Të paktën 15 palestinezë humbën jetën gjatë natës në një sulm ajror izraelit në jug të Gazës, ndërsa tensionet mes Izraelit dhe Hamasit mbeten të larta, në pritje të një përgjigjeje përfundimtare për një propozim armëpushimi të ndërmjetësuar nga ShBA.

Sipas zyrtarëve lokalë të shëndetësisë në Spitalin Nasser në Khan Younis, sulmi goditi një kamp me tenda ku qëndronin palestinezë të zhvendosur nga luftimet që vijojnë prej gati dy vitesh. Sulmi ndodhi rreth orës 2 të mëngjesit, duke shkaktuar viktima në mesin e civilëve. Ushtria izraelite nuk ka dhënë ende një reagim zyrtar mbi këtë sulm.

Pamjet nga vendi i ngjarjes treguan funerale të përshkuara nga dhimbja, me të afërmit që qanin për të dashurit e tyre të vrarë. “Armëpushimi do të vijë, dhe unë e kam humbur vëllain tim? Duhet të kishte ndodhur shumë më parë,” tha mes lotësh 13-vjeçarja Mayar Al Farr, motra e Mahmoudit, një nga viktimat e sulmit.

Ndërkohë, Presidenti i ShBA-së Donald Trump deklaroi se pret që Hamasi të japë një përgjigje përfundimtare ndaj propozimit amerikan për një armëpushim brenda 24 orëve. Sipas tij, Izraeli ka rënë dakord për një marrëveshje armëpushimi 60-ditore, gjatë së cilës pritet të zhvillohen negociata për një zgjidhje përfundimtare të konfliktit.

Hamasi, nga ana tjetër, ka sinjalizuar se po shqyrton propozimin, por deri më tani nuk ka dhënë asnjë qëndrim publik nëse do ta pranojë apo refuzojë atë. Grupi militant ka insistuar më herët se do të pranojë vetëm një marrëveshje që sjell një përfundim të përhershëm të luftës.

Qeveria e Afganistanit deklaroi të enjten se Rusia është bërë vendi i parë që e ka njohur zyrtarisht regjimin e talibanëve, duke e quajtur vendimin “të guximshëm”.

Lajmi u bë publik pas takimit të ministrit të Jashtëm taliban, Amir Khan Muttaqi, me ambasadorin rus në Kabul, Dmitry Zhirnov.

“Ky është një hap i ri në marrëdhënie pozitive, respekt të ndërsjellë dhe bashkëpunim konstruktiv“, tha Muttaqi.

Ministria e Jashtme ruse theksoi se njohja do të forcojë bashkëpunimin ekonomik dhe tregtar, përfshirë energjinë, bujqësinë dhe infrastrukturën.

Në prill, Moska hoqi talibanët nga lista e saj e organizatave terroriste dhe pranoi ambasadorin e tyre në kryeqytetin rus, raporton AFP.

Njohja është dënuar nga aktivistet afgane, të cilat thonë se ajo legjitimon një regjim që ndalon shkollimin e vajzave dhe shkel të drejtat e njeriut.

Edhe ish-deputetet afgane paralajmëruan se ky vendim rrezikon sigurinë globale.

Talibanët u rikthyen në pushtet në gusht 2021, pas tërheqjes së forcave të NATO-s. Që atëherë, shtetet perëndimore nuk i kanë njohur zyrtarisht, duke i kushtëzuar marrëdhëniet me respektimin e të drejtave të grave dhe lirive themelore.

SHBA, BE dhe aleatë të tjerë kanë ngrirë ndihmat dhe kontaktet mbeten të kufizuara, kryesisht për çështje humanitare dhe sigurie. Perëndimi kritikon ashpër ndalimin e arsimit për vajzat dhe përfshirjen e figurave të sanksionuara në qeveri./REL

Valë sulmesh me dronë dhe raketa goditën Kievin, në atë që konsiderohet si sulmi ajror më i madh që nga fillimi i luftës së Rusisë në Ukrainë, duke lënë të plagosur 23 persona dhe duke shkaktuar dëme në disa rajone të kryeqytetit.

Forcat ajrore të Ukrainës thanë se Rusia lëshoi gjithsej 550 dronë dhe raketa në të gjithë territorin e Ukrainës gjatë natës. Shumica ishin dronë të tipit Shahed, ndërsa në sulm u përdorën edhe 11 raketa.

Gazetarët e Associated Press në Kiev dëgjuan gjatë gjithë natës zhurmën e pandërprerë të dronëve mbi qytet, shpërthime të fuqishme dhe të shtëna të dendura armësh ndërsa forcat ukrainase përpiqeshin të zmbrapsnin sulmin ajror.

Kievi ishte objektivi kryesor i sulmit. Sipas kryetarit të bashkisë Vitali Klitschko, të paktën 23 persona janë plagosur, ndërsa 14 prej tyre janë shtruar në spital.

Mbrojtja ajrore e Ukrainës rrëzoi 270 objektiva, përfshirë dy raketa lundruese. Ndërkohë, 208 objektiva të tjerë u zhdukën nga radarët dhe dyshohet se janë penguar përmes ndërhyrjeve elektronike.

Rusia goditi me sukses tetë lokacione, duke përdorur nëntë raketa dhe 63 dronë. Mbeturina nga dronët e rrëzuar ranë në të paktën 33 lokacione në qytet.

Sulmi ndodhi vetëm disa orë pasi presidenti amerikan Donald Trump zhvilloi një bisedë telefonike me presidentin rus Vladimir Putin dhe dha komentet e para publike për vendimin e administratës së tij për të pezulluar disa dërgesa armësh për Ukrainën.

Ky vendim përfshin municione si raketat Patriot, raketat ajër-ajër AIM-7 Sparrow dhe raketat më të shkurtra Stinger, të cilat janë të domosdoshme për të ndaluar raketat dhe dronët që vijnë nga Rusia, si dhe për të rrëzuar avionët rusë.

Kanë kaluar më pak se shtatë ditë nga sulmi ajror më i madh i mëparshëm i Rusisë gjatë luftës. Forcat ajrore të Ukrainës kishin raportuar se Rusia kishte lëshuar 537 dronë, mjete mashtruese dhe 60 raketa në atë sulm.

Shërbimet emergjente raportuan dëme në të paktën pesë nga dhjetë distriktet e kryeqytetit./REL

Presidenti i SHBA-së, Donald Trump, ka shprehur pakënaqësi për situatën aktuale në Ukrainë pas një bisede telefonike me homologun e tij rus, Vladimir Putin.

Gjatë një konferencë për mediat në Bazën e Përbashkët Andrews pranë Uashingtonit, Trump tha se biseda e zhvilluar me Putin nuk kishte sjellë asnjë përparim në zgjidhjen e konfliktit ukrainas.

“Ne folëm për shumë çështje, përfshirë Iranin dhe luftën në Ukrainë. Nuk jam i kënaqur me atë situatë. Nuk bëra asnjë përparim,” tha Trump, duke theksuar se ende nuk ishte arritur ndonjë zgjidhje për këtë krizë të vazhdueshme.

Ndihmësi i Kremlinit, Yury Ushakov, gjithashtu konfirmoi bisedën telefonike midis dy udhëheqësve, duke e cilësuar si një diskutim që zgjati pothuajse një orë. Ushakov njoftoi se gjatë bisedës, Putin dhe Trump diskutuan një gamë të gjerë temash, përfshirë situatën në Ukrainë dhe në Lindjen e Mesme.

Përveç kësaj, një temë e veçantë që ka ngritur interes ishte mundësia e shkëmbimit të filmave që promovojnë vlerat tradicionale të përbashkëta midis Rusisë dhe administratës amerikane. Ky propozim sugjeron një mundësi për të thelluar bashkëpunimin ndërmjet dy shteteve, ndonëse çështja kryesore mbetet konflikti në Ukrainë, që vazhdon të shqetësojë të dy udhëheqësit.