Lajmet

​212 afganë përcillen nga Shqipëria drejt ShBA-së

Ambasadorja Kim vlerësoi mënyrën se si populli shqiptar mikpriti qytetarët afganë.

Published

3 years ago

on

212 afganë që u strehuan në Shqipëri tashmë janë nisur për në Shtetet e Bashkuara të Amerikës (ShBA).

Ministrja për Evropën dhe Punët e Jashtme, Olta Xhaçka dhe ambasadorja e ShBA-së në Tiranë, Yuri Kim morën pjesë sot në ceremoninë e përcjelljes të 212 shtetasve afganë drejt ShBA-së.

Në fjalën e rastit, Xhaçka kujtoi ditët kur qytetarët afganë mbërritën në Shqipëri.

“Sot kam ndjenja vërtet të përziera, nga njëra anë, jam shumë e lumtur për secilin prej jush, e di se kjo është ajo që ju keni dashur, që kjo është ajo që keni ëndërruar dhe jam shumë e lumtur që kjo ëndërr u realizua dhe në një farë mase, ajo u realizua edhe më shpejt nga sa guxuam të shpresonim. E di që shumica prej jush kanë qenë njerëz të suksesshëm në atdhe, në të gjitha kapacitetet e jetës, njerëz që bënë ndryshimin në Afganistan, qoftë në media, qoftë në të drejtat e njeriut dhe të drejtat e grave e në botën akademi. ShBA është vendi më i mirë dhe vendi i mundësive, dhe nëse ia dolët në Afganistan, pavarësisht rrezikut, vështirësive, jam e sigurt se do të keni një të ardhme fantastike në SHBA dhe do të keni sukses atje për shumë kohë”, tha ajo.

Xhaçka tha se ky është fundi i një operacioni për të cilin padyshim ne dhamë gjithçka, ndërsa uroi një të ardhme më të mirë për qytetarët afganë.

“Shpresoj që ju të keni gjithmonë̈ një kujtim të mirë për këtë vend dhe që në të ardhmen do të ktheheni të na vizitoni. Por gjithashtu besoj shumë se ky operacion, evakuimet dhe strehimi juaj, nuk ju ndihmoi vetëm ju, besoj fort se na ka ndihmuar edhe neve. Ky operacion na ka bërë të gjithëve njerëz më të mirë dhe ne nuk do ta harrojmë kurrë këtë përvojë, për më tepër na ka bërë miq dhe e ka bërë edhe më të fortë lidhjen tonë me miqtë e vjetër”, tha ajo.

Xhaçka shtoi se “ky operacion na ka afruar edhe më shumë ne dhe miqtë tanë amerikanë”.

“Njerëz si Ambasadorja Yuri Kim, Keith dhe bashkëpunëtorët e tyre që kanë punuar pa u lodhur për të realizuar pikërisht këtë moment këtu. Ka qenë një nder për ne që të ndihmojmë̈ partnerët tanë në kohën e tyre të nevojës dhe jam e sigurt se aleanca dhe miqësia jonë vetëm sa do të forcohet dhe ka hyrë në një fazë të re”, tha Xhaçka.

Ambasadorja Kim vlerësoi mënyrën se si populli shqiptar mikpriti qytetarët afganë.

“Ju keni bërë një rrugë të gjatë dhe e di që ndoshta ka pasur momente kur keni dashur të hiqni dorë. Dhe ne jemi të lumtur që askush nga ne nuk u dorëzua. As mikpritësit tuaj shqiptarë, as miqtë tuaj amerikanë, as ju, as familjet tuaja. Nuk do ta harroj kurrë natën kur ju mbërritët këtu dhe erdhët gjatë disa netëve njëra pas tjetrës, dhe të shihja se arritët në këtë vend të mrekullueshëm si Shqipëria ishte një moment i ndritshëm në ato ditë të errëta. Ka dy arsye që nuk do ta harroj kurrë ardhjen tuaj. Njëra është guximi juaj. Edhe përpara se të kalonit kohët e vështira gjatë muajit gusht në Afganistan, ju ishit njerëz të cilët rrezikuan veten për të punuar për një Afganistan më të fortë, më të mirë dhe më të lirë. Dhe ju punuat për një botë më të mirë për brezin e ardhshëm. Arsyeja e dytë që nuk do ta harroj kurrë atë që ka ndodhur gjatë muajve të fundit është për shkak të popullit shqiptar dhe mënyrës se si ata hapin krahët dhe hapin zemrat e tyre për të gjithë ne”, tha ajo.

Kim kujtoi se Shqipëria ishte vendi i parë që u ngrit dhe tha: “Ne do të ndihmojmë. Dyert tona janë të hapura. Ejani te ne”.

“Dhe ajo që kam mësuar në dy vitet e mia këtu në Shqipëri është se populli shqiptar e merr shumë seriozisht mundësinë, përgjegjësinë për t’i hapur derën një të huaji në nevojë dhe për t’ju bërë të ndiheni se jeni vërtet një mysafir. Këtu në Shqipëri ekziston një shprehje: “bukë, kripë dhe zemër të hapur”. Dhe ajo që kam ndjerë këtu është se, nëse shkoni tek një shqiptar në momentin tuaj më të vështirë, kur keni ftohtë, kur jeni të uritur, apo jeni të etur, një shqiptar do ta hapë derën gjerësisht dhe shqiptari do t’ju japë deri thërrimet e fundit të bukës, kokrrat e fundit të kripës dhe gjithçka që mbajnë në zemrën e tyre. Është çështje nderi. Ndaj faleminderit mikpritësve tanë shqiptarë, miqve tanë, zyrtarëve të qeverisë”, tha ajo.

Ambasadorja Kim kujtoi po ashtu strehimin e hebrenjve në Shqipëri gjatë Luftës së Dytë Botërore.

“Në ato kohë, kur hebrenjtë vinin sepse e gjithë bota ishte kundër tyre, ishin shqiptarët ata që hapën derën. Siç dhe mund ta dini, ata filluan me strehimin e 200 hebrenjve në këtë vend. Shqipëria është i vetmi vend në të gjithë Evropën që përfundoi me më shumë hebrenj sesa në fillim. Dhe në fakt, ata kishin pothuajse 4000 hebrenj në kohën kur mbaroi Lufta e Dytë Botërore. E di që, si shumë hebrenj, edhe ju do të keni një vend të veçantë në zemrën tuaj për Shqipërinë dhe për popullin shqiptar, dhe duhet ta dini se edhe ju lini diçka nga pas këtu, një kujtim shumë të veçantë edhe për ta”, tha Kim.

“Shpresoj ta dini se është një nder i madh për ne që jemi këtu me ju. Ne u përpoqëm të punonim sa më shumë që mundëm duke e ditur që ju po punonit edhe më shumë, dhe jemi të kënaqur që ishim në gjendje të bënim atë pak që kishim mundësi. Sonte, ju po filloni një kapitull tjetër, kapitullin e jetëve tuaja të reja në Amerikë. Ju do t’i bashkoheni një kombi emigrantësh dhe paraardhësve të emigrantëve nga e gjithë bota, pasardhësve të emigrantëve nga e gjithë bota, duke u bashkuar me të tjerë nga Afganistani dhe Shqipëria dhe qindra të tjerëve. Unë jam vetë emigrante, emigrante e gjeneratës së parë. Dhe ajo që dua t’ju them është se keni bërë një rrugë të gjatë, siç them unë, por edhe rruga përpara do të jetë e gjatë. Do të ketë sërish çaste kur do doni të hiqni dorë. Mos u dorëzoni. Mos hiqni dorë”, tha ajo.

Related Topics:
Continue Reading

Aktualitet

Piloti kroat i KFOR-it dhe partnerja e tij nga Mitrovica arrestohen për spiunazh në favor të Listës Serbe

Published

50 minutes ago

on

August 28, 2025

By

Një serbe nga Mitrovica, A. M., dhe partneri i saj, J. I., pilot në Forcat Ajrore të Kroacisë, janë arrestuar më 25 korrik në ishullin Vis, nën dyshimin për spiunazh në favor të Serbisë dhe Listës Serbe. Hetimi ndaj tyre është kryer nga policia kroate në bashkëpunim me Europolin.

Sipas burimeve të gazetës kroate Index, dyshohet se piloti kroat i ka siguruar partneres së tij informacione konfidenciale, të cilat ajo më pas i ka përcjellë tek Lista Serbe. Hetuesit po ashtu dyshojnë se informacionet përfshinin detaje mbi lëvizjet e trupave ndërkombëtare dhe të komunitetit serb në veri të Kosovës që nga fundi i vitit 2022, si dhe të dhëna të ndjeshme lidhur me komunën e Zubin Potokut.

Çifti akuzohet gjithashtu për shkëmbim informacionesh lidhur me transferimin e ish-policit të Kosovës, Dejan Pantiq, i arrestuar në dhjetor 2022 për sulme ndaj zyrave të Komisionit Qendror Zgjedhor në Mitrovicën e Veriut.

A. M., e cila ka punuar më parë për kompani private në Serbi dhe si reportere nga Mitrovica, dyshohet të ketë vepruar si ndërmjetëse në përcjelljen e informacionit tek Lista Serbe. Partneri i saj, J. I., ka shërbyer si pilot helikopteri edhe në misionin e KFOR-it në Kosovë dhe dyshohet se ka zbuluar informacion të klasifikuar lidhur me lëvizjet e trupave ndërkombëtare dhe të komunitetit serb në veri.

Gjykata e Qarkut e Splitit ka vendosur nga një muaj paraburgim për pilotin kroat dhe të dashurën e tij, serbe nga Kosova të cilët akuzohen për spiunazh. Hetuesit kanë siguruar komunikime të shumta në telefonat e tyre që dyshojnë se lidhen me aktivitetet e spiunazhit dhe i kanë bashkëngjitur si prova në hetim.

Reagime politike në Kroaci

Rasti ka tronditur opinionin kroat dhe ka ngjallur shqetësime për sigurinë kombëtare. Kryetari i Komisionit Parlamentar për Mbrojtjen, Arsen Bauk, në mediumin kroat RTL, e cilësoi këtë si “një problem serioz sigurie” duke shtuar se hetimi do të tregojë përmasat e plota të rastit.

Ndërkohë, Sandra Bençiç, anëtare e Komisionit për Siguri Kombëtare, theksoi për mediumin Novu TV, se ky rast do të trajtohet patjetër nga institucioni që ajo përfaqëson:

“Po flasim për akuza shumë të rënda. Në këto kohë, pavarësisht ndasive politike, të gjithë kemi një qëllim të përbashkët: sigurinë e qytetarëve tanë, të vendit dhe të misioneve ku marrim pjesë”.

Continue Reading

Aktualitet

Studentët e Muzikës në UBT dhe profesori Blerim Emerllahu marrin pjesë në edicionin e 9-të të Festivalit të Klarinetës në Poloni

Published

1 hour ago

on

August 28, 2025

By

Tre studentë të Fakultetit Muzika Moderne, Prodhimi Digjital dhe Menaxhmenti në UBT, Leona Ferati, Rinor Hasimi dhe Sunaj Qerimi, se bashku me profesorin Blerim Emërllahu, patën mundësinë të përfaqësojnë Kosovën në edicionin e 9-të të Festivalit Ndërkombëtar të Klarinetës, në Rubnej të Polonisë, një nga aktivitetet më të rëndësishme në skenën evropiane të muzikës klasike.

Gjatë festivalit, studentët ndoqën ligjërata të nivelit të lartë nga profesorë dhe artistë të njohur ndërkombëtarisht, bashkëpunuan me solistë të famshëm dhe interpretuan në koncertet kryesore së bashku me studentë nga e gjithë Evropa. Kjo përvojë u ofroi mundësinë të thellojnë njohuritë teknike, të rrisin aftësitë interpretative dhe të krijojnë kontakte profesionale me artistë ndërkombëtarë.

Në këtë edicion mori pjesë edhe Prof. Blerim Emerllahu si solist dhe ligjërues, duke ofruar mbështetje dhe mentorim për studentët gjatë aktiviteteve të festivalit.

Ky përfaqësim i studentëve tregon qartë se UBT vazhdon të promovojë talentin dhe ekselencën artistike në arenën ndërkombëtare, duke kontribuar në zhvillimin profesional të studentëve dhe rritjen e prezencës së universitetit në evente prestigjioze kulturore.

Continue Reading

Aktualitet

Turqia merr sërish komandën e KFOR-it

Published

1 hour ago

on

August 28, 2025

By

Ministria e Mbrojtjes e Turqisë ka njoftuar se vendi do të marrë përsëri komandën e misionit paqeruajtës të NATO-s në Kosovë (KFOR) në tetor 2025, për një mandat njëvjeçar. Ky do të jetë rikthimi i komandës turke pas drejtimit të suksesshëm të forcave gjatë periudhës 2023–2024, raporton TurkiyeToday.

Zëdhënësi i Ministrisë së Mbrojtjes, kontradmirali Zeki Akturk, konfirmoi se Turqia do të udhëheqë sërish misionin ndërkombëtar, duke theksuar angazhimin e Ankarasë për sigurinë dhe stabilitetin në rajonin euroatlantik.

“Vendi ynë, i cili ka dhënë kontribute të rëndësishme dhe vendimtare për sigurinë e NATO-s dhe rajonit euroatlantik, do të vazhdojë ta bëjë këtë edhe në të ardhmen”, deklaroi Akturk. “Detyra do të përmbushet në mënyrë neutrale dhe transparente, në përputhje me rezolutat e NATO-s dhe Kombeve të Bashkuara.”

Që nga themelimi i KFOR-it më 12 qershor 1999, në bazë të një rezolute të Këshillit të Sigurimit të OKB-së, Turqia ka qenë një ndër kontribuesit e pandërprerë me trupa në këtë mision. Aktualisht, KFOR përbëhet nga rreth 4,500 trupa nga 29 vende anëtare dhe joanëtare të NATO-s.

Një moment i rëndësishëm për sigurinë në Kosovë ishte në qershor 2023, kur ushtarët turq morën masa sigurie në rajonin e Zubin Potokut, në veri të Kosovës, me kërkesë të KFOR-it, për të ndihmuar në ruajtjen e qetësisë në zonë.

Udhëheqja e përsëritur e KFOR-it nga Turqia vjen në një kohë të ndjeshme për rajonin e Ballkanit Perëndimor. Që nga shpallja e njëanshme e pavarësisë së Kosovës në vitin 2008, Turqia ka mbështetur vazhdimisht përpjekjet për paqe dhe ka luajtur rolin e ndërmjetësit në raportet Kosovë–Serbi.

Pas pushtimit rus të Ukrainës në vitin 2022, pasiguritë në Ballkan janë thelluar, duke i dhënë më shumë peshë rolit të Turqisë si faktor stabiliteti. Komanda turke e KFOR-it në vitet 2023–2024 u vlerësua për ndikimin e saj në uljen e tensioneve në veri të Kosovës, dhe rikthimi në krye të misionit në 2025 shihet si vazhdimësi e këtij angazhimi stabilizues.

Zëdhënësi Akturk gjithashtu bëri të ditur se për herë të parë në historinë e NATO-s, një gjeneral turk është emëruar si Drejtor i Bashkëpunimit për Siguri në Komandën Ushtarake Ndërkombëtare të NATO-s në Bruksel një tjetër tregues i rolit në rritje të Turqisë në sigurinë e aleancës.

Në raportet e fundit strategjike, Turqia përmendet si një shtyllë kyçe e NATO-s. Vizita e paralajmëruar e Kancelarit gjerman Friedrich Merz në Ankara dhe deklaratat e zyrtarëve amerikanë që vlerësojnë kontributin e Turqisë në sigurinë euroatlantike, janë tregues të rëndësisë së saj në arkitekturën e mbrojtjes kolektive të Aleancës.

Continue Reading

Aktualitet

Raporti 24 orësh nga Policia e Kosovës

Published

1 hour ago

on

August 28, 2025

By

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 2587 tiketa trafiku, janë shkaktuar 48 aksidente me dëme materiale dhe 23 aksidente me të lënduar. Zyra e Informimit nga PK ka njoftuar se 23 persona janë arrestuar, kurse 16 janë dërguar në mbajtje.

INCIDENTET KRIMINALE-PRISHTINË

PËRDORIM I ARMËS

Obiliq/ 27.08.2025 – 15:00. Ankuesi mashkull kosovar ka raportuar se në drejtim të veturës së tij një person I dyshuar ka shtënë me armë tri herë. Në vendin e ngjarjes njësia policore ka gjetur dhe sekuestruar një predhë dhe një gëzhojë. Në konsultim me prokurorin është inicuar rasti, ndërsa i dyshuari në kërkim policor.

 SHKAKTIM I RREZIKUT TË PËRGJITHSHËM

Hajvali / 27.08.2025 – 11:43. Është përfshirë nga zjarri një deponi e veturave të vjetra si dhe një plantacion i mbjellur me pemë. Në vendin e ngjarjes kanë dalë njësitë përkatëse policore dhe zjarrfikësit të cilët kanë lokalizuar zjarrin. Lidhur me rastin është njoftuar prokurori, ndërsa i dyshuari në kërkim policor.

KANOSJE

Gllogoc / 27.08.2025 – 16:15. Është arrestuar i dyshuari mashkull kosovar për shkak se i njëjti dyshohet se e ka kanosur viktimën femër kosovare. I dyshuari pas inicimit të rastit me vendim të prokurorit është dërguar në mbajtje.

Prishtinë / 27.08.2025 – 13:14. Është shoqëruar në Stacion Policor e dyshuara femër kosovare pasi që e njëjta ka telefonuar në linjën emergjente 192 dhe ka kanosur zyrtarët përmes telefonit. Lidhur me rastin është njoftuar prokurori ndërsa e dyshuara është dërguar në trajtim mjekësor Psikiatrik. Rasti procedohet në procedurë të rregullt.

LËNDIM I RËNDË TRUPORË

Prishtinë/27.08.2025-23:00 Është arrestuar i dyshuari mashkull kosovar pasi i njëjti në bashkëveprim edhe me 3 të dyshuar tjerë, të cilët gjenden në arrati, kishin sulmuar fizikisht viktimën mashkull kosovar. Si pasojë e sulmit viktima ka pësuar lëndime trupore. I dyshuari me vendim të prokurorit është dërguar në mbajtje.

VRASJE NË TENTATIVË

Lipjan / 27.08.2025 – 21:40. Janë arrestuar 4 të dyshuar meshkuj kosovarë pasi të njëjtit dyshohet se kishin sulmuar fizikisht 4 viktimat meshkuj kosovarë. Gjatë përleshjes është përdorur edhe një mjet i mbrehtë (thikë). Si pasojë e përleshjes fizike viktimat kanë pësuar lëndime trupore për çka dhe janë dërguar në tretman mjekësor. Tre nga viktimat pas pranimit të tretmanit mjekësor janë liruar, kurse njëri ka ta vazhduar për trajtim mjekësor në QKUK. Me vendim të prokurorit të dyshuarit janë dërguar në mbajtje.

DHUNË NË FAMILJE

Prishtinë / 27.08.2025 – 03:00. Ankuesja femër kosovare ka raportuar se i dyshuari mashkull shtetas i huaj, kishte ushtruar dhunë ndaj saj dhe dy viktimave tjera femra kosovare. Lidhur me rastin është njoftuar prokurori, dhe po hetohet nga ekipet relevante policore.

Prishtinë / 27.08.2025 – 16:00-17:00. Është arrestuar i dyshuari mashkull kosovar për shkak se i njëjti dyshohet se ka ushtruar dhunë ndaj viktimave femra kosovare. Viktimat nuk kanë dashur të marrin trajtim mjekësor. I dyshuari me vendim të prokurorit pas inicimit të rastit është liruar, rasti vazhdon të trajtohet në procedurë të rregullt.

Prishtinë / 27.08.2025 – 20:30. Është arrestuar i dyshuari mashkull kosovar për shkak se i njëjti dyshohet se ka ushtruar dhunë ndaj viktimës femër kosovare.Viktima ka pranuar trajtim mjekësor, ndërsa i dyshuari me vendim të prokurorit pas inicimit të rastit është liruar. Rasti vazhdon në procedurë të rregullt.

AKSIDENT TRAFIKU ME LËNDIME

Prishtinë / 27.05.2025 – 15:55. Raportohet se ka ndodhur aksident trafiku në mes të dy veturave. Si pasojë tre persona kanë pësuar lëndime trupore dhe të njëjtit kanë pranuar tretman mjekësor.

AKSIDENT TRAFIKU ME FATALITET

Gllogoc / 27.08.2025 – 02:08. Raportohet se viktima mashkull kosovar derisa ka qenë duke drejtuar veturën, humb kontrollin mbi veturë dhe është rrokullisur. Si pasojë, i njëjti pëson lëndime trupore dhe transportohet në Emergjencën e Drenasit ku mjeku kujdestar konstaton vdekjen e tij. Me vendim të prokurorit, trupi i pajetë është dërguar në IML për obduksion.

INCIDENTE KRIMINALE-GJILAN

MBAJTJE NË PRONËSI, KONTROLL APO POSEDIM I PAAUTORIZUAR I ARMËVE

Viti / 27.08.2025 – 14:00. Është arrestuar i dyshuari mashkull kosovar pasi që gjatë kontrollit në shtëpinë e tij është gjetur dhe konfiskuar arma e zjarrit pushkë e gjatë pa fishekë. Pas intervistimit, me vendim të prokurorit i dyshuari është liruar në procedurë të rregullt.

INCIDENTE KRIMINALE-FERIZAJ

LËNDIM I RËNDË TRUPOR

Kaçanik / 25.08.2025 – NN. Është arrestuar i dyshuari mashkull kosovar pasi që i njëjti dyshohet se ka sulmuar fizikisht viktimën femër kosovare. Viktima ka pësuar lëndime trupore ndërsa i dyshuari me vendim të prokurorit është dërguar në mbajtje.

HETIM MBI VDEKJEN

Ferizaj / 27.08.2025 – 09:10. Raportohet se viktima mashkull kosovar dyshohet se ka rënë nga ashensori. Në vendin e ngjarjes kanë dalë njësitë përkatëse, ndërsa ekipi mjekësor ka konstatuar vdekjen e viktimës. Me vendim të prokurorit, trupi i pajetë është dërguar në IML për obduksion.

INCIDENTE KRIMINALE-PRIZREN

SULM NDAJ PERSONIT ZYRTAR

Prizren / 27.08.2025 – 18:30. Është arrestuar se i dyshuari mashkull kosovar për shkak se i njëjti në shenjë revolte pas shqiptimit të një gjobe në trafik ka sulmuar zyrtarët policor. I dyshuari me vendim të prokurorit është dërguar në mbajtje.

INCIDENTET KRIMINALE-GJAKOVË

VJEDHJE E RËNDË

Gjakovë / 24.08.2025 – 13:15. Pas hetimeve të zhvilluara lidhur me rastin, më 27.08.2025 është arrestuar i dyshuari shtetas I huaj për shkak se i njëjti dyshohet se më 24.08.2025 kishte vjedhur një trotinet elektrik nga viktima mashkull kosovar. I dyshuari me vendim të prokurorit është dërguar në mbajtje.

INCIDENTET KRIMINALE-MITROVICË JUG

LËNDIM I RËNDË TRUPOR

Vushtrri / 27.08.2025 – 08:45. Janë arrestuar tre të dyshuar meshkuj kosovar pasi që pas një mosmarrëveshje janë përleshur fizikisht në mes vete. Të njëjtit kanë pësuar lëndime trupore dhe janë dërguar për tretman mjekësor. Pas intervistimit, me vendim të prokurorit një i dyshuar është dërguar në mbajtje, ndërsa dy të dyshuarit e tjerë janë liruar në procedurë të rregullt.

LËNDIM I LEHTË TRUPOR

Skenderaj / 27.08.2025 – 09:15. Viktima femër kosovare ka njoftuar policinë se është sulmuar fizikisht nga I dyshuari mashkull kosovar. Viktima është dërguar për trajtim mjekësor, ndërsa i dyshuari është arrestuar dhe pas intervistimit me urdhër të prokurorit është dërguar në mbajtje.

MBAJTJE NË PRONËSI, KONTROLL APO POSEDIM I PAAUTORIZUAR I ARMËVE

Vushtrri / 27.08.2025 – 14:45. Është arrestuar i dyshuari mashkull kosovar pasi që i njëjti dyshohet se ka shtënë me armë zjarri. Nga i dyshuari është konfiskuar një pistoletë me karikator dhe dy fishekë. Pas intervistimit, me vendim të prokurorit i dyshuari është liruar në procedurë të rregullt.

INCIDENTET KRIMINALE-MITROVICË VERI

VJEDHJE E RËNDË

Mitrovicë Veri / 13.06.2025 – 03:00. Më 27.08.2025 pas hetimeve të zhvilluara është arrestuar i dyshuari mashkull kosovar për shkak se i njëjti dyshohet se më 13.06.2025 kishte kryer vjedhje në lokalin e ankuesit mashkull kosovar. I dyshuari me vendim të prokurorit është dërguar në mbajtje.

ARMËMBAJTJE PA LEJE

Mitrovicë Veri / 27.08.2025 – 20:50. Njësitë e hetuesisë gjatë kontrollit në banesën e të dyshuarës femër kosovare kanë gjetur dhe sekuestruar dy fishekë, dhe një sprej. Në konsultim me prokurorin është inicuar rasti, ndërsa e dyshuara gjendet në arrati.

INCIDENTET KRIMINALE-DEPARTAMENTI I POLICISË KUFITARE

KALIMI I PAAUTORIZUAR I VENDKALIMEVE KUFITARE APO I VIJËS KUFITARE

Leposaviq / 27.08.2025 – 15:30. Janë arrestuar dy të dyshuar, njëri kosovar e tjetri shtetas i serbisë, pasi që të njëjtit kanë kaluar ilegalisht kufirin nga Serbia në Kosovë. Me vendim të prokurorit, një i dyshuar është dërguar në mbajtje ndërsa tjetri është liruar në procedurë të rregullt.

 

 

 

Continue Reading

Të kërkuara