11:00, policia serbe bllokoi lagjen e Lekajve në Baicë dhe arrestoi Feriz Lekun (47) dhe Jetmir Lekun (21), të cilët nga dita e djeshme ende po mbahen në arrest.

Të përkujtojmë se më 29 qershor të vitit 1994, nga persona po ashtu ende të paidentifikuar, qe vrarë edhe babai i Ramizit, Ymer Leku.

Në përpjekje për të futur pasiguri e përçarje në mesin e shqiptarëve, shtypi serb njoftoi dje menjëherë se kinse vrasës të Lekut janë pjesëtarët e të së ashtuquajturës UÇK. Mediumet serbe kanë vepruar kështu edhe në dy raste të tjera, lidhur me vrasjen e Xunë Durmishit nga Rakinica e Skënderajt dhe të Isuf Halitajt e Fehmi Hazirajt të vrarë më 25 mars në fshatin Siçevë të Klinës. Mirëpo, pohimet për kolaboracionizëm, i kanë hdehur poshtë me shkrim dhjetëra shqiptarë të fshatrave prej nga ishin viktimat.

 

 11 prill 1998

Edicioni i parë (15:00)

Lajm i plotë:

Në rrugën kryesore të Prishtinës edhe sot defiluan në mënyrë të qetë mijëra qytetarë

Dhjetëra mijëra qytetarë shqiptarë të të gjitha moshave e gjinive, bënë sot një sheti protestuese në qendër të Prishtinës, në rrugën “Nëna Tereze”. Protesta u mbajt me moton “Kosova burgu më i madh në botë”.

Qytetarët filluan të grumbulloheshin para orës 12,00, ndërsa në mesditë, e gjithë rruga “Nëna Tereze”, prej ndërtesës së Kuvendit të Kosovës e deri te shtëpia e vjetër e mallrave u bllokua nga numri i madh i pjesëmarrësve në këtë shëtitje.

Ndryshe nga dita e djeshme, protestuesit sot nuk bartnin pankarta, nuk brohorisnin, por vetëm shetisnin të qetë, duke duartrokitur herë pas herësh.

Policia serbe në kohën sa zgjati kjo sheti e qytetarëve ndaloi qarkullimin e automjeteve rrugës kryesore të kryeqendrës.

Gjatë ditës së sotme protestuesit iu përmbajtën me përpikëri thirrjes së Këshillit Organizativ të Protestave dhe në orën 12. 30 u shpërndanë të qetë.

Policia serbe edhe sot përcolli me vëmendje pjesëmarrësit e kësaj proteste, e cila u mbajt me moton: “Kosova burgu më i madh në botë”, por kësaj radhe nuk intervenoi.

Shetitje të ngjajshme dhe me moto të njëjtë u mbajtën edhe në të gjitha qendrat e Kosovës. Në rrugën kryesore të Prizrenit edhe pse binte një shi i imët, ishin prezentë disa dhjetëra mijëra qytetarë. Qytetarët bënë shetinë pa pankarta dhe pa brohoritje. Por, pasiqë numri i pjesëmarrësve ishte i madh, në “Shadërvan” u krijuan dy rreshta të mëdhenj qytearësh, që shëtisnin në radhë, kurse në rrugët tjera kishte qytetarë të shumtë. Ishte e dukshme prezenca e forcave policore.

Në Suharekë edhe sot, në mënyrë spontane qytetarët dolën në qendër të qytetit për të protestuar kundër dhunës serbe mbi popullin shqiptar të Kosovës. Protesta filloi në ora 12 dhe mbaroi në ora 12,30. Në protestë morën pjesë rreth 10. 000 qytetarë.

Në orët e para të mëngjesit e me pretekst të kontrollimit të automjeteve në komunikacion, policia ka përjashtuar nga qarkullimi në komunikacion një pjesë të madhe të autobusëve. Kjo ka ndikuar që një numër imjaft i madh i qytetarëve të mos mund të marrin pjesë në protestë.

Edhe sot forcat policore ishin prezente, por intervenime nuk pati, kështu që protesta përfundoi pa ekscese, njofton KI i Degës së LDK-së në Suharekë.

Pejë: Në qytet, në orën 12:00 pati shetitje të qytetarëve nëpër të gjitha rrugët që shpiejnë në qendër. Nga mëngjesi, në hyrje të qytetit ishin përqëndruar forca të mëdha të policisë serbe, të cilat i legjitimonin qytetarët.

Numri i qytetarëve që mori pjesë sot në shetitje nuk ishte aq i madh për shkak se ishte ditë me shi, njofton Komisioni për Informim i Degës së LDK-së në Pejë.

Gjilan: – Edhe sot, në Gjilan, në mënyrë masive, me dhjetëra mijëra qytearë iu përgjigjën ftesës së organizatorit për shëtitje të qetë e spontane.

Ashtu, siç ishte paraparë nga Këshilli Organizativ i Protestave, sikurse dje, edhe sot, më 11 prill, para orës 12, në komunën e Gjilanit, turma të mëdha qytetarësh ia mësynë qytetit, për t’i pushtuar trotuaret e tij. Sot, për shkak se ishte edhe ditë tregu, qyteti i Gjilanit ishte i bllokuar, kështu që edhe shetitja ishte e zgjatur për shkak se kordonet e policisë, nuk lejonin qytetarët të niseshin drejt qendrës dhe tregut, për të kryer shërbimet e tyre, njofton KI i Degës së LDK-së në Gjilan.

Mijëra qytetarë shetiten sot në mesditë edhe në Malishevë, Shtime, Han të Elezit e në Rahovec, ndonëse në shumicën e këtyre qendrave moti ishte me shi.

 

 

Lajm i plotë:

Raporti i dhunës në Skënderaj, 74 të vrarë në periudhën janar-mars 1998

Vrasje 74, plagosje 22, ndalim arbitrar 144, arrestim arbitrar 34, bisedë informative 52, torturë fizike 107, torturë psikike 686, dënim për vepër penale 2, dënim për kundërvajtje 5, marrje e pasaportës 5, të zhdukur 18, bastisje 65, kërcënim 423, marrje peng 110, tentim vrasje 572, fyerje 24, lëndime trupore 105, plaçkitje 76, ndërhyrje në institucionet humanitare 1, ndërhyrje në institucionet arsimore 5, ndërhyrje sociale 5, punëtorë në botën e jashtme 1, ndalim kthimi në atdhe 2, azilkërkues të kthyer 2, vizitë e policisë në shtëpi 36, goditje e shtëpive me armë të ndryshme 53, pengim për t’u varrosur në varrezat e veta 5. Gjithsej 2. 635 raste të shkeljeve, njofton “Bujku”.

 

Lajme të tjera:

Civilët serbë rrahën disa të rinj shqiptarë

Forcat serbe plaçkitën lagjen e Kastratëve në Turiçefc

Izet Ismaili: Popullin e Drenicës e kërcënon uria

Gllogoc: U morën në polici tre veprimtarë politikë dhe humanitarë

Ahmet Mustafa u lirua dje në gjendje të rëndë fizike

Policia serbe arrestoi shumë persona nga Hasi

Shpërthim i zjarreve në malet e Vushtrrisë e të Kaçanikut

Forca ushtarake u vendosën në aeroportin bujqësor të Dushanovës së Prizrenit

Serbët formojnë edhe një qendër propagandistike gazetare në Prishtinë

Pengohet qarkullimi i autobusëve nëpër Komoran

U lirua objekti i shkollës së mesme në Rahovec

Në shkollën e Janjevës zvarritet kthimi i nxënësve shqiptarë

 

 

Edicioni i dytë (19:30)

Lajmet kryesore:

Kryetari Rugova priti diplomatin rumun Jon Donka

Forca të mëdha ushtarake u stacionuan në zonën kufitare Kosovë-Shqipëri

Ushtria serbe provokon banorët e fshatrave të Gjilanit

Në rajonin e Hasit policia bastis familjet shqiptare

Në Mitrovicë dolën në shetitje proteste 20 000 vetë

Konferencë për Kosovën në Kaliforni

Në Mitrovicë u bastis një familje shqiptare

Marrje në biseda informative

Policët dhe civilët serbë keqtrajtojnë shqiptarët në Gjilan

Foto: Skenderaj

 

Continue Reading

Vendi

Vdes ish-kongresisti Eliot Engel, zë i fuqishëm në mbështetje të Kosovës

Published

1 day ago

on

April 10, 2026

By

Ish-kongresisti amerikan Eliot Engel ka vdekur në moshën 79-vjeçare, duke lënë pas një trashëgimi si një nga mbështetësit më të mëdhenj të Kosovës. Ai u largua nga Kongresi i Shteteve të Bashkuara në janar 2021, pas mbi 30 vjetësh shërbim.

Kryetarja e Kuvendit të Kosovës, Albulena Haxhiu, e cilësoi vdekjen e tij si humbje të një miku të dëshmuar dhe përkrahësi të palëkundur të lirisë dhe shtetësisë së Kosovës. Ajo theksoi se Engel, gjatë dekadave në Kongres, ishte në anën e drejtë të historisë – nga mbështetja për ndërhyrjen e NATO më 1999 kundër regjimit të Slobodan Milošević, deri te përkrahja për pavarësinë e Kosovës më 2008.

Edhe kongresisti Ritchie Torres e vlerësoi Engelin si një zë të fortë për Kosovën dhe komunitetin shqiptar në kohë kur pak të tjerë i kushtonin vëmendje.

Engel, pjesë e Partisë Demokratike, përfaqësoi që nga viti 1989 një zonë të Bronksit në New York City me komunitet të madh shqiptar. Ai ishte ndër figurat kyçe në sigurimin e mbështetjes së Kongresit për njohjen e pavarësisë së Kosovës në vitin 2008.

Për kontributin e tij, Kosova ka emërtuar rrugë dhe autostradë me emrin e tij, si dhe ka lëshuar pullë postare me portretin e Engelit. Ndërkohë, qëndrimet e tij pro Kosovës e bënë figurë të diskutueshme në Serbi, e cila vazhdon të kundërshtojë pavarësinë e saj.

Gjatë një seance dëgjimore në vitin 2020, Engel kishte shprehur lidhjen e veçantë me rajonin, duke theksuar se asnjë vend në Ballkan nuk e kishte prekur më shumë se Kosova.

Ai hyri në Kongres në periudhën e shpërbërjes së dhunshme të Jugosllavisë dhe u angazhua në çështjet e rajonit përmes Komitetit për Punë të Jashtme, duke u bërë një nga njohësit më të mirë të Ballkanit në politikën amerikane.

Continue Reading

Aktualitet

Kalon në parim ligji për sigurime shëndetësore dhe çmimet tavan

Published

1 day ago

on

April 10, 2026

By

Në vazhdimin e seancës së dytë të jashtëzakonshme të pasdites, Kuvendi i Kosovës ka miratuar në parim projektligjin për sigurimin e detyrueshëm të kujdesit shëndetësor dhe atë për çmimet tavan.

Projektligji për sigurimet shëndetësore u miratua me 65 vota për, duke marrë mbështetje edhe nga një pjesë e opozitës, e cila e cilësoi atë si të domosdoshëm. Ky projektligj parasheh krijimin e një pakete bazike shëndetësore që do të përditësohet çdo vit, ndërsa kontributet do të jenë 3.5 për qind nga paga e të punësuarit dhe 3.5 për qind nga punëdhënësi, për financimin e fondit të sigurimit.

Megjithatë, u theksua se funksionalizimi i Sistemit Informativ Shëndetësor mbetet parakusht për zbatimin e tij, ndërkohë që digjitalizimi i këtij sistemi ende nuk është përmbyllur. Një ligj i ngjashëm ishte miratuar edhe në vitin 2014, por nuk kishte gjetur zbatim praktik. Ndërkaq, ky projektligj ishte rrëzuar nga Gjykata Kushtetuese në janar për shkak të miratimit jokushtetues. Shqyrtimi i dytë i tij pritet të bëhet më 23 prill.

Në të njëjtën seancë, Kuvendi miratoi në parim edhe projektligjin për çmimet tavan me 63 vota për, pa mbështetjen e opozitës. Sipas ministrit të Financave, Hekuran Murati, ligji synon mbrojtjen e qytetarëve dhe do të përdoret si masë e jashtëzakonshme në raste të destabilizimit të tregut, duke theksuar se nuk është kundër tregut të lirë, por kundër abuzimeve me çmimet.

Nga ana tjetër, deputetët opozitarë e kundërshtuan projektligjin, duke vlerësuar se ai rrezikon ndërhyrjen në tregun e lirë dhe i jep Qeverisë kompetenca të drejtpërdrejta për kontrollin e çmimeve. Ata ngritën shqetësime edhe për mënyrën e funksionimit të bordit të paraparë në projektligj, duke e cilësuar atë si jopavarur dhe me mungesë të metodologjisë së qartë për vendimmarrje.

Continue Reading

Të kërkuara