Lajmet

​Për dy muaj regjistrohen mbi 220 raste të reja me kancer

Kurtishi në një intervistë për KosovaPress thotë se është rritur numri i pacientëve të prekur me sëmundje malinje.

Publikuar

Në Klinikën e Onkologjisë, vetëm gjatë muajve janar dhe shkurt janë regjistruar 220 deri në 230 raste të reja me kancer.

Drejtori i Klinikës së Onkologjisë, Ilir Kurtishi në një intervistë për KosovaPress thotë se është rritur numri i pacientëve të prekur me sëmundje malinje. Sipas onkologut, mbeten brengosëse rastet që lajmërohen me vonesë për trajtim në klinikë.

“Numri i pacientëve ka ngritje nga viti në vit, dhe vetëm gjatë muajve janar dhe shkurt ne kemi regjistruar rreth 220-230 raste të reja, që i bie të ketë rritje të sëmundjeve malinje nga viti paraprak, meqenëse në vitin 2020 e kemi mbyllur me 10%-12% raste më shumë sesa në vitin 2020. Ky trend i rritjes me sëmundje malinje, ne lutemi që të mos vazhdojë, por në bazë të të gjitha të dhënave dhe shënimeve që ne i disponojmë, ky trend vazhdon të ngritët dhe kjo është shqetësuese pasi që ka edhe raste, të cilat lajmërohen në klinikë tek zakonisht janë pak më të vona, ku trajtimi i sëmundjes është pak më i vështirë”, thotë Kurtishi.

Brenda 24 orëve, numri i pacientëve që marrin shërbime në Klinikën e Onkologjisë arrin deri në 400, e që siç thotë Kurtishi, të gjithë këta marrin shërbimet e nevojshme.

“Ne trajtojmë ‘tumoret solit’ tek të gjithë personat, pra tumorët johematologjik dhe numri i pacientëve të cilët e frekuentojnë Klinikën e Onkologjisë brenda 24 orëve kap shifrën deri në 400 persona. Rreth 200-250 persona marrin shërbime të kimioterapisë ose onkologjisë mjekësore dhe rreth 120-130 pacientë bëjnë shërbime të rrezatimit së bashku me shërbimet tjera që ne i kemi në klinikë siç është shërbimi i transfuzionit dhe shërbimet tjera të hospitalizimit të pacientëve”, shprehet ai.

Drejtori i Onkologjisë apelon për kujdes nga faktorët që rrezikojnë shëndetin e njeriut, e që mund të kenë ndikim edhe në shfaqjen e kancerit.

“Realisht faktorët që ndikojnë janë të ndryshëm, pasi që edhe sëmundja është multifaktoriale, por ne kemi disa faktorë, të cilët mund të ndikojnë, dhe disa faktorë që nuk mund të ndikojnë. Ndikon stili i jetës, kequshqyerja ose ushqimi i pasur shumë me sheqer e yndyra, kripëra dhe me mish të fërguar, pastaj mungesa e aktiviteti fizik, ekspozimi i rrezeve të diellit, disa infeksione virale, bakteriale si dhe faktor shumë dominonte tek sëmundjet malinje është tek sinuset e mushkërive, konsumimi i duhanit, alkoolit, përdorimi i kontraceptivëve tek femrat si dhe këtu ju bashkëngjitën dhe faktorët trashëgues që ne i kemi, trashëgimia, mosha dhe gjinia. Në këtë mënyrë sëmundja është multifaktoriale, por kjo nuk do të thotë që ne t’i largohemi të gjithë këtyre faktorëve dhe të mos kemi sëmundje malinje, por ato mund të shfaqen, por është evidente që nëse i largojmë këta faktorë impakti i shfaqjes së sëmundjes është më i vogël”, thekson onkologu.

E gati çdo i dyti pacient që ka shkuar për trajtim në Klinikën e Onkologjisë, është lajmëruar me konornavirus.

Kurtishi thotë se është fat i mirë që shumë nga ta, këtë sëmundje e kanë përballuar si një grip të zakonshëm.

“Realisht një numër të saktë nuk kemi, mirëpo në bazë të të dhënave dhe lajmërimit të pacientëve të cilët trajtohen në Klinikë të Onkologjisë, mund të themi që gati çdo i dyti pacient, i cili është lajmëruar në klinikë tek ne, sidomos këto dy-tre muajt e fundit me valën e re të COVID-it, kanë qenë të infektuar me COVID, mirëpo fati i mirë i gjithë kësaj është që shumica apo të gjithë e kanë përballuar sëmundjen si një grip të zakonshëm… Realisht, e kemi menduar si shumë problem , pasi që janë kategorizuese që pacientët me kancer në grupin e katërt të atyre të cilët mund të përfundojnë me fatalitet, kjo ka qenë në vitin 2020, mirëpo forma fillestare e COVID-it, edhe atëherë pacientët onkologjikë e kanë përballuar lehtë sëmundjen, por kohëve të fundit sidomos me valën e re dhe me omikron kjo gati është bërë si një grip i zakonshëm dhe shumica e pacientëve onkologjikë, sidomos ata që kanë qenë në trajtim onkologjikë e kanë kaluar infeksionin me COVID si një grip të zakonshëm”, thotë ai.

Ndonëse ka numër të madh të pacientëve me sëmundje malinje në vendin tonë, Kurtishi tregon se shumica prej tyre marrin shërbime falas, me standarde botërore, me staf të kualifikuar në Klinikën e Onkologjisë në Prishtinë. 

Lajmet

Fakulteti i Medias dhe Komunikimit në UBT organizoi tryezë diskutimi në ditën botërore të lirisë së shtypit

Publikuar

nga

3 maji njihet si dita botërore të lirisë së shtypit, ditë kjo shënohet që nga viti 1993 nga Asambleja e Përgjithshme e Kombeve të Bashkuara.

Me këtë rast fakulteti i Medias dhe Komunikimit në UBT organizoi tryezë diskutimi me profesorë dhe panelistë, në të cilën folën për lirinë e medias në Kosovë.

Mirëpo mëngjesin e së premtes në indeksin vjetor të “Reporterëve pa Kufij” për Kosovën nuk erdhën lajme të mirë. Vendi ynë shënoi rënie të lirisë së shtypit për 19 vende. Andaj Dekani i Fakultetit, Ferid Selimi, komentoi këtë rënie të lirisë së shtypit.

“Përderisa para dy, tre vitesh ne jemi lavdëruar se po ecim para me lirinë e shtypit, prapë këtë vit kemi një ngecje, një rënie të lirisë së shtypit, ajo ndoshta ndodh gjithkund, por ne si vend i vogël, një vend që gjithmonë ka luftuar për liri dhe pavarësi, shihet dhe merret si me një kompetencë, me një përgjegjësi më të madhe. A thua po bëjmë ne sa duhet për mediat në përgjithësi sepse kur bëjmë për media bëjmë për njerëzit”, deklaroi ai.

Profesori në Media dhe Komunikim, Votim Hanolli, duke folur për indeksin e Reportërëve pa Kufij, shtoi se rënia e Kosovës në indeksin e lirisë së shtypit ka ardhur si pasojë e disa faktorëve.

“Sipas analistëve qe janë marrë me ketë indeks, kjo rënie duhet të parë në kontekstin e tensioneve në Mitrovicë, ku gazetarët në Kosovë janë përballur dhe kanë duruar shumë sulme fizike ndaj tyre, të cilat kanë qenë të shumta. Ndërkohë që partia në pushtet shtoi trysninë ndaj medias së pavarur, ka pasur gjithashtu një lloj përndjekje administrative ndaj stacionit privat televiziv KlanKosova, nga ana tjetër zgjedhja e Drejtorit të RTK-së që ishte e lidhur me kampin qeveritar…… konsiderohen rreziqet e shoqërisë dhe rreziqet politike”, deklaroi ai.

Në raportin për Kosovën, po ashtu thuhet se gazetarët vazhdojnë të jenë cak i sulmeve politike. Për këtë profesori Safet Zenjullahu tha se gazetarët e mirëfilltë nuk duhet të bazohen në atë se çfarë kërkon pushteti, por në atë që i nevojitet publikut.

“Ajo çfarë kërkon pushteti kurrë nuk është gazetari profesionale, pushteti kërkon lavd ndërsa publiku i mirëfilltë kërkon informacion të duhur, të palulëzuar, e kërkon informacionin të pastër ashtu siç është. Në këto kërkesa nuk qëndrojnë gazetarët, qëndrojnë pronarët”, deklaroi Zejnullahu.

Pjesë e panelit ishte edhe profesoresha Gjylie Rexha. Ajo kërkoi që të diskutohet më shumë për përgjegjesinë.

“Në këtë ditë le të merrim edhe me përgjegjësinë, jo vetëm me lirinë e cila na takon dhe sa më shumë të jemi të përgjegjshëm se si e zbatojmë lirinë që na takon si e drejtë elementare, aq më mirë do të mund ta bëjmë edhe gazetarinë dhe profesionin dhe mbi të gjitha më shumë të realizojmë vetën tonë si profesionistë në këtë detyrë shoqërore”, deklaroi Rexha.

Ndërkohë profesori Musa Sabedini, që njëkohësisht është edhe anëtar i Këshillit të Mediave të Shkruara shprehu shqetësimin që shumica e këtyre mediave nuk janë anëtare të këtij Këshilli vetërregullues.

“Janë 500 e disa portale në Kosovë që funksionojnë ose të paktën janë të regjistruara, sepse disa janë edhe efektive, prej tyre vetëm 71 janë anëtare të Këshillit. Të tjerët nuk pranojnë sepse kanë frikë me u monitoru, sepse vinë palët ankohen, bëjnë padi. Këshilli jep dënim moral nuk jep dënim me gjobë sepse nuk e ka atë mandat”, deklaroi ai.

Në Indeksin e saj Botëror të Lirisë së Shtypit për vitin 2024, Kosova renditet e 75-ta nga 180 shtete, për dallim nga viti i kaluar që ishte në vendin e 56-të. Edhe shtetet e tjera të rajonit të Ballkanit Perëndimor kanë shënuar kthim prapa sa i përket lirisë së medias. Shqipëria ka rënë nga vendi i 96-të në atë të 99-të. Në Shqipëri, sipas Reporterëve pa Kufij, gazetarët përballen me presion politik, veçmas gjatë zgjedhjeve./UBTNews/

Realizoi: Fjolla Gashi

Vazhdo të lexosh

Lajmet

​Petkoviqit i refuzohet vizita në Kosovë

Publikuar

nga

Ministria e Punëve të Jashtme dhe Diasporës e Kosovës ka konfirmuar se shefit të Zyrës për Kosovën në Qeverinë serbe, Petar Petkoviq, i është refuzuar vizita në Kosovë.

Lajmi u konfirmua për Radion Evropa e Lirë, por nuk treguan arsyet e refuzimit të kërkesës për vizitë.

Më herët gjatë 3 majit, e ashtuquajtura Zyra për Kosovën në Qeverinë serbe tha se Petkoviq kishte kërkuar që të vizitonte Kosovën për Pashkët Ortodokse gjatë fundjavës.

Petkoviq ishte parparë të merr pjesë në liturgjinë e mesnatës për Pashkët në Manastirin e Deçanit, pastaj në shërbesën në Manastirin e Graçanicës në mëngjesin e Pashkëve dhe në një takim me të rinjtë në Manastirin e Draganacit.

Edhe në të kaluarën, Kosova ka refuzuar kërkesat e parashtruara nga Petkoviq për të zhvilluar vizita, duke thënë se refuzimi ishte për shkak të “deklaratave provokuese”.

Në janar 2024, Serbia ia refuzoi kërkesën për vizitë ministrit të Punëve të Brendshme të Kosovës, Xhelal Sveçla. Ai kishte planifikuar që të vizitonte komunat Preshevë, Medvegjë dhe Bujanoc, që janë të banuara me shqiptarë.

Çështja e vizitave zyrtare mes Kosovës dhe Serbisë rregullohet përmes një marrëveshjeje të arritur në kuadër të dialogut për normalizim të raporteve, që ndërmjetësohet nga BE. Këto vizita duhet të paralajmërohen përmes zyrtarëve ndërlidhës të Kosovës dhe Serbisë. Ndërkaq, autoritetet e shteteve përkatëse duhet t’i autorizojnë ato.

Vazhdo të lexosh

Lajmet

​Pakistani nis misionin në Hënë

Publikuar

nga

Pakistani të premten nisi misionin e tij të parë hënor iCube-Q në bordin e sondës pa pilot të Kinës Chang’e 6 nga qyteti kinez Hainan.

iCUBE-Q, ose CubeSats, u lançua rreth orës 17:27 (09:27 GMT) nga faqja e nisjes hapësinore Wenchang, në bordin e misionit Chang’e-6 që shpërtheu në hapësirë me raketën Long March5 Y8.

Kryediplomati pakistanez në Pekin, Khalil Hashmi konfirmoi në X se lëshimi ishte “i suksesshëm”. Ai do të “vendoset në orbitën e Hënës më 8 maj”, tha Hashmi, i cili mori pjesë në ceremoninë e nisjes në Hainan. Orbiteri iCUBE-Q mbart dy kamera optike për të xhiruar sipërfaqen hënore.

Instituti i Teknologjisë Hapësinore i Pakistanit, në bashkëpunim me Universitetin e Shangait të Kinës dhe agjencinë kombëtare hapësinore të Pakistanit SUPARCO, zhvilluan së bashku iCUBE-Q.

Qëllimi kryesor i CubeSats është të lehtësojë kërkimin shkencor, zhvillimin e teknologjisë dhe iniciativat arsimore në eksplorimin e hapësirës.

Sipas Administratës Kombëtare të Hapësirës së Kinës, sonda Chang’e 6 do të mbledhë mostra nga ana e largët e Hënës, duke e bërë misionin të parin e këtij lloji në historinë njerëzore.

Anija kozmike Chang’e-6, si paraardhësi i saj Chang’e-5, përbëhet nga një orbiter, një tokëzues, një ngjitës dhe një kthim. Chang’e-5 u kthye në tokë në dhjetor 2020 me mostrat e para të tokës hënore në më shumë se katër dekada.

Pasi të arrijë në Hënë, ai do të bëjë një ulje të butë në anën e largët. Brenda 48 orëve pas uljes, një krah robotik do të shtrihet për të hequr gurët dhe dheun nga sipërfaqja hënore.

Pas mbledhjes së mostrave, anija kozmike pa pilot do të kthehet në Tokë, duke u ulur në rajonin autonom të Mongolisë së Brendshme të Kinës veriore. I gjithë fluturimi ka të ngjarë të zgjasë 53 ditë.

Përveç CubeSat nga Pakistani, misioni Chang’e-6 transporton gjithashtu një numër ngarkesash të tjera ndërkombëtare në hënë, duke përfshirë analizuesin e joneve të sipërfaqes hënore të Agjencisë Evropiane të Hapësirës, instrumentin e zbulimit të radonit të Francës, reflektorin e këndit laser të Italisë.

Kryeministri i Pakistanit Shehbaz Sharif gjithashtu përgëzoi kombin dhe shkencëtarët për nisjen e misionit të parë në orbitën hënore./AA

Vazhdo të lexosh

Lajmet

​NATO e BE dënojnë sulmin kibernetik të Rusisë ndaj Gjermanisë e Çekisë

Publikuar

nga

NATO dhe BE dënuan të premten sulmin kibernetik të Rusisë kundër Gjermanisë dhe Çekisë.

“Unë dënoj fuqishëm aktivitetet kibernetike keqdashëse të Rusisë kundër aleatëve të NATO-s, përfshirë Gjermaninë dhe Çekinë”, tha shefi i NATO-s, Jens Stoltenberg në X, duke shprehur angazhimin për t’iu kundërvënë kërcënimit kibernetik “të konsiderueshëm, të vazhdueshëm dhe në rritje”.

Këshilli i Atlantikut të Veriut, në një deklaratë, vuri në dukje se i njëjti aktor kërcënimi ka shënjestruar entitete të tjera qeveritare kombëtare, operatorë të infrastrukturës kritike dhe entitete të tjera në të gjithë aleancën, duke përfshirë Lituani, Poloni, Sllovaki dhe Suedi.

“Aktivitetet e dëmshme kibernetike që synojnë Gjermaninë dhe Çekinë nënvizojnë se hapësira kibernetike është e kontestuar në çdo kohë”, tha këshilli. “Aktorët e kërcënimeve kibernetike kërkojnë me këmbëngulje të destabilizojnë Aleancën”.

Në një deklaratë të veçantë, BE-ja theksoi se një fushatë keqdashëse kibernetike tregon “modelin e vazhdueshëm të sjelljes së papërgjegjshme të Rusisë në hapësirën kibernetike, duke synuar institucionet demokratike, entitetet qeveritare dhe ofruesit e infrastrukturës kritike në të gjithë BE dhe më gjerë”.

BE nënvizoi se kjo lloj sjelljeje është në kundërshtim me normat e OKB-së për sjelljen e përgjegjshme të shtetit në hapësirën kibernetike.

“BE nuk do të tolerojë sjellje të tilla keqdashëse, veçanërisht aktivitete që synojnë të degradojnë infrastrukturën tonë kritike, të dobësojnë kohezionin shoqëror dhe të ndikojnë në proceset demokratike, duke pasur parasysh zgjedhjet e këtij viti në BE dhe në më shumë se 60 vende në mbarë botën”, shtoi ai. /AA

Vazhdo të lexosh

Të kërkuara