Lajmet

Hoti: Gjendja kritike në raportet me ShBA, sot ka më pak sovranitet në veri

Hoti u shpreh se veprimet sado të drejta të jenë duhet të bëhen në koordinim me aleatët ndërkombëtarë.

Published

3 years ago

June 7, 2023

Betim Gashi

Ish-kryeministri i Kosovës, Avdullah Hoti ka deklaruar se me ardhjen në pushtet të Qeverisë Kurti II ka humbur sovraniteti në veri të Kosovës. Ai ka paralajmëruar se me këtë sjellje të kryeministrit, vendi mund të vijë në një situatë kur në veri, rendi dhe ligji të vendoset nga KFOR-i dhe EULEX-i, e jo nga Policia e Kosovës.

Ai thotë se në 30 vite të përpjekjeve të shqiptarëve për shtet të pavarur dhe 15 vite pas pavarësisë, kurrë nuk ka pas një komunikim të tillë mes Qeverisë Kosovës dhe Qeverisë së ShBA-së, me ç’rast thekson se gjendja është kritike.

Hoti u shpreh se veprimet sado të drejta të jenë duhet të bëhen në koordinim me aleatët ndërkombëtarë.

“Vijnë emisarët amerikanë në Kosovë dhe thonë qartë që ata janë mbrojtës të sovranitetit dhe integritetit territorial të Kosovës, dhe kërkesat që kanë karshi Kosovës për themelim të Asociacionit, e thonë qartë se nuk është kërkesë e tyre që duhet të bihet ndesh me kushtetutën e Kosovës. Janë edhe marrëveshjet paraprake, e vitit 2015 në veçanti, që krijon siguri Qeverisë së Kosovës për të lëvizur përpara në përputhje më këshillat e partnerëve, por kam përshtypjen se situata ka shkuar shumë larg. Veprimet e njëanshme, pavarësisht se janë të drejta, sepse ne kemi të drejtë legjitime si shtet sovran të vendosim ligjin dhe rendin në çdo pjesë të Kosovës, por këtë ne mund ta bëjmë në koordinim me partnerët tanë ndërkombëtarë, të shohim çfarë humbim dhe çfarë fitojmë nga veprimet e njëanshme. E vërteta është që asnjëherë nuk ka pasur më pak sovranitet të shtrirë në veri të Kosovës sesa në këtë qeveri”, deklaroi Hoti.

Hoti thotë i druhet edhe një situate tjetër kur KFOR-i dhe EULEX-i të kujdesen për rendin dhe ligjin në veri të vendit. Sipas tij, kjo do të ishte e rëndë. Ai kërkon që të gjitha komunitetet të përfshihen brenda strukturave të Republikës së Kosovës përmes politikave të mençura dhe jo duke përdorur dhunë.

“Unë i druhem edhe një situate tjetër, me këto veprime të pamatura të Qeverisë së Kosovës, kam frikë që mund të vijmë në situatën kur në atë pjesë të vendit rendi dhe ligji të vendoset nga KFOR-i dhe EULEX-i, ne nuk e duam atë. Kemi punuar shumë në pavarësinë e mbikëqyrur, në partneritet të ngushtë me miq tanë ndërkombëtarë duke shtrirë hap pas hapi sovranitetin tonë në atë pjesë të vendit. Të jetë NATO në Kosovë përmes KFOR-it, si mbrojtës i rendit, i sigurisë kombëtare, për gjitha çështjet t’i marrim përsipër, ta forcojmë policinë tonë, FSK-në dhe gradualisht t’i integrojmë të gjitha komunitetet brenda strukturave të rendit, të sigurisë, të ushtrisë së Kosovës, sepse ne jemi shumicë në këtë vend, shqiptarët janë shumicë, ne kemi përgjegjësi t’i integrojmë të gjitha komunitetet, jo me dhunë. Ne duhet të bëjmë politikë shumë më të mençur, të koordinohemi me partnerët tanë ndërkombëtarë në mënyrë që ta amortizojmë këtë ndikim, dhe gradualisht t’i përfshijmë komunitetin serb brenda institucioneve”, shton Hoti.

Hoti u shpreh se Kurti në dy vitet e fundit ka sjellë një komunikim të vështirë me Shtetet e Bashkuara të Amerikës dhe gjendja është kritike.

“Në dy vitet e qeverisjes ka pas momente të vështira të komunikimit të tyre me aleatin kryesor, me SHBA-të. Kemi pas rastin kur janë anuluar vizitat e ministrave, kemi pas situata kur kryeministri ka qëndruar tre javë atje dhe nuk e ka takuar askush, dhe situata të ndryshme të problemeve në bashkëpunim, për shkak të sjelljeve të Qeverisë së Kosovës, por që vjen deri në këtë pikë nuk e kam imagjinuar. Të vijnë deri në pikën që zyrtarë shumë të lartë amerikanë, nga Sekretari i shtetit (Blinken) e poshtë, hierarkia e Departamentit të Shtetit, ta thonë qartë se Kosova nuk po i ndjek këshillat e partnerit kryesor, është duke i cenuar marrëdhëniet mes dy vendeve, kjo situatë është e paimagjinueshme. Në 30 vite të përpjekjeve të shqiptarëve të Kosovës për shtet të pavarur dhe 15 vite pas pavarësisë, kurrë nuk ka pas një komunikim të tillë mes Qeverisë Kosovës dhe Qeverisë së ShBA-ve. Gjendja është kritike”, vijon Hoti.

Pezullimi i Kosovës nga stërvitja ushtarake “Defender Europe ‘23” për Hotin është një mesazh ogurzi për Republikën.

“Më vjen keq që gjithë ata ushtarë të FSK-së e kanë pas ëndërr me qenë pjesë e ushtrimit ‘Defender 2023’, të përjashtohen nga ky ushtrim. Ka qenë ndër momentet më të mira të qeverisjes time, sa kam qenë kryeministër kur patëm marrë ftesën që shumë pak ushtarë të FSK-së t’i bashkohen ushtrisë amerikane në misionin paqeruajtëse dhe gjithë Kosova e ka festuar si një arritje të madhe. Ndërkaq, sot pas dy viteve të merret vendimi që Kosova të përjashtohet nga ushtrimi i NATO-s, ku Amerika është kryesore, është shenjë dhe mesazh ogurzi për shtetin e Kosovës”, përfundon Hoti.

Në Zveçan, Zubin Potok dhe Leposaviq, serbët po protestojnë duke kundërshtuar hyrjen e kryetarëve të rinj shqiptarë në objektet komunale, si dhe praninë e Policisë së Kosovës. Si pasojë e veprimeve të protestuesve kanë mbetur të lënduar 6 policë dhe 30 pjesëtarë të KFOR-it. Gjithashtu janë djegur dhe dëmtuar vetura të Policisë së Kosovës dhe të mediave.

Related Topics:SHBA Avdullah Hoti Policia e Kosoves veriu

Up Next

Granit Mavriqi zgjidhet anëtar i Bordit për Ankesa të Mediave

Don't Miss

Blinken do të takojë zyrtarët e Gjirit në Arabinë Saudite

Lajmet

Partitë politike në Kosovë publikojnë listat zgjedhore për 28 dhjetor

Published

11 minutes ago

December 8, 2025

UBTnews

Fushata zgjedhore për zgjedhjet parlamentare të 28 dhjetorit po hyn në një fazë të re, pasi të gjitha partitë kryesore politike në vend kanë publikuar listat e tyre të plota me nga 110 kandidatë për deputetë. Prezantimi i këtyre listave shënon edhe zyrtarisht nisjen e garës së brendshme për votën qytetare dhe përfaqësimin në legjislaturën e re të Kuvendit të Kosovës.

Kryetari i PDK-së, Bedri Hamza, prezantoi listën me 110 kandidatë, ku dhjetëshja e parë kryesohet pikërisht nga ai.

Në mesin e dhjetë kandidatëve të parë renditen figura me peshë politike dhe profesionale, si Uran Ismaili, Vlora Çitaku, Enver Hoxhaj, Arben Mustafa, Besa Kabashi Ramaj, Rrahman Rama, Eman Rrahmani, Sala Jashari dhe Kujtim Gashi.

Parti Demokratike e Kosovës në këto zgjedhje garon në fletëvotim me numrin 130.

Edhe Lidhja Demokratike e Kosovës (LDK) ka publikuar listën e saj të kandidatëve, e cila udhëhiqet nga kryetari i kësaj partie, Lumir Abdixhiku. Në top-10 gjenden emra të njohur të politikës dhe akademisë, si Kujtim Shala, Hykmete Bajrami, Doarsa Kica-Xhelili, Lutfi Haziri, Avdullah Hoti, Anton Quni, Jehona Lushaku Sadriu, Ferid Agani dhe Ukë Rugova.

Abdixhiku e cilësoi listën si një “kombinim përvoje, profesionalizmi dhe energjie të re”, duke e quajtur atë “listën e shpresës” për Kosovën.

AAK garon me listë të kryesuar nga Ramush Haradinaj, ndërsa në dhjetëshen e parë përfshihen emra si Besnik Tahiri, Time Kadrijaj, Bekë Berisha, Arber Tolaj, Albania Bytyqi, Pal Lekaj, Gani Dreshaj dhe Agim Çeku.

Haradinaj u shpreh se Kosovës i duhen “përfaqësues të guximshëm”, duke siguruar se secili kandidat në listë ka peshë të barabartë për votuesit.

Kryeministri në detyrë, Albin Kurti, prezantoi listën e Lëvizjes Vetëvendosje, të përbërë edhe nga kandidatët e Guxo, Alternativa dhe PSHDK. Dhjetëshja e parë përfshin figura qeveritare dhe partiake të profilit të lartë, si Glauk Konjufca, Donika Gërvalla, Avni Dehari, Albulena Haxhiu, Hekuran Murati, Xhelal Sveçla, Mimoza Kusari Lila, Hajrulla Çeku dhe Shqipe Mehmeti Selimi.

LVV garon në fletëvotim me numrin 116.

Kryetari Fatmir Limaj publikoi listën zgjedhore ku ai kryeson, të ndjekur nga Xhevahire Izmaku, Arbëreshë Krasniqi, Mevludin Krasniqi, Endrit Shala, Albulena Balaj Halimaj, Artan Nimani, Çerkin Dukolli, Jehona Rrafshi Lumi dhe Nehat Mustafa.

NISMA në këto zgjedhje garon me numrin 122, ndërsa Limaj e quajti listën “bashkë drejt fitores”.

Me publikimin e listave, partitë politike i kanë hapur rrugë fazës më të nxehtë të fushatës. Ato tashmë synojnë të bindin qytetarët se përfaqësuesit e tyre ofrojnë stabilitet, reformë dhe vizion të qartë për zhvillimin e vendit.

Në ditët në vijim, fokusi do të kalojë te prezantimi i programeve, takimet me qytetarë dhe debati publik, ndërsa qytetarët do të mbeten në qendër të çdo premtimi politik që synon marrjen e votës./UBTNews

Lajmet

Conte: Napoli po më mbush me krenari

Published

35 minutes ago

December 8, 2025

UBT News

Antonio Conte u shfaq shumë i lumtur dhe krenar pas fitores 2-1 të Napolit ndaj Juventusit, një ndeshje që skuadra e tij e dominoi edhe pse po kalon një periudhë me shumë lëndime.

Ai tha se lojtarët po bëjnë gjëra të jashtëzakonshme dhe po tregojnë karakter të madh, duke marrë përgjegjësi në një moment tepër të vështirë.

Juventusi shënoi me të vetmen goditje në portë, por Napoli reagoi dhe Rasmus Hojlund shënoi dy gola, duke i dhënë fund mungesës së tij të gjatë të realizimeve. Conte theksoi edhe lojën e mirë të McTominay dhe Eljif Elmas, ndërsa tregoi se Lobotka do të mungojë rreth dy javë për shkak të një problemi muskulor.

Me këtë fitore, Napoli e mbyll vitin 2025 pa humbje në shtëpi në Serie A, për herë të parë që nga viti 1987, dhe Juventusin e mund për herë të shtatë radhazi në kampionat. Conte tha se ekipi i tij po fiton energji nga uniteti, dëshira dhe sakrifica e lojtarëve, duke kaluar me sukses një seri ndeshjesh të vështira kundër Atalantës, Romës dhe Juventusit.

Trajneri shpreson që skuadra të pushojë disa ditë, pasi i pret udhëtimi në Portugali për ndeshjen e Ligës së Kampionëve kundër Benfikës, një sfidë që do të kërkojë përgatitje të kujdesshme për shkak të lodhjes së madhe të lojtarëve./S.K/KP/

Lajmet

Tajlanda nis sulme ajrore në Kamboxhia, mijëra njerëz largohen nga kufiri

Published

59 minutes ago

December 8, 2025

UBT News

Tajlanda ka nisur sulme ajrore kundër Kamboxhias të hënën, 8 dhjetor, duke rritur ndjeshëm tensionet në kufirin mes dy vendeve dhe duke vënë në pikëpyetje marrëveshjen e paqes të ndërmjetësuar vetëm dy muaj më parë nga presidenti i SHBA-së, Donald Trump.

Sipas ushtrisë tajlandeze, goditjet kanë shënjestruar pozicione ushtarake kamboxhiane si përgjigje ndaj një sulmi që vrau një ushtar tajlandez më herët gjatë ditës. Autoritetet njoftuan gjithashtu se shtatë persona u plagosën.

Tajlanda akuzon Kamboxhian se ka mobilizuar armatim të rëndë dhe ka ripozicionuar forcat pranë kufirit, duke rrezikuar përshkallëzimin e konfliktit. Nga ana tjetër, Ministria e Mbrojtjes së Kamboxhias i ka quajtur akuzat të pavërteta, duke theksuar se vendi i saj po respekton marrëveshjet dhe po kërkon zgjidhje paqësore.

Të dy ushtritë akuzuan njëra-tjetrën për nisjen e sulmeve. Ushtria kamboxhiane deklaroi se Tajlanda kreu sulmin e parë pas ditësh provokimesh, ndërsa Tajlanda njoftoi se rreth 70% e civilëve në zonat kufitare janë evakuuar.

Konflikti i ri vjen pas armëpushimit të korrikut dhe marrëveshjes së zgjeruar të paqes të nënshkruar në tetor në Kuala Lumpur. Marrëveshja u vlerësua si një fitore diplomatike, por tensionet filluan të riktheheshin pas një shpërthimi mine që plagosi disa ushtarë tajlandezë.

Ndërkohë, kryeministri i Malajzisë, Anwar Ibrahim, u shpreh thellësisht i shqetësuar dhe u bëri thirrje palëve të tregojnë përmbajtje, duke paralajmëruar se rikthimi i luftimeve mund të dëmtojë përpjekjet e bëra deri tani për stabilizimin e rajonit.

Tajlanda dhe Kamboxhia kanë pasur prej vitesh mosmarrëveshje për kufirin e tyre, dhe përplasjet aktuale konsiderohen ndër më seriozet e viteve të fundit./S.K/KP/Rtsh/